توركیا ھەڵگری ڤایرۆسی داعشەكانە دژی گەلی كورد

Thursday, 10.16.2014, 12:00

1108 بینراوە





 ئەو پیلانەی كە بەڕێوە دەچێت كە لە 15ی مانگی ئەیلولدا دەستی پێكردوە دژ بە كۆبانێ شتێكی لە ناكاو نەبووەو لابەلا ڕووی نەداوە ، بەڵكو بە پلان و نەخشەی داڕێژراو كراوەو ئەنجام دەدرێت ، مەبەستیش كۆتایی ھێنانە بە دەستكەوتەكانی گەلی كورد لە ڕۆژ ئاوای كوردستان بە پێشەنگایەتی پارتی یەكێتی دیموكرات (پەیەدە) بە ھاوپەیمانێتی لەگەڵ كۆمەڵێك پارت و لایەنی سیاسی و پێكھاتە نەتەوەیی و ئایینیەكانی دی لەو بەشەی كوردستاندا، وە دامەزراندنی كانتۆنەكانی كۆبانێ ،عەفرین و جزیرە،وە بەڕێوەبردنی بە سیستیمی خۆسەری دیموكرات و پاراستنیان بە ھێزێكی مەشق پێكراو و گۆشدراو بە بیروباوەڕی دیموكراسی وپێشكەوتن خواز و خۆشەویستی خاكی كوردستان و نەتەوەكەی ، وە ئامادە بوونیان بۆ پاراستنی بە ئیرادە و گیانێكی پۆڵایینەوە تا دوا ھەناسەیان.وە ڕێزگرتن لەھەموو پێكھاتە وئایین وئایینزاكانی كوردستان و پاراستنیان.
ئەم ھێزەش بە یەكینەكانی پاراستنی گەل و یەكینەكانی پاراستنی ژن ناونراون . ئەم سیستیمە شێوازێكی نوێیە لە فەرمانڕەوایی و بەرێوەبردنی رۆژئاوای كوردستان كە گەل خۆی خاوەن دەستەڵات و بڕیارە بە ڕێگای ئەنجومەنەكانەوە . ئەو بارو دۆخە سیاسییەی ھاتە ئاراوە دوای ڕاپەڕین و شۆڕشی گەلانی سوریا لە ساڵی 2011 دا دژی ڕژێمی بەشار ئەسەد ، پاشان لەڕێلادانی ئەم شۆڕشە بە دەست تێوەردانی دەوڵەتانی ھەرێمی و نێونەتەوەیی بۆ یەكلاییكردنەوەی ململانێیەكانیان و دەستەبەركردنی بەرژەوەندییەكانیان و پاراستنی ،وە بەنزین كردنە سەر ئاگری نێوان سوننە و شیعە لە ناوچەكە دا و رێگا گرتن لە ھەژموونگەرایی ئێران كە مەترسی لەسەر پێگە و بەرژەوەندی چەندین لایەنی ھەرێمی و نێودەوڵەتی ھەیە . كشانەوەی ھێزەكانی ڕژێمی بەعسی سوریا لە بەشی زۆری ڕۆژئاوای كوردستان لەژێر فشاری ڕاپەڕین و بەرخۆدانە شكۆمەندەكەی كە جیھان لە ئاستی دا حەپەسا و سەرسامە ، وە بەھۆی ئەو قەیرانە سیاسییە ، سەربازییە و ئابورییەی كە ڕژێمی رەگەزپەرستەی سوریا تێیكەوتییە . خۆڕێكخستنی گەلی كورد و دامەزراندنی دامودەزگاكانی ھەنگاو بە ھەنگاو بوویتە جێی ھیوا و ئومێدی گەلی كورد و پێكھاتەكانی دی لەو بەشە دا ، وە لە بەشەكانی تری كوردستان دا . خۆسەری دیموكراتی ، كە گەلانی ڕۆژ ھەڵات بەخۆیان نەبینیوە ، جگە لە داپڵۆسین و پێشێلكردنی مافەكانیان لەلایەن ڕژێمە دیكتاتۆر و ڕەگەزپەرستەكانەوە كە داردەست و نۆكەری زلھێزەكانی جیھانن.ئەم دەستكەوتەی ڕۆژئاوای كوردستان زۆر لایەنی تووشی نیگەرانی و دڵەڕاوكێ كردییە ، چونكە ئەم دەستكەوتەی گەلی كورد لە فەرمانرەوایی و بەڕێوەبردندا كە گەل دەكاتە چەق و سەروچاوەی دەستەڵات ، ئەم ڕژێمانەی داگیركەری كوردستان پێیان ھەزم ناكرێت ، بەتایبەتی توركیای داگیركەر و فاشیست و تیرۆریستی ڕاستەقینە و دوژمنی سەرسەختی نەتەوەی كورد . ھەر بۆیە دەستەڵاتدارانی ئیخوانی موسلیمینی توركیا لە بەرگی پارتی داد و گەشەپێدان كە ڕەجەب تەیب ئەردۆغان سەركردایەتی دەكات ، ئامادەن پەنا ببەنە بەر شەیتان لەپێناو خنكاندن و لەناوبردنی ئەو كانتۆنانە و ئاوارەكردن و دەربەدەركردن و كۆمەڵ كوژی گەلی كوردی ڕۆژئاوای كوردستان. بۆیە بەناوی دژایەتی كردنی ڕژێمی بەشار ئەسەد و ھەوڵی ڕووخاندنی كە پرسەكە خۆی لە ململانێی شیعە و سوننە دەردەكەوێت كە دوو جەمسەر یاری لەسەر دەكەن ، ئێران و ھاپەیمانەكانی كە بریتین لە عێراق ، سوریا و حیزبوڵڵا ، وە ڕوسیا وەكو ھێزێك لەسەر ئاستی نێودەوڵەتی كە پاڵپشتی ڕژێمی سوریا دەكات وەكو بنكەیەكی سەربازی و بازرگانی خۆی لە ناوچەكەدا ، جەمسەرەكەی دی بریتیە لە توركیا ، سعودیە و وڵاتانی ئیماراتی عەرەبی بەتایبەتی قەتەر بەسەر پەرشتی ئەمەریكا . ئەم بارودۆخەی كە سوریا تێیكەوتییە ، چەندین ڕێكخراوی تووندڕەوی تیڕۆریستی ئیسلامی بەرھەم ھێنا لەژێر ناوی ئۆپۆزیسیۆنی سوری بە پارەی سعودیە و قەتەر و كردنەوەی توركیا دەرگاكانی لەسەرپشت بۆیان وپێشوازیكردن لە لێشاوی ئەو ڤایرۆس و جانەوەر و میكرۆبانەی كە دوورن لە ڕەگەزی مرۆڤ و مرۆڤایەتی . بەرپرسە باڵاكانی ئەمەریكا نكۆڵی لەمە ناكەن و دانیشی پێدادەنێن كە ڕێكخراوی تیرۆریستی داعش دژ بەھەموو ڕەوشت و بەھاكانی مرۆڤە ، لەو كاتەی خۆیان دروستكەر و خوڵقێنەرینە ، ھەروەكو ھیلاری كلینتۆن جەختی لەسەر كردییە ولە كتێبە تازەكەیدا ئاماژەی پێدەكات كە لەم دواییەدا چاپكرا و كەوتە بازاڕەوە . ھەروەھا جۆ بایدن جێگری باراك ئۆباما لە ووتەیەكیدا لە دانیشگای ھارڤەرد ڕاشكاوانە ئاشكرایكرد كە ھاوپەیمانەكانیان لە ناوچەكەدا ، توركیا ، سعودیە و قەتەر بە سەدان ملیۆن دۆلار و دەیان ھەزار تۆن چەك و تفاقیان ڕەوانە كردییە بۆ جەبھەی ئەلنوسرە و ئەلقاعیدە لە سوریا بە نیازی ڕوخاندنی ڕژێمی ئەسەد .! توركیا بەتایبەتی بە دایكی داعشەكان دادەنرێت ، چونكە ھەریەك لەو دەوڵەتانەی بەشداریان لە دروستكردنی ئەو ڕێكخراوە وەحشیگەراییە كردییە ، مەبەست و نیازی خۆی ھەیە . مەبەستی توركیای سەرەكی لە ھاوپیمانێتی و خزمەتكردنی ئەم دڕندانە كە دژ بە كۆی بەھاكانی مرۆڤایەتین بە پلەی یەكەم و بەتایبەتی لێدانی گەلی كوردە لە ڕۆژئاوای كوردستان و لەباربردنی دەسكەوتەكانێتی . ھەروەھا لە باشووری كوردستانیش كە دەركەوت كاتێ ھێرشەكانی داعش لە شێوەی ھێرشەكانی (سەلەمە ) وھۆلاكۆ بۆسەر ناوچەكانی گەرمەسێر، ژەنگار و مەخمور كە بووە ھۆی كومەڵكوژی وڕفاندنی ھەزاران كچ و ژن و منداڵانی كوردانی ئێزیدی ، كەچی توركیای دۆستی حكومەتی ھەرێمی باشووری كوردستان ، بەتایبەتی پارتی دیموكراتی كوردستان ، كە توركیا بوویتە دابەستی لەسەر سامان و خێروبێری گەلی كوردستان ، چاوی كوێر بوو و خۆی كەڕ وڵاڵكرد و نووزەی لێوەنەھات ، تەنیا بە وشەیەكیش نارەزایی دەرنەبڕی و پاڵپشتی دۆستە دڵسۆزەكانی نەكردن و بەھانایانەوە نەھات. لەو كاتەی دەنگی ناڕەزایی و ئامادەیی پاڵپشتیكردن لە باشووری كوردستان بەتایبەتی كە مەترسی گەیشتە سەر ھەولێر لەلایەن زۆر لە وڵاتان بەرز بۆوە ، بە كرداریش ھاتنە مەیدان بەتایبەتی دوای ھاتنی ئەمەریكا بۆسەر خەت و ھۆشیاری دا كە ھەولێر ھێڵی سوورە بۆ ئەوان بەھۆی ئەو بەرژەوەندییانەی ھەیانە . بەڵام توركیای داگیركەری خوێن مژی گەلی كورد كە كوردستانی تەنیتەوە بە دامودەزگا سیخوریەكانی و كۆمپانییە بازرگانەكانی كە ساڵانە چەندین ملیار دەستكەوتێتی و ئابوری پێقەبە و بەھێز دەبێت،جگە لەو نەفتەی بۆی ڕەوان دەكرێت و پارەكەی لای ئەوان لە بەیتولماڵ گڵدەدرێتەوە ، ئینجا ھەڵوێستی ئەوە بوو كەی داگیردەكرێ وخەڵكەكەی دوچاری قڕكردن و جینۆساید دەبن بۆ ئەوەی ڤایرۆسەكانی ببنە ھاوسێی . كورد لە خۆڕا نەیگۆتییە (ئەگەر دوژمن بووە پرد بەسەری دا مەڕۆ) ، چونكە جێی بڕوا و متمانە نییە و چەشنی مارە دەرفەت ببینی پێتوەدەدا . ئێستاش دوای ڕووسووڕاندنی چەتەكانی ئەردۆغان لە 15ی ئەیلول دا بۆ كۆبانێ و ئابڵۆقدانی لە سێ لاوە ، لە باكووریش لەلایەن توركیاوە ، كە ڕێگرە لە ھاوكاری و گەیاندنی ئازووخە و چەك و تفاقی پێویست ، وە بەربەست دانان لەپێش ئەو گەنجانەی كە ئامادەن لە باكووری كوردستان دەربازی كۆبانێ بن بۆ بەھێزكردنی سەنگەرەكانی برا و خوشكەكانیان لە یەكینەكانی پاراستنی گەل و یەكینەكانی پاراستنی ژن . تەنیا ڕێگا بەچۆڵكردنی ناوچە كان دەدات كە گەلی كورد ئاوارە و دەربەدەر و پەرت و بڵاوببنەوە دوور لە زێدی باووباپیران و دەست بەسەرداگرتنی لەلایەن چەتەكانی دوڵەتی خەلافەتی ئیسلامی مۆدێرن كە مزگێنی دادپەروەری ، ئازادی و ڕێزگرتن لە مافەكانی مرۆڤ و سەربەخۆیی و ئاشتی و ژیانێكی دیموكراسی بۆ گەلانی ناوچەكەی لە ھەگبەدایە ، ڕەنگە مەھدی چاوەروان كراو بێ كە موسڵمانان خەون بەو ڕۆژەوە دەبینن ، !
ڤایرۆسەكانی ئەردۆغان بە خەیاڵی خۆیان وایان مەزەندە دەكرد كە ئەوەی بۆیان لە موسڵ و ناوچەكانی دی عێراق ، وە لە باشووری كوردستان ، لە ژەنگار و دەوروپشتی تا دەگاتە مەخمور و گوندەكانی كە بۆیان ڕەخسا و سازكرا و دەرگا خرایە سەرپشت ، وەكو پێشوازی لێكردنی و پێشكەشیان كرا و دەستیان بەسەر داگرت ، گوایە ھەمان شت لە كۆبانێی لانەی شێران و قەڵای پۆڵایینی بەرخودان و كەرامەتی نەتەوەی كورد بۆیان دەڕەخسێ و كۆمەڵ كوژی ئەنجام دەدەن و كۆتایی بە دەستكەوتەكانی گەلی كورد لە ڕۆژئاوای كوردستان دێنن كە خەون و ئامانجی توركیای تیرۆریستە كە ھەرگیز نایبینێ . شاعیری گەورەی عێراقی (محەمەد مەھدی جەواھیری) لە ھەڵبەستێكیدا سەبارەت بە گەلی كورد دەڵێ " گەلێك كۆرەگەكانی كەللەی سەران و خوێن بێ ،دونیا تێكدەشكێ ئەو تێكناشكێ " داستانی كۆبانێ سەرنجی گەلان و دەوڵەتان و میدیاكانی بۆ لای خۆی ڕاكێشایە ، خۆڕاگریەكە كە لە مێژووی ھاوچەرخدا نموونەی كەمە ، ھەر چەندە تاكو ئێستا بە كردار شتێكی ئەوتۆی بۆ نەكرایە لە ئاستی ئەو مەزنایەتییە بێت .
ئەمەریكا 30 40 دەوڵەتی لە خۆی خڕكردیتەوە بەناوی ھاوپەیمانی بۆ شەڕی چەتەكانی توركیا ، كۆبانێ ئەوە نزیكەی مانگێكە بەتەنیا شەڕی داعش دەكات بە چەكی سووك و تفاقێكی كەم بە بەراورد بەو چەك و جبەخانە زەبەڵاحەی ئەو چەتانەی سەردەمی جاھیلی كە لەبەردەستیانە ، سوپا شڕو پەڕپووتەكەی مالیكی كە وەكو دیاری پێشكەشی كردوون . ! خۆڕاگری نەبەردانی كۆبانێ لە كوڕ و كچانی دەگەڕێتەوە بۆ مەشقی سەربازی و پەروەردەی فكری و زھنی لەسەر ڕۆشنایی ئایدیۆلۆژیای ڕێبەری گەلی كورد (عەبدوڵڵا ئۆجەلان) . كۆبانێ جۆش و خرۆشی خستە دڵ و دەروونی گەلی كورد لەناوەو دەرەوەی كوردستان ، خۆپیشاندان ، ڕێپیوان و ناڕەزایی لەسەر بێدەنگی و بێھەڵوێستی كۆمەڵگای نێودەوڵەتی و بەردەوام بوونی یارمەتییەكانی توركیا بۆ چەتەكانی . لەھەمان كاتدا ڕەخنە و ناڕەزایی ھەندێ لایەن و كەسایەتی بەرز دەبێتەوە لەمەڕ خەم ساردی بەرامبەر بە كۆبانێ ، لەم بارەیەوە بەرنارد كۆشنەر وەزیری دەرەوەی پێشووی فەرەنسا دەڵی (ئێمە ئەم نامەردیەی خۆمان بەچی تاجیدار بكەین ، كوردانی سوریا بۆ ڕزگاركردنی كوردانی ئێزیدی بە قارەمانی شەڕیان كرد ، سەیركردنی كوشتنی كورد ئابڕووچوونە) ھەروەھا رەخنە لە توركیا بەم شێوەیە دەگرێت : داعش مۆڵەتی ھێرشی سەر كوردان لە توركیاوە وەردەگرێ. پەیامەكەی ئۆجەلان كە لەم دواییەدا لەدوای چاوپێكەوتنەكەی محەمەدی برای كە بڵاویكردەوە كە تێیدا دیاریكردووە كە پێڤاژۆی ئاشتی و كۆبانێ پەیوەستە پێكەوە ، كەوتنی كۆبانێ كۆتایی بە ھەموو شتێك دێنێت و تا 15 ی ئەم مانگە مۆڵەتی بە توركیا داوە ، وە بانگەوازەكەی كۆما جڤاكی كوردستان كە داوای ڕاپەڕینی سەرتاسەری لە خەڵكی كوردستانی باكوور كرد دژ بە سیاسەتی تورك بەرامبەر كۆبانێ و گەلی كورد كە بووە ھۆی تەقینەوەی ناڕەزایی چەشنی بوركان لە شارەكانی باكووری كوردستان ، دەیان شەھید و سەدان برینداری لێكەوتیتەوە و بە سەدانیش گیراون ، ئەم ڕاپەڕینانەش بەردەوامن .
كاتی ئەوە ھاتووە كە توركیا باجی ئەو سیاسەتە دوژمنكارییەی دەرھەق بە گەلی كورد بدات ، ئەویش بەو ڕێگایە دەبی كە ئەگەر شەڕ لە دوای 15 ی ئەم مانگە كە مۆڵەتەكەی (ئۆجەلان) دابووی بە ئەردۆغان كۆتایی دێت و ئەگەری شەڕی گەریلاكانی كوردستان دژی توركیا دەست پێبكاتەوە ، ڕاپەڕینیش لەناو شارەكانەوە دژی دامودەزگاكانی داگیركەری تورك ، سەربازی ، ئابوری ، بازرگانی و گەشتوگوزار كە بڕبڕەی پشتی ئابوریی و بەردەوامی سیاسەتی قڕكردن و داننەنان بە مافەڕەواكانی گەلی كورد نەك تەنھا لە باكووری كوردستان ، بەڵكو لە ھەر بەشێك گەلی كورد كە خەبات لە پێناوی دەكات ، بە شێوەیەك كوردی قبوڵە وەكو كۆیلەیەك و خزمەتكارێكی دڵسۆز و گوێڕایەڵ ، كە ئامادەبێ بە چەشنی كەو ڕاوی كوردی بۆ بكات و بیخاتە داوەوە و ملی بشكێنێ بۆی .! ئەوەی لە كۆبانێ ڕوودەدات ، بە ھەموو یاسا و شەریعەتێك مافی خۆیەتی گەلی كورد بە ھەمان شێوە ئەنجامی بدات لەناو ماڵی دوژمن ، كۆبانێ گوڕی ئاگری لێھەڵدەستێ ، چڕە دوكەڵ ئاسمانی داپۆشیوە ، لەلایك ڤایرۆسەكانی ئەردۆغان و ھاوپەیمانەكانی لە دروستكردنی ، لەولاشەوە توركیا خۆی سنووری لێگرتینە بە تێل و خەندەق لێدان بە ھەماھەنگێ لەگەڵ حكومەتی ھەرێمی كوردستان كە تائێستا ھەڵوێستەكی نەتەوەیی نیشان نەداوە سەرەڕای ئەو ھەموو رەخنە وناڕەزاییەی لێیدەكرێ .! گرنگە شەڕی دەستەڵاتی تورك لە ھەموو ئاستێكدا كە مەترسیدارترین دوژمن و داگیركەرە . لە باشووری كوردستان ، توركیا دەستی باڵایە وبەرژەوەندی زۆر و زەوەند و زەبەڵاحی ھەیە ، دەكرێت لەسەر ئاستی حكومەت چاو بە زۆر لایەن بخشێنرێتەوە ، لە بواری بازرگانی ، نەفت ، قوتابخانەكان و دانیشگای عیشقی فەتحوڵڵا گوڵەن كە ژەھر بڵاودەكاتەوە لە جیاتی زانست و پەروەردەی سەردەم ھەر وەكو خۆی ڕاشكاوانە دانی پێدادەنێت كە بۆ بڵاوكردنەوەی زمان و كەلتوور و مێژووی توركە لە نێو خێزانەكاندا و دوور خستنەوەیان لە كوردایەتی و كورد بوونیان . دەڵێ قوتابخانەیەكم لە دوای 2003 دا كردەوە دوای ڕەزامەندیم لە ئەردۆگان وەرگرت ، پاش ئەمە (جەلال تاڵەبانی و مەسعود بارزانی) داخوازی كردنەوەی قوتابخانەی زیاتریان لێكردم .! وە خاڵێكی دی گرنگ داواكردن بۆ ڕۆیشتن و باركردنی ئەو پایگا وئۆرد وسەربازیانەی لە چەند ناوچەیەكی كوردستان دا ھەیە ، ھەر چەندە بڕوا ناكرێت دەستەڵاتدارانی باشووری كوردستان ئەو ھەنگاوانە بگرنە بەر . بەڵام لەلایەكی دی خەڵكی كوردستان ، دوای ئەو مەترسیانە و كارەساتانەی بەرەو ڕوویان بوویتەوە ، بێدەنگی و بێھەڵوێستی توركیا و ھاوكاری بەردەوامی بۆ ڤایرۆسەكانی دژی گەلی كورد كە بوویتە ھۆی بەرز بوونەوەی ئاستی وشیاری و ھەستی نەتەوایەتی و ھەستكردنی زیاتر بە بەرپرسیارەتی سەر شانیان كە دەتوانن سزای توركیا بدەن و تۆڵەی كۆبانێی خۆڕاگری لێبكەنەوە بە پەیڕەكردنی ئەو ھەنگاوانە : 1 بایكۆت كردنی كەلوپەل و ھەر بەرھەمێك كە لە كۆمپانییەكانی توركیا دروستكراوە و ھاوردەی كوردستان دەكرێ . 2 وەكو ئەركێكی نیشتیمانی ، ئەخلاقی و مرۆڤایەتی ، بازرگانان بەرھەم و كەلوپەلی كۆمپانییەكانی توركیا ھاوردە نەكەن و بایكۆتی بكەن . 3 دانیشگای عیشق و چەندین قوتابخانە كە لە باشووری كوردستان كراینەوە بە تایبەتی لە شاری ھەولێر كە مەترسیدارترین و ترسناكترین چەكە بە دەست تورك كە بە كاری دێنێ بۆ تاواندنەوەی كورد ، دایكان و باوكان ئەگەر خەمخۆری جگەر گۆشەكانیانن و پەروەردەیەكی دروست و ساغ و سەلامەت بۆیان دابین بكەن لە كورد بوونیان نەشوورێنەوە ، پێویستە منداڵەكانیان نەنێرنە ئەو قوتابخانانە كە ساڵانە دۆلارێكی زۆر لە خەزێنەی تورك دەكەن بۆ سەقەت كردنی منداڵەكانتان و بوونیان لە ئایندەدا بە كادیرانی داگیركەری توركیا . 4 بە داخەوە ژمارەیەكی زۆر لەوانەی باری بژێوی و ئابورییان لەبارە و خاوەنی پارە و پوولن ، مناڵەكانیان ڕەوانەی خوێندنگاكان و دانیشگاكانی توركیا دەكەن كە ساڵانە پارەیەكی زۆر دەخەنە سەر ئابوری توركیا ، كە ئەمەش خۆی لە خۆیدا ناھۆشیاری و كەمتەرخەمی و ھەست نەكردن بەوەی كە ئاو لە ئاشی دوژمن دەكەن و نزمی ھەستی نەتەوایەتی دەردەخات كە لای ئەو خەڵكە لەچ قۆناغێك دایە . داگیركەرێك بە ئاگر و ئاسن برا و خوشكەكانت كۆمەڵ كوژ و سەركوت دەكات و دە یچەوسێنێتەوە ، كەچی لاوازترین ھەڵوێستت بەرامبەری نەبێ .! 5 ئەنجام دانی ڕێپێوان و خۆپیشاندان بۆ فشار خستنە سەر دەستەڵات و لایەنە پەیوەندیدارەكان لە باشووری كوردستان بۆ داخستن و لابردنی ئەو بنكە سەربازیانەی كە چەندین ساڵە توركیا دایمەزراندوە ، گوایە ھاتوون وەكو ھێزێكی پاراستنی ئاشتی و ناوبژیكەر و چاودێری نێوان یەكێتی و پارتی لە سەردەمی شەڕی ناوخۆی نێوانیانەوە كە تاكو ئێستا دایكوتاوە و لێی پاڵدایتەوە و كەس ناتانێ بەلایدا تێپەڕێ .! كۆبانێ سەلماندی ، كە گەلێك خاوەنی ئیرادە و تامەزرۆی ئازادی بێ ، كچان و ژنانی كە دەگمەنە لە مێژووی كۆن و نوێدا بەو شێوەیە شان بەشانی برایەكانی سەنگەر لە دوژمن بگرن ، سینگیان قەڵغان بێ كە جیھان سەرسامە پێیان ، ئەم بەچكە شێرانەی پەروەردە بە خۆشەویستی خاك و گەلەكەیان و مرۆڤایەتی بە گشتی ، بوونەتە شوورایەكی پۆڵایین بۆ نەتەوەی كورد كە بەكردار دەریان خست لە ژەنگار ، مەخموور ، گەرمیان وئێستاش كۆبانێی قەڵای شێران ، بێگومان سەركەوتن و دواڕۆژ بۆ ئێوەیە . سەربەرزی و شكۆمەندی بۆ قارەمانانی خۆڕاگری كۆبانێ ، شەرمەزاری و ڕووزەردی و نەفرەتیش لەوانەی دەستیان ھەیە لە نەخشە و پیلانی ھێرش و گەمارۆی سەر كۆبانێ .

"سەلەمەی كوڕی قەیسی ئەشجەعی : فەرماندەیەكی سوپایەكەی خەلیفەی دووەمی ئیسلام بووە ، دەڵێ كاتێ ڕەوان دەكراین بۆ داگیركردنی ئەو ناوچانە ، خەلیفە پێی گوتین بەناوی خواوە داگیر دەكەن و دەست بەسەر دادەگرن ، وە لە سێیان دەبی یەكێك ھەڵبژێرن ، یان دێنە ناو ئیسلام ، ئەگەر نا جزیە دەدەن ، ئەگەر ڕازی نەبوون شەڕیان لەگەڵ دەكەن . دوای ئەوەی گەیشتینە ناوچەكە و تووشی كوردە كافرەكان ھاتین ، ڕاسپاردەكەی خەلیفەمان پێڕاگەیاندن ، بەڵام ڕەتیان كردەوە بێنە ناو ئیسلام یان جزیە بدەن ، بۆیە كەوتینە شەڕ لەگەڵیان ، ئەوەی پیاو بوو و دەستی چەكی دەگرت شەڕ بكات لەناومان بردن ، دەستمان بەسەر كچ و ژن و منداڵەكانیان داگرت ، وە ئەوەی ھەیان بوو لە سامان .!