وتارە كافرەكانی كورد لە ئاقار ئیسلامدا و هەناسەكانی بیابانی عەره‌بستان

Sunday, 04.25.2010, 12:00

1174 بینراوە


یەكێك لە كارەساتەكانی كوردستان ئەوەیە، كە ڕەخنە دەگیرێ، ئەو كەسە یان ئەو شوێنەی ڕەخنەی لێگیراوە، بەهیچ شێوەیەك هەوڵی چاكبوون نادات و هەڵەكە بەردەوام دەبێت.
چەندین جار، چ وەك دانیشتنی تایبەت، یان بە وتار، بە برایانی ئیسلامیم گوتووە، كە وەڵامدانەوە و ناڕەزایی دەربڕین سەبارەت بە هەر قسەیەك و هەر كەسێك كوفرێكی كرد، وێڕای كات بە فیڕۆدان، بچوك كردنەوەی ئیسلامیشە. چەندین كۆلكە نوسەر و كەسانی نا دیار، كە حەز و خەونی سەریان مەشهور بوونە، كورتترین ڕێگا بۆ ئەمە، جوێن دانە بە ئیسلام و، ئەوانیش بێ سێ و دوو ئەم ڕێگەیە دەگرنە بەر. لە نێو جەنجاڵی و فەوزا و قەرەباڵغی ئینتەرنێت و تەكنەلۆجیا، كێ پێ ڕادەگات هەرچی وتار و نوسینە بیخوێنێتەوە؟ كەواتە هەزاران وتار و هەواڵ تەنها خاوەنەكانیان دەیخوێننەوە و، ئەو نوسینانەی دەشخوێندرێنەوە پاش چەند سعاتێك لە بیر دەچنەوە. ئەمە كەشوهەوای دونیای هەنوكەیە. ئیتر، بۆ وەدەستهێنانی گرنگی پێدان، باشترین شت، هێرشكردنە سەر موقەددەساتە!
لەبەر ئەوە، كە دونیا بۆتە گوندێكی بچوككراوەی گەشەسەندوو لەڕووی تەكنەلۆجیاوە, خۆ دەرخستن و شوهرەت پەیداكردن بۆتە خولیای ناو سەری زۆرێك لە كۆلكە ڕۆشنبیرو تەرزە نووسەرەكان, كەسانێك هەست بە تەنیایی و شاراوەیی و متبوون دەكەن، پێیان وایە هیچ گرینگیەكیان نیە، تاكە ڕێگەیان بۆ دەرچوون لەم قەیرانە جوێن دانە بەموقەددەساتی مسوڵمانان، خەڵكی سادە و نەزانیش زۆرە، پەرچەكی ئەم جوێنانە بداتەوە، ئیتر لێرەوە بازاڕەكە گەرم دەبێت و، ئەوەی جوێن فرۆش ویستی، بۆی جێبەجێ و دەستەبەر دەبێت.
خودی پێغەمبەر (د.خ)، جوێنی پێدراوە و ئەزیەت و ئازار دراوە. بەڵام ئەو ڕۆژێك لەڕۆژان جوێنی بەكەس نەدا، بەجوێن وەڵامی نەدایەوە. ڕێگەشی نەدا كەس لەجیاتی ببێتە پارێزەری كۆست و كۆسپ! نزای ڕۆژی (تائیف)یش، باشترین گەواهیدەرە. باشە ئێمە دەتوانین هەر كەسێكی ناخ تاساو جوێنی دا، بیكەین بە هەڵلا؟ كێ كەڵك وەردەگرێت؟ لە بەرژەوەندی كێ ئەو هەموو پەرچەكردارە و هەرایە كۆتایی دێت؟ بێ گومان، تەنها بە كەڵكی ئەو خەڵكانە تەواو دەبێت كەجوێنیان داوە و، مەرامەكانیان بە ئامانج دەگەن. سەلمان ڕوشدی و تەسلیمە نەسرین و فاتیمە مەڕنیسی و خەڵكانی تر، لە ناخیاندا سوپاسی مسوڵمانان دەكەن، چونكە بە هۆی فەتواو خۆپیشاندان و ناڕەزاییە بێ تام و بێ ماناكانی ئەوان، بوون بە خاوەنی چەندین خەڵات و پارەوپولێكی زۆر و، ناوبانگێكی جیهانییش! وەڵامدانەوەی وڕێنەكانی ئەو گۆڤارەی پێش چەند ڕۆژێك لە هەولێر، هێڕشی كردووەتە سەر موقەددەسات، كات بە فیڕۆدانە! چونكە ئەم جۆرە خەڵكانە، بۆ جەمێكی خۆش، یان بۆ مستێك دینار ئامادەن دەست و قاچی گێلترین پیاوی دەسەڵات ماچ بكەن كە غەرقی زوڵم و ستەمە. كەواتە جوێندانی ئەوان هیچ نرخێكی نیە، بەڵكو تەنها پەرچەكردار نرخی پێدەدا!
لە لایەكی ترەوە، لەم ڕوژانە وتارێك بە عەرەبی بڵاو بووەتەوە، باسی كورد بوونی ساسانیەكان دەكات و، ڕەخنە لە سەحابەكان دەگرێت. ئەوەی كوفر بێت لەم وتارەدا نیە، كەچی سایتە عروبیەكان نەك هەر خاوەن وتار، بەڵكو میللەتی كوردیشیان پێ كافر كردووە!
یەكێك نەشارەزا بێت، وا دەزانێت هەرچی عەرەبە، پێغەمبەرە!
كاتێك سەرەتای نەوەدەكان بۆ خوێندن لە شام بووم، چەندین قوتابی نەتەوە مسوڵمانەكانی یەكێتی سۆڤیەت لە گەڵمان بوون، بە حەسرەتەوە دەیانگوت: "پێش هاتنمان بۆ سوریا، وامان دەزانی هەرچی عەرەبە وەلی و پیاو چاك و زانایە، كەچی پێچەوانە دەرچوو!".
ڕۆژانە خەڵكی ئاسایی عەرەب، لە عێراق، سوریا و لوبنان، وەك ئەوەی بە خۆم بینیومە، سەر و بنی زمانیان جوێندانە بە دین و خوا و پێغەمبەر. هەر دوو كەس بیكەن بە دەمەقاڵی یان سوعبەت و دەمەتەقێ، ئەم جۆرە جوێنانە بە یەكتری دەدەن!
جارێ مەسەلەی وتار دژی ئیسلام و قورئان و پێغەمبەر، كە لەلایەن عەرەبەوە دەنوسرێ، هەر باسی مەكە. چونكە ئەم جۆرە وتارانە لە عەرەبەوە بۆ خەڵكانی تر ماوەتەوە. بەڵام ئایا، هەڵلا كردنی عەرەب لە سەر كورد بە هۆی وتاری كوردێك، گوایە كوفری كردووە، لە بەر خۆشەویستی ئیسلام و خواو پێغەمبەرە؟ یان عەرەب خۆی لە بەهانەیە لە كورد و، بەهەموو شێوازێك دەیەوێت دژایەتی بكات؟
با، بە بەڵگەوە وەڵام بدەینەوە.
ئەی عەرەب نەبوون، لە لایەك لە ژێر ڕۆشنایی میشێل عەفلەقی مەسیحی، وڵاتیان بەڕێوە دەبرد و، لە لایەكیش بە ناوی ئیسلام، ئەنفالی كوردیان دەكرد؟ ئەی عەرەب نەبوون مزگەوتی گوندەكانیان وێران كرد و قورئانەكانیان سوتاند؟ ئەی عەرەب نەبوون كاتێ ئازاری زیندانیە كوردەكانیان دەدا، زیندانیەكان لە تاو ئازار هاواریان دەكرد، خاتر ئەڵلا، عەرەبەكانیش دەیانگوت: ئەڵا موجاز، واتە خوا لێرە نیە و ئیجازەی وەرگرتووە؟! ئەی كاتێ زیندانیەكان لەتاو ئازار هاواریان دەكرد، بۆ خاتری موحەممەد، ئەی هەر عەرەب نەبوون، كەسێكی جەللادیان بانگ دەكرد و بە كوردەكەیان دەگوت، ئەمە موحەممەدە و ئەویش تا هێزی هەبوو، ئازار و ئەشكەنجەی دەدا؟!
