نوکتەی پەندوەرگرتن

لە ئاواییەک دزێک پەیدا دەبێت، هەر شەوەی ماڵی کەسێک دەبڕی و تاڵانی دەکات، خەڵکی زۆر هەوڵ دەدەن، کە دزەکە بدۆزنەوە، بەڵام نەیاندەتوانی.. تا رۆژێک باران باری، خەڵکی شوێن پێی دزەکە هەڵدەگرن و دەدۆزنەوە، تا دەگەنە بەردەم ماڵی کوێخا.. سەیر دەکەن ڕێک شوێن پێی کوێخای ئاواییە، خەڵکەکە لە بری ئەوەی بڵێن خۆ ئەوە کوێخایە دزییەکە دەکات، بۆیە دەبێتە مشتومڕیان ، یەکێک دەڵێت:

ـ دیارە دزەکە جووتێک پێڵاوی هەیە لەپێڵاوی کوێخا دەچێت.

یەکێکی تر دەڵێت:

ـ لەوانەیە دزەکە پێڵاوەکانی کوێخای دزیبێ..

یەکێ تریشیان دەڵێت:

لەوانەیە دزەکە پێڵاوی کوێخای دزیبێت وا بەکاری هێنابێت...

لە ناو ئاوایی تەنیا شێتێک، دەنگی بەرز دەبێتەوە و پێیان پێدەکەنێت و دەڵێت:

ـ بێ عەقڵینە لەم ئاواییە جگە لەکوێخا کەس دز نییە، دزەکە تەنیا کوێخاخۆیەتی.

ئیتر خەڵکەکە لێیان دەبێت بە مقۆ مقۆ و دەڵێن:

ـ لێی مەگرن، ئەم کابرایە شێت و نەزانە و حیساب لەسەر قسەی شێت ناکرێ..

دوای ئەو ڕۆژە شێتەکە دیار نەمێنێت، خەڵکی ئاوایی هەرچەندە بە دوایدا دەگەڕێن نایدۆزنەوە.. تا کوێخا هەلدەداتێ و دەڵێت: 

بەدوایدا مەگەڕێن، بەخوا وادیارە دزەکە کوشتویەتی!