مامۆستا (شێركۆ بێكەس)... ئاخر واپینەناكرێت!

Monday, 05/07/2010, 12:00

3517 بینراوە


(وەڵامێك بۆ سەرۆك و ئەندامانى ئەنجومەنى سەردەم)
(وابڕیاربوو ئەم نووسینەم لە هەفتەنامەى ئاوێنەدا دابەزێت، بەڵام رێبین هەردى و برادەرەكانى لەڕێى چاوسووركردنەوەوە لەسەرنووسەرى ئاوێنە رێگەى بڵاوكردنەوەیان نەدا، بۆیە بەچاكمان زانى لەڕێى كوردستانپۆستەوە حەقیقەتەكانى ناو ئەم نووسینە بگەیەنینە هەموو لایەك).

لەژمارەى رابردووى هەفتەنامەى (ئاوێنە)دا، سەرۆك و ئەندامانى ئەنجومەنەكەى سەردەم، وەڵامى نووسینەكەى منیان داوەتەوەو ئەوەشى وەڵامیان داوەتەوە و دابەزیووە، بەشى یەكەمیەتى. من لێرەدا بەكورتى و پوختى، وەڵامى ئەم بەشە دەدەمەوە و چاوەڕێى بەشەكانى دیكەش دەكەم.
سەرەتا دەمەوێت ئەوەبڵێم كە من تابڵاوبوونەوەى ئەم وەڵامدانەوەیە، رقم لەسەرۆك ئەندامانى ئەنجومەنەكەى سەردەم دەبووەوە، بەڵام لەدواى بینینى ئەو وەڵامە، دڵم پێیان دەسوتێ و بەزەیم پێیاندا دێتەوە، چونكە حەیفە شەش شاعیرو لێكۆڵیارو وەرگێڕو چیرۆكنووس و نۆڤلێت نووسى كورد، ئەمە تواناى نوسین و وزەى وەڵامدانەوەیان بێت.
شتێكى سەیرو عەنتیكەى ئەم نووسینەى شێركۆ و ئەنجومەنەكەى، ئەوەیە كە بەناوى زمانزبرى و تۆمەت تاشین و ناوبانگ زڕاندنەوە سەركۆنەى نووسینەكەى من دەكەن، كەچى وەڵامدانەوەكەى خۆیان لیپاولیپە لەوشتانە. بەهەرحاڵ من دەزانم ئەوان لە چ دۆخێكى سایكۆلۆژى دژوارو ناخۆشدانو ئاگادارم كە نووسینەكەم چۆن شپرزەى كردون و بڕستى لێ بڕیوون، لەبەر ئەوە مرۆڤ لەودۆخە ناهەموارەدا هەر بەو جۆرە دەستى قەڵەم دەگرێتو دێتەگۆ.
وەڵامدانەوەكەى (شێركۆ) و ئەنجومەنەكەى وەك روونكردنەوەكەى (ئاراس و بەختیار و رێبین)، هەوڵێكە بۆ دووركەوتنەوە لە كێشە سەرەكییەكە، بۆ بازدان بەسەر مەسەلە جەوهەریەكەدا كە گەندەڵى و مەحسوبیەت و پارەخواردنە.. من دەڵێم دوو كێشەتان لە دادگایە و دیوانى چاودێرى دارایى چل دانە لاپەڕەى لەسەر رەشكردونەتەوە، ئەوەش سى و هەشت بەڵگەنامە و فاكس و نامەى دەست و خەتى خۆتان، ئەوان دەنووسن (شوان ئەحمەد) نمونەى چ كارمەندێكە و بۆ وایكرد و چۆن دەوام دەكات و فەرهەنگى جنێوو ناتۆرەكانى بەچ شێوەیەكە.. من دەمویست لەم نووسینەتاندا لەبرى ئەو هەموو درێژدادڕیی و سەفسەتەبازیە، بە بەڵگەوە بەرگریتان لەو شتانە بكردایە كە باسم كردوون و بهاتنایه‌ بەڵگەى سەنتێك یان دینارێك یان دۆلارێكتان لەسەر من نیشان بدایە. خۆ وەسڵ و بەڵگەنامە و عەریزە و دیكۆمێنتى ئەم یانزە ساڵەى دەزگا لەبەر دەستى خۆتاندایە. ئێوە كە ئەوە ناكەن، دەبێت بكەونە تۆمەت داتاشین و قسە هەڵبەستن كە سەرتاپاى نووسینەكەتان ئەو شتانەیە. وا من لێرەدا وەڵامى یەك بەیەكى ئەو ناهەقى و تۆمەتانە دەدەمەوە:
یەكەم) شێركۆ و ئەنجومەنەكەى دەڵێن: (ئەم كابرایە لە زانیارى و داتاكانیدا پشتى بەڕاپۆرتێك بەستووە كە هى ساڵى 2006). باشە عەیب لە چیدایە؟ گرنگ ئەو زانیاریانەیە، كە لە راپۆرتەكەدایە، ئیتر هى ساڵى 2002 یان 2005 یان 2007 یان 2009 چى لەمەسەلەكە دەگۆڕێت؟
دووەم) شێركۆ و ئەنجومەنەكەى لە بڕگەیەكى دیكەى وەڵامەكەیاندا دەنووسن: (وا ئێمە لێرەشدا رایدەگەیەنین كە لە برى دەعوایەك، چەند دەعوایەكیش لەسەر نووسەرى ئەو بابەتە بۆ دادگا بەرزدەكەینەوە). من بۆ خۆم چاوەڕێى هەمووشتێ لە ئێوە دەكەم، هەر لە ناوزڕاندنەوە بۆ دادگا، بۆ پەنابردن بۆ حزب و حكومەت و سكرتاریەتى (تاڵەبانى) و سەرۆكایەتى كۆمار لە بەغدا. هانابردن بۆ گروپى رەهەند، كۆبوونەوەكردن لەگەڵ نووسەران و كارمەندانى دەزگاى سەردەم، تا لە سەرم بنووسن و ئیمزام لەسەر كۆبكەنەوە و دەعواى یاسایم لەسەر تۆمار بكەن. تا دەگاتە ئازاردانى جەستەیى و تۆقاندنیش، بەڵام هیچ یەك لەمانە ساردم ناكاتەوە و لە نرخ و بەهاى كێشەكە كەم ناكات.
كۆمپانیا (نالیا) لەماوەى كەمتر لە مانگێكدا، پێنچ دەعواى لەسەر رۆژنامەى (ئاوێنە) تۆمار كردووە، ئێوەش لە برى پێنچ پەنجا بۆ دادگا بەرزبكەنەوە. ئەگەر یاسا سەروەربێت و عەدالەت بەرقەراربێت، دەردەكەوێت كێ گەندەڵ و تاوانبارو ناهەقە و كێش پەرێزى پاكە و بێگوناحه‌. پەنابردنەبەر دادگا جاڕدانى بۆچیە و كەى باسكردنى دەوێت. شتێكى ئاساییە و ئاسایش وەریدەگرم.
سێیەم) لەبڕگەیەكى تردا داهاتووە كە: (سەرنووسەرى ئاوێنە بێ ئەوەى ئێمە ئاگادار بكاتەوە، بابەتەكەى دابەزاند). سەیرى ئەم قسە نامەنتیقییەى شێركۆ و ئەنجومەنەكەى بكەن. ئەمە دەریدەخات ئەوانە لەچ دۆخێكى شپرزەیی و ئاڵۆزدا دەژین. باشە چۆن دەبێت سەرنووسەرى رۆژنامەیەك (رۆژنامەیەكى سەربەخۆ)، وەك مەرجەع سەیرى ئێوە بكات و لە بڵاوكردنەوەى هەرشتێك ئێوە ئاگاداربكاتەوە؟ ئێوە تەنها بۆتان هەیە بەرامبەر بەوشتانەى لەسەرتان دەنوسرێت، وەڵام بدەنەوە یان شكات بكەن، غەیرى ئەمە رێگاى سێیەم نییە. رۆشنبیرانى كورد، خۆ (ئاوێنە) دەزگاى چاپ و پەخشى سەردەم دەریناكات، تا شوان محەمەد ئاگادارتان بكاتەوە، چى بڵاودەكاتەوە و چى بڵاوناكاتەوە؟!