ئەی هەر عەرەب نەبوون، لە نوگرە سەلمان، زیندانەكان و سریەو كەتیبەكانیان بە ناوی ئەبو بەكرو عومەرو خالیدو موسەنناو شەیبەو حارس و ئەبو عوبەیدەو قەعقاع ...هتد كردبوو، كاتێكیش كوردە ئەنفالكراوەكان بیانویستبایە نوێژ بكەن، پێیان دەگوتن: بۆ نوێژ دەكەن خۆ ئێوە عەرەب نین، ئیسلام تەنها بۆ عەرەب هاتووە؟!
ئەی هەر عەرەب نەبوون، كیمیاویان لە مناڵ و پیر و ژنی شار و شارۆچكەكانی كوردستان دەدا كەچی یەك دەوڵەتی عەرەبی تەنانەت بەزوبانیش، ناڕەزاییەكیان دەرنەبڕی؟!
ڕاستیەكەی هەرچی كورد هەیە لەم دونیایە، گەر ڕۆژانە لەجیاتی حەفت جار، حەفتا جار بەدەوری كەعبە دابخولێتەوە، عەرەب لەگەڵ كورد تەباو ساغ نابێتەوە، چونكە موشكیلەی عەرەب لە گەڵ كورد موشكیلەی دین نیە!
چاوی عەرەب لەسەر خاكی كوردەو، سامانی كوردە. هەر وەختێك بۆیان بلوێ، لەپێشتر خراپتر دەكەن بە كورد. عەرەب ڕەحم بە یەكتر ناكەن چۆن ڕەحم بە كورد دەكەن؟ لە مەسەلەی پێكەوە ژیانیش بە ئاشتیانە، كورد لە ناخدا حەز بە ئاشتی دەكات و گیروگرفتی نیە لەم ئاستەدا. ئەوەی گیروگرفتی هەیە لە مەسەلەی پێكەوە ژیان، دوژمنانی كوردن، كە تەنانەت مافی شوناسیشیان پێ ڕەوا نابینن، كە خودا پێی داون!
بەڵام با بێینەوە سەر مەسەلەی ئەو بابەتانەی، كە لەچەشنی ئەو وتارەی پێشووتر ئاماژەم پێیدا، بزانین ئایا بابەتێكی كوفریە؟
پێویستە ئەوە بزانین، سەحابەی پێغەمبەر مرۆڤن و، مەعسوم نین و، ڕەخنەگرتن لێیان، كوفر نیە و ڕەخنەگرتن نیە لەخودی پەیامەكە. بەڵكو ئەوە دەچێتە خانەی هەڵسەنگاندن و مومارەسات. كردەوەی مرۆڤەكان بەناو پەیژەكانی مێژوو، بەشێك نیە لە دین وەك پەیام، تا لەوێوە مۆركی قودسیەت بوون بە بەرخۆی دابكات و ڕەخنەگرتنیشی هێلێكی سوور بێ و یەكسان بێت بە ڕخنەگرتن لە دین وەك دەق. سەحابە هەبووە زینای كردووە، هەشبوە كوشتنی بەناهەقی كردووە، هەروەها سەحابەی مونافیقیش هەبووە. گەر قەول وایە خەڵك دەمی خۆی ببەستێت، چونكە نابێت تخونی سەحابە بكەوین، ئەمەیان نەپەیامی دینە و نە كاكڵ و ناوەڕۆكی ئیسلامە. هیچ گرفتێكم نیە بە تێر و تەسەلی باسی ئەم بابەتە بكەم، هەرچەندە بە پێویستیەكی ئەوتۆی ئەمڕۆی كوردی نابینم و، كێشەكانی ئێمە مەیدان و ڕەهەندی تریان هەیە.
