خەڵکی هەولێر بە سەبرن ئەمما کە دەستیان دایە هەر شتێک مەردانە دەیکەن

دیارە لێرەدا مەبەستم نیە جیاکاری نێوان شارەکانی کوردستان بکەم و، هەموو کەسێک شایەتی ئەوەم بۆ دەدەن کە لەم بوارەدا بەهیچ شێوەیەک نە موزایەدە و نەش سازشم  کردووە و مامەڵەم لەگەڵ سەرجەم شارەکاندا بە عەقڵ و بیرو روانینی کوردستانیانە بووە . بەڵام تایبەتمەندیەکانی سەرجەم شارەکانم لەبەرچاو بووە و سیفەتە جوان و پیاوانە و مەردانەکانی هەر شارێکم بەرێزەوە باس کردووە، وەک چۆن سلێمانیم بە شاری هەڵمەت و قوربانی و رۆشنبیری و  دونیای پێشکەتنخوازی پێناسە کردووە و شانازیشیان پێوە دەکەم، هەروەها هەولێری دێرین و خاوەن شارستانیەت و  خەڵکی راستگۆ و پاک و  کورد پەرست و مەردانە جێگەی شانازی هەموومان بون . زۆر جار  لێرەو لەوێ ئەگەر باسی خەڵکی هەولێریان بە شێوەیەکی زۆر  راستگۆ تا رادەی ساویلکەیی باس کردبێت هەمیشە من پێم وابووە هێمنی و بە دیقەت و جوان رەفتار و بێ هەڵەشەیی پێویستی بە راستگۆیی و ئارامی و هێمنی دەوێت ئەوەش لە خەڵکی ئەم شارە دێرینەدا جێگیرە و لە ئەخلاقی ئەم خەڵکەدا دەوەشێتەوە .

لەم ماوەیە زۆر گفتوگۆ لەبارەی پێداویستیە تایبەتیەکانی خەڵک و هەڵوێستی لایەنەکان و شارەکان کرا و تەنانەت باس لە زیاتر پەیوەستبونی هەولێر بە بەرژەوەندخوازی حزبی وکەسیەوە کرا و بێ ئەوەی هەڵسەنگاندنێکی بابەتیانە لەسەر ئەم شارەو خەڵکە خۆشەویستەکەی بکرێت و بێ ئەوەی رەفتاری تاک لایەنی حزبێک کە بە ئاگر و ئاسن حوکم بکات وەک هۆکارێکی لە سەرخۆیی زیاتری هەولێریان لە دەربرینی هەڵوێست دەربخرێت . بەلام وەک لە بینین و روانگەی هەڵسەنگاندنی شەخسی خۆمەوە هەمیشە و ئێستاش بە تایبەتی رام وابووە کە دوا هەڵوێستی یەکلاکەروە و جوان و لە جێی خۆی هەمیشە لە پاش بیرکردنەوە و خوێندنەوەی سەرجەم لایەنەکانی هەر هەڵویستێک بە فاکتەری سەرەکی گەیشتن بەوئامانجەی ئەو هەڵوێستەی لە پیناودا دەربراوە لەقەڵەم دەدرێت . بۆیە بە کورتی و کوردیەکەی کە سیفەتی هەولێریانەشە، ئەگەر خەڵکی هەولێری دلێر سەبریان لەسەر زوڵم و زۆر لە پێناو بەرژەوەندیە گشتیەکە تائێستا گرتبێت بەڵام ئەم هێوری و هێمنی و زۆر دان بەخۆداگرتنە تا سەر نابێت و، لە دواجاردا بەرژەوەندی نێوخۆیی کوردستان خۆی فەرز دەکات و ، هەڵوێست و رەفتاری ئەوان رێچگەی یەکلاکەرەوەی بەدیهێنانی ئامانجەکانی خەڵک دەبێت و، ئەوەتا سەلماندیان کە ئەوان میلەتێکی ئازا و بوێر و بەسبرن و زۆر لایەنی کوردستانیانە لەبەر چاو دەگرن، بەڵام کە دەستیان دایە هەر کارێک و بۆ هەر ئامانجێک بە مەردانە دەیکەن تا دوا هەناسە لە پێناویدا قوربانی دەدەن .خەڵکی کوردستانیش هەمیشە چاوەرێی دەستی ئەوانن کە پرس گەلێک چارەسەر بکەن ، لەنێویشیاندا گەیاندنی کێشە و ئاریشە نێوخۆییەکانی کوردستان بە دۆخی چارەسەر . چاوەرێین .