فیرعەونەكان خۆیان و كەسوكاریان عیلاجیان دەرەوەیە ، میللەتیش با دەساڵى تر چاوەڕێ بكات

Monday, 05/03/2012, 12:00

1807 بینراوە

لە كۆتایى تەمەنى كابینە شكستخواردووەكەى بەرهەم ساڵحدا ، وەزیرى تەندروستى ڕایگەیاند دوایى دە ساڵى تر سیستەمى تەندروستى كوردستان تۆكمە ئەبێت ، واتا دوایى سەرفكردنى ئەو هەموو بودجەو داهات و كۆنگرەو كۆنفرانس و وۆركشۆپانە ، دوایى كۆمەكى ئەو هەموو ڕێكخراوە بیانیانەو بیست ساڵى حوكمى دیكتاتۆرانەى پارتى و یەكێتى تازە بەتازە ئەڵێ دوایى دەساڵى تر باش ئەبێت .

لە وەڵامى ئەو لێدوانەى جەنابیاندا ئەڵێین تاخاوەنى ئێوەبین نەك دەساڵ بەبیست ساڵى تریش چاك نابێت ، سەرەتایترین مافى خەڵك لەكەرتى تەندروستى دابینكردنى چارەسەری سەرەتایى و دەرمانى باشە تائێستا ئەم دەسەڵات و وەزارەتە پیلانى بۆ ئەمە نیە حاشا لەوانى تر، هەر خوودى لێدوان و هەواڵەكانى خۆتان ئەڵێن ببورە جەناب بەبیست ساڵى تریش چاك نابێت ، وەزیرێك ئامادە نەبێت لەماوەى پۆستەكەى دەستبەردارى بەرژەوەندیەكانى خۆى بێت ئومێدى چى لەسەر لێدوانەكانى هەڵچنین ، لەنەخۆشخانە ئەهلیەكەى خێزانى وەزیر لەماوەى كەمتر لەساڵێكدا دوو نەخۆش بوونەتە قوربانى جەنابى مێشیشى میوان نیە؟ كوا هەڵوێستى؟ كوا ڕوونكردنەوەى ؟ كوا دەست لەكاركێشانەوەى؟ كوا داخستنى نەخۆشخانەكە؟ لەكاتێكدا ئەو هەموو كەموكوڕى و كارەساتە هەن و ڕۆژانەش بەردەوام دووبارە ئەبنەوە كەچى تائێستا یاسایەكى تایبەت بەنەخۆش نیە (حاموڕابى زیاتر لەهەزار ساڵ پێش زاین یاساى بۆ نەخۆش هەبووەو مافى نەخۆشى دابینكردوەو ئەڵێ ئەگەر نەخۆشێك لەژێر نەشتەرگەریدا مرد ، دەستى دكتۆرەكە ببڕن) لەماوەى ئەم چەند ساڵەدا چەندین هاوڵاتى و نەخۆش بوونە قوربانى تائێستا ئەم وەزارەت و سەندیكا حزبیانەى پزیشكان بەدواداچوونێكى ووردو زانستیانەیان نەكردووە، هەر هیچ نەبێت كارەساتەكان دووبارە نەبنەوە حاشا لەداخستنى نەخۆشخانەكان و دوورخستنەوەیان لەكارى پزیشكى و دەست بڕین ، فیرعەونەكانى پارتى و یەكێتى و سیاسیە نەخوێندەوارەكانیان و بەرپرسە حكومیەكانیان خۆیان و خێزانەكانیان نەك هەر پشتیان لەم سیستەمە كردووە بۆ ئەنجامدانى بچووكترین پشكنینى پزیشكى تادەگاتە نەشتەرگەرى ڕوو لەوڵاتانى ئەوروپاو ئەمریكا دەكەن (ئەمە باشترین بەڵگەیە لەسەر خراپى كۆى سیستەمى تەندروستى لەكوردستان و ناڕاستى و دووڕوویى ئەو میدیا درۆزن و چەواشەكارانەى پارتى و یەكێتیش كەباس لەپێشكەوتنى سیستەمى تەندروستى و هێنانى ئامێرى پێشكەوتووى دروستكراوى ئەو ووڵاتانە ئەكەن كەخۆیان ڕووى تێ ئەكەن) ئەگەر وایەو هێندە پێشكەوتووە ئەى خێرە خۆتان و كەسوكارتان بەچەند سەعاتێك و بەپەلە ئەچنە ئەو ووڵاتانەو لێرە چارەسەر وەرناگرن؟ ئەمە پێچەوانەى ئەم درۆ شاخدارەشە كەسەرى زمان و بنى زمانیان مافى مرۆڤە ، یەكێك لەمافە گشتیەكانى جاڕنامەى جیهانى مافى مرۆڤ دابینكردنى خزمەتگوزارى تەندروستیە بێ جیاوازى ڕەگەزو ئایین بۆ هەموو تاكێك ؟ ئەوەى نەبێت لەكوردستان ئەم خاڵەیە.

زیاتر لەبیست ساڵە ئەم دەسەڵاتە دیكتاتۆرە سیاسەتێكى ڕوون و ئاشكراى بۆ كەرتى تەندروستى نیە ؟ كەس نازانێت ئەم وەزارەتە بە چ ئاڕاستەیەك كارئەكات ؟ تەنها گەرەكیەتى سیستەمێكى ڕووكەش هەبێت و بەس ؟ ئەم دەسەڵاتە فیرعەونیە دیكتاتۆرە تاچەند ئەم سێكتەرەى بەلاوە گرنگە تائێستا ڕوون نیە ؟ ئەگەر بپرسین مەبەستى خزمەتكردنى چینێكى تایبەتە یان هەموو میللەت ؟ ئەوا بێگومان بێ دوودڵى ئەڵێین چینێكى تایبەت ، چونكە ئەگەر هەموو میللەت بووایە ئەو جیاوازیە گەورەیەیان دروست نەئەكرد لەقڕگە ؟ كەس نازانێت كەرتى گشتیە یان تایبەتە یان سەربازیە ؟ كەرتە گشتیەكە بەرهەم هێنەرە یان بەكارهێنەر ؟ سیستەمى كارگێڕى و بەڕێوبردن چۆنە؟ چ بەرنامەیەكیان هەیە ؟ ئەى ئاسایشى خواردن و هێنانى دەرمان چۆنە ؟ لەبەرزكردنەوەى ئاستى هۆشیارى تەندروستى هاوڵاتیان چ بەرنامە و پیلانێكیان هەیە؟ بیست ساڵە چیان كردووە بۆ ژینگەو پارستنى ژینگە ؟ بێگومان هیچ نەكراوە بۆ ئەمانەو دەیان بابەتى تریش بۆیە جەنابى دڵنیا ئەكەینەوە بیست ساڵى تریش هیچ ناكرێت ، ئەبوو ئەم دەسەڵاتە ئەجێندایەكى ڕوون و شەفافى بۆ ئەم كەرتە هەبووایە بەڵام وەك چۆن بۆ باقى كەرتەكانى تر نیەتى بۆ ئەمەش بەهەمان شێوەیە ، دەسەڵاتێكى فاشیلى گەندەڵ بیست ساڵە پێناسەیەكى بۆ ئەم كەرتە نیە ، تائێستا نەیتوانیوە سیستەمێكى لامەركەزى بەڕێوبردن دابنێت ؟ كەرتى گشتى و تایبەت و سەربازى لێكجیابكاتەوە ؟ نەبوونى بەرنامە و پیلان بۆ فێركردنى تەندروستى دكتۆر و كارمەندانى تەندروستى ، ئەوەى هەیەو كراوە تەنها دەستێوەردانى ئاشكراى حزب و كردنى كەسی نەخوێندەوار بەپسپۆر لەكەرتى تەندروستى و پێدانى هەموو دەسەڵاتێك پێیى و نەبوونى پێناسەى كار لەبەشەكان و تێكەڵكردنى كارەكان و چارەسەر نەكردنى كێشەى دەرمانخانەكان و بوونى گەندەڵى زۆرو ڕۆتیناتى ئیدارى زۆرو نەبوونى ئامارو داتاى وورد (بۆ ژمارەى دانیشتووان و تووشبووانى نەخۆشیەكان و كردنەوەى نەخۆشخانەو بنكەكان و دابینكردنى ئامێرو كەلوپەلى پزیشكى) نەبوونى چاودێرى و بەدواداچوونى وورد لەسەر بنەماى پاداشت و سسزاو نەبوونى چەند كۆگایەكى سەرەكى دەرمان و ساغ نەكردنەوەى بابەتى كڕینى دەرمان و نەبوونى پیلان و بەرنامە بۆ پێشخستنى تواناى زانستى كارمەندان و پەرستاران و... هتد .
تائێستا ئەم وەزارەتەو ڕاوێژكارە خەوتووەكانى ئامادەنین دان بەو هەموو هەڵەو كەموكوڕیانە دابنێن كەلەم كەرەتەدا هەیە تەنها خەمى پۆست و مووچەو كورسیانەو بەس بۆیە ئێمە دووبارەى ئەكەینەوەو ئەڵێین تادەستى حزب بەتەواوى لەم كەرتەدا نەبڕدرێ و دوورنەخرێتەوە ، تاڕاستیەكان وەك خۆى بۆ خەڵكى كوردستان ڕوون نەكرێتەوە دڵنیابن نەك چارەسەر بەپێچەوانەوە ڕۆژ بەڕۆژ زیاتر بەرەو ماڵوێرانى و سەرگەردانى هەنگاو ئەنێ وەهەر خوودى ئامارەكانى خۆشتان سەبارەت بە ئایدزو شێرپەنجە ئەمە پشت ڕاست ئەكاتەوە .

خوێنەرانى بەڕێزى كوردستانپۆست ....
بۆ دڵنیایى هەموو لایەكیش وەزارەتى تەندروستى وەك باقى وەزارەت و دەزگاكانى ترى ئەم دەسەڵاتە دیكتاتۆرە تەنها لەسەرەوە یەكى گرتۆتەوە ئەگینا تا ئێستاش دوو وەزارەتەو (سێ سیستەمى جیاوازى تەندروستیش پەیڕەو ئەكرێ دهۆك بەجیاو سلێمانى بەجیاو هەولێریش بەجیا) هەموو شتێك جیاوازە هەر لەهەیكەلى كارگێڕى و ئیدارى و حیسابى دارایەوە بیگرە تائەگاتە ئامارو پلاندانان هەریەكەو بەشێوەیەكە سەربارى ئەوەى لەسلێمانى دەزگاى تەندروستى پێشمەرگەش هەیە كەهەمان ڕۆڵ و دەورى وەزارەتى تەندروستى ئەبینێ واتا ئەم دەزگایە هەر بۆخۆى وەزارەتێكە بەشێوەیەك (بەناو لەسەر وەزارەتى پێشمەرگەیە تەنسیب و سیستەمى مووچەى وەك وەزارەتى تەندروستیەو حسابى دارایى تایبەت و جیاشى هەیە لەگەنجینەى 2ى سلێمانى وەزارەتى دارایى ئیدارەى سلێمانى بەبڕى دەملیارو پێنج سەد ملیۆن دینار).

بەڕێزان ...  لەخوارەوە بەڵگەكان خۆیان ئەدوێن ، بەپێیى هەواڵ و لێدوانەكانى ئەوان بێت تادە ساڵى تر نەك چاك نابێت سیستەمەكە ماڵوێرانتر ئەبێت ، تەمەنا ئەكەین ئێمە هەڵەبین و دوایى دەساڵى تر سیستەمەكە زۆر زۆر باش بێت .
1 _ تائێستا جەنابى تاهیرهەورامى و ئەوانەى پێش ئەویش غیرەت و جورئەتى ئەم پۆلە گەنجە دكتۆرەیان نەبووە بەرامبەر بەفیرعەونەكانى دەسەڵات و بڵێن تكایە ئێوەش هەمان نەخۆشخانە بەكاربهێنن كەخەڵكى فەقیرو داماوى كوردستان بەكارى دێنن .
هەمان نەخۆشخانە بەکاربهێنن کە خەڵک بەکاریدەهێنێت!
بەکارنەهێنانی سیستمی تەندروستی و ئەو خزمەتەی پێشکەشی دەکات لە لایەن سەرکردە سیاسی و بەرپرسە حکومیەکانەوە بووە بە دیاردەیەک کە بێدەنگ بوون لە ئاستیدا چیتر جێگای قبوڵ نیە. سەرکردە سیاسی و بەرپرسە حکومیەکان و خێزانەکانیان، پشتیان لە سیستمی تەندروستی کوردستان کردووە و بۆ ئەنجامدانی بچووکترین پشکنینی پزیشکیی تا دەگاتە گەورەترین نەشتەرگەری ڕوو لە وڵاتانی ئەوروپا و ئەمریکا دەکەن.
ئەم دیاردەیە ئاماژەگەلێکی ترسناک دەبەخشێت کە جێگای هەڵەوەستەکردن و هەڵوێست وەرگرتنی ئێمەی پزیشکن؛
لە ئاستێکدا دیاردەکە ئاماژەیە بۆ بێ متمانەیی سەرکردە سیاسی و بەرپرسەکانی حکومەتی هەرێمی کوردستان و بەرپرسە کوردەکانی حکومەتی عێراق بە سیستمی تەندروستی کوردستان. ئەم بێ متمانەییە، لە کاتێکدایە کە خودی ئەو سەرکردانە بەرپرسن لە باشترکردن و بەرەوپێشەوەبردنی سیستمی تەندروستی و گەیاندنی بە ئاستی سیستمە پێشکەوتووەکانی دنیا. بەڵام سەرکردە و بەپرسەکان نەک ئەوەیان نەکردووە بەڵکو خۆیان لە خەڵکیی ئاساییش جوودا کردووەتەوەو ئەوەی بە هاوڵاتیانی ڕەوا دەبینین خۆیان ئامادە نین بەکاریبهێنن.
لە مەودایەکی تردا، ئەم هەڵسوکەوتانە، بەڵگەن لەسەر ناڕاستی ئەو نمایشە میدیایانەی باس لە پێشکەوتنی سیستمی تەندروستی و هێنانی ئامێری پێشکەوتووی دروستکراوی ئەو وڵاتانە دەکەن کە سەرکردەکان ڕوویان تێدەکەن. ئەگەر پزیشکەکانمان هەمان ئەو زانیاریانە بخوێنن کە لە وڵاتە پێشکەوتووکاندا دەخوێنرێن و ئەو ئامێرانە بەکاربهێنن کە لەو وڵاتانەدا دروستدەکرێن، ئیتر چی پێویست دەکات بۆ بچووکترین پشکنین سەرکردەکانمان ڕوو لە دەرەوە بکەن.
ئەگەر سەرکردەکانمان، سڵ لەوە دەکەنەوە کە نهێنیە پزیشکیەکانیان ئاشکرا دەبێت، ئەوا مافی هەموو کەسێکە بەئەوان و هاوڵاتیانی ئاسایشەوە کە نهێنیە پزیشکیەکانیان پارێزراو بێت و دەبێت ئەوان لە خەمی هێنانەکایەی یاسا و ڕێسای ئەوتۆ بن کە پارێزگاری لە نهێنی نەخۆش بکات.
بەردەوام بوون لەسەر ئەم هەڵسوکەوتانە، پێش ئەوەی خۆ جیاکردنەوە بێت لە هاوڵاتیان و خۆ بە گەورە زانین بێت، بەسووک تەماشاکردنی سیستمی تەندروستیە و هێنانە خوارەوەی متمانەی هاوڵاتیانە بە کۆی سیستمی تەندروستی و ئێمەی پزیشک. تکاتان لێ دەکەین سیستمی تەندروستی بە هێ خۆتان بزانن و وەکو هەمووان ڕوومان تێکەن.

2 _ فیرعەونەكان خۆیان و كەسوكاریان بەپەلە دەنێردرێنە دەرەوە، هاوڵاتیان و خەڵكى هەژاریش دەبێ دە ساڵى تر چاوەڕێ بكەن.

_ له‌ ئه‌ڵمانیا نه‌شته‌رگه‌ری بۆ ئازاد جندیانی ئه‌نجامدرا .
29/2/2012
پاش ئه‌وه‌ی له‌ چه‌ند رۆژی رابردوودا، ئازاد جندیانی وته‌بێژ ‌و ئه‌ندامی مه‌كته‌بی سیاسی یه‌كێتی به‌مه‌به‌ستی پشكنینی پزیشكی سه‌ردانی وڵاتی ئه‌ڵمانیای كرد، ئه‌مڕۆ چوارشه‌ممه‌ له‌و وڵاته‌ نه‌شته‌رگه‌ریه‌كی بۆ ئه‌نجامدراوه‌.
چیا هاوار به‌رپرسی نوسینگه‌ی ئازاد جندیانی له‌ لێدوانێكدا بۆ (نها24) وتی: له‌ ئه‌ڵمانیا نه‌شته‌رگه‌ریی بۆ سه‌ری ئازاد جندیانی ئه‌نجامدراوه‌‌و نه‌شته‌رگه‌رییه‌كه‌ سه‌ركه‌وتوو بووه‌.
هاوار وتیشی:" له‌ ئێستادا باری ته‌ندروستی جندیانی جێگیره‌ و بڕیاره‌ پاش مانه‌وه‌ی بۆ چه‌ند رۆژێك له‌ نه‌خۆشخانه‌ بگه‌ڕێته‌وه‌ بۆ هه‌رێمی كوردستان".

_ باری تەندروستی، دایكی دكتۆر بەرهەم ناجێگیرە .
29/2/2012 .
دایكی جێگری دووەمی سكرتێری گشتی یەكێتی دكتۆر بەرهەم بەشیوەیەكی خێرا دەگەینرێتە نەخۆشخانەو باری تەندرووستی تێكچووەو لەئێستدا لەژێر چاودێریەكی وردی پزیشكیدایە پێدەچێت رەوانەی دەرەوەی كوردستان بكرێت.

بەپێی ئەو زانیاریانەی دەست لڤین پریس كەوەتووە رووناك خان دایكی دكتۆر بەرهەم‌و خاوەنی ڕێكخراوی رووناك بۆ پارێزگاری لە ژنان بەشیوەیەكی خێرا دەگەیەنرێتە نەخۆشخانە و لەئێستدا لەژێر چاودێری وردایە و هەریەكە لە دكتۆر بەرهەم‌و كۆسرەت رەسوڵ جێگری سەرۆكی هەرێم‌ و جێگری سكرتێری یەكێتی سەردانیان كردووە دكتۆرەكانیش ئاگاردار كراونەتەوە كە لەحاڵەتی تێكچوونی لایەنی پەیوەندیدار ئاگاربكرێتەوە بۆ ئەوەی بۆ چارەسەری پزیشكی رەوانەی دەرەوەی وڵات بكرێت .

ئەو سەرچاوەی لڤین پریس ئاماژەی بەوەشكرد جگە لەكۆسرەت ڕەسوڵ چەندین سەركردەیەكی سەربازی‌و مەدەنییەكانی یەكێتی سەردانیان كردووە، پێش بینی ئەوەش دەكرێت بۆ چارەسەر بەرەو وڵاتێكی ئەوروپی ببرێت.

3 _ جەنابى هەر خۆى ئەڵێ كارەساتەكان لە بەرزبوونەوەن، دوایى هەر خۆشى ئەڵێ دە ساڵى تر باش ئەبێت، بێ ئەوەى هیچ بەرنامەو پیلانێك هەبێت.

_ (د. تاهیر هەورامی): نەخۆشیی ئایدز لە كوردستاندا لە بەرزبوونەوەدایە.

2012-02-17
وەزیری تەندروستیی حكوومەتی هەرێمی كوردستان (د. تاهیر هەورامی) لە دیمانەكی ڕۆژنامەی "هەولێر"ـدا، دەڵێت كە ڕێژەی نەخۆشیی ئایدز لە كوردستاندا لە ساڵی پارەوە لە 9 كەسەوە بۆ 23 كەس بەرز بووەتەوە و تاكوو ئێستایش نزیكەی 80 هاووڵاتیی بیانیی تووشبوویان بۆ وڵاتەكانی خۆیان ڕەوانە كردووەتەوە.

*باس لە زیادبوونی نەخۆشیی ئایدز لە كوردستاندا دەكرێت، بەپێی ئامارەكان تاكوو ئێستا چەند كەسی تووشبوو هەیە و چەندیشیان كوردن؟

- بە پێی داتاكانی وەزارەتی تەندروستیی هەرێم، نزیكەی 103 هاووڵاتیی تووشبوو بەو نەخۆشییە لە كوردستاندا هەبوون كە 23 كەسیان كوردن كە ئەوانەیش زیاتر ئەو كەسانەن كە لە دەرەوە بوون و هاتوونەتەوە كە ئەمانەیش ناونووس كراون و چاودێری دەكرێن و مووچەیەكی كەمیان بۆ بڕاوەتەوە و چارەسەر وەردەگرن. لە هەمان كاتدا نزیكەی 80 كەسیش هەبوون كە بیانی بوون، بەڵام پاش پشكنینیان ڕەوانەی وڵاتەكانی خۆیان كراونەتەوە.

* بە بڕوای ئێوە ئەو ڕێژەیەی كە لە كوردستاندا هەیە لە زیادبووندایە یان لە دابەزین؟
- بێگومان لە زیادبووندایە كە پارساڵ 9 كەس بوون و ئەمساڵیش بوونەتە 23 كەس.
_ بەڕێوەبەری نەخۆشخانەی هیوا: ڕێژەی نەخۆشیی شێرپەنجە 500% زیادی كردووە .
2012-02-19
بە پێی ئەو داتایانەی لە نەخۆشخانەی هیوا لە شاری سلێمانی هەیە، ژمارەی تووشبووان بە نەخۆشیی شێرپەنجە بە بەراورد لەگەڵ ساڵی 2007ـدا، بە ڕێژەی 500% زیادی كردووە.
بەڕێوەبەری نەخۆشخانەكە (تاڵب تۆفیق قادر)ـیش لە دیمانەیەكی ڕۆژنامەی هەولێرـدا، پیسبوونی ژینگە، خواردنی ئێكسپایەر و سیفەتی بۆماوەیی بە سەرەكیترین هۆكارەكانی تۆشبوونی هاووڵاتیان بەو نەخۆشییە دەزانێت. ئێستاكە ڕۆژانە 300 بۆ 350 كەس سەردانی ئەو نەخۆشخانەیە دەكات و بە هۆی خراپیی بیناكەیانەوە، تەنیا جێیان بۆ مانەوەی 100 نەخۆش هەیە.
10 ساڵی‌ تر سیسته‌می ته‌ندروستی‌ تۆكمه‌ ده‌بێت .
سبه‌ی:
له‌ كۆنگره‌یه‌كی رۆژنامه‌نوسیدا، ئه‌مڕۆ چوارشه‌ممه‌ وه‌زیری‌ ته‌ندروستی‌ هه‌رێم ته‌ئكیدی‌ له‌وه‌ كرده‌وه‌، كه‌ 10 ساڵی تر‌ سیسته‌می ته‌ندروستی هه‌رێم‌ تۆكمه‌ ده‌بێت.
د.تاهیر هه‌ورامی‌، وه‌زیری‌ ته‌ندروستی‌ حكومه‌تی‌ هه‌رێمی‌ كوردستان رایگه‌یاند: كێشه‌كانی‌ كه‌رتی‌ ته‌ندروستی‌ له‌هه‌رێمی‌ كوردستان به‌رده‌وامه‌و پێویستمان به‌ زانیاری‌ گرنگی‌ ته‌ندروستی‌ وڵاتانی‌ تره‌ بۆ پێشخستنی‌ كه‌رتی‌ ته‌ندروستی‌ له‌ هه‌رێمی‌ كوردستان.
هه‌ر له‌ كۆنگره‌ رۆژنامه‌نوسیه‌كه‌دا ناوبراو ئه‌وه‌شی وتوه‌ كه‌، هه‌رێمی‌ كوردستان پێویستی‌ به‌ 10 ساڵی‌ تره‌ تا سیسته‌مێكی‌ تۆكمه‌ی‌ ته‌ندروستی‌ دابنێت.

4 _ سەیرى ئەم وێنەیە بكەن وەزارەتێك ئەمە ڕێنمایى و كاركردنى بێت بۆ هۆشیاركردنەوەى منداڵان و قوتابیانى قوتابخانەو خوێندنگاكان ، واتا بۆ ئەوپەڕى تەمەنى منداڵى 7 ساڵ بۆ 15 ساڵ ئەمە ڕێنمایى بێت (دووركەوە لەسێكس ، دووركەوە لەماددەى هۆشبەرو كحولیەكان ، دووركەوە لەتاتۆكردن) .
ئێوە بڵێن دە ساڵى تر چۆن ئەبێت لەسایەیى ئەم جۆرە هۆشیارى و ڕاگەیاندنەى وەزارەتى بەناو تەندروستى (كە مەى خواردنەوە بەهۆكارى گواستنەوەى ڤایرۆسى HIV دادەنێت) لەكۆنەپەرسترین ووڵاتى جیهاندا شتى وانیە ئەمە پێشیلكردنێكى زەق و دیارى سەرەتایترین بنەماكانى تەندروستى و پزیشكیە ، لەوەش كارەساتتر وێنەى رەش پێستیان داناوەكەئەڵێ دووركەونەوە لەسێكس ، ئەمە هەر بۆ خۆى ئەوپەڕى بێ ڕێزیە .
بەڕێزان ئەمە ئەو عەقڵەیە كەسیستەمى تەندروستى كوردستان بەڕێوە ئەبات ، بۆیە ئەڵێین تاخاوەنى ئەمانە بین بەبیست ساڵى تریش چاك نابێت .
((ڕوونتریش بڵێین بەڕێزان ئەمە لەقوتابخانە سەرەتایى و ناوەندیەكان یان وەك ئێستا ئەڵێن بنەڕەتى و ئامادەیەكان ئەمە هەڵواسراوە نەوەك لەزانكۆو پەیمانگاكان)) .
5_ بەكارگەو كارخانەى دەرمانى ئێكسپایەر و گێلكردنى مرۆڤ شوكور نەبووین ، قەڵەمى ئەنسۆلینیشى هاتەسەر كەتاكە چارەسەرى تووشبووانى نەخۆشى شەكرەیە ڕووداو كارەساتەكان ڕۆژانە زیاد دەكەن ، سەندیكا حزبیەكەش بەئاشكرا هاوار ئەكات نابێت سسزا بدرێن ، ئەوانیش ئەڵێن دە ساڵى تر ، ئێوە بڵێن دەساڵى تر چۆن ئەبێت ، ئەم سەندیكا حزبیە خۆفرۆشانە تەنها ڕۆڵى ڕۆبۆتیان بینیوە ، سەدان دەست درێژى و كارى نایاسایى هەبووە بۆ سەر پزیشكە بەڕێزەكان و لەلایەن پزیشكانیشەوە بۆ سەر نەخۆش هاوڵاتیان ئەم سەندیكا حزبیە هەمووى لەڕێگەى سوڵحى عەشایرى و دیوەخانەوە چارەسەر كردووە ، كەیسەكانى نەداوون بەدادگا لەجیاتى ڕۆڵى چاودێریش ڕۆڵى پەردەپۆشكردنى دزى و گەندەڵى و كارى ئابڕووبەرانەى بۆ بەرپرسەكان بینیوە ، پزیشك هەیە لەم شارە تەنها بۆ ئەوەى دڵى بەرپرسێكى خوێنمژ لەخۆى ڕازى بكات چەندین كەسى ڕاوانەى نەخۆشخانەكەى ئەو كردووە بۆئەشیعە كە 400 هەزار دینار تەكلیف دەكات بێ ئەوەى نەخۆشەكە پێویستى بەم جۆرە ئەشیعەیە بێت ، ئەم سەندیكایانە لەدەیان كارەساتى لەم جۆرە بێ دەنگ بوون ، چونكە زۆربەیان لەنەخۆشخانەى بەرپرسە نەخوێندەوارەكانى حزب دەوام ئەكەن .

لێكۆڵینه‌وه‌ له‌ كڕینی قه‌له‌می ئه‌نسۆلین ده‌كرێت .
13/02/2012 10:19:00
سه‌ندیكاى ده‌رمانسازانى كوردستان داواى هه‌ڵوه‌شانه‌وه‌ى بڕیارى ده‌ست له‌كاركێشانه‌وه‌ى 2 به‌ڕێوه‌به‌ره‌كه‌ ده‌كه‌ن .
گوته‌بێژی وه‌زاره‌تی ته‌ندروستی حكومه‌تی هه‌رێمی كوردستان رایگه‌یاند، له‌سه‌ر كڕینى قه‌ڵه‌مى ئه‌نسۆلین كه‌س سزا نه‌دراوه‌ به‌ڵكو داوای ده‌ستله‌كاركێشانه‌وه‌ له‌ به‌ڕێوه‌به‌ری به‌شی ده‌رمان له‌ فه‌رمانگه‌ی ته‌ندروستی هه‌ولێر‌و به‌ڕێوه‌به‌ری بنكه‌ی ته‌ندروستی له‌یلا قاسم كراوه‌‌و لێكۆڵینه‌وه‌ش به‌رده‌وامه‌.
به‌هۆی به‌كارهێنانی قه‌له‌می ئه‌نسۆلین كه‌ (ده‌رزییه‌كه‌ بۆ دابه‌زاندنی شه‌كره‌ له‌ له‌شی مرۆڤ به‌كاردێت) بۆ ئه‌و نه‌خۆشانه‌ى چوونه‌ته‌ بنكه‌ى ته‌ندروستى له‌یلا قاسم، 7/2/2012 له‌سه‌ر داوای سه‌رۆكایه‌تی داواكاری گشتی لێژنه‌یه‌ك بۆ لێكۆڵینه‌وه‌ له‌و بابه‌ته‌ پێكهات‌و بۆئه‌وه‌ى لێكۆڵینه‌وه‌ بكرێت له‌ به‌كار هێنانى ئه‌و ده‌رمانه‌، چونكه‌ هیچ كاریگه‌رییه‌كى نه‌بووه‌ له‌سه‌ر نه‌خۆشه‌كان.
لێژنه‌كه‌ به‌ سه‌رۆكایه‌تی سه‌رۆكی داواكاری گشتی‌و نوێنه‌ری وه‌زاره‌تی ته‌ندروستی لێكۆڵینه‌وه‌ له‌و بابه‌ته‌ ده‌كات‌و داوای ده‌ست له‌ كاركێشانه‌وه‌شی له‌ به‌رپرسی بنكه‌ی ته‌ندروستی له‌یلا قاسم‌و به‌ڕێوه‌به‌ری به‌شی ده‌رمان له‌ فه‌رمانگه‌ی ته‌ندروستی هه‌ولێر كردووه‌، تاوه‌كو لێكۆڵینه‌وه‌ ته‌واو ده‌بێت.
دكتۆر خالیس قادر، گوته‌بێژی وه‌زاره‌تی ته‌ندروستی حكومه‌تى هه‌رێمى كوردستان له‌ كۆنگره‌یه‌كی رۆژنامه‌وانیدا راگه‌یاند "له‌لایه‌ن لێژنه‌ى لێكۆڵینه‌وه‌كه‌وه‌ داوای ده‌ستله‌كاركێشانه‌وه‌ى به‌ڕێوه‌به‌رى بنكه‌ى ته‌ندروستى له‌یلا قاسم‌و (ێحب الید)ى به‌ڕێوه‌به‌رى به‌شى ده‌رمانى فه‌رمانگه‌ى ته‌ندروستى هه‌ولێرمان لێكراوه‌، ئه‌مه‌ش سزادان نییه‌، به‌ڵكو به‌ مه‌به‌ستی لێكۆڵینه‌وه‌یه‌، ئه‌گه‌ر تۆمه‌تبار ده‌رچوون ئه‌وه‌ ئیجرائاتی یاساییان له‌گه‌ڵ ده‌كرێ، ئه‌گه‌رنا ده‌گه‌ڕێندرێنه‌وه‌ شوێنی خۆیان".
سه‌ندیكاى ده‌رمانسازانى كوردستان له‌ به‌یاننامه‌یه‌كدا كه‌ دوێنێ ده‌رچووه‌‌و وێنه‌یه‌كى بۆ (رووداو) نێردراوه‌ داوا له‌ وه‌زاره‌تى ته‌ندروستى حكومه‌تى هه‌رێمى كوردستان ده‌كه‌ن له‌ماوه‌ى 48 كاژێردا بڕیارى ده‌ست له‌كاركێشانه‌وه‌ى به‌ڕێوه‌به‌رى بنكه‌ى ته‌ندروستى له‌یلا قاسم‌و به‌ڕێوه‌به‌رى به‌شى ده‌رمانى فه‌رمانگه‌ى ته‌ندروستى هه‌ولێر هه‌ڵبوه‌شێته‌وه‌.

