چاڤه‌ڕێینه‌... ب له‌ز هه‌سپێ خۆ ب زینێ ب خه‌ملینه

په‌زێ بێ شڤان
مه‌نجه‌لوکێن بێ بێری
ژنێن ب خێلی
بریندارێن بێ چاڤدێری
گۆڕستانێن بێ کێلی
ته‌نا نه‌ بوونا جانێن
شه‌هیدێن خه‌باتێن ئاسته‌نگێن
ژوردا و ژێلی
ترس و له‌رزا تالانکرنێ و ڕه‌ڤ
ژ له‌شکه‌رێن پێنج ڕه‌خێن ب گه‌ف
شه‌ڤێن بێ روناهی و چرا
زارۆکێن بێ که‌س
مرۆڤێن شکه‌ستی
مشه‌ختیێن بێ باب و برا
به‌لاڤ بونه‌ ل هه‌می ده‌را
جاما به‌هه‌شت، هیڤی و خه‌ونێن مه‌
شکه‌ست ، ژێ ڕشت بزاڤ، خۆهـ و خینا مه‌
هه‌ر زاڕوکه‌ک ل به‌ر
دلێ باب و دایکا خۆ شیرینه‌
هه‌ر به‌ره‌ک ل جهێ خۆ سه‌نگینه‌
گه‌ر لڤی بێ بهاییه‌، نه ‌دێرینه‌
ب زاراوه‌کێ شیرین
ژ ده‌ڤێ پێر و کالێن خه‌مگین
ل کوشک ، ئه‌یوان، ل هه‌می ماڵ
بوومه‌ ماییه‌ ئه‌ڤ گوتنا که‌ڤنار
هه‌روه‌سا داستانا رۆسته‌مێ زاڵ
و چیڕۆکا دندک هنار
دگه‌ل دیرۆکه‌کا ژه‌نگ و تۆز گرتی
ته‌نوک پاقژ دبت ب ئالایێ گه‌ڤزاندی
ب خوهـ ، خین و ڕۆندکێن کوردی
پێتڤییه‌ به‌ری ئه‌ڤ ده‌سته‌
زاڕوکه ‌ژی ب بن پیر و کال
ب دوودلی ڤه‌گێڕن
چیرۆکا رۆسته‌مێ زاڵ
ئه‌ی قه‌هره‌مانێ داویێ
ب له‌ز وه‌ره‌
بۆچی گیرۆ بووی
ته‌ چ ل به‌ره‌...؟
هه‌سپێ خۆ ب زینێ ب خه‌ملینه‌
دادوه‌ریێ لسه‌ر ئه‌نییا مه‌ مۆر که‌، ب چــینه
هینگێ داستان دبته‌ راسته‌قینه‌
ب سه‌رپه‌رشتییا ته‌ ئێدی ته‌ڤاڤ
ئێکجاری ماڵئاڤاهیێ د که‌ین ل دۆزخستان
د بین ئێک ده‌ست، ناکه‌ڤین کین و داڤ
ل کوردستانه‌کا شه‌ڤ ب هه‌یڤ و ستێر
رۆژ ب تیشک و حه‌تاڤ ،ئاخه‌ک تێر
پێگڤه‌ بژین شه‌پاڵ و دلێر
ته‌ناهیێ به‌رفره‌هـ که‌ین بۆ نه‌ڤیێن جوامێر