حه‌مید حه‌میدی، ده‌نگێکی جوانه‌مه‌رگ و ئه‌وینێکی زیندوو!

Monday, 07/09/2009, 12:00

2288 بینراوە


به‌م زووانه‌ چوارهه‌مین ساڵوه‌گه‌ڕی مه‌رگی حه‌مید حه‌میدی یه‌. غه‌دره‌ ئه‌گه‌ر ناوی له‌ بیر بکه‌ین.
له‌ رۆژگارێکدا که‌ له‌ مه‌یدانی گۆرانی و کلیپی کوردیدا، مرۆڤ که‌متر هونه‌ر ده‌بێنێ، حه‌مید حه‌میدی کاری هونه‌ری به‌رچاوی ئه‌نجام ده‌دا، به‌ تایبه‌ت گۆرانی و کلیپه‌کانی ته‌ژی له‌ هونه‌ر و زه‌وق و جوانی و ناوه‌رۆکی ئینسانی بوو!
یه‌کێک له‌ نوێترین کلیپه‌کانی گۆرانیه‌که‌ به‌ ناوی سه‌فه‌ر! سه‌فه‌ری مه‌رگ. ئه‌و ئه‌ڵێ: " دنیا سه‌فه‌ره‌ و گشتمان میوانین!"
حه‌مید له‌و کلیپه‌دا کاتێک به‌ کۆڵانێکدا تێده‌په‌ڕێ، چاوی به‌ ئاگاداری مه‌رگی خۆی ده‌که‌وێ، که‌ به‌ دیواره‌کانه‌وه‌ هه‌ڵواسراوه‌. ئه‌و له‌ گه‌ڵ خه‌ڵک ته‌رمی خۆی به‌ره‌و گۆرستان به‌ڕێ ده‌کات. کاتێک له‌ ناو گۆڕی ده‌نین، هه‌ردووک چاوه‌کانی کراوه‌یه و چاو له‌ زیندووان ده‌کات‌!
چیرۆکی ئه‌م کلیپه‌ له‌ لایه‌ن شکسپیره‌وه‌ نه‌نووسراوه‌. ئازاره‌کانی که‌ له‌م شیعره‌دا بوونه‌ته‌ گۆرانی، ئازاره‌کانی لاوه‌کانی ئه‌مرۆی وڵاته‌که‌ی حه‌میده‌ و شیعری ئه‌م گۆرانیه‌، ئازاری وڵاته‌که‌ی ئێمه‌ی له‌ خۆیدا گرتووه‌، که‌ حه‌مید زۆر هونه‌رمه‌ندانه‌ ده‌یچڕێ.
بینینی ئه‌م کلیپه‌ خه‌م و بیرکردنه‌وه‌ ده‌خوڵقێنێ، خه‌می ژیان و بیرکردنه‌وه‌ی مه‌رگ. حه‌مید باسی مه‌رگ ده‌کات و خۆشی ئاکتۆری کلیپی مه‌رگه‌. حه‌مید باس له‌ ژیان ناکات باس له‌ سه‌فه‌ری یه‌کجاری ده‌کات. حه‌مید ئه‌گه‌ر گۆرانی هه‌ڵپه‌رکێش ده‌چڕێ هه‌ر دیسان باس له‌ مه‌رگ ده‌کات: " گه‌نم گه‌ڕه‌جۆ، پشتم ژان ده‌کات، عیزرائیل هاتگه‌ و داوای گیان ئه‌کات."
دڵ و دوروونی حه‌مید خه‌م دایگرتووه‌ و خه‌م ده‌چڕێ و له‌ گه‌ڵ زیندووان ده‌دوێ، ئه‌و باس له‌و ده‌مه‌ کورته‌ی ژیان ده‌کات، حه‌مید به‌ هه‌موو وجودیه‌وه‌ هاواری خۆشه‌ویستی ده‌چڕێ.
بینینی کلیپه‌کانی حه‌مید بۆ من موژه‌ده‌یه‌کی گه‌وره‌ بوو، ئه‌و هیوایه‌ی له‌ دڵمدا گه‌رم کردبوو، که‌ موسیقای کوردی شاسواری هه‌یه‌ به‌ڵام نادیارن، بێ موده‌عان، هات و هاواریان نیه‌! حه‌مید لای‌ خه‌ڵکی کوردستان به‌ تایبه‌ت سنه‌ و کرماشان و لای ئه‌وانه‌ی که‌ نرخی هونه‌ر ده‌زانن گه‌ڵێک خۆشه‌ویست بوو.
ئه‌مرۆ 11.10.2005 سه‌عات 10‌ی به‌یانی ته‌له‌فون ده‌نگی لێ بڵیند بوو:
"بابی ئێستا له‌ سنه‌وه‌ ته‌له‌فونیان کرد و کوتیان که‌ حه‌مید دوێنێ سه‌کته‌ی کردووه‌!؟"
بیستنی ئه‌م هه‌واڵه‌ ره‌نگی رووی گۆڕاندم، هاوکاره‌که‌م ده‌پرسێ چی رووی داوه‌؟ چیرۆکی کلیپی سه‌فه‌ر و هه‌واڵی مه‌رگی حه‌میدی بۆ ده‌گێڕمه‌وه‌. حاڵه‌تی تێک ده‌چێ و سه‌ری داده‌خات. ئه‌و پسپوڕی بواری فه‌لسه‌فه‌یه‌ و‌ ده‌یان نمونه‌ی جیهانی له‌ بواره‌کانی هونه‌ر و بیر و موسیقا ده‌هێنێته‌وه‌. ئه‌و ده‌ڵێت:
" ئه‌و که‌سانه‌ سنوری ئاسایی ژیان و بیر و زه‌وقی ئینسانی ده‌به‌زینن، هێندێکیان‌ عاسی ده‌بن و ئه‌و کارانه‌ ده‌که‌ن که‌ مرۆڤی تر به‌ بڤه‌ی ده‌زانن، ئه‌وانه‌ به‌گژ ئه‌م جیهانه‌دا ده‌چن."
حه‌مید پاش بڵاوکردنه‌وه‌ی کلیپی سه‌فه‌ر پرسیارباران ده‌کرێ. دایکی که‌ دوو ساڵ به‌ر له‌ ئێستا کوڕێکی تری به‌ ناوی سه‌عید له‌ مانگی ره‌مه‌زاندا به‌ کاره‌ساتی ماشێن جوانه‌مه‌رگ ده‌بێ،ده‌ڵێ:"رۆڵه‌ ئه‌م کارگه‌له‌ چیه‌ ده‌یکه‌ی؟"
کلیپی سه‌فه‌ر بۆ زۆر که‌س پرسیارێکی گه‌وره‌ بوو. به‌ڵام ئه‌مرۆ وه‌ک سناریۆی مه‌رگی هونه‌رمه‌ندێک دێته‌ به‌رچاو که‌ له‌ دنیای هونه‌ر و موسیقادا که‌م وێنه‌یه‌ و تراژدییه‌کی تاڵه‌ !
حه‌مید به‌ تێکست و موسیقا و ده‌نگ و شێوه‌ی گوتنه‌که‌ی و به‌کارهێنانی ئه‌ندامه‌کانی له‌شی کاری ده‌کرده‌ سه‌ر مێشک و ده‌روون و دڵی من، وام ده‌زانی که‌ ئه‌و بۆمن گۆرانی ده‌ڵی و تێکست و شیعره‌کانی من ده‌چڕێ. من چاوم به‌ حه‌مید نه‌که‌وتبوو، به‌ڵام هه‌ستم ده‌کرد له‌ مێژ ساڵه‌ ده‌یناسم، ئه‌وه‌ش هه‌ست و بۆچوونی من به‌ ته‌نیا نیه‌.
حه‌مید له‌ رۆژگاری بێ رێزکردنی موسیقادا هونه‌ری ده‌خوڵقاند، به‌وه‌ش خۆشه‌ویستی من بوو. ئه‌و سنوره‌ ته‌سکه‌کانی تێکست و موسیقا و ده‌نگی شکاند و گاشه‌ به‌ردێکی هاویشته‌ ناو گۆمێکی مه‌ند و وێستاو. ئه‌و بیرو و بیرکردنه‌وه‌ی هێنایه‌ ناو موسیقای تایبه‌تی سه‌رده‌م. حه‌مید لای من گۆرانبێژێکی رۆشنبیر بوو له‌ فۆرماتێکی بانتردا. مخابن ئه‌ویش به‌ چاره‌نووسی گۆرانیبێژه‌کانی هاوشانی خۆی ، فه‌رهای فارس زمان و ئه‌حمه‌د کایای زمان قه‌ده‌غه‌کراو چوو. یادی گه‌رم و زیندوو بێ.
http://www.youtube.com/watch?v=GSBY5YqqXfw
11،10،2005 ئاڵمان


نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە