پیاوەکانی بارزانی لە شنو داوادەکەن خەڵکی دەستبداتە چەک، تا رۆژهەڵات ببێتە گۆمی خوێن


با حزبی شیوعی كوردستان چاو لەدایكی بكات

Thursday, 03.24.2011, 12:00

987 بینراوە




حزبەكەی فەهدو حازم و سارم و سەلام عادیل لەنێو عیراقی ئەمڕۆی تایەفی و مەیدانی دابەشكردنی سامان و پۆستدا دەبنە جێی باس و ئافەرینی خەڵكی هەژارو نیگەرانی و ئازاری حزبەكەى مالیكی و حزبە ئایینییەكان و بەرپرسە گیرفاندۆستەكان بەوەى لەچەند پارێزگایەك پێشڕەوی خۆپیشاندانەكانن، بەڵام نەوەكەی كوردستانی (شیوعی كوردستان) لەنێو دیوارى بارەگاكاندا قەتیس بووەو بە تەنها كورسی و وەزیرێك قوفڵی لەدەمی خۆی داوە.
(ح ش ك) رۆژگارێك ناوبژیوانی شەڕی نێوەندی هەردوو حزبی ئێستای دەسەڵاتدار بوون و لەرۆژنامەو راگەیاندنەكانیاندا هەمیشە هاواریان بۆ وەستاندنی شەڕی براكوژی بوو، بەڵام كە ئێستا شەڕی كوشتارو فیشەك نەماوەو گواستراوەتە بۆ شەڕی دابەشكردنی سامانی گشتی و پۆست و كورسی لەژێر پەردەی رێككەوتنی ستراتیژیدا، كەچی ئەو حزبە بێدەنگی نواندووەو بیری چووەتەوە ئەم شەڕەى ئێستا لەشەڕى دوێنێی ناوخۆ مەترسیترو با ئازارترە، یاخود گەر قسەیەكیشی هەبوبێت شەرمنانەو بچووك بووەو لەئاست داواى خەڵك و دۆست و لایەنگرو جەماوەرەكەشیدا نەبووە.
لەئێستادا زۆر پێویستە (ح ش ك) چاو لەحزبی دایكی (شیوعی عیراق) بكات كە ئەمڕۆ بوێرانە و بێ ئەوەى كورسییەكی پەرلەمانی و وەزیرو پۆستێكی حكومییان هەبێت و لەنێو جەنجاڵی ئەو عیراقەدا بوونەتە جێی باسی هەموو لایەك و رۆژانە بە پراكتیكی هەڵوێستی حزبەكەیان دەردەبڕن و خەڵكی ناڕازی دەهێننە سەر شەقامەكان و داواى دادپەروەری و نەهێشتنی هەژاری و گەندەڵی دەكەن و لەو لاشەوە مالیكی بارەگاكانیان دادەخات و فشاریان دەخاتە سەر، بەڵام هەر دەنگ هەڵبڕن و بێ دەنگ نین، نەك وەك نەوەكەى كوردستانى.
(ح ش ع) تەمەنێكی درێژی لەدژی رژێمەكانی پێشووی عیراق بردووەتە سەرو چەندین سەركردەیان لەپێناو دادپەروەریدا ملی خۆی خستە بەر پەتی سێدارەوەو ئامادە نەبوو نەك مل بۆ ئیمتیازات دابدات، بەڵكو ئامادەنەبوون لەچەند رستەیەكی خۆیان پاشگەز ببنەوە، وەك باسدەكرێت دەڵێن كاتێك فەهد دەستگیر دەكرێت پێش لەسێدارەدانی لەزیندان پێی دەڵێن ناوی هاوڕێكانیش ئاشكرا بكەو بینوسە، ئەویش لەلاپەڕەكەدا تا خوارەوە نوسیبووی فەهد فەهد فەهد، كە لێی دەپرسن ئەمە چییە، دەڵێت ئێوە فەهدێك لەسێدارە دەدەن، بەڵام هەزاران فەهدی تر لەدەرەوەن و ماون و لەزیادبووندان، كەچی نەوەكەى كوردستانی هەر بێدەنگ.
مەخابن ئێستا لەدەمی هەندێ لەشیوعییەكان دەبیستین ئەم خۆپیشاندانانە حزبانی ئۆپۆزسیۆنی لەپشتەوەیەو دەربڕینی هەر ناڕەزایەتییەك لەئێستادا لەبەرژەوەندی ئەواندایە، كە بە بۆچوونی بەندە ئەو پاساوە زۆر لاوازە، چونكە ئەم ناڕەزایەتییانە شەقام خاوەنێتی و ئۆپۆزسیۆن بە خشكە هاتە پشتیانەوەو ئێستا بە ئاشكرا پشتیوانیانە، كە هەر لەیەكەم رۆژی خۆپیشاندانەكانەوە (ح ش ك) دەیتوانی بچێتە نێو خۆپیشاندانەكانەوەو داواى چاكسازی و باشكردنی گوزەرانی خەڵك و رێگرتن لەئاودیوكردنی سامانی گشتی بكردایەو بەو دوو حزبەى بوتایە كە ئێمە چەند ساڵە بە بەیاننامەو نوسین هاوار دەكەین ئێوە ئامادە نەبوون و نین گوێ بگرن، بۆیە چیتر مافی خۆمانە شەقام بكەینە جێگەى ناڕەزایی دەربڕین.
بیركردنەوە لەوەی ناڕەزایی دەربڕین لەئێستادا لەقازانجی گۆڕان و كۆمەڵ و یەكگرتووە، هێندەى تر ئەو حزبە دەمرێنێت و مەترسییەكی گەورەیە بۆ سەری، چونكە ناكرێت و نابێت و ناڕەوایە بەو پاساوە بێ دەنگی بنوێنی، بەڵكو هەلێك هاتووەتە پێشەوە دەبێت حزبەكان بە تایبەت و جەماوەر بە گشتی فشار بخەنە سەر یەكێتی و پارتی و دەسەڵاتەكەیان و بە یەك دەنگ بڵێن "ئیدی بەسە كوردستان بووەتە مەملەكەتی بەرپرس و ترس و تۆقاندن و ناعەدالەتی".
هەرچەندە ئەو حزبە چەند ساڵێكە چەند جارێك لەرۆژنامەكەیاندا بە یەك دوو نوسین داوایان كردووە كە پێویستە گەندەڵی بنەبڕ بكرێت و یاسا سەرەوەر بێت، بەڵام دەبێت بزانن كە یەكێتی و پارتی (نە چاویان هەیە و نە گوێ)، بۆیە زەرورە ئەو داوایە لەرۆژنامەكەیانەوە بگوێزنەوە بۆ سەر شەقامەكان و چیتر لەو حكومەتە ناحكومییە نایاساییە بێدەسەڵاتە بكشێتەوە.

بەڵێ جاران كاری حزبی شیوعی لەسەر شەقام و نێو چایخانەكاندا بوو، وەك پێی دەوترا (حزب المقاهی)، بەڵام ئەمڕۆ بووەتە (حزب المقرات) و بێ دەنگی و ئەوەتا مەلا بەختیارو رۆژنامەكەى بەو شێوەیە باسی دەكەن و بە جیابووەوە لەحزبی دایكی ناوی ببەن.
حەیفە بۆ ئەو حزبە لەكاتێكدا هەزاران دەرچووی زانكۆو پەیمانگاكان بێكارن، هەزاران ئافرەت دەچەوسێنرێنەوەو دەكوژرێن و دەسوتێنرێن، كرێكارو جوتیاران نزمترین چینی گۆمەڵگان و فەرمانبەران نائازادو موچەكەی نایەكسانە لەگەڵ بەرپرسان، سیستمی تەندروستی و پەروەردە لەوپەڕی شكستدایە، سیستمی ئیدارى لەوپەڕی ناعەدالەتی و دیكتاتۆریدایە، ژینگەى وڵات لەژێر مەترسییەكی گەورەدایە .. تاد، كەچی نەوەی حزبەكەى فەهد بێ دەنگی هەڵبژاردووە بێ دەنگیی.
رەخنەیەكی دیكەى بەندە ئەوەیە ئەو حزبە تەنها لەبۆنەو یادەكاندا لەچەند شارو شوێنێك چالاكییەكانیان بەئەنجام دەگەیەنن وەك رۆژی كرێكاران ئافرەتان شەهیدان لاوان، ئەمەش جۆرێكە لەداهێنانی نوێ و دەكرێت ناو بنرێت (بۆنە پەرست)، كە دەبوایە وەك چۆن رۆژانە ئافرەتانی نیشتیمانەكەم ئەتك دەكرێن ئاواش رۆژانە ناڕەزاییان دەرببڕایەو حكومەتیان ئەتك بكردبایە.
بۆیە دەڵێم "با چیتر ئەندامانی حزبی شیوعی لەئاست بێدەنگبونی سەركردایەتییەكەیدا بێدەنگ نەبن و رەخنەگرتن لێیان بكەنە بنەمای بیركردنەوەیان"، چونكە مەترسی سەر ئەو حزبە لەئێستادا ئەوەیە "هەموویان وەك یەك بیر دەكەنەوە كە ئەمەش مانای بیرنەكردنەوەیانە"، قاعیدەش وەك قیادە راهێنراوە لەسەر ئەدای كاركردن و بیركردنەوە، ئەدی كوا قوتابخانە فیكری و رەخنەییەكەى دوێنێی ئەو حزبە تا نەوە بەرهەمێنراوەكانی بە دەنگی بەرز بڵێن نا نا نا بۆ حزبێكی بێدەنگ و شەرمن.
دەزانم لەسەر ئەم كورتە نوسینە هەندێ دەروێشی نێو ئەو حزبە دەكەونە تانە لێدانم بگرە جنێودانیش پێم، بەڵام دەشزانم كەسانی دڵسۆزو خەمخۆری ئەو حزبەو مێژووەكەى گەر نەوێرن بە ئاشكرا بڵێن ئافەرین، ئەوا لەناخەوە بە هەناسەیەك ئەهوەن دەبنەوە دەڵێن ( )..
ئەم وتارە لەژمار 716 رۆژی چوار شەممە 23/3 رۆژنامەى هاوڵاتی بڵاوبووەتەوە..