ڕاپۆرتێکی باڵوێزخانەی ئەمریکا لە هەولێر، باس لە ڕوخانی کابینەکەی مەسرور دەکات


ڕاستیە گرنگەکان سەبارەت بە واقعی دۆزی کوردستان (1)

Wednesday, 03.11.2020, 23:23

1622 بینراوە


 بیری نیشتمانی كوردستانی (4 - 16) 

----------------------
لە مەودای ڕۆچونمان بە ناو واقعی کوردستاندا، ڕاستیە گرنگەکان کە پەیوەستن بە کێشەی کوردستانەوە بەدیار دەکەون. ئەم ڕاستییانە کۆڵەکە ستراتیجی سەرەکی پێکدەهێنن، کە بیری نەتەوەیی کوردستانی لەسەر بونیات نراوە. ئەو ڕاستیانە هەڵبژاردەکانی کوردستان دیاری دەکەن، كه ئامانجن بۆ چەسپاندنی ئازادی گەلی کوردستان و ڕزگارکردنی وڵاتەکەی. بیری نیشتمانی کوردستان دروشمى سەربەخۆیی کوردستان بەرزدەكاتەوە و ستراتیجێك دادەڕێژێت بۆ ئازادی و یەكپارچەیی کوردستان لەژێر ڕۆشنایی ئەم ڕاستیانەدا. پێویستە هەموو هاونیشتمانیەکی کوردستان ئەم ڕاستیە گرنگانە بزانێت و لە دەفتەری یادگاری ڕۆژانەیی خۆیدا بینوسێت بۆ ئەوەی بەبەردەوامی بیخوێنێتەوە و لەیادی بێت. هەروەها پێویستە سیاسیەکانی کوردستان ئەم راستیانە لەسەر تابلۆ بنوسن و لە ناو ئۆفیسەکانیاندا هەڵیواسن بۆ ئەوەی هەردەم لەبەر چاویان بێت تاکو لە ژێر ڕۆشنایی ئەم ڕاستیانەدا ستراتیجی دابڕێژن بۆ ئازادكردنى کوردستان و سەربەخۆیی و بە پشتبەستن پێیان، تاکتیك و هاوپەیمانێتیان دیاری بکەن و دۆست و دوژمنەکانی گەلی کوردستان دەستنیشان بکەن.

راستی یەکەم:

مەترسی هەرە مەزن کە ڕوبەڕوی گەلی کوردستان بۆتەوە لەوەدا خۆی دەبینێتەوە کە داگیرکەری کوردستان داگیرکەرێکی نیشتەجێیە، وەك دەبینرێت دەوڵەتە داگیرکارەکانی کوردستان بانگەوازی ئەوە دەکەن کە گەلی کوردستان بەشێکن لە "گەلی تورك" و "گەلی عێراق" و "گەلی سوریا" و "گەلی ئێران" وە کوردستانیش بەشێکی جیانەکراوەیە لە خاکی ئەم وڵاتە داگیرکەرانەی کوردستان. بە واتایەکی دیکە دەوڵەتە داگیرکەرەکان، کوردستان بە بەشێك لە موڵکی خۆیان دەزانن و بەمەش گەلی کورد لە خاوەندارێتی و ناسنامه دادەماڵن، و کورد وەك نەتەوە و کوردستانیش وەك وڵات، دەسڕنەوە و سەروەت و سامانەکەشی تاڵان دەکەن.
ئەم داگیرکەرە نیشتەجێیە مەترسیەکی ڕاستیە لەسەر سەربەخۆبوونی گەلی کورد، کە گەلێکی خاوەن شارستانی و کولتور و مێژووی دێرینی خۆییەتی. داگیرکەران بۆ ئەوەی داگیرکاری درێژە پێبدەن و بەردەوامبێ، کاردەکەن لەسەر نەهێشتنی بوونی گەلی کوردستان. ئەو دەوڵەتانە، کە داگیرکەرانی کوردستانن، هەردەم کاریان کردوە و بەبەردەوامیش کاردەکەن بۆ بەعەرەبکردن و بەتوركکردن و بەفارسکردنی کوردستان و گەلەکەی، هەروەك هەستاون بەدەرکردن و ڕاگواستنی زۆرەملێـی ملیۆنان کەس لە دەڤەرەكانی خۆیان لە کوردستان و جێگیرکردنیان لە ناوچە عەرەبی و تورکی و فارسیەکان لە هەریەك لە (عێراق و سوریا) و "تورکیا" و ئێراندا و جێگیرکردنی عەرەب و تورك و فارس لە شوێنیاندا و دەستبەسەراگرتنی سەروەت و سامانەکانیان. هەروەها بە هۆی پیادەکردنی سیاسەتی ڕەگەزپەرەستیانەی دەوڵەتانی داگیرکەر لە کوشتن و لەناوبردن و تۆقاندن و برسیکردن، دژی گەلی کورد، بەناچاری گەلی کورد بەبەردەوام زێدی خۆیی بەجێهێشتووە و ڕوی لە ناوچە تورکی و فارسی و عەرەبیەکان لە هەر چوار وڵاتی "تورکیا و ئێران و عێراق و سوریا" یاخود ڕوی لە وڵاتانی دیکەی جیهان کردوە، بەتایبەت دەوڵەتانی ڕۆژئاوا. هەروەها گۆڕینی ناوی هەزاران شەقام و جێگا و گوند و ناوچە و شار و شارۆچکەى لە لایەن داگیركەرانەوە بۆ سڕینەوەی بوونی کورد لە وڵاتەکەی خۆی و لەسەر زەمینی دێرینی خۆیدا. لە ئەنجامی ئەم سیاسەتە پاوانخوازی داگیرکاریە نیشتەجێیەدا، ملیۆنەها کورد کرانه بە عەرەب و بە فارس و بە تورك و ڕێژەی کورد کەمبووەتەوە و خاکی کوردستانیش کەمکرایەتەوە. هەروەها میللەتی کورد بێبەشکراوه لە خوێندن بە زمانی دایك و بە بەرنامە داگیركەران هەوڵدەدەن بۆ سڕینەوەی ناسنامە و كەسایەتیی و كولتور و مێژوو و کەلەپوری گەلی کورد.

راستی دووەم:

کوردستان وڵاتێکی داگیرکراوە لەلایەن چەندین دەوڵەتەوە، بۆیە دابەشکراوە و هەر بەشێکیش پەیڕەوی سیاسەت و كولتور و زمان و ئابوری و کۆمەڵایەتی دەوڵەتە داگیرکارەکە دەکات، و هەروەها دەوڵەتە داگیرکەرەکان سامانە سروشتیەكانى کوردستان دەدزن. لە ئەنجامی ئەو دابەشکردنەدا و پیلانى وڵاتانی داگیرکەری کوردستان و نەبوونی سەرکردایەتیەکی لێزان و سەردەمیانە، شۆڕشەکانی کورد دابەش و لاواز بووە و وایکردوە کە هەر پارچەیەك بە جیا بۆخۆی تێبکۆشێت بەدوور لە بەشەکانی دیکە، لەگەڵ ئەوەشدا دەسەڵاتەکانی هەرێمەکان و ناوچەکانی کوردستان لە کاتە جیاوازەکاندا شەڕی یەکترییان کردوە لە جیاتی یەکگرتن و شەڕکردن دژی وڵاتانی داگیرکەری کوردستان.
هەروەها هەر بەشێکی کوردستان هەستاوە بە دامەزراندنی چەندین ڕێکخراوی سياسى تایبەت بەخۆی لە بری دامەزراندنی ڕێکخراوی سیاسی یەکگرتوو کە هەر چوار پارچەکە لەخۆ بگرێت، کە بەمەش سەرکردەکانی کورد بە شێوەیەکی پراکتیك داندەنێن بە دابەشکردنى كوردستان و ئەو واقیعەی ئێستا هەیە وە بە سنوری دەوڵەتە داگیرکارەکانی کوردستان، کە کێشراوە لە لایەن دەوڵەتانی کۆلونیالیزمەوە. ئا بەم شێوەیە سەرکردەكانى كوردستان، لە ڕابوردوو هەڵساون و ئێستاکەش هەڵدەستن بە پەرتکردنی خەباتی کوردستان و پارچەپارچەکردن و لاوازکردنی گەلی کورد.

راستی سێیەم:

دەوڵەتانی داگیرکەری کوردستان هەستاوەن بە بڵاووکردنەوەی هزری نەتەوەیی شۆڤینی لوتبەرز لە ناو نەتەوەکانیاندا و بەگوێدا خوێندنی زانیاری درۆ و هەڵە لەسەر ڕەچەڵەك و مێژوو و شارستانی گەلی کورد، لە چوارچێوەی پلانێکی بەرنامەکراو بۆ دروستکردنی ڕق و دوژمنکاری لە نێوان گەلی کورد لەلایەك وە گەلانی تورك و فارس و عەرەب لە لاکەی دیکەدا، بۆ ڕاکێشانی گەلانی خۆیان بۆ لای خۆیان بۆ سەرخستنی پرۆژە ڕەگەستپەرستەکانیان بۆ سڕینەوەی گەلی کورد وەك گەل و بە بەعەرەبکردن و بەفارسکردن و بەتورككردنى گەلی كوردستان و نیشتمانەكەی، و تاڵانکردن و دزینی سامانەکەی.
ئەم پلانە ڕەگەزپەرستیە کە پەیڕەو دەکرێت و لە ڕابوردوشدا پەیڕەو کراوە، بۆ شۆردنی مێشکی گەلانی تورك و فارس و عەرەب، ئەویش لە ڕێگای میدیا و ڕێبازى خوێندكاریی و تێوەگلاندنی ئەم گەلانە بە شەڕی ماڵوێرانکەرەوە و برسیکردن و نەخوێندەوارکردنیان بۆ ئاسانکردنی شۆردنەوەی مێشکیان وە ڕاهێنانی مێشکیان بۆ وەرگرتنی بیروباوەڕی ڕەگەستپەرستیانە و دروستکردنی دوژمنکاری و ڕەگەستپەرستی دژی مافەکانی گەلی کوردستان کە ئازادی و سەربەخۆبوونە، وەك هەر گەلێکی دیکەی ئازاد له جیهاندا.
حکومەتەکانی دەوڵەتانی داگیرکەری کوردستان، تا ڕادەیەکی باش سەرکەوتوبوون لە قایلکردنی گەلەکانیان کە کوردستان خاکی تورکیایە (ئەو بەشەی کە لەلایەن "تورکیا"وە داگیرکراوە) و عەرەبیە (ئەو بەشەی کە لەلایەن "عێراق و سوریا"وە داگیرکراوە) و ئێرانیە (ئەو بەشەی کە لەلایەن "ئێران"وە داگیرکراوە). ئەم سەرکەوتنەی حکومەتە داگیرکەرەکانی کوردستان لە قایلکردنی گەلەکانیاندا، کەلێنێکی گەورەی دروستکرد لە پەیوەندیەکانی گەلی کوردستان لەلایەك و گەلانی تورك و فارس و عەرەب لەلاکەی دیکەوە، و ئەمەش سەربەخۆیی کوردستانی لە ڕێگای دانوستان و لێکتێگەیشتن و گفتوگۆوە، زیاتر سەخترکرد، و لە هەمان کاتدا خەباتی گەلی کودستانی دژوارتر کرد.
ئەگەر دەرفەتێكی باش بدرایە بە گەلانی تورك و فارس و عەرەب بۆ ئەوەی هۆشیار و ئاگاداری بەرژەوەندیەکانیان بن، ئەم گەلانە دەبوونه هاوپەیمانی گەلی کورد بۆ ئازادكردنى و لە هەمان کات ئەم گەلانە خۆشیان ڕزگاریان دەبوو لە حکومەتە دکتاتۆر و ڕەگەستپەرستە خۆسەپێنەکانیان، بۆ دابينكردنى ژیانێکی پڕ سەروەری بۆ خۆیان و گەلی کوردستانیش، و هەڵدەستان بە دامەزراندنی سیستەمی دیموکراسی لە وڵاتەکانیاندا، کە پڕ بێت لە ئاشتەوایی و ئاسایش و پێشکەوتن.
بەرژەوەندی گەلی کوردستان یەکدەگرێتەوە لەگەڵ بەرژەوەندیەکانی گەلانی ئەو دەوڵەتانەی کە کوردستانیان داگیرکردوە بۆ لەناوبردنی هزری ڕەگەسپەرستیانەى دواکەوتوو و بونیاتنانی دەوڵەتی دیموکراتی، کە هەوڵبدات بۆ گەیشتن بە دەوڵەتانی پێشکەوتوو شارستانیيەكان و بەشداریکردن لە خزمەتکردنی مرۆڤایەتیدا و پەرەپێدان و پێشخستنی هەسارەی زەوی، بەڵام دواکەوتووی گەلانی وڵاتانی داگیرکەری کوردستان ڕێگرێکە لە بەردەم یەکدەنگییاندا لەگەڵ گەلی کوردستاندا بۆ ڕزگاربوونیان لە ژێر چنگی دیکتاتۆری و ڕەگەستپەرستی لەلایەك و سەربەخۆیی کوردستان لەلایەکی دیکەوە.

راستی چوارەم:

دەوڵەتانی داگیرکەری کوردستان بەڕێوەدەبرێن لەلایەن دەسەڵاتى ڕەگەسپەرست و دواکەوتووەوە، کە هەوڵیان داوە و هەوڵ دەدەن بۆ ئەوە گەلی کورد بسڕنەوە لەڕێی سڕینەوەی شوناس و زمان و مێژوو و كولتور و کەلەپورەکەیەوە. ئەم دەسەڵاتە ڕەگەستپەرستیانە هەموو جۆرێك لە توندوتیژی بەکارهێناوە بۆ لەناوبردنی گەلی کوردستان و بەرگرتن لە خەباتی سەربەخۆبوونی وڵاتەکەیدا، و هەستان بە ئەجامدانی لەناوبردنی بەکۆمەڵ بە بەکارهێنانی چەکی کیمیاوی دژیان و دانانی گەمارۆی ئابووری دژیان و پەیڕەوکردنی سیاسەتی سوتماكکردنی زەوی و کاولکردنی دەیان هەزار گوند و شارەکانی کوردستان و دەرکردنی خەڵکەکەی و سوتاندنی دارستانەکانی کوردستان و کاولکردنی ژینگەکەی و کارکردن بۆ سڕینەوەی ناسنامه و زمان و مێژووی دێرینی کورد.

لە زنجیرەی داهاتوودا بەردەوام دەبین لە باسکردنی ئەو ڕاستیانەی کە ماون سەبارەت بە واقعیی کوردستان.




(دەنگدراوە: 7 . زۆرباشە: 5/5)