چوارەم) لەبڕگەیەكى دیكەى نووسینەكەى شێركۆ و ئەندامانى ئەنجومەنەكەیدا هاتووە: (شوان ئەحمەد نموونەى چ كارمەندێكە؟). جارێ من نووسەرى ئەو دەزگایە بووم، نەك كارمەند. ئەمە تەعنێكە و (ئازاد بەرزنجى) وەك تەشهیر و گاڵتە پێكردن نووسیویەتى. پاشان دەنوسن (بۆ دواى یانزە ساڵ كاركردن، ئێستا باسى گەندەڵى سەردەم دەكات؟). وەڵامى من ئەمەیە: (راستیەكەى من لەسەرەتاوە ئاگادارى وەزعى دەزگا بووم و دەمزانى و ناڕازیش بووم، بۆ سەلماندنى راستى ئەو قسانەش، ئەمە پێنجەمین جارمە دەست لەكار دەكێشمەوە). كە قسەشم نەكردووە، لەبەر دوو هۆ بووە:
1- هەمووجارێك (رێبین هەردى) و (د.شاهۆ سەعید) پێیان دەوتم: (ئێمە برادەرین و دەكرێت بەدانیشتنى دۆستانە ئەو گلەییانە بكەین)، یان دەیانوت: (ئێمە شەڕى گەورەترمان لەبەرەو دەبێت بەگژ سستمەكەدابچینەوە، نەك دەزگایەكى بچوكى وەك سەردەم بكەین بەئامانج. ئەمە شەڕێكى بچوكە و وازى لێ بێنە).
2- راستییەكەى تا ساڵ و نیوێك لەمەوبەر هیچ بەڵگەیەكم لەبەردەستدا نەبوو، من لە بەهارى پارساڵەوە لەڕێى خۆشكردنى پەیوەندیم لەگەڵ یەك بەیەكى كارمەندانى سەردەمدا بە ژن و پیاوەوە، كەوتمە سۆراخكردن و كۆكردنەوەى زانیارى و پەیداكردنى دیكۆمێنت و نامە و بەڵگە و فاكس و زۆر زانیاریى زارەكى تر.
من ساڵێك بەرلە ئێستا هەموو ئەم قسانەم بكردایە، نرخى فلسێكى قەڵبیان نەدەبوو، چونكە دەیانوت هەر قسەیە و بێ بەڵگەیە. دەست بەجێ (شێركۆ) و ئەنجومەنەكەى یەخەیان دەگرتم و دەیانوت هەموو قسەكانتمان قبوڵە، بەڵام تەنها بەڵگەیەكمان نیشان بدە. من قەناعەتم بەوەیە، كە ئازایەتى هەر ئەوە نییە مرۆڤ شەڕى گەندەڵى بكات، بەڵكو دەبێت بزانێت كەى و چۆن و بەچ شێوازێك دەیكات. هەنووكە حاڵى بوون، که‌ بۆچی ئێستا هاتمە دەنگ و پەردەم لەسەر هەمووشتێك لادا؟!
لەبڕگەیەكى تردا دەنووسن: (بۆچى قبوڵى كردووە تا دوومانگ لەمەوبەر كاربكات و بەهەموو شێوەیەك سوودمەندبێت؟). من جارێكى تر بە تەحەداوە دەڵێم جگە لە موچەى مانگانەكەم، ئەگەر یەك شتى دیكەم لە دەزگاكەى ئێوە وەرگرتبێت و لێى سوودمەندبووبم، فه‌رموو باسى بكەن و ئاشكراى بكەن. تكایە هەرهیچ نەبێت بەڵگەنامەیەك، دیكۆمێنتێك بۆ قورسایى بەخشین بە وەڵامدانەوەكەتان دابەزێنن، تا بە خەڵكى بڵێن بەمجۆرە (شوان ئەحمەد) لە دەزگاى سەردەم سوودمەندبووە.
پێنجەم) لەبەشێكى ترى ئەو وەڵامدانەوەیەدا، بەوپەڕى ناهەقى و تۆمەت داتاشینەوە (ئازاد بەرزنجى) و (شێرزاد حەسەن) دەنووسن: (شوان ئەحمەد كە لافى ئەوە لێدەدات باسى گەندەڵیى دەكات و هەندێ لە نووسەرانى سەردەم بەوە تاوانبار دەكات موچەى بەلاش وەردەگرن، خۆى كارمەندى بەڕێوەبەرایەتى راگەیاندنى سەر بەوەزارەتى رۆشنبیریى بووە لە سلێمانى و بەدرێژایى پێنج ساڵى رابردوو، بەبێ ئەوەى پێنج دەقیقە دەوام بكات موچەى مفت و بەلاشى وەرگرتووە. ببورن، خۆشى وەرى نەگرتووە، بەڵكو هەموو جارێك لەلایەن هاورێكانییەوە بۆى وەرگیراوە).
لە وەڵامى ئەم ڕقە زۆرو كوێرانەیەى (شێرزاد) و (ئازاد)دا دەڵێم: (ئەمە راستى مەسەلەكەیە: ئێمە زیاد لە سیانزە نووسەروكارمەندى دەزگاى سەردەم بووین، كە تەعینى حكومیمان لە بەڕێوەبەرایەتى راگەیاندنى سلێمانى بوو، دەبوو هەفتەى سێ تاچوار رۆژ لەو بەڕێوەبەرایەتییە دەوام بكەین، ئەمەش سستمى دەوامكردنى لەناو سەردەمدا تێك دەدا. چەند ئەندامێكى ئەنجومەن بۆ چارەسەركردنى كێشەكە سەردانى عومەرفەتاحیان كرد وەك جێگرى سەرۆكى حكومەت، نووسینگەكەى ئەویش بە زارەكى ئاگادارى كاك سەڵاحە رەشى بەڕێوەبەرى بەڕێوەبەرایەتى راگەیاندیان كردبوو، كە ئەو سیانزە كەسە وەك تەنسیب موچەیان لاى ئێوە دەبێت و دەوامیان لەسەردەم. ئەم مەسەلەیە هەم ئەندامانى ئەنجومەن و نووسەران و كارمەندانى سەردەم و نووسینگەى جێگرى سەرۆكى حكومەت و كاك سەڵاحە رەشى بەڕەێوەبەرى ئەو بەڕێوەبەرایەتییە لێی ئاگادارن.. ئەنجومەنى سەردەم وەك دژایەتیكردنێكى من، ئەوكات كە ناوەكانیان ناردبوو، ناوى دوانزە كەسیان نووسى بوو، تەنها ناوى من نەبێت. كاك سەڵاح ناردى بەشوێنمداو وتى: ئیتر لێرە بەدواوە ئێوە بەپێى ئەو بڕیارە دەوامتان لەسەردەم دەبێت موچەتان لێرە، بەڵام سەیرە ناوى تۆیان نەنووسیبوو، من خۆم ناوى تۆم بۆ زیادكرد، ئەمە قسەى كاك سەڵاح بوو. ئەم حاڵەتە تا كاتى لاچونى عومەر فەتاح و هاتنى عیماد ئەحمەد وەك جێگرى سەرۆكى حكومەت بەردەوامبوو، نەك تەنها بۆ من بۆ هەر سیانزە كەسەكەى سەردەم. دواتر كە عیماد ئەحمەد هات، ئەو بڕیارە هەڵوەشایەوە و لە بەڕێوەبەرێتى راگەیاندنیش كاك سەڵاح لادرا و خاتوو پەروا عەلى جێگەى گرتەوە. لە دواى ئەویش كاك ئەحمەد رەزا بوو بە بەڕێوەبەر. من لەسەروەختى ئەو دوو هاوڕێیەدا، بە بەڵگەوە، خۆشیان شایەتن، یان مۆڵەتى بەموچە بووم، یان مۆڵەتى بێ موچە بووم. واتە بەدرێژایى ئەم پێنج ساڵە، كە دەوامم نەكردووە، نەبێ قانونیم كردووە، نە گەندەڵى. ئەوەشى كە دەڵێن موچەیان بۆ وەرگرتووە، بەدرێژایى ئەم پێنج ساڵە جگە لە دووجار راست نییە، چونكە ژمێریارى بەڕێوەبەرایەتیەكەى موچەى كەس بەكەس نادات و هاوكات ماڵى ئێمە و بیناى بەڕێوەبەرایەتى راگەیاندن، لەیەك كۆڵانداین، تەنها دوو خانوو نێوانمانە. بەدرێژایى ئەو پێنج ساڵە تەنها دووجار ساكار رەووف بێگەرد، لەبەر سەرقاڵى موچەى بۆ وەرگرتووم و ئەم زانیارییە بەنرخە ئەو داویەتى بەكاكى و بە ئازاد و شێرزاد. ساكار رەئووف وەك كاندیداى لیستى گۆڕان بۆ هەڵبژاردنە پەرلەمانیەكەى عیراق، ئەوە دەبەستێتە پریاسكەیەك و بۆ باوكى و برادەرەكانى باس دەكات، بەڵام باسى ئەوە ناكات كە بەدرێژایى ماوەى هەڵمەتى هەڵبژاردنەكانى پەرلەمانى عیراق، حەرف بەحەرفى موقابەلە رۆژنامەوانییەكانى دەنارد بۆ من بۆى جواب بدەمەوە، لە رووداو رۆژنامە و سایت و گۆڤارو بڵاوكردنەوەكانى تردا، تا ئێستاش تەواویى ئەو شتانەم لایە كە بەئیمەیل بۆى رەوانەكردم و دەپاڕێتەوە كە فریاى كەوم و وەڵامى چاوپێكەوتنە رۆژنامەوانییەكانى بۆ بدەمەوە). ئەمەش راستى ئەو مەسەلەیەیە كە (ئازاد) و (شێرزاد) باسى دەكەن.
شەشەم) لەبڕگەیەكى تردا (ئازاد) و (شێرزاد) لەبرى سەرۆك و ئەندامانى ئەنجومەنى سەردەم دەنووسن: (هەركەسێك بابەتەكەى شوان ئەحمەد بخوێنێتەوە یەكسەر دەزانێت كە شیوەنى ئەو شیوەنە بۆ ئیمتیازات، ئەگەرچى ئەو وەكو هەموو ئەوانیتر سودمەندبووە لەو یارمەتیەى بەڕێز مام جەلال و بەدرێژایى شەش ساڵ مانگانە سەدو پەنجا دۆلار لەو یارمەتییەى وەرگرتووە، كەچى دەڵێت: لیستى پاداشت و پارە لە كولەكەى تەڕایشدا ناوى ئێمەى تیا نییە. ئەمە خۆى لەخۆیدا كڕوزانەوەیەكە بۆ پاداشتو پارە). ئەمە ئەوپەڕى درۆ و بێرێزییە (شێرزاد) و (ئازاد) دەیكەن. من ئەگەر شیوەنم بۆ ئیمتیازات بكردایە وەك (ئازاد) دەچووم لە ئیدارەى گشتى تاسەروەختى پرۆسەى ئازادیى عیراق، موچەى مانگانەیەكى بەلاشم وەردەگرت! وەك (شێرزاد حەسەن) یانزە ساڵ بەناوى خەبیریەوە موچەى مفت و بەلاشم دەخوارد. من شیوەنم بۆ ئیمتیازات بوایە، زۆر شوێنى تر هەبوو سەرى پێوەبنێم و وەك ئێوە خاوەنى تازەترین مۆدێلى ئۆتۆمۆبێل و شوقە و خانوى بەرز و گران و باخ و باخات بوومایە. شیوەنم بۆ ئیمتیازات بوایە، بەدرێژایى یانزە ساڵ داواى یانزە سەنتم لە (شێركۆ) دەكرد. بۆ ئیمتیازات بگەڕامایە، دوو سەفەرى بەیروت و بەرلینم رەتنەدەكردەوە، بەدۆلارى كاشى سەردەمەوە. من ئەگەر وەك ئێوە و (رێبین) و برادەرەكانى سوودمەندبوومایە، ئەبوو بۆ یەكجار لە چل دانە لاپەڕەى دوو راپۆرتى دیوانى چاودێرى دارایدا، بۆ خۆشى جارێك ناوم بهاتایە. من لێرەدا وەك تەحەدا دەیڵێمەوە، جگە لە موچەى مانگانەكەم، چیم لێوەرگرتوون بێمنەت بن بە دیكۆمێنت ئاشكراى بكەن.
حەوتەم) ئازاد بەرزنجى وەك باش كاتبى شێركۆ بێكەس، لە بڕگەیەكى تردا بەوپەڕى توانجەوە دەڵێت: (دیسانەوە شوان ئەحمەد دەكوڕزێتەوە بۆ پۆست و پلە وپایە، بەڵام ئەى ئەو سەرەتا ئەندامى دەستەى نووسەرانى گۆڤارى سەردەم نەبووە و پاشتریش نەبووە بەڕێوەبەرى نووسینى گۆڤارەكە). پیاوى باش لەم گەردوونە پان و بەرینەدا، تۆ بەڕێوەبەرى نووسینى گۆڤارى سەردەم بە پۆست و پلە وپایە دەزانیت. من تەنها حەوت ژمارە ئەو كارەم كرد، ئەویش لەسەر داواى زۆرو تەكلیفى (رێبین) و (شاهۆ) و (رەووف بێگەرد)، بەهەمان موچەى دەستەى نووسەرانى خۆمەوە. واتە ئەركێكى زیاترم خستە سەرشانى خۆم، بەڵام بەبێ ئەوەى یەك دینار لە موچەى مانگانەكەم سەركەوێت. من بەڕێوەبەرى نووسین بووم، بەڵام موچەى (رێبین هەردى) و (د.شاهۆ سەعید) كە دەستەى نووسینى گۆڤارەكە بوون، لە هى من زیاتر بوو. كاتێك سەرەتاى ئەم ساڵیش نەسریەى بەڕێوەبەرى نووسینى تێكڕاى گۆڤارەكانى سەردەم تەسدیق كرا، تەنها ناوى منى تێدا نەبوو، ئەڵبەت بەدەستى ئەنقەست و ئەوەشم فەرامۆشكرد.
هەشتەم) لە بڕگەیەكى ترى ئەو نوسینەدا هاتووە كە: (دووجار دەرفەتى سەفەر خراوەتە بەردەم شوان ئەحمەد، جارێكیان بۆ لوبنان بۆ دوو مانگ، جارێكى تریش بۆ ئەڵمانیا، بەڵام خۆى نەچووە، تەنانەت بۆ ئەمە كاك رێبین هەردى شایەتە). من تێنەگەیشتم ئەمە ستایشە یان لاقرتێیە.. من ناڵێم دۆخى سایكۆلۆژى ئێوە مەزبوت نییە.. من كە سەفەرى بەیروت و بەرلینم بە فڕۆكە و بەدینارو دۆلارى مفتى سەردەم رەتكردبێتەوە، ئەبێ چ عەیبەیەكى بۆ من تێدابێت؟ خەڵك هەیە بە پارەى بەلاش شەست رۆژ سەفەرى بەیروت و (شارع الحمرا) رەتكاتەوە؟ كەس هەیە حەزنەكات كۆڕنیشى بەیروت ببینێ؟ یان كۆرسێكى رۆژنامەوانى پڕۆفیشناڵى سەنتەرێكى موعتەبەرى وەك سەنتەرەكەى (د.فالح عەبدولجەبار) وەلا بنێت؟ ئەى كەس هەیە سەفەرى بیست ویەك رۆژەى شارێكى وەك بەرلین لەخۆى بكات؟ جا من كە بكڕوزێمەوە، بۆ ئەو فرسەتانە ناقۆزمەوە و خۆم خەنى ناكەم؟ بالێرەدا بەوردى باسى ئەوە بكەم، كە بۆچى من ئەو سەفەرانەم نەكرد: (پێشنیارى هەردوو سەفەرەكە رەحمەتى مامۆستا ئەكره‌م قەرەداغى بۆی كردم، بەنهێنى و دووبە دوو لە ژورەكەى خۆیدا. وەڵامى من ئەوەبوو، وتم مامۆستا لەبەر دووشت من قبوڵم نییە. یەكەم) بێ ئەدەبیە من باز بەسەر رێبین هەردى و شاهۆ سەعیددا بدەم و من بەرلەوان سەفەربكەم و لەوهەقە بەهرەمەندبم. دووەم) ئەوەى ئێوە دەیڵێن بێدەنگى لێبكەم و تا دێمەوە كەس نەزانێت، قابیلى قبوڵ نییە، چونكە دەبێتە مایەى عاجزبوونى هاوڕێكانم و پاشان من بۆ سەفەردەچم نەك خەباتى نهێنى بكەم. لەبەر ئەوە كەسێكى تر بنێرن و ماڵتان ئاوابێت). جا توخوا ئەمە جوامێریە بۆ من یان نەنگى و شورەیى؟!
نۆیەم) لەبڕگەیەكى تردا (ئازاد بەرزنجى) باش كاتب، بەوپەڕى ڕق و توانجەوە دەنوسێت: (شوان ئەحمەد بەهۆى دەزگاى سەردەمەوە و لەڕێى دەزگاى سەردەمەوە، شەش ساڵ لەمەوبەر زەوى بۆ وەرگیراوە كە لەو رۆژگارەدا، زۆر نووسەرى تر هەبوون لە دەرەوەى سەردەم، رەنگە زۆر لەو موستەحەقتر بووبن و تائێستاش بستێك زەوییان پێنەدرابێ، هەروەها لەناو سەردەمیشدا كارمەندى وەها هەیە، كە زەوى وەرنەگرتووە، بەڵام ئەو بەبێ ئەوەى خێزانداریش بێت زەویى بۆ وەرگیرا، كەچى دەكوڕوزێتەوە كە لەهەمووشتێك مەحروم بووە). با بۆ ئەم هەموو تەعن و ناجوامێریەش وەڵامێك بدەمەوە:
(من لە نووسینەكەمدا لەسەر روونكردنەوەكەى سكرتاریەتى جەلالم تاڵەبانى و نووسەرانى رەهەند، باسى زەوى وەرگرتن و شوێنى زەویەكە و رووبەرەكەشیم كردووە، ئەوەشم بە مافێكى خۆم زانیووە و مەكرمەى هیچ كەس و دەزگاو لایەنێك نییە. راستە من خێزاندارنیم، بەڵام كوڕە گەورەى ماڵم و سیانزە ساڵە لە دواى مردنى باوكمەوە، لە خێزانێكى حەوت كەسى بەرپرسم. هەر ئەم ئەركە قورسەشە وایكردووە چاوپۆشى لە زۆرێك لەژیانى شەخسى و هەقى تایبەتى خۆم بكەم، كە ژن هێنان و خێزان دروستكردن یەكێكە لەوانە. من تائێستاش لەگەڵ خوشك و براكانم و دایكمدا مانگانە پێنج سەد هەزار دینار كرێى خانوو دەدەین، شەش ملیۆن دینار پێشەكى ساڵێكم داوە. هیچ كەس لە ئەندامانى خێزانەكەمان بستێك زەویمان نییە، كەوابێ بۆچى حەرامە ئەگەر من پارچە زەویەكى 160 مەترى لەوپەڕى شاردا بۆ خێزانێكى حەوت كەسى كرێچى وەربگرم. خۆ هاوڕێكانم هەموویان لە سەردەم، وەكو من كاتێك زەوییان وەرگرت، هیچیان ژنیان نەهێنابوو. ئەى ئەو هەموو خەڵكەى سى ساڵە لە ئەوروپان و ناسنامەى عیراقیشیان نەماوە، چۆن وەرى دەگرن؟ ئەى بۆ رەوایە شێركۆ بێكەس سێ پارچە زەوى 600م بە 400م 400م وەربگرێت، وەك وەزیرى رۆشنبیرى و ئەندام پەرلەمان و ئەندامى فەخرى سەركردایەتى یەكیەتى، كە دەكاتە هەزار و چوارسەدمەتر، لەسەنتەرى شارو لەنزیك تراییە كۆنەكە، بەڵام بۆچى بۆ ئێمە حەرام و بڤەبێت؟ بۆ دەبێت ئازاد بەرزنجى زەوى و شوقەى پێبدرێت، رەوابێت، بەڵام بۆ ئێمە كوفربێت؟ بۆ دەبێت رێبین هەردى لەگەڵ ئەوەى خانوویەكى سێسەدوبیست مەترى لەسەنتەرى شاردا هەیە، چاكترین زەوى لە گەڕەكى شێخاندا پێ بدرێت، ئاسایى بێت ، بەڵام بۆ من فەزیحە بێت؟ ئەى بۆچى بۆ (ئاراس فەتاح، بەختیار عەلى، دڵشاد عەبدوڵڵا، مەریوان وریا، شێرزاد حەسەن، ئەكرەم قەرەداخى، دانا ئەحمەد مستەفا و رەووف بێگەرد بۆ خۆى و كچى و كوڕى) رەوابێت، بەڵام بۆ من تاوان بێت؟ شێركۆ بێكەس هەرچى بەخوێى چێشت پێیبگات زەویەكى بۆ وەرگرتووە، تەنانەت ئەوانەشى لە ئەوروپان و منداڵى دەپانزە ساڵانن، ئەى بۆ ئێمە رەوانییە تا بەخێزانێكى حەوت كەسى كرێچییەوە، سەد و شەست مەتر زەوى وەربگرین؟).
ئازاد بەرزنجى، من نەفسیەت بەرزى خۆم وایلێكردوم لەهەموو ئەو شتانەى ئێوە هەتانە مەحروم بم، نەك كڕوزانەوە. كڕوزانەوە هونەرێكە ئێوە تێیدا مامۆستان. سەرەتاى مانگى چوارى ئەمساڵ كاتێك جەلال تاڵەبانى لە (هۆڵى شازاد سائیب) لەگەڵ راگەیاندنى سەر بە (ى.ن.ك)دا كۆبووەوە، وتبووى : (هەڤاڵینە بەقەد ژمارەى ئێوە كە شەست كەسێك بوون، لەدواى راپەڕینەوە شێركۆ بێكەس تەكلیفى شەخسى لێكردوم و بێ سێ و دوو بۆم جێبەجێكردووە) من كڕوزانەوەم بزانیایە و هێندەى (ئازاد بەرزنجى) لە پلەو پایە و پارە بگەڕامایە لە (1989 1991) لەگەڵ (عەبدولوەهاب تاڵەبانى و موسلیح جەلالى و عەبدوڵڵا عەباس)، ئاسۆم بۆ موخابەراتى بەعس دەردەكرد. (1991 1993) دەچوومە تەلەفزیۆنى گەلى كوردستان. لە (1993 1996) دەچوومە ناو (I.N.C)و رۆژنامەى (الموتمر)م بۆ (ئەحمەد چەلەبى) دەردەكرد. گەر هونەرى كڕوازنەوە و راوە دینارم بزانیایە، لە (1996 1998) دەچوومە بندەستى (مەلا بەختیار) و لە بنكەى ئەدەبى و رووناكبیرى گەلاوێژ ئۆقرەم دەگرت. لە (1998) تا ئێستا دەبوومە بازرگانە گەورەكەى دەزگاى سەردەم. هونەرى كوڕزانەوە و حەزى پارە كۆكردنەوەم هەبووایە لە (2000 2003) دەچوومە پاڵ (هیرۆى ئیبراهیم ئەحمەد) و شوێنێكم لە كوردستاندا بۆ خۆم دەگرت. لە (2004 2006) دەچوومە لاى (كوردە حەسەن) و لە رادیۆى (نەوا) گۆڤارى (سێڤ)م دەردەكرد. یان لە (2006 2010) چمكى كراسى بەرپرسێكى دەست رۆیشتوى (ى.ن.ك) دەگرت و دەبوومە خوێندكار لە زانكۆى سلێمانى.