6 _ كۆگایەكى تریش دەستى بەسەرداگیرا ، بێ ئەوەى جەنابى وەزیر پێمان بڵێ ئى كێ یە ؟ كێ ى لەپشتە ؟ دەرمانەكانى براون بۆ كوێ ؟ چۆن و چەند سەرفكراوە ؟ چۆن مۆڵەتى پێدراوە ؟ لەگەڵ دەیان پرسیارى بێ وەڵامى تر ؟

_ كۆگەیەكی دەرمانی نایاسایی دەستی بەسەردا گیرا
2012-02-28 .
لە لایەن ئاساییشی هەولێرەوە، كۆگەیەكی نایاسایی فرۆشتنی دەرمان لە شاری هەولێر دەستی بەسەردا گیرا.
سەرچاوەیەك لە بەڕێوەبەرایەتیی ئاساییشی هەولێر، بە ڕۆژنامەی هەولێرـی ڕاگەیاند: هێزەكانی ئاساییشی هەولێر توانیویانە دەست بەسەر كۆگەیەكی نایاسایی دەرمان لە شاری هەولێردا بگرن، كە بە شێوەیەكی نایاسایی و بە بێ ئاگاداری وەزارەتی تەندروستی و سەندیكای دەرمانسازان، كاری كردووە.
سەرچاوەكە هەروەها ئاماژەی دا: ئەو كۆگەیە لە شەقامی پزیشكانی شاری هەولێر بووە، كە چەندین جۆر لە دەرمانەكانی (پەنادۆڵ و كۆڵ ئەندفلوڵ و ڤیاگرا و كلۆمید و ئەنادۆڵ ئێكسپڕا و سیدۆ ئەفیردین)ـی تێدا بووە.
هەمان سەرچاوە، زیاتر گوتی: ئەوەی لەو كۆگەیە دەستی بەسەردا گیراوە، بڕەكەی نزیكەی 10 تەن حەب و دەرمان بووە، كە بەشێكیان ماوەیان بەسەر چووە و بەشێكیشیان لە كاتی بەكارهێنانیدا هیچ كاریگەرییەكی بۆ سەر نەخۆش نەبووە.
گوتیشی: ئەوانەی ئەو كارەیان كردووە، دوو كەسن كە هەردووكیان كوردن و دەستگیر كراون، لێكۆڵینەوەیش بەردەوامە تاوەكوو بزانین چەند كەسی دیكەیان لەگەڵدایە.
وەزیری تەندروستیی حكوومەتی هەرێمی كوردستان (تاهیر هەورامی) بە هەولێرـی ڕاگەیاند: حەبی سیدۆ ئەفیردین، كاریگەرییەكەی لەسەر مرۆڤ، زۆر لە ماددە هۆشبەرەكان خراپترە.
7 _ ئەم وێنەیە ، وێنەى نەخۆشخانەیەكى دەروونیە لە ووڵاتى مالیزیا ، لاى ئێمەش یەك نەخۆشخانەى دەروونى هەیە جگەلەبیناى نەخۆشخانەكە كەزۆر نالەبارە ، شوێنەكەشى زۆر كۆن و نەگونجاوە لەنزیك كارگەى چیمەنتۆى تاسڵوجەیە تەنها دوكەڵى كارگەكە بەسە بۆ شێت بوونى ئینسانە ساغەكان نەوەك ئەو كەسانەى نەخۆشى دەروونیان هەیەو لەوێ داخڵكراون ، لەولاشەوە جەنابى وەزیر زۆر خۆشحاڵە كەحكومەتى توركیا بڕیاریداوە نەخۆشخانەیەكى 600 قەرەوێڵەیى دروست بكات ، ئێوە بڵێن خێرە توركیا نەخۆشخانەى 600 قەرەوێڵەیى بۆ ئێمە دروست ئەكات ؟ ئەگەر هەزارو یەك تەڵەو فرتو فێڵ لەمەدا نەبێت ؟ ئەى جەناب بۆ 400 قەرەوێڵەیەكە تەواو ناكەن ؟ .
_ توركیا نه‌خۆشخانه‌یه‌كی 600 قه‌ره‌وێڵه‌یی له‌كوردستان ده‌كاته‌وه .
‌ 22/2/2012
ئایدن سه‌لجه‌ن كونسوڵی گشتیی كۆماری توركیا له‌هه‌ولێر رایگه‌یاند: كار بۆ په‌ره‌پێدانی زیاتری په‌یوه‌ندیی كۆمه‌ڵایه‌تی و رۆشنبیری له‌نێوان هه‌رێم و توركیادا ده‌كه‌ین و بڕیاره‌ نه‌خۆشخانه‌یه‌كی 600 قه‌ره‌وێڵه‌یی به‌ناوی زانكۆی ئه‌نكه‌ره‌ له‌هه‌رێم بكه‌ینه‌وه‌.

8 _ لەكۆتایدا ئەڵێین تائەم پیرەژنى ئاخیر زەمانە (هێرۆى برایم ئەحمەد) میكڕۆب و تەكبیركەرى سیستەمى تەندروستى بێ و كۆمەڵێك خەبیرى كەللە زلى ماستاوچیش بەدواوەى بن ، دڵنیابن بیست ساڵى تریش چاك نابێت .