نیشتمان ماڵى گشتمانە

Sunday, 04.24.2011, 12:00

1089 بینراوە






لەبەر ڕۆشنایی دۆستایەتییەك كە تۆ زیاتر هۆى پتەوبوونى بوویتە ، ئەگەر چى جاروبار بەهۆى منەوە ڕەنگە ساردیشى تێكەوتبێ، بۆئەوەی ئەو دۆستایەتییە قوڵتر لە برایەتیی پەیوەندییەكان گرێ بدات، پێم خۆشە وەكو سەرۆكی حكومەت، پێكەوە مەسەلەی خوێندنەوەمان هەبێت و هەر پێكەوە سەیرێكی نیتشیمانی ئەم گەلە بێ تاج و تەخت و بەختە بكەین. ناكرێ پرسە نەتەوەكانی ئەنفال و هەڵەبجەو نەورۆزو راپەڕین و كۆڕەو لەتوپەت بكرێن و حزب لە میللەتیان بسەنێتەوە، نە ئۆپۆزیسیۆن، نە دەسەڵات، واتە حزبەكانی دەسەڵات بەتەنیا خاوەنی ئەو بۆنانە نین و ناتوانن خاوەنی بن، هەروەها دیموكراسی و ئازادیش دیاریی حزبێك نین، تا خۆی پێوە بابدات و ئەوە كەمترین دەسكەوتی خوێنی ئەنفال و هەڵەبجەو راپەڕین و كۆڕەو و كێشە لەوەدایە هەندێ جار سەرۆك جاشیش خۆی دەكاتە خاوەنی دیموكراسی و ئازادی، لەكاتێكدا دەبوایە ئەو سەرۆك جاشە ئەگەر قەفەسی زیندانیشدا نەبوایە، ئێستا داوای لێبوردنی لە میللەتەكەی بكردایە، ئازادی و دیموكراسی نە هی یەكێتی و پارتین، نە هی حزبە ئیسلامییەكانن، بەڵام بەرپرسیارێتی پاراستنی ئازادی و دیموكراسی لە ئەستۆی حكومەتدایە، حكومەت لە رێگەی دەنگی میللەتەوە دروست دەكرێت و ئەویش لە رێگەی یاساو پۆلیس و ئاساییشەوە ئەم وڵاتە دەپارێزێت و دیموكراسی و ئازادی زیاتر پەرە پێدەدات، حكومەت داردەستی هیچ حزبێك نییە، نەخۆی و نە پۆلیس و ئاساییش و هێزەكانی، دڵنیام سەرۆكی حكومەت بەهیچ شێوەیەك سەرۆكی حكومەتێك نابێت كە حزب لە كاروباری وەربدات، من لە نزیكەوە ئەو سەرۆكی حكومەتە دەناسم و لانی كەم دۆستایەتی و یەكترناسینمان دەگەڕٍێتەوە بۆ (11) ساڵ لەمەوبەر، لەگەرمەی ئازادكردنی عێراقیشدا لەسەر داوای ئەوە زیاتر لە مانگێك ماڵ و منداڵم بەجێهێشت و لە باشووری عێراق لەگەلأ تیمێكدا بەدوای ئێسك و پروسكی ئازیزاندا دەگەڕام، كە حكومەت بەرپرسیارە لە ئازادی و دیموكراتی لەم وڵاتە، پێویستە بەدواداچوون بۆ كێشەی ئەو هاووڵاتییە بكات كە پێڵاوی پێ ماچ دەكەن و سووكایەتی پێ دەكەن، پێویستە بەدواداچوون بۆ دۆسییەی دكتۆر پشتیوان و رێبین ئەحمەد هەردی و هەموو ئەوانە بكات كە سووكایەتییان دەرهەق كرا، پێویستە سەربكات بە ماڵە بێنازەكەی شەهید گەرمیانداو هەر لەوێ بڕیاری ئەوە بدات كە باشترە وەزیری ناوخۆ بچێتە ماڵەوە، ئەمە چەند رێزگرتنە لە ماڵی شەهید گەرمیان، دە ئەوەندە رێزگرتنە لەو بەڕێزەی كە وەزیری ناوخۆیە، دەبوایە ئەو بەڕێزەی خۆی ئەو كارەی بكردایە، نە ئۆپۆزیسیۆن فریشتەن، نە حزبەكانی دەسەڵات شەیتانن. حكومەت بەرپرسیارە لەوەی لەم نێوەندە وا بێلایەنی خۆی بپارێزێ و بە چاك چاك و بە خەراپ خەراپ بڵێ، من دەزانم لەم ساڵ و كەمەدا حكومەت لە شەڕێكی دەستەویەخەدا بووە لەچەند بەرەیەكەوە لەلایەكەوە لەگەلأ ئۆپۆزیسیۆن، لەلایەكەوە لەگەلأ ئەو هەموو ستەمكارییەی عێراق دەرهەق بە كوردستان دەیكات، لەلایەكەوە لەگەلأ مافیای ناو حكومەت، مافیاكانی گەندەڵی و نادادی، لەلایەكی دیكەشەوە لەگەلأ ئەو حزبانەی خۆیان، ئەم حكومەتەیان دروستكردووە، لەگەلأ پارتی و یەكێتی لەشەڕدا بووەو هەنگاویشی بۆ چاكسازی ناوە، ، بێویژدانییەكی گەورەیە ئەم هەنگاوانە نادیدە بكەین، بەڵام شەڕی گەورە، شەڕی نەیارەكانی سەرۆكی حكومەت و حكومەتە لەناو پارتی و یەكێتیدا، كێ رێگا دەدات پاسەوانەكانی لێ بسێنێتەوەو دیوەخانانەی ببڕیت و شیرینی بۆ نەهێلێ؟ كێ رێگە دەدات درزو كەلێنەكانی گەندەڵی بدۆزێتەوەو بیانگرێ؟ گرفتی راستەقینە لێرەوە دەست پێدەكات. ئێمە دەبێ شەرم نەكەین ئەو راستییە بە حزب بڵێین كە حكومەت لە حزب گەورەترە، دەبێ پێی بڵێین كە حكومەت ئاوێنەی میللەتەو خەڵك لەوێوە تەماشای ئێمە دەكات، نەك لە رێگەی حزبەوە، حزب نابێ ببێتە جێگرەوەی حكومەت، هەركاتێك حزب كار بۆ ئەوە بكات ببێتە جێگرەوەی حكومەت، نیشتیمان لە ماڵی گشتمانەوە، دەگاتە ماڵی خۆی، شاری لە شاری تەواوی خەڵكەكەیەوە دەكاتە شاری حزبێك، بۆنە لە بۆنەی هەموو گەلەوە دەكاتە بۆنەی خۆی، رەنگە ئۆپۆزیسیۆن لەوەدا هەڵەیەكیان كردبێت، لەبری دوورخستنەوەی دەستی حزب لەناو حكومەت، لەبری ئازادكردنی حكومەت، داوای هەڵوەشاندنەوەی حكومەتیان كردبێت.
من بڕوام وایە ئێمە دەبێ كوێخایەتی حزب بەسەر حكومەتەوە نەهێلین، نەك داوای هەڵوەشاندنەوەی حكومەت بكەین، ئەمە هەڵەیەك بوو، من هەر زوو قسەم لەسەركرد. ئۆپۆزیسیۆن هەوڵیدا داوای هەڵوەشاندنەوە بە میللی و جەماوەری بكات، هەڵەكە لێرەوەیە، دەبوایە كار بۆ ئەوە بكرایە، حزب لەم وڵاتە چاك بكرێتەوە، بەر لە حكومەت، ئاخر حزب ئەم هەموو رێكخراوە پیشەیی و جەماوەرییەی بۆچییە؟
ئاخر كە ئێمە خاوەنی حكومەتی خۆمان نین، حزب هێزی چەكداری بۆچییە؟، ئاخر هەرێمی كوردستان كە لێ پارێزگاو نیو پێكدێت، ئەم هەموو دەزگا سەربازی و ئەمنییە جۆراوجۆرەی بۆچییە؟، كە هەندێكیان ئێستاش بەهەمان بیركردنەوەی سەردەمی شەڕی ناوخۆوە بیر دەكەنەوە، ئەو سەردەمەی ئێمە لەگەلأ چەند برادەرێك، كۆمەڵەی دژ بە شەڕمان دادەمەزراندو خەڵكانی دیكەش لەسەر كڵاوقاسم و كەپكی حەمەد ئاغا، خوێنی لاوانی كوردیان شاباش دەكرد. ئۆپۆزیسیۆن دەبوایە شەڕی رزگاریكردنی حكومەتی پێش هەر شەڕێكی دیكە بخستبوایە، كە ئەوە نەكرا دەبێ چاوەڕوانی ئەم توندوتیژییە بكەین. حزبەكانی كوردستان بە حزبەكانی دەسەڵات و ئۆپۆزیسیۆنیشەوە دەبێ ئەوەیان لەبیر بێت، سیاسەت گەمە نییە ئەمڕۆ بەجۆرێك و سبەی بە شێوازێكی دیكە بێت، دەبێ هەردوولا ئەوە بزانن كە دەشێ لە هەڵبژاردنێكی دیكەدا رەنگە حزبێكی نێودەسەڵاتی ئێستا لەگەلأ حزبێكی ئۆپۆزیسیۆندا حكومەت دروست بكەن، ناكرێ هیچ بوارێك بۆ هەناسەدان نەمێنێتەوەو حكومەتیش