كەناڵی كوردسات یان كەناڵی پرۆژەكان

Friday, 15/05/2009, 12:00

1658 بینراوە

هەر كە دەنگۆی هەڵبژاردن هاتە گۆڕێ ئیدی كەناڵە بەشان و باڵ هەڵدەرەكەى تاڵەبانی و بنەماڵەو بەرپرسەكانیان، بەدەر لەوەى لەماوەى چەند ساڵی رابووردوودا لاسای تەلەفژیۆنی (كەركوكی) جاران و (الشباب)ی كاكە سەدام كە هەر لەگەڵ دەسپێكی هەواڵەكاندا جگە لەپیشاندانی كاكی سەرۆك هیچ شتێكی تر بڤە بوو، كوردساتە حەیاتەكەش بەهەمان وێنەى ئەو دوو كەناڵەی بەعس چەندین ساڵە رۆژێك لەرۆژان نەمانبینی لەدەسپێكی هەواڵەكاندا كێشەیەكی هاوڵاتیان و خەمێكی دایكی شەهیدان یان گەنجێك یان سوتاندن و كوشتنی ژنێك پیشان بدات، جگە لەدەرخستن و بەشان و باڵ هەڵدانی مامەگیاندا هیچێكی تر بڤە بوو.
ئەوەتا ئەمرۆش لەترسی كورسییەكانیان كە لەژێرەوە بۆگەنی كردووە لەدۆلارو مەسروفاتی منداڵ و نەوەكانیان و وەسڵی بانزینی ئۆتۆمبیل و نان خواردنەكانیان كە هێندەى موچەى گشت فەرمانبەرانی كوردستان زیاترە، ئەو كەناڵەیان خستووەتە خزمەتى خۆیان و پیشاندانی پرۆژەو چی و چی... بەڕاستی شەرم و عەیبەیە چیتر ئەو كەناڵە بەخۆی بڵی (پڕڕڕڕڕۆفیشناڵ!) و تەسمیەى خۆی بكات بە گەناڵی گەیاندنی زانیارییەكان.
نازانم دەتوانن بە چی كردەوەو كارێكتان بڵێن پرۆفیشناڵ لەكاتێكدا كەناڵی راگەیاندن كارى گەیاندن و پەیوەندى (كۆمنیوكەیشن)ی نێوان خەڵك و دەسەڵاتەو دەسەڵاتیش هەر كارو پرۆژەیەك ئەنجامبدات ئەركی سەرشانێتی نەك وەسف بكرێت و بدرێت بەناوچاوو رووی خەڵكیدا، ئەوەی حكومەت دەیكات و ئێوەش ماكیاژی دەكەن و پیشانی خەڵكی دەدەن، وەك ئەوە وایە باوكێك منداڵەكانی خۆی بەخێو بكات و بێت لەناو خەڵكیدا بڵێت ئەوە نییە منداڵەكانم بەخێو دەكەم و جلیان بۆ دەكڕم و گەورەیان دەكەم.
هاوكێشەى حكومەت و خەڵك، وەك باوك و منداڵەكانى وایە، چۆن دەبێت حكومەت و باوكەكە منەت بەسەر خەڵك و نەوەكانیانەوە بكەن؟، بەڕاستی سەرمان سپی بوو ئەوەى لەئێوە دیمان لەهیچ مەملەكەت و وڵاتێكدا نەماندى.
نازانم كەی شەرم و حەیا دەتانگرێ واز لەو كارە نەنگییانە بهێنن؟؟؟، بڕوا بكەن ئەم جۆرە نوسینانە دەچێتە گیرفانی مێژووەو دەبێتە خاڵی رەش بەنێو چاوانتانەوە.