ده‌هـ سالان د زیندانێ ڤه‌ بێ دادگه‌هی کرن

Thursday, 25/02/2010, 12:00

1078 بینراوە


گرتنا خه‌لکێ بێ گه‌نه‌هـ و زیندانی کرنا وان ب سالان بێ کو گونه‌هه‌کا ئاشکرا و دیار د دادگه‌هێ دا بێت ئاراسته‌ کرن ، نه‌ تشته‌کێ ڤه‌شارتی و سه‌یره‌ د بن ده‌ستهه‌لاتا پارتی ڤه‌. ژبه‌ر کو پارتی هێشتا فیر نه‌بوویه‌ کو یێ به‌رانبه‌ری خوه‌ قه‌بوول بکت ، به‌لکو به‌س خوه‌ دبینت ، ئو وه‌سا دڤێت کو ل چه‌رخێ بیست و ئێکێ ژی هه‌ر خه‌لك بێژنێ ئه‌زبه‌نی !!.

وه‌لید یونس زاخۆیی ئێك ژ وان بێ گونه‌هانه‌ یێن کو ب زولم و زۆرداری ، ب بێ به‌ختی و بێ وژدانی ژ سالا 2000 ێ وه‌ره‌ د زیندانا پارتی ڤه‌ یه‌.

ئه‌ڤه‌ سه‌رێ ده‌هـ سالا یه‌ کو وه‌لیدێ به‌له‌نگاز د زیدانێن پارتی ڤه‌. ده‌هـ سالان د زیندانێ ڤه‌ یه‌ بێ کو بێت دادگه‌هی کرن یان گونه‌هه‌ك بۆ وی بێت ئاراسته‌ کرن. نه‌ کو ئه‌ڤه‌ بتنێ به‌لکو هه‌تا کو ناڤێ وی ژی د ناڤ لێستـێن زیندانیا دا نه‌ هاتیه‌ نڤیسین ، دا کو که‌س چ ژێ نه‌ زانت. ئو گاڤا کو فه‌رمانبه‌رێن رێکخراوێن مرۆڤاتیخواز دچن سه‌ره‌دانا زیندانێن پارتی ، نه‌خاسمه‌ ئاسایشا گشتی !! ل هه‌ڤلێرێ ، ره‌شه‌کێن ب ناڤ ئاسایش وی ژ ناڤ زیندانیا تینن ده‌ر و جلکێن کوردی یان په‌نته‌رۆنا دکن به‌ر و دکن د ناڤ فه‌رمانبه‌رێن ئاسایشێ دا هه‌تا کو فه‌رمانبه‌رێن رێکخراوێن مرۆڤاتیخواز ژ وێرێ دچن ، ئو گاڤا کو چوون ، په‌رێ وه‌کی به‌رێ دکن د زیندانێ ڤه‌.

د درێژاهیا ڤان ده‌هـ سالان دا گه‌له‌ك جاران بوویه‌ کو ره‌شه‌کێن ئاسایشێ ئه‌ڤی وه‌لیدێ به‌له‌نگاز ب هه‌یڤان دکن د ژۆرێن ته‌نگ و تاری ڤه‌ و روناهیا رۆژێ ب چاڤێن خۆ نابینت. شه‌ڤ و رۆژ ل نك وی ئێکن. ئو ئێسکنجه‌دان ژی چ له‌شی بت یان ده‌رۆنی ، سه‌رباره‌.

ئه‌رێ بۆچی که‌سه‌ك یان په‌ڕله‌مان ، پرسیارا حالێ ڤی به‌له‌نگازی و سه‌دان به‌له‌نگازێن دی ناکت ؟ ئه‌گه‌ر هه‌تا نهۆ په‌ڕله‌مانی وه‌کی متربا داهۆل و زڕنا بۆ به‌ژن و بالا مسعود بارزانی و جه‌لال تاله‌بانی دقوتا و به‌رانبه‌ری تاوانێن وان د راستا مله‌تێ مه‌ دا بێ ده‌نگ بوون ، ئو ئه‌ندامێن ئێکگرتوویا ئیسلامی و یێن دی د په‌ڕله‌مانی دا جورئه‌تا کتکه‌کێ نه‌ بوون کو پرسا وه‌لیدێ به‌له‌نگاز و سه‌دان به‌له‌نگازێن وه‌کی وی ‌د په‌ڕله‌مانی دا پێشبه‌ر بکن. ئه‌گه‌ر ئه‌ڤ تشت ژبه‌ر ڤان سه‌ده‌ما ژبه‌ری نۆکه‌ ، نه‌ دهات کرن ، دڤێت کو ئیرۆ بێت کرن. ئه‌ڤرۆ ره‌وش هاتیه‌ گوهۆڕین و خه‌لکه‌ك د په‌ڕله‌مانی دا هه‌یه‌ کو ئه‌ندامێن (گۆڕان) ێ نه‌ ، دشێن بێژن پارتی و ئێکه‌تیێ نه‌ ! بۆچی ؟ وه‌سا نابت !

ڤێجا داخوازا مه‌ ژ ڤان که‌سا ، ژ ئه‌ندامێن (گۆڕان) ێ ئه‌وه‌ کو دۆزا ولیدی و هه‌می دۆزێن هۆسا د په‌ڕله‌مانی دا پێشبه‌ر بکن و په‌ڕله‌مانی نه‌چار بکن کو دۆزا وان ب ستۆیێ خوه‌ ڤه‌ بگرت و چاره‌سه‌ر بکن و پارتی داخوازا لێ بۆرینێ ژ وان بکت و زیانا سالێن زیندانێ بۆ وان ته‌عویز بکت.

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە