تەماشاكەن لەترسى راپەڕینى حەڤدەى شوباتى ئایندە دەزگا ئەمنیەكانى سلێمانى و بەرپرسەكانى چۆن تۆقاون !!

Thursday, 09/02/2012, 12:00

1787 بینراوە



 


لاى هەمووان ئاشكرایە كە ئەوەى بەبازوو و قوربانى و خوێنى خۆنیشاندەرانى حەڤدەى شوباتى ساڵى پار هاتە ئاراوە .. وانەبوایە پەنجا ساڵى تر یەكێتى و پارتى ئەمجۆرە تەنازولەیان بۆ میللەتەكەمان نەدەكرد و لە كەشكەلانى بوغرایى و لەخۆبایبوونى خۆیان نەدەهاتنە خوارەوە ، بۆ نموونە چــــمــا حەڤدەى شوبات نەبوایە دكتۆر بەرهەم فەرمانى دەكرد بەگێڕانەوەى موڵك و ماڵى میرى و تایبەتى [هەرچەندە فەرمانەكە جێبەجێش نەكرا] ، یان حەڤدەى شوبات نەبوایە سەرۆكى هەرێم سزادراوانى سیاسى ئەگەڕانەوە بۆ سەركارەكانى خۆیان یان پەیام و قسەى خۆشى ئاراستەى میللەتەكەى خۆى دەكرد .. هەزار و یەك ئەگەرى ترى لەم بابەتە .
ئیستا هەینى داهاتوو ساڵیادى خۆنیشاندانەكانى ساڵپارى حەڤدەى شوبات و دواترە كە بەخوێنى لاوەكانى شارى سلێمانى تیایدا شەقامەكان نغرۆى خوێن رەشبگیرى و تۆقاندن و راوەدوونان بوون ، دیارە بەهەرچى گوزارە هەیە لەوشەدا بەرپرسە حیزبى و حكومییەكان رەنگى مردووەكانى گۆڕستانیان لێنیشتووە .. بەتایبەتى پاش ئەوەى ساڵیادى ئەمجارە و هەڕەشەكردنى لاوان بەخۆنیشاندانى سەرتاسەرى هاوشانى زۆر گۆڕانكارى و رووداوى گرنگە لە كوردستان و ناوچەكەدا ، بۆنموونە شۆڕشە خوێناویەكەى سوریا بۆتە وانەیەكى زیندوو بۆ هەموو میللەتێكى ستەمدیدە و بەشخوراو و چەوساوە كە ئاگر و ئاسن و سەركوتكردن و مەرگیش ناتوانێ ئاگرى رقى رەواى گەلێكى كۆیلە دابمركێنێتەوە ، ئەمە ئەو راستییەیە كە هەموو ستەمكارێكى خاوەن دەسەڵاتى تۆقاندووە لەسەرى هەمووشیانەوە سەرانى یەكێتى و پارتى ، گۆڕانكارییەكى تر رووداوەكانى سووتاندنى بارەگاكانى یەكگرتووى ئیسلامیە لەلایەن دەسەڵاتى پارتیەوە لە بادینان ، ئەمانە هەمووى هاوشانى ئاشكرابوونى سەدان دۆسیەیى گەندەڵى و دزى و جەردەیەیى و بەهەدەردانى سامانى گشتى وڵات هەموویان پێكەوە بونەتە سووتەمەنى راپەڕینى داهاتوو .
ئەمڕۆ بەرپرسى دەزگا ئەمنى و حیزبیەكانى سلێمانى بەتایبەتى زەندەقیان چووە لەوەى خۆنیشاندانەكانى ئەمجارە رایانماڵێت و كۆتایى بەدەسەڵاتى گەنیان بهێنێ ..   ئاسایش و سەرۆكایەتى ئەركان و فەرماندەى گشتى و فەوجى بەرگرى فریاكەوتن و زێڕەڤانى هەموو مۆڵەتەكانیان راگرتووە و بەهەزاران دارە دەستیان بۆ پۆلیس و سەربازەكانیان كڕیووە ، ئەوەتا مەڵبەند و كۆمیتەكان هەموو رۆژێ كۆبوونەوە لەگەڵ ئەنجوومەن و فەرمانبەرەكاندا دەكەن و چاوێكیان كردووە بەهەزار .
بەهەرحاڵ ئەمە حاڵى دەسەڵاتى دیكتاتۆرە جـــــا هەرچى بكەن هەر بەئەندازەى بەعسى سوریایان پێدەكرێ ... لەهەمووشى گرنگتر ئەوەیە كە ئەم سەرە گەندەڵە جەردانە ئەبێ زۆر باش بزانن كە راپەڕینى جەماوەرى سەرتاسەرى بەرێوەیە ئەگەر لە ئەفریقیاوە كرێگرتەش هاوردە بكەن و بیكەنە پۆلیس و سەربازى زەرد و سەوز ، ئەوكاتەى جەماوەریش هەستایە سەرپێ تەنها ئەوكاتە ئەم سەرە تاوانبارانە كێشى راستەقینەى خۆیان دەزانن .

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست


چەند بابەتێکی پێشتری نووسەر




کۆمێنت بنووسە