بەڵام دوو قسە ماوە. یەكەمیان بۆ برایانی ئیسلامی، كە ئیتر خۆیان ئازاد بكەن لە عوقدەی برا بچوكیەتی بۆ عەرەب و چیتر بەچاوی گومان تەماشای خۆیان نەكەن، چونكە زمانی عەرەب دژ بە كورد تیژە، گوایە ئەوانیش هەوڵدەدەن وێنەی كورد جوان بكەن لای عەرەب! گرفتی عەرەب لەوە نیە كورد وێنەی كرێت و ناشیرینە، بەڵكو عەرەب خۆی نایەوێت كورد بەجوانی ببینێت. مرۆڤیش لە ناخەوە چۆن بێت هەروا تەماشای خەڵك دەكات! هەر جوێنێك و قسەی ناڕەوا لەلایەن عەرەبەوە بۆ كورد هات، با بەقەد پوشكەیەك حیسابی بۆ نەكرێت، چونكە بەبەردەوامی لەهەست و نەستێكی دوژمنكارانەوە هەڵدەقوڵێ، كە عوقدەی نەقس فاكتەری تەقینەوەكەیەتی.
دووەمیان، بە قووڵی باوه‌ڕم بە ئیسلام هەیە و شانازی بە شارستانیەتی ئیسلامەوە دەكەم، بەتایبەتی لە ئەندەلوس (ئیسپانیای ئێستا)، بەڵام بۆ ڕزگاری كورد و گەیشتن بە نیشتمانێكی ئازاد و سەربەخۆ لە كوردستان، زۆر بەقووڵی باوەڕم وایە كورد پێویستە كەڵك لە ئەزموونی ئیسپانیەكان ببینێت لەو جەنگانەی دژ بە عەرەب و مسوڵمانان بەرپایان كرد، كە بە (ڕیكۆنكوێستا) ناسراوە، لە پێناو ئەو باوەڕەی میللەتە جیاكانی ئیسپانیا هەیان بوو، كە ئیسپانیا پێویستە ڕزگار بكرێت لە بێگانە، ساڵی 1492 ئەم ئامانجەیان جێبەجێ كرد و ڕەوتی میژوویان 180 پلە گۆڕی! لەم میانەشدا پێویستە ئەوە بخەمەوە یاد، كە ئەم بارو زروفەی ئێستای كوردستان، ڕاستە بەهەموو شێوەیەك پێویستە ڕەخنەی لێبگرین و بەهەموو شێوەیەك چاكسازی بكەین و (رادیكال)انە ــ بە مەفهومێكی ئەكادیمیانە ــ بیر بكەینەوە، بەڵام زۆر بڤەیە بیر لەوە بكەینەوە لەپێناو لادانی پارتی و یەكێتی، وابزانین بەیانی گەر عەرەب بێنەوە كوردستان، حاڵی كورد باش دەبێت و نەهامەتیەكانی كەمدەبن. ڕاستیەكەی عەرەب هەركاتێك بێنەوە كوردستان، تەنانەت بەزەییان بە منداڵانی كوردیش نایێتەوە. لەبەر ئەوە وەك هۆكارێك بۆ ئامانجی ستراتیجی كورد، لەم میانەدا هەر چەندە دەسەڵاتداری كوردی زاڵم بێت، نابێت ئێمە هەوڵی گۆڕینی بدەین، بە دەسەڵاتێكی بێگانە بەكورد. عەرەبیش بە ئێمە بێگانەن. لەبەر ئەوە نابێت ڕێگە بدەین تەئسیری عەرەبمان بەسەرەوە بێت لەچۆنیەتی جیهان بینیمان و، چۆنیەتی ژیان و هەڵسوكەوتمان! ئەم پەندە، بەندە بەڕێی فۆرماتكردنی عەقڵ و فیكری كوردەوە، كە تاچەند ئامادەیی شكاندنی قوفڵی خۆگرێدانی بەعێراقەوە هەیە؟!

بۆ بینینی وتارەكە بە عەرەبی تكایە ئەم لینكە ببینە:
http://www.iraq-ina.com/showthis.php?type=1&tnid=48830