دەیەم) لە گێچەڵێكى تردا (ئازاد بەرزنجى) باش كاتب و چاولەبەرى (شێركۆ) دەنووسێت: (شوان ئەحمەد گرێبەستى لەگەڵ دەزگادا هەبووە رۆژانە شەش سەعات دەوام بكات، بەڵام ئەو نەك شەش سەعات، بەڵكو جارى وابووە بەهەفتەش دەوامى نەكردووە). دەرهەق بەم ناهەقى و بوغزو كینەیەش دەڵێم: (ئێوە خۆتان زۆرچاك دەزانن، بەڵام دەست ئەنقەست شتەكان دەشێوێنن كە كارمەندى سەردەم مەرجە رۆژانە شەش سەعات دەوام بكات، نەك نووسەران. ئەم مەرجە نووسەران ناگرێتەوە. ئێمە سەرەتاى سەرەتا، كە دەست بەكاربووین لەسەردەم بۆ ئەمەش رێبین هەردى و شاهۆ سەعید شایەدن، پێمان وتن ئەوەى ئیشى گۆڤارەكەیە وەك خۆى جێبەجێى دەكەین، بەڵام ئیلتیزام بەدەوامەوە ناكەین. ئەمە لەلایەك، لەلایەكى ترەوە گەر ئەم شتەى ئێوە مسقاڵە زەڕەیەك راستى تێدایەو بوختان نییە، ئەى بۆ نووسەرەكانى دیكەى سەردەم دەڵێن چى؟).
1- ئەوە بۆ ماوەى یانزە ساڵى رەبەقە (رێبین هەردى) یەك تاقە رۆژ چییە دەوامى 8 بەیانى تا 2 نیۆڕۆ نەكردووە، چونكە ئەو شەشی بەیانى دەخەوێت و دوو پاش نیوەڕۆ لە خەوهەڵدەستێت. ئەى كەواتە كوا6 سەعاتى دەوامكردنى ئەم بەڕێزە؟
2- د.شاهۆ سەعید مامۆستاى زانكۆبوو، لە 8.5 بەیانى تا 3.5 لە زانكۆى سلێمانى بوو، لە كۆلێژى زانستە سیاسییەكانیش لە 3.5 بۆ 8.5 وانەى دەوتەوە. ئەى بۆ دەوامى 6 سەعات رۆژانەى ئەمیش دەڵێن چى؟
3- دانا ئەحمەد مستەفا مامۆستاى زانكۆى سلێمانى و پەیمانگاى تەكنیكى بەختیارى و خوێندكارى دكتۆرایە. ئەى چۆن 6 سەعات دەوام دەكات؟
4- نەوزاد ئەحمەد ئەسوەد ، مامۆستاى زانكۆى سلێمانى و خوێندكارى دكتۆرایە.
5- هەورامان وریا قانیع، مامۆستاى سەرەتاییە.
تەنها من نەبێت هیچ كارو ئیلتزاماتێكى ترم نییە و موتەفەریغم بۆ سەردەم و رۆژانە و بەردەوام دەوامى ئسوڵى خۆمم كردووە. تەنانەت ئەو كاتانەشى دەزگا مانگێك پشوى رەسمى بووە، من هەردەوامى خۆمم كردووە. ساڵى 2008 كە لەگەڵ بەڕێوەبەرى گشتى كارگێڕى دەزگاى سەردەم كردم بەشەڕ، لەسەر ئەوەبوو بەدرێژایى ئەو مانگە من هاتوچۆى سەردەمم دەكردوو دەوامم دەكرد، كەچى ئەو تەنها ساردكەرەوەى دەزگاكەى بۆ خۆى و ئەو چەند كچە خوێندكارەى تەتبیقاتى خولى هاوینەیان هەبوو، پێیدەكرد و ئەو نهۆمەى من لێبووم كوژاندبوویەوە. ئەو هەفته‌ یان دە ڕۆژەشى دەوامم نەكردووە، ئەو كاتانە بووە، كە گۆڤارەكەم تەسلیم بەچاپخانە كردووە و هیچ كارێكمان نەبووە. لەبەرئەوەى گۆڤارەكەى ئێمە وەرزى بوو، دواى ئەو دە ڕۆژە دوو مانگ و بیست رۆژمان لەبەردەمدا بوو، تا ژمارەى تازەى تێدا حازربكەین. ئەمە ناهەقیە دەرهەق بە من و گەر ئەو قسەیەى ئێوە راست بێت، بەرلە من بەو بەڕێزانەى تر بڵێن شەش سەعات دەوام بكەن كە من ناوم بردن، چونكە هەندێ لەوانە بەمانگى جارێكیش دەزگاى سەردەمیان نەبینیوە. (رێبین) بەدرێژایى چواردانە مانگ خۆم موچەكەیم بۆ بردووەو داومەتە دەست (ئاسۆس هەردى) و (شوان محەمەد) و (سارا قادر) لە ئاوێنە. بۆ راستى و دروستیى دەوامكردنى من، تەواوى كارمەندانى سەردەم ئاگادارن و شایەتیم بۆ دەدەن، گەرنا لە هاوڕێى ئایزم كاكە (ئارام عەلى) بپرسن كە بەرگى كتێبەكانى سەردەم دەكات، تاڕاستى ئەم قسانەتان بۆ بسەلمێنن.
یازدەیەم) لە بڕگەیەكى تردا خوێندكارەكەى (موسڵیح جەلالى) و (عەبدولوەهاب تاڵەبانى) دەنووسێت: (شوان ئەحمەد لە سێ مانگدا 20 لاپەڕەى ئەى فۆڕ تەرجەمە دەكات و زیاتر لە دوو ملیۆن و نیو دینار وەردەگرێت. ئەمە جگە لەوەى دیسانەوە زۆربەى ئەم وتارانەى كۆكردونەتەوە و لەسەردەم بەشێوەى كتێب چاپى كردونەتەوەو سەرلەنوێ پاداشتى كتێبیشى پێوەرگرتووە). با وەڵامێكى كورتى ئەم هەموو نابەجێیانەش بدەمەوە: (من لە هەموو ژمارەیەكى سەردەمدا بەناوى خۆم و ناوى لاس و سەردەم و سەهەندەوە زیاتر لە هەشت بابەتم هەبووە. وەك نمونەیەك تەنها لە ژمارە 61دا، دە بابەتم بڵاوكردۆتەوە و هەموویان 53 لاپەڕە دەكەن. پاشان من گۆڤار دەردەكەم، كتێب دەرناكەم تا لەبەرگەوە بۆ بەرگ بابەتى خۆم بێت. دووەم من 600 هەزار لەسەردەم وەردەگرم كە بەسێ مانگ دەكاتە ملیۆنێك و هەش سەد هەزار، واتە من بە سێ مانگ موچەى مانگێكى ئەندام ئەنجومەنێكى سەردەمم نییە، كە بێجگە لە نەسریەى خواردن و خواردنەوە و كارتى مۆبایل و بەنزین و قرتاسیە و چاككردنى ئۆتۆمۆمبێل، بەسێ مانگ شەش ملیۆن دینار موچەیانە. بە ئازاد بەرزنجى خۆتان بڵێن، که‌ چوارساڵە نەك هەرچیت كردووە، بگرە رۆژێك دەوامى شەش سەعاتیت كردووە، خوێندكارەكەى زانكۆى سلێمانى، تا بەسێ مانگ شەش ملیۆن دینار بخەیتە باخەڵت؟ هەڵكەوت عەبدوڵڵا بەسێ مانگ سێ لاپەڕەى وێنەدارى سەردەمى منداڵان دەنوسێت، رەووف بێگەر كورتە چیرۆكێكى بۆرخێس و كورتە وتارێكى كۆندێرا و شەش ملیۆن بۆباخەڵى. ئەوە هەرباسى شێرزاد حەسەن مەكە، كە سەرى مانگ و سەرى مانگ بۆ موچە دەزگا دەبینرێت).
هەر لەوپەراگرافەدا (ئازاد بەرزنجى) باش كاتبى (شێركۆ بێكەس) تەعلیق دەدات و دەڵێت: (جگەلەوەى دیسانەوە زۆربەى ئەو وتارانە كۆدەكاتەوە و بەشێوەى كتێب چاپیان دەكاتەوە و سەرلەنوێ پاداشتى كتێبیشى پێوەرگرتووە). جا باشە پیاوى باش ئەمە بۆ بە من دەڵێى، ئەى بۆ بەخۆت (هەڵكەوت) و (شێركۆ) و (رەووف) و (شێرزاد) ناڵێیت؟ (شێركۆ بێكەس) كە قەسیدەیەكى درێژ دەنووسێت لە كۆڕێكدا دەیخوێنێتەوە، پاشان لە ستۆدیۆكانى كوردسات وێنەى دەگیرێت و پەخش دەكرێت، دواى ئەوە چەند بەشێكى لەم رۆژنامە و لەو گۆڤار بڵاودەبێتەوە، دواى ئەوە دەبێت بەكتێب و دواتر جارێكى تر لە سەرجەم بەرهەمە چاپكراوەكانى شاعیردا، دەخرێتەوە بەردیدەى خوێنەران. ئەى بۆ ئەمەیان دەڵێى چى؟
تۆ بەش بە بەشى كتێبى مۆدێرنەكانت لە ئەدەب و هونەرى كوردستانى نوێ و ئایندە و سەردەمدا بڵاوكردەوەو دواى ئەوەش سێ دانە جار كتێبەكەت چاپكردەوە و سێیەم چاپیت بەنرخى چاپى یەكەم فرۆشتەوە بەسەردەم، ئەى بۆ ئەمە دەڵێى چێ؟ ئەى بۆچى بۆ من نابێت ئەو بابەتانەى بڵاوى دەكەمەوە لە كتێبێكدا كۆیان بكەمەوە و پاداشتەكەشى وەربگرم، بەڕێز؟
دوازدەیەم) ئازاد بەرزنجى لەناهەقیەكى تردا دەنووسێت: (جگە لەوشێوازە پڕ بێڕێزیەى بەرامبەر بەسەردەم و ژن و پیاوەكانى ناو سەردەم بەكاریهێناوە). بازرگانە گەورەكەى دەزگاى سەردەم، كێشەى من لەگەڵ باوكى هەڵۆ و ئەندامانى ئەنجومەنەكەى ئێوە و شێرزاد حەسەن و بەڕێوەبەرى گشتى كارگێڕى دەزگاى سەردەمدایە، نەك لەگەڵ نووسەرو كارمەندە بەڕێزەكانى دەزگاكە. ئەوانە زۆربەى زۆریان دۆست و براو هاوڕێى منن و خەڵكى بەشخوراو بەڕێزو دڵسۆزن و بەدرێژایى ئەو ماوەى یانزە ساڵەى لەسەردەم بووم، كێشەم لەگەڵ هیچ كەسێكیاندا نەبووە. وەك بەڵگەیەك ئەو قسانەى خۆتان دەهێنمەوە بیرتان كە دەڵێن: (هەر بۆ نمونە ناوى هەندێك كەسى بێڕێز دەهێنین كە لە دەزگاكەى خۆماندا كە شوان ئەحمەد لە رابردوودا گیروگرفتى دروستكردووە لەگەڵیان، یان بەقسەى ناشیرین یاخود بەدەستەو ئێخە هێرشى كردۆتە سەریان: شێرزاد حەسەن، بەهادین نورى، ئازاد بەرزنجى). كەواتە ئەمە دەریدەخات كە من هەرلە سەرەتاوە كێشەم لەگەڵ ئێوەدا هەبووە، نەك لەگەڵ كارمەندە بەڕێزەكانى سەردەم.
سیازدەیەم) لەبڕگەیەكى تردا ئازاد به‌رزنجی لە تۆمەتێكى ناڕەواى تردا دەڵێت: (لەسەر كتێبەكەى ئاوات ئەحمەد، شوان ئەحمەد وتویەتى نابێت ئەو پارەیە بدرێتە ئاوات ئەحمەد و منیش ئەو پارەیەم دەوێت و دەبێت چوارهەزار دۆلاریش بدەن بە من). راستى ئەم مەسەلە بەم شێوەیەیە: (من خۆم لەدەزگاكەدا بووم و ئاگادارى هەموو شتێك بووم. كەواتە خێرە نەزانم كتێبى تەكلیف چۆنە و چۆن دەبێ؟ من بەشێركۆم وت: بەپێى ئەو كتیابە بێبت كە واژۆى رەووف بێگەردى لەسەرە، كتێبەكەى ئاوات ئەحمەد لاپەڕەى دە دۆلار ناكات، چونكە ئەى فۆرنیە و كتێبەكەى ئەو لە فیئەى هەشت دۆلارى و شەش دۆلاریە. ئەگەر ئێوە ئەم پرانسیپەى خۆتان بشكێنن، سبەى هەركەسێك كتێبێكى تەكلیفى بەقەوارەى كتێبەكەى ئاوات ئەحمەد كرد، دێت و داواى دە دۆلار بۆ هەر لاپەڕەیەك دەكات. بۆ نمونە كتێبەكەى من كە چوارسەد لاپەڕەیە، سبەى كە دەرچوو هەقى خۆمە داواى چوار هەزار دۆلار بكەم. هەروەها وتم: ئازاد بەرزنجى لە نووسینى ئەو موكافەئەیەدا دووجار بەهەڵەداچووە، جارێك كە دە دۆلارى نووسیووە و جارێك كە پاداشتەكەى بە لاپەڕەكانى دەقە كوردییەكە بەراورد كردووە، نەك دەقە عەرەبیەكە. لە كاتێكدا ئێوە لەو كیتابە رەسمیەى خۆتاندا نووسیوتانە، دەبێت لەگەڵ دەقە ئەسڵیەكەدا بەراورد بكرێت. شێركۆ لە وەڵامدا وتى: كاكە من چى بكەم متمانە و مەسئولیەتم داوە بەو برادەرە و ئەویش ئاوا ئیش دەكات، گوناحى من چییە). ئەمە ئەسڵى مەسەلەیەكە، نەك ئەو درۆ داتاشینەى ئازاد بەرزنجى. هەر لەو بڕگەیەدا دەنووسێت: (دواتریش شوان ئەحمەد بەیانیەك دەچێتە كافتریاى سەردەم و بەدەنگى بەرز دنیایەك جنێوى سوك و پیس دەداتە بە ئەندامێكى ئەنجومەن).