بگلێنرێتە شەڕی میللەتەوە، ئاخر هەرچی رووبدات كوڕی سەركردەو سەرۆكەكانی دەسەڵات و ئۆپۆزیسیۆن خوێن لە پەنجەیان تیانییە، كوڕی میللەت دەبێتە سووتەمەنی، ئەمە لە رابردووشدا هەروا بوو، سەركردەو بەرپرسەكان لە شەڕی ناوخۆدا بەردەستی نەیارانیش بكەوتنایە چاوپۆشییان لێدەكرا، كەچی خەڵكی رەشوڕووت دەبووە قوربانی، لێرەوەیە حكومەت دەبێ راستوڕەوان رووی دەم بكاتە هەموولایەك و هەركێ دۆخەكە بشێوێنێ بیداتە دادگا، دەبێ رووی دەمیان تێبكات و پێیان بڵێ هیچ حزب و لایەنێك بۆی نییە، فەرمان بەسەر پێشمەرگەو پۆلیس و ئاساییشدا بكات، جگە لە حكومەت!!. لە پشتی چاوی حكومەتەوە تەقە لە هاووڵاتییان كرا، لە پشتی چاوی حكومەتەوە كەناڵی نالیا سووتێنرا، رۆژانە لە پشتی چاوی حكومەتەوە بەناوی حزبەوە هەڕەشە لە رۆژنامەنووسان، نووسەران، رۆشنبیران، پیاوانی ئایینی، هاووڵاتییان و خوێندكارانی زانكۆ دەكرێت، دیانەوێت حكومەت لە شەڕێكەوە بگلێنرێت كە شەڕی ئەو نییە، دەیانەوێ تۆڵەی ئەو چاكسازی و تەقەللای چاكسازییە لە حكومەت بكەنەوە لەمەدا دەبێ ئۆپۆزیسیۆن روونتر سەیری دۆخەكە بكات، شەڕ بۆ نەمانی گەندەڵی و نادادی بۆ ئەوە نییە، ستەمكاری بەرهەم بهێنێت، ستەمكاری خەریكە دێتە نێو ماڵەكانمانەوە، ئێمە دەمانەوێ پارتی و یەكێتی و گۆڕان و كۆمەڵ و یەكگرتوو بە شێوەیەكی دروست و بە گیانی پێكەوە ژیان و یەكتر قبوڵكردنەوە درێژە بە سیاسەت بدەن و بە گوێرەی رۆژگارەكە خۆیان چاك بكەن، ناكرێ نە كەس شەڕی حكومەت بەوشێوەیە كە حكومەتی ئەو نییەو با نەبێ، نە كەس منەتی ئەوە بەسەر حكومەتدا بكات، كە حزبەكەی ئەو حكومەتی دروست كردووە، یان بە هاوبەشی لەگەلأ حزبێكی دیكەدا خاوەنی حكومەتە.
بە میلیتاریكردنی هەر شارو شارۆچكەیەك، پاشگەزبوونەوەیە لە دیموكراتییەت، ئێستا لە باشووری كوردستان، لە زاخۆوە تا كفری پاشەكشەیەكی بەرچاو لە دیموكراسییەت بەدیدەكرێت، ئێستا رۆژانە لە زاخۆوە تا كفری دەستوەردانەكانی حزب لە حكومەت، دەبێتە هۆی ئیحراج كردنی سەرۆكی هەرێم و سەرۆكی حكومەت و حكومەت. ئاخر ئیحراج كردن نەبێت چییە، كاتێ سەرۆكی هەرێم داوای خۆپیشاندەران بەڕەوا دەزانێ و ئەوە وا لێكدەداتەوە كە ئەمە نیشانەی هۆشیاری كوڕان و كچانی میللەتە، كەچی لە هەولێر هەموو جوولەیەك لەژێر پرسیاردایە، دكتۆر پشتیوان كە لەسەر فانیلەكەی دەنووسێ، "نا بۆ گەندەڵی"، لەبری ئەوەی بانگ بكرێ و دەستخۆشی لێبكرێت، لەبری ئەوەی سەرۆكایەتی هەرێم و حكومەت شانازی بە هۆشیاری ئەم كوڕەیانەوە بكەن، دەبرێت و كورد وتەنی: چاوی دەكەن بە قۆخ!!، من بڕوام وایە دكتۆر بەرهەم ئەحمەد ساڵح پیاوێك كە زۆرێك لە تەمەنی لە بەریتانیاو ئەمریكا بەسەربردووە، پیاوێك كە زۆر بە وردی دیموكراسییەتی رۆژئاوایی خوێندۆتەوە، پیاوێك كە یەكێتی و پارتی بیانەوێ، یان نا بۆ خۆی ناوەو هەیەو پێشتر رۆڵێكی گەورەی لە ئەمریكا لە ناساندنی كوردو كێشەكەی گێڕاوەو دۆستی باشیشی بۆ حزبەكەی پەیداكردووە، ئئامادەبێت سەرۆكی حكومەتێك بێت، كە بەردەوام قەیرانی بۆ دروست بكرێت، كە بەردەوام ئەو بیەوێ چاكسازی بكات و رێگری لێبكرێت، ئامادە نییە ئەو حكومەتە بەڕێوەبەرێت، بە بڕوای من كەم رێكدەكەوێت یەكێتی و پارتی پێویستیان بە خەڵك بێت، بۆ كاروبارەكانیان، بۆ مەسەلەی پرسی بەڕێوەبردنی حكومەت، ئەوان پێویستیان بە دكتۆرە، نەك دكتۆر بەوان، ئەگەرچی پێشترو لەسەرەتای دەسبەكاربوونیان لەلایەن پارتی و یەكێتییەوە رووبەڕووی شەڕێكی گەورە بووەو تا ئێستاش بەدەستییەوە گیرۆدەیە، لە راستیدا ئێستا ئیدی كاتی ئەوەیە دكتۆر بەرهەم روون و رەوان بە یەكێتی و پارتی، بە كاك مەسعودو مام جەلال بڵێت: ئەگەر دەستوەردان لەكاروباری حكومەت كۆتایی نەیەت، ئیدی من ئامادەنیم ئەم حكومەتە بەڕێوەبەرم. ئیدی كاتی ئەوەی سەرۆكی حكومەت بە هەردوو حزب بڵێت و بەشێكی زۆر لەو شەڕەی ئێستای حكومەت لەلایەن ئۆپۆزیسیۆنەوە رووبەڕووی بۆتەوە هۆیەكی مامەڵەی پارتی و یەكێتییە، یان روورنتر بەشێك لە بەرژوەندییەكانی نێو ئەو دوو حزبەیە، یەكێتی و پارتی و گۆڕان و كۆمەڵ و یەكگرتوو، هەموویان دەرچووی نێو هەناوی ئەم كۆمەڵی كوردەوارییەن، نە هیچیان دوژمنن، نەهیچیان زیادن، عەیبوعاری نێو كۆمەڵی كوردەواری عەیبوعاری ئەوانیشە، بەپێچەوانەشەوە هەروایە، ئەوان وەك حزبی سیاسی، ئەو حزبانەی كە زۆرینەی هەرەزۆری كورسییەكانی پەرلەمان، لە كۆی (111) كورسی لای ئەوانە، لانی كەم دەكرێ بڵێم: بریتین لە زۆرینەی كۆمەڵیك كوردەواری ئەركی ئەوانە پەرە بە هۆشیاری سیاسیی كوردەواری بدەن، پەرە بە گیانی لێبوردەیی و یەكتر قەبوڵكردن و پێكەوە هەڵكردن بدەن، نەك رۆڵ لە قوڵكردنەوەی برینەكەدا بگێڕن، ئەو پێنج لایەنە پێكەوە هەر چۆن بەرپرسیارن لەوەی حكومەت پەرلەمانێكی تەندورست دروست بكەن، حكومەت و پەرلەمانێك كە لە دەرەوە ببنە هۆی جوانكردنی كورد، بەتایبەت پەرلەمانێك كە جێگای مشتومڕی دیموكراتی و جێگای داكۆكیكردن بێت لە مافەكانی خەڵك، نەك جێگای پاراستنی بەرژەوەندییەكانی حزب، ئاواش ئەم پێنج لایەنە بەرپرسیارن لەوەی كە پەرە بەرهۆشیاری نەتەوەیی بدەن، ئاواش بەرپرسیارن كە گیانی یەكخۆشویستن و رێًز لە یەكدی گرتن لەنێوان تاكەكانی كۆمەڵی كوردەواریدا پەرە پێبدەن.
هەر لایەنێك پێچەوانەی ئەمەی كرد، پێویستە حكومەت دەرگای دادگای لێبگرێت، پێویستە خەڵك بەر لە هەر كەسێك لایەنگرو ئەندامانی خۆیان ئەوە قەبوڵ نەكەن لێی، دەبێ داواكاریی گشتی بۆ داكۆكیكردن لە مافەكانی خەڵك، لە پاراستنی ئارامی و لە پاراستنی دیموكراتی لێی بێتەدەنگ و داكۆكی لە میللەت بكات، پێویستە سەرۆكی حكومەت و حكومەت بەر لەهەر لایەكی دیكە، دەنگی ناڕەزاییان لێ بەرزبێتەوە، من لای خۆمەوە هەر چاوەڕوانی هەنگاوی لەوجۆرە لە سەرۆكی حكومەت دەكەم.