بارودۆخی ڕۆشنبیری كەركوك

Saturday, 16/10/2010, 12:00

1583 بینراوە

جگە لەوەى پایتەختە ڕۆشنبیریەكە زیاتر قسەى سەر كاغەز بوو، ئەوە ئیتر بەتەنێ دوو مانگ و شتێكى ماوە و هیچیش نەكرا، لەگەڵ ئەوەشدا شارەكە لەڕووى چالاكى ڕۆشنبیرییەوە تەواو بێناز كەوتووە، ئەوەتا ڕۆژانە لە شوێنەكانى دیكە بۆنە و دیداری ڕۆشنبیری بەڕێوە دەچێت و كەركیەكانیش لەبری ئەو بۆنانە یان لە شین دان، یان لە چلەى ئازیزەكانیاندا، لە ڕابردوودا بە تەقەلاى یەك دوو برادەر چەندین چالاكى ڕوناكبیریمان لە كەركوك بەڕێوەبرد و یادى هەریەكە لە ئەسیری، شێخ مارف بەرزنجى، خەلیل منەوەر، سابیریمان كردەوە، دیارە زۆری دیكەش هەیە، كە شایانى یادكردنەوەن، شایانى ئەوەن دیداریان لەبارەوە بكرێت، ئاوڕیان لێ بدرێتەوە، ئەو یادانە بە بودجەى زۆر كەم بەنرخى نەبوو كراونەتەوە.. ئێستا ئەوانەش نەما، وەك بڵێی ئەم شارە كەس خاوەنى نییە، ئەمە لە كاتێكدا یەكێكە لە شارە هەرە دەوڵەمەندەكان لە بواری فەرهەنگ و ڕۆشنبیریدا، لە راستیدا من نازانم ئەم دەردە دڵە بۆ كێ دەكەم، لەكاتێكدا، كەركوك لە نێوان دوو بەرداشا، دەبێ هەر بڵێ"بە جارێ ماڵی وێرانم ئەمیشم چوو ئەویشم چوو"، ئێستا كەس نییە ئاوڕ لە سەرگۆن پۆڵس و جان دەمۆ و جەبار جەباری و مامەند كەركوكى و عەلی مەردان و هابە و بەدیع باباجان و ئەستێرەكانى دیكەى ئەو ئاسمانە بداتەوە، وەكى دیكەش سبەینێ هەزار و یەك كوێخا و ئاغا پەیدا دەبن، من دەمێكە هاوار بۆ لۆبی كەركوكى دەكەم، بەڵام دیارە شتێك نییە ناوى لۆبی كەركوكیى بێت و هەر كاكە و بیر لە گیرفانى خۆی دەكاتەوە، بۆیە پێم وایە ئێستا لە هەر كات لەبارترە بۆ ئەوەى بیر لەوە بكەینەوە گرووپی فشار، هێزى فشار دروست بكەین، گرووپگەلی فشار بۆ ئەوەى لانى كەم ڕێگە نەدەین نەوتەكەمان بە خۆڕایی بڕوات و شارەكەش جگە لە وێرانەیەك هیچی دیكە نەبێت، بە تاڵانبردنى ئەو نەوتە و دزینى پارەكەى وا خۆی دەدات لە نزیكەى (100) ساڵ، كەچی وەرە سەیری كەركوك بكە، ئەو كەركوكەى سیاسییەكان و رۆشنبیرەكان و هونەرمەندەكان بەباڵایدا دەچڕن و ڕۆژ بە ڕۆژیش وێرانتر دەبێت، عەلی مەردانى بەهەشتى لە گۆرانیەكدا دەڵێ: "ڕەنجى بێوەرم داد بۆ كێ بەرم".
كەركوكیەكە لەم بارودۆخە ناجۆرەدا داد بۆ كێ بەرێت، ئەدى ئێمە لە داكۆكى كردن لە كەركوك لەسەر هێشە بەو لاوە چی دیكەمان دەستكەوتووە. ئەوە بۆچی ئەو خەمە نابێتە خەمێكى سەرتاسەری، بەبڕواى من هۆیەكەى هەر ئەوەیە، كە نەمانتوانیوە لە ڕێگەى گرووپەكانى فشارەوە، كێشەى كەركوك بكەینە كێشەیەكى میللی، هۆیەكى دیكەش سیاسەتە، لە كەركوكدا ئەوانەى نایانەوێت، ڕووى جوانى ئەو شارە دەربكەوێت، ئەوانەى نایانەوێت كەركوكێكى جیاوازتر ببینین، هەمیشە لە ڕێگەى گرفتە سیاسییەكانەوە تەنگ و چەڵەمە بۆ شارەكە و خەڵكەكەى دروست دەكەن، گیروگرفتە سیاسییەكان بۆ ئەوەن، كە كەركوكیەكان نەپەرژێنە سەر ئەوەى یەكتریان خۆش بوێت، یان بە ئاسوودەیی لە كەشێكى ئارامدا ئاوڕ لە ڕابردوودى شارەكەیان بدەنەوە، شارێك كە هەڵدەگرێت پرسەكەى لە چوارچێوەى فرمێسك و وادە و بەڵێنەوە بگوازینەوە بۆ خزمەت و ئاوڕ لێدانەوە، ئاخر ناكرێ ئەو شارە، كە بە گاز و نەوت و كەلتوور و نەتەوە و ئاین و خاك و خەڵكى باش دەوڵەمەندە هەمیشە چاوى لە دەستى شوێن و خەڵكى دیكە بێت، ناكرێ بەردەوام بواری هەناسەدان لە كەركوك لە قاڵب بدرێت و لەولاشەوە بە كەركوكیەكان بگوترێت ئێوە خۆتان هەر ئەوەتان هەیە، وەك قسەى ئەو پیاوەى، كە دەیگوت: ئەم قوڕە هەر ئەو تۆزەى لێ هەڵدەسێت، پێم وانیە ڕاستیەكە ئەوە بێت، كە لە كەركوكدا كەس نییە، ڕاستیەكە ئەوەیە كە نایانەوێت كەس هەبێت، بۆیە دەبینم بەناچاری بەشێك لە كەركوكیەكان لە شوێنان و شارانى دیكە خزمەت دەكەن، دەى خۆ ئەوەش كارێكى چاكە، بەڵام خۆ ناكرێ كەركوكە بە تەواوەتى لەبیر بكرێت. ئەمەى ئێستا هەیە لە لەبیركردن ترسناكترە، هەر ئەمەشە ناچارمان دەكات ئێمەش بیر لەڕێگاى دیكە بكەینەوە، ڕێگاى كەركوك بۆ كەركوكیەكان، نەوتى كەركوكیش بەر لە هەر كەس بۆ كەركوكیەكان و دواتر بۆ خەڵكى دیكە.