بۆ راستكردنەوەى ئەم شێواندنە دەست ئەنقەستە دەڵێم: (ئەوە بەیانییەكى تر نەبوو، هەرهەمان رۆژ بوو كە لاى شێركۆ هاتمە دەرێ و ئەوەى سوك و رسوامكرد ئازاد بەرزنجى خۆى بوو، كە رووى نایەت ناوى خۆى بهێنێت. ئەم پیاوە پڕ شەهامەتە دواتر لاى رێبین هەردى و نەوزاد ئەسوەدا وتبوى كە من هیچم لەدڵدا نەماوەو هیچ شتێكم بەرامبەر بە شوان ئەحمەد نییە و حەزدەكەم مەسەلەكە لەوەزیاتر گەوەرتر نەبێت). لە درۆداتاشینێكى دیكەى ئازاددا هاتووە، كە شێركۆ و رێبین داوایان لە منكردووە داواى لێبوردن بكەم، كە ئەمەش دوورە لە راستییەوەو (رێبین هەردى) شایەتى ئەوە دەدات. پاشان كاكى بوهتانچى، كە من ئەوەندە نمونەیەكى خراپى ناو ئەو دەزگایە بووم و هەموو ئەو رەفتارە ناشیرینانەم كردبێت، بۆچى (شێركۆ بێکه‌س) پەلەى لەپەسەندكردنى دەست لە كاركێشانەوەكەم نەكرد و دنیاتان كرد بە تكاكار تا بگەڕێمەوە؟ كە من بێڕێزیم بەرامبەر یەك بەیەكتان كردبێت و دەوامم نەكردبێت و خۆشیم بەچارەى كەستان نەهاتبێ و پەلامارم دابن و سوكم كردبن، ئیتر بۆچى سەرۆكى دەزگاكە و ئەنجومەنەكەى (وەك خۆت دەڵێیت)، بەدڵفراوانى و لێبوردنەوە مامەڵەیان لەگەڵ مەسەلەكەدا كردووە؟
چواردەیەم) لەبڕگەیەكى تردا پیاوەكەى (موسڵیح جەلالى) و (عەبدولوەهاب تاڵەبانى) دەنووسێت: (بۆ زانیاریتان شوان موچەى ئەو مانگە و پارە كەڵەكەبووى چەند ساڵەشى بۆ نێردراوە و وەریشگرتووە). بالەسەر راستى ئەم مەسەلەیەش چەند شتێك بڵێم:
لەوپەیوەست نامەى كارەى نووسەران و كارمەندانى سەردەم لەگەڵ دەزگاكەدا هەر شەش مانگ جارێك تازەى دەكەنەوە. بڕگەیەكى تێدایە كە دەڵێت: (هەر كارمەندێك دەزگاى بەجێهێشت جگە لەسەرفكردنى موچەى ئەو مانگە، پارەى كەڵەكەبووى ساڵانى پێشووشی بۆ سەرف دەكرێت كە پارەى شەست رۆژە، واتە دوو مانگ). كەواتە ئەو پارەى وەرمگرتووە شەرعى و حەڵاڵ و مافى شەخسى خۆمە و بەپێى پەیوەست نامەیەكى ئسوڵى كراوە. نەك من هەر كەسێكى تر لەو دەزگایە بڕوات، هەمان ئەو شتەى منى بۆ دەكرێت، كەواتە عەیب لەمەدا چییە؟ نەشتان كردایە بەدادگا و بەهێزى باسك و بازوو لێم دەسەندن.. من ئەوەم جێ بهێشتایە، ئێوە دەتاندا بە كارتى مۆبایل و خواردن و خواردنەوە و بەنزین بۆ ئۆتۆمۆمبێلەكانتان. وابزانم لەوە دەڵگرانن كە نەمهێشت ئەوەش حەپەلوش بكەن؟!
ئەمە راستى مەسەلەكەیە كارمەندە دڵسۆزەكەى رۆژنامەى (ئاسۆ). ئەو رۆژنامەیەى لەسەردەمى ئەنفال و كیمیابارانى كوردستاندا، موخابەراتى بەعس دەریدەكرد و تۆش دڵسۆزانە كارت تێدادەكرد و شەو تا بەیانى بەدیار دەرچوونى رۆژنامەكەوە دەمایتەوە (بۆ راستى ئەم قسانە، دەتوانن بە وێنەوە دەقى قسەكانى ئازاد بەرزنجى، لەسەر رووپۆشى ئەو رۆژنامە رووزەردە ببینن). كەواتە شەڕى من بۆچى شەڕە لەسەر ئیمتیازات و كام ئیمتیازاتانەتان داوە بەمن؟ بۆ دەیەمین جار دووبارەى دەكەمەوە، جگە لە موچەى مانگانەكەم، بەدرێژایى ئەو یانزە ساڵە، ئەگەر تاكە سەنتێكم لە ئێوە وەرگرتووە، جوامێرو بەجورئەت بن ئاشكراى بكەن. دیكۆمێنتێك بخەنەڕوو، كە من داواى پارەو ئیمتیازاتم لە ئێوە كردبێ. وەك چۆن من بەدیكۆمێنت حەقیقەتى ئێوەم بۆ هەموو لایەك ئاشكراكرد، ئێوەش مەردبن و هەمان شت بكەن. نەك بێن بەقسەى هەڵبەستراو، قەرەبووى ئابڕچونى خۆتان بكەنەوە. باوەك من نووسینەكەى ئێوەش یەك تاكە بەڵگە و دیكۆمێنتى لەگەڵدابوایە.
پازدەیەم) لەبڕەگەیەكى تردا، هاتووە: (ئەى باشە كە شوان ئەحمەد لە ئێمە زیاتر بەتەنگ ئەو دۆستانەى سەردەمى رەخنەەوە بووە و چوار ساڵ لەمەوبەر ئەوەى بە پیلانێك زانیووە كە گوایە ئێمە دژ بەوان كردوومانە، ئەى بۆچى هەر ئەوكات هەڵوێستێكى ئازایانەى لەئاستى سەردەمدا وەرنەگرت و هیچى نەنووسى و ئیستیقالەى نەكردوو بەدزیەوە كەوتە ناردنى نامەى ئەلكترۆنى بۆیان، تا ناكۆكى و بەدگومانى لەنێوان ئێمەو ئەواندا دروست بكات؟). لەوەڵامدا دەڵێم:
1- من هەمیشە لە سەر هەموو شتێك بەدەنگى بەرز و ئاشكرا هەڵوێستى خۆم دەربڕیووە. كاتێك ئەو برادەرانەش دەستیان لە كاركێشایەوە، دەست بەجێ بە (رێبین هەردى) و (شاهۆ سەعید) و (نەوزاد ئەسوەد) و (هەورامان وریا قانع)م وت، با ئێمە نەهێڵین ئەو مەسەلەیە هەروا بەبێدەنگى تێپەڕێت و پێویستە هەر پێنجمان بۆ گەورەكردنى مەسەلەكە و ئیفلیجكردنى دەزگاكە، دەست لەكاربكێشینەوە دژى ئەو كارە وەك پاڵپشتى كردنێكیش لەسەردەمى رەخنەو ئەو سێ برادەرە. ئەو چوار كەسە شایەتى ئەوەن كە دەیڵێم و هەر چواریشیان ماون و بۆ راستى و دروستى ئەو قسانەم پرسیاریان لێ بكەن، بەڵام ئەوان بەو پێشنیارەى من رازى نەبوون و رێبین پێی وتم: (واز لەو شتەبێنە).
2- من لەهەر لەسەروبەندى ئەو مەسەلەیەدا بوو، كاكە مەمى بورهان قانع كە ئەوكات لە هەفتەنامەى (چاودێر) بوو، پەیوەندى تەلەفۆنى لەگەڵ گرتم و وتى بیستومانە برادەرانى (سەردەمى رەخنە) دەستیان لەكاركێشاوەتەوە و چیتر لەوێ كارناكەن. تەلەفۆن بۆ هەركەس دەكەین قسەمان بۆ ناكات، حەزدەكەین تۆ لەوبارەیەوە شتێك بڵێیت، منیش زۆر راشكاوانە قسەى خۆم لەسەر ئەو مەسەلەیەكرد. خوێنەرى بەڕێز وەك بەڵگەیەك دەتوانێت لەلاپەڕە یەكى چاودێرى ساڵى 2007، دەقى ئەو قسانەى من بخوێنێتەوە.
ئەمانە هەڵوێستى من بوون و لەناو دەزگاش بەئاشكراو رووبەڕوو لەبەرچاوى یەك بەیەكتاندا، بەرگرى سەختم لە (سەردەمى رەخنە) و توانا و لێهاتووى ستاڤى گۆڤارەكە كردووە. من ئێوە نیم پاشەملە لەپەناو پەسێودا، خورتەو بۆڵەم بێت و قسە بكەم.
شازدەیەم) لەبڕگەیەكى تردا بەناوى (یارمەتیەكەى بەڕێز مام جەلال و نامەكەى كاك جەلالى سام ئاغا)، باش كاتب ئازاد بەرزنجى مەتەڵێكى زۆر عەنتیكەى داهێناوە و دەڵێت: (رەنگە زۆر كەس ئەوە نەزانێت كە دەزگاى چاپ و پەخشى سەردەم، دەزگایەكى نە حكومى و نەحزبیە..) تۆ سەیرى ئەم نوكتە عەجایەبە. دەزگاكە بەقسەى باش كاتبەكەى شێركۆ نەحزبیە و نەحكومى، بەڵام پارە لە حزب و حكومەتیش وەردەگرێت. توخوا كوردینە ئێوە شتى واسەیرو عەنتیكەتان بینیووە؟
بۆ مامە حەمەیى و رووپامایكردن، شێركۆ و پیاوەكانى لە پەراگرافێكى نووسینەكەیاندا دەڵێن: (دەبێ لێرەداو لە ڕوى ئەمانەتى مێژووییەوە ئەوە بڵێین كە بەڕێز مام جەلال، بەدرێژایى تەمەنى دەزگاى سەردەم، هەمیشە پشتیوانى مادى و مەعنەوى دەزگاى سەردەمى كردووە و ئێمە هەرگیز پشتگیرى و هاوكارى بەردەوامى بەڕێزیانمان بیرناچێتەوە). من ئەمە وەكو خۆى و بێ هیچ لێدوان و تەعلیقێك جێ دێڵم بۆ خوێنەرانى كورد زبان، تا خۆیان حوكم بدەن و قسە لەسەر ئەم مەسەلەیە بكەن، بزانن وایە ئەم دەزگایە نەحكومیە و نەحزبى؟
هەر لەوبڕگەیەدا پیاوەكەى موسڵیح جەلالى و عەبدولوەهاب تاڵەبانى و ئەحمەد چەلەبى دەڵێت: (پاداشتى جەلال تاڵەبانى مانگانەى بۆ كۆمەڵێك نووسەرى دەزگا لێبڕاوەتەوە كە شوان ئەحمەد یەكێك بووە لەوانە). ئەمەش درۆیەكى شاخدارو تۆمەتێكى ناڕەوا و دەست ئەنقەستە، من موچەى مانگانەكەم 600 هەزار دینار بووە و هیچى تر، ئەگەر ئەوەى ئێوەش دەیڵێن راست بێت، دەبوو ناوى منیش یەكجار بۆ دەرمان، لە راپۆرتەكەى دیوانى چاودێرى داراییدا بهاتایە، لەریزى ناوى ئەوانەى لە یارمەتیەكەى سكرتاریەتى تاڵەبانى) سوودمەندبوون. ئەم پارەیە پارەیەكە بەدرێژایى ئەم ساڵانە، خۆتان خواردوتانە و سكرتاریەتیش باش دەزانێت كە وایە، چاودێریى دارایش ئاگادارە. پەنابردنتان بۆ لاى جەلال تاڵەبانى و روونكردنەوەى سكرتاریەتەكەى و سوپاسنامەى پڕ لەشەرم و ریاكاریەكەى شێركۆ بێكەس بۆ جەلال تاڵەبانى، شایەتى راستى ئەو قسانەن. من سەرباسى هەردوو بەشى وتارەكەم لە هەفتەنامەى (ئاوێنە)دا، ئەمە بوو: (سەردەم.. نمونەى دەزگایەكى گەندەڵ و بێسەروبەر)، ئەوەى ئێوە لەبەشى یەكەمى وەڵامدانەوەكەتاندا توخنى نەكەوتوون، پرسى گەندەڵى و بێسەروبەرى دەزگا بەدناوەكەتانە. لەپاڵ فەرامۆشكردنى ئەوەشدا، كەوتوونەتە داتاشینى كۆمەڵێك تۆمەتى درۆ و قسەى بێ بەڵگەو بێ دیكۆمێنیت.
لە كۆتایى ئەم بەشەى وەڵامدانەوەكەمدا دەمەوێت لەوە ئاگادارتان بكەمەوە كە هەفتەیەك دواى بڵاوبوونەوەى بەشى یەكەمى وتارەكەم لە (ئاوێنە)دا، وەزارەتى (داد)ى حكومەتى هەرێمى كوردستان، سەرۆكایەتى داواكارى گشتى، فەرمانگەى داواكارى گشتى سلێمانى، دەربارەى نووسینەكەى من لەسەر گەندەڵییەكانى دەزگاى سەردەم، ئەم بڕیارە ئیداریەیان دەركردووە:
هەرێمى كوردستان عیراق
ئەنجومەنى وەزیران
وەزارەتى داد
سەرۆكایەتى داواكارى گشتى
فەرمانگەى داواكارى گشتى سلێمانى
ژمارە/ 30
زاینى: 15/6/2010 كوردى: 25/3/2710

بۆ/ سەرۆكایەتى داواكارى گشتى
بابەت/ لێكۆڵینەوە

هاوپێچ وێنەیەك لە پەڕە (10، 11)ى رۆژنامەى ئاوێنەى ژمارە (227)ى (8/6/2010)تان بۆ دەنێرین كە بابەتێكى تێدا بڵاوكراوەتەوە، لەژێر ناونیشانى (سەردەم، نمونەى دەزگایەكى گەندەڵ و بێسەروبەرە). داواتان لێدەكەین لەڕێگەى وەزارەتى دادەوە، داوابكرێت لەوەزارەتى رۆشنبیرى بۆ پێكهێنانى لیژنەیەكى لێكۆڵینەوە، لەسەر ئەو بابەتەى بڵاوكراوەتەوە لەسەر دەزگاى چاپ پەخشى سەردەم لە سلێمانى، لە ئەنجام ئاگادارمان بكەنەوە لەگەڵ رێزدا.

بەرپرسى فەرمانگە
ناز نورى عارف
جێگرى داواكارى گشتى سلێمانى

(ئازاد بەرزنجى) ، تكایە بە (شێركۆ) و (شێرزاد) و (رەووف) و (هەڵكەوت) بڵێ: كوڕینە فریاكەون، نەك سكرتاریەتى تاڵەبانى و رێبین و بەختیار و ئاراس، بەڵكو پەنا بۆ هەموو لایەك بەرن، تا لەو سكانداڵە ئەخلاقى و ئیدارییە دەرتان بێنن.. سەیركە نێو و نێوبانگى ئێوە چى لێهاتووە، دوو كێشەتان لە دادگایە و چل لاپەڕەى دیوانى چاودێرى داراییتان لەسەر رەشكراوەتەوە و ئێستاش بەفەرمانى داواكارى گشتى، داوا لە وەزارەتى دادى بەڕێز دەكەرێت، وەزارەتى رۆشنبیرى ئاگادار بكاتەوە تا لیژنەى لێكۆڵینەوەتان لەسەر دروست بكەن.
لە برى ئەم وەڵامدانەوە چروك و بێ بەڵگەو ساختەیە، مشورى حاڵێكى خۆتان بخۆن، واخەریكە كەشتییەكەتان لە دەریاى گەندەڵى و بەدناویدا غەرق دەبێت. من تەواو دڵنیام درەنگ، یان زوو، گەر یاسا سەروەربێت و حزب و حكومەت و ئەم بەرپرس و ئەو بەرپرس و ئەو نێوەندى رەهەند بۆ لێكۆڵینەوەى كوردى، بەفریاتان نەكەوێ و مەسارى قانونى كێشەكە نەگۆڕن، هەر زوو دەدرێنە دادگا و هەقى ئەو هەموو ناعەدالەتى و گەندەڵیی و مەحسوبیەت و دزیى و مشەخۆریەتان لێدەكرێتەوە.

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە