باوەڕ دەكەى یان باوەڕ ناكەى... سەرۆك ئۆباما دێتە كوردستان و بۆ هەر ماڵێك یەك دەفتەر دۆلار دەكاتە دیاری

Sunday, 09.22.2013, 12:00

1276 بینراوە






ڕۆژێكیان بەهۆی جەنجاڵی بەردەوامى جادەكانی شار لەزۆری سەیارە و ئەو حەشاماتە بێشوماری وەكو ڕێچكەى مێروولە بەرەو بازاڕی لەنگە دەهاتن و دەچوون، خەیاڵم دوور ڕۆیی بەخۆمم وت: بۆچی بەسەیارەوە بچمە بازاڕ لەكاتێكدا هەر دەبێ كلاج بكەم ئەوجا نازانم دەگەمەجێ و ناگەمێ، ڕەنگە لەنیوەى ڕێ و لەوپەڕی قەرەباڵغیدا كلاجەكەم بسووتێ و ڕێ لەهەموو ئەوانە بگرم وا بەو دەوروبەرەدا گوزەر دەكەن، یا دەیانەوێ بەسەیارە بەو شوێنەدا تێپەڕن، بۆیە تا لەو سەریەشەیە قورتارمبێ، واباشە بەسواری پاس بڕۆمە لەنگە.. هەنگاوی ئاسایی خۆمم هەڵگرت، خۆم گەیاندە جادەى سەرەكى و لەسەر جادەى ڕەیسی وەستام تا دە دەقە و شتێ زیاتر كاتێ یەك لە پاسەكانى ناو بازار دەركەوت، لەدوورەوە دەستم لێی ڕاگرت و لەهێواش بوونەوەیدا سوار بووم، بەئەسپایی چووم لەتەنیشت گەنجێكەوە دانیشتم، گەنجەكە دیاربوو بەدەست مۆبایلەوە دونیای لێ وێك هاتبۆوە، گیری خواردبوو، هەر ئەوەندەى من ئاگاداربووم چەند جارێ پەیوەندی بەكەسێكەوە دەكرد، دوو قسەى نەدەكرد، یەكسەر پەیوەندەكەى دەپچڕا.. ئەو بەدەهری بوونەوە دەیوت: كاكە ئەوە بۆچی پەیوەندیەكەت ئەوەندە دەپچڕێ؟ ئەویش هەمان پرسیاری لێی دەكردەوە و دەیوت: من شەبەكەم فوولە و لاى من هیچ لەگۆڕێ نییە، ئەویش دەیوت: بەخوای شەبەكە لەلای منیش هەر فوولە دەك خوا لێیان هەڵنەگرێ و ئەو پارەیان لێ حەرامبێ و ببێتە گۆشتى سەى، هەموو پارەكە لەدەرماندەن و لەخۆیانى بدەن و تا ئەو ڕۆژەیشى دەمرن خێر وخۆشی لەخۆیان نەدینن و نەحەسێنەوە وەكو ئاوا بەئاشكرا و بەدەستى ئەنقەست ئەو پەیوەندەیانەمان لێ دەپچڕێنن تا من و تۆ و ئەمسالی وەكو من و تۆ دووبارە پەیوەندیەكە دووبارە و چەندبارە بكاتەوە و ئەوانیش قازانج لەدزینى سەنتەكانمان وەربگرن، ئاخر نازانم دزى لەوە كێوە و دزى لەوە ئاشكراتر چییە وا بەڕۆژی ڕووناك سەنتمان لێ دەدزن و هەر چاویان تێر نابێ .

وەلێ گەنجەكە لەتووڕەیی خۆیدا ئاگری لەناوچەوان دەباری، كاتێ بەخۆی هاتەوە و لەلایەن تۆماری دەنگى كچۆلڵەكەوە ئاگاداری تەواوبوونى پەیوەندەیەكەی پێ ڕاگەیەندرا، بەناچاری وتى: كاكى خۆم، بەخوا خەریكە سەنتم تەواو دەبێ، بەهەر حاڵ پاش سەعاتێكى تر خۆم پەیوەندیت پێوە دەكەم و قسەكانمان ئەو وەختە تەواو دەكەین، جارێ خوا حەفیز، خواحەفیز، خوات لەگەڵ.

لەگەڵ داخستنى دوگمەی سوورى مۆبایلەكەىدا،هەناسەیەكى قووڵی هەڵكێشا، لەبەر خۆیەوە وتى: دەك خوایە لێیان هەڵنەگری وەكو چۆن بەو دەردەوە ئەو میللەتە دەچەوسێننەوە و كەسیش نییە بڵێ: بەری چاوتان دوو برۆیە، ئاخر چ خێرتان دەگاتێ؟ بۆچی وا لەوخەڵكە ڕەش و ڕووتە دەكەن؟.

منیش وەكو ئەوەى ئاگام لەهیچ نەبێ، خۆم لەگوورە نەبرد، وەلێ ئەوەى سەرنجی ڕاكێشام، گەنجەكە لەوە دەچوو كەسێكى خوێنەوار و ڕۆشنبیربێ ئەویش بەو حوكمەى لەسەر ڕانیدا چەند گۆڤار و ڕۆژنامەیەك هەبوو، لەسەرەوەى سەرەوەدا مانشێتێك سەرنجى ڕاكێشام نەمتوانى خۆمی لەڕاست ببوورێنم، نووسرابوو: كۆنسێرتێكى گەورە بۆ هونەرمەندی گەورەى عەرەب.......لە......ساز دەكرێ، بەهەڵپەیەكەوە دەستم بۆ بابەتەكە درێژ كرد و بەئەدەبەوە پێموت: ئەرێ بێزەحمەت روخسەت هەیە بەپەلە ئەو بابەتە بخوبَنمەوە و بتیدەمەوە؟

ئەویش بەزەردەخەنەیەكەوە ڕۆژنامەكەى دەست دایێ و بۆ ڕاگرتم : فەرموو، فەرموو.

چاوێكى خێرام پێیدا گێڕا.. كە بابەتەكەم بەتەواوى خوێندەوە، بەڕێزەوە دامەوە دەستى: فەرموو قوربان، زۆر سوپاس.

گەنجەكە بێ ئەوەى بمناسێ بزانێ من چیم و من كێم، تووڕی هەڵدا وتى: قوربان منیش هەر ئەو بابەتەى كە تۆ خوێندتەوە زۆر سەرنجی ڕاكێشام كە بڵێم ئەگەر ئێمە خراپ نەبین، كەسی خراپمان لەسەر موسەلەت نابێ.

پێموت: مەبەستت یەعنی....

نەیهێشت قسەكانم تەواو بكەم، قسەكەى لەدەم قۆستمەوە، وتى: مەبەستم ئەوەیە ئەم مەملەكەتە لەلایەن كۆمەڵە مشەخۆرێكەوە بەڕێوە دەبرێ، شار بێ حاكمە و كەس بەكەس نییە.

كە وتم: نا، هەمووان وەكو یەك نین، مریشك هێلكە دەكات و جیقنەش دەكا، مرۆڤ بەدەستى خۆیەتى دەتوانێ چاكە بكات و دەشتوانێ چی خراپە و خوا پێی ناخۆشە ئەو شتە بكات.

بەدەم زەردەخەنەیەكەوە وتى: تازە كار لەكار ترازاوە و زۆر زەحمەتە ئەم وەزعە چاكببێ، ئەوانەى ئێمە لەتامیان بردۆتە دەر، تۆ نازانى چ گەندەڵیەك دەكرێ،فەرموو ئەوەتا خۆ خوێندتەوە، فەرموو شەرمیان بەخۆ نییە، كۆنسێرتێكى گەورە بۆ هونەرمەندی گەورەى عەرەب.......لە......ساز دەكرێ، دەزانی ئەوانە بەناوى هونەرەوە قۆڵبڕو بەڕكبڕی ئەم وڵاتەن، جگە لەخۆ دەوڵەندكردنی خۆیان و بێگانەپەرستى هیچ مەبەستێكیان نییە و لەسەر خوێنى من و تۆ دەژێن.

كە وتم: ئاخر ئەوەش هەر خزمەتە، تۆ پێ دەچێ زۆر ڕەشبین بی.

گەنجەكە نەختێ سەری لێ بادام و وتى: ئااای كە بەڕاستى خزمەتە، خزمەتى چی و تەڕەماشی چی، نازانم خزمەت لەكوێیە تۆ بانگهێشتى هونەرمەندێكى بیانى بكەى و بۆ چەند سەعاتێ چل پەنجا دەفتەری كاشی بنێیە مست و بۆ قەرەبۆ و پڕكردنەوەى ئەو پارەیە دەیدەیتێ، بێی تۆڵەى لەم و لەوی بكەیەوە ئاخر ئەو خەڵكەى ئێمە سادە و ساویلكەو گێلن، با هەروا بڵێم، ئەگەر من و تۆ نەچینە كۆنسێرتەكە و زەرەرێكى زۆریان بەركەوت، ئەوا ئەمانیش تەمبێخواردوو دەبن، دەستى خۆیان دەسووتێنن و جارێكى تر كاری وا دووبارە ناكەن، بڕۆ لێیان بپرسە ئەگەر ئەوەندە لەخەمى هونەردان و ئامادەییان تێدایە، فەرموو وەرنە پێش، ئەوە عەرد و ئەوە گەز، وەرن كۆنسێرتەكە بەخۆڕایی بەڕێوە ببەن و لە كۆنسێرتێكدا ڕازى دەبن سی چل دەفتەر دۆلار زەرەر بكەن؟

كە وتم: ئاخر ئەوانە بەتێڕوانینى خۆیان دەیانەوێ پردی پەیوەندی لەنێوان ئێمە و ئەوانی دەرەوە دروست بكەن و كورد بەدونیا بناسێنن.

گەنجەكە دایە قاقای پێكەنین وتى: توخوا ئەوە بیركردنەوەى تۆیە؟ ئەگەر ئەمانە نەبن دیارە كورد پەكى دەكەوێ، ئەگەر ئەمان نەبن كەس نازانێ كورد چییە، لە بێ ئەدەبیەوە ئەو قسەیە ناكەم كە بڵێم ئەى شێخ مەحمودی حەفید و مەلا مستەفای بارزان و هەموو ئەو سەركردانەى لەمەڕ خۆمان ئەوەندە ساڵە پیازیان وردكردووە و داریان لەسەر بەرد دانەناوە و ئەوانە دێن ئەو پردە دروست دەكەن! ئەى هەر ئەوان نین خەمى گەورەى ئەم میللەتەیان لەكۆڵ ناوە و شانیان داوەتە بەر؟

گەنجەكە وتى: تۆ ناهەقم مەگرە، وەلڵاهی وەبیللاهی وەتەللاهی ئەوەى من لەم ڕەمەزانە لە تیڤیەكانەوە بینیم كڕووزەم لەجەرگەوە هەڵسا كە تف لەخۆم و لەكوردبوونم بكەم، سەیرتر لەوە كێوە سەرەڕای لەدەوڵەمەندى هەرێمەكەمان بەو نەوتە زەبەلاحەى هەیەتى مردەنى نییە هێشتا خەڵكێكى ئاوا داماو و فەقیر و ڕووت و ڕەجاڵمان هەبن، بەهەر حاڵ با هەر خەتای دەسەڵات نەگرین و بەشێكى ئەو خەتایانەیش خۆمانین، فەرموو وا بەدەستى خۆمان ماڵی خۆمان حەرام دەكەین و هانی ئەوانە دەدەین وەرن بمانبڕنەوە، وەرن خوێنمان بمژن.

كە وتم: لەمەبەستت تێناگەم؟

بەدەم قاقای پێكەنینەوە وتى: فەرموو با من لێت بپرسم، ئەو سی چل دەفتەری دەیدەنە هونەرمەندێكى بیانى، هەر بەو پارەیە ژیانى چەند خێزان لەمردن ڕزگار دەبێ؟ ئەوەش هەر هیچ، ئەو پێشبڕكێیەى بۆ سەیارە لەو تیڤى و ئەو تیڤییە دەكرێ، هەر نامەیەك من و تۆ دەینێرین بێ ئەوەى پێی بزانین و نەیزانین گوناهێكى گەورەمان دەگاتێ ئەوە جگە لەوەى لەشەرعدا ئەو نامەناردنە بەهەموو پێوەرێك حەرامە و هەر ئەوەش وایكردووە تووشی گوناه ببین، من لێت دەپرسم چ كۆمپانیایەك ئامادەیە ئەگەر پارەیەكى خەیاڵی نەیەت دەست، بۆ من و تۆ سەیارەیەكى گرانبەها بكاتە دیاری هەڵخەڵەتاندن كە قازانجی یەكەم بەشێكى بۆ ئەو تیڤییە و پشكى شێریش بۆ كۆمپانیای پەیوەندی، هەقە ئەو خەڵكە كەمێ بەخۆیدا بچێتەوە و ئەوەندە بەدەستى خۆمان ئەو مشەخۆرانە نەكەینە كەڵەگا و دەوڵەمەندیان نەكەین، فەرموو پێشنیارم بۆ كۆمپانیا پەیوەندییەكان ئەوەیە ئەگەر دەتانەوێ دیاری پێشكەش بكەن بۆچی نایەن بەبێ نامە ناردن ئیعلانى ئەوە بكەن كە لە تیروپشكێكدا چ ژمارە مۆبایلەكی سەر بەو كۆمپانیایە سەیارەكەى بۆ دەرچوو، ئەوە ئەو سەیارەی بۆ بكەنە دیاریی كە ئەمەش لەهەموو كەس ناوەشێتەوە و ئامادەییان تێدا نییە زەرەر لەخۆیان بدەن .

بەسەرسوڕمانەوە كە وتم: نازانم بڵێم چی؟

بەپێكەنینەوە وتى: ئەگەر من ڕۆژنامەنووسبم، هەر ئەمڕۆ بە مانشێتێكى گەورە دەنووسم: سەرۆك ئۆباما دێتە كوردستان و بۆ هەر ماڵێك یەفتەر دۆلار دەكاتە دیاری و هیچ بەلاتەوە سەیر نەبێ و لەم وڵاتە هەموو شت ڕوودەدات ئەوجا ئەو خەڵكە باوەڕ دەكات یا ناكات، هەرنا بەم قسانە دڵیان خۆش دەكەم، هەروەها دەنووسم لەسەرەتای مانگى داهاتوو كۆنسێرتێكى هاوبەش بۆ مایكل جاكسۆن و ئوم كەلسوم ساز دەدرێت و ئەو خەڵكەیش بەپەرۆشەوە ڕووى تێدەكەن لەكاتێكدا سووڕ دەزانن ئەو گۆرانیبێژانە مردوون و كۆچیان كردووە، ئەوەش نەتوێنیەتیە و نەهیچێ وەئەگینا فەرموو ناوى سێ چوار هونەرمەندی خۆمانم بۆ بژمێرە كە لەلایەن كۆمپانیایەكى گەورەى جیهانیەوە بۆ سازدانى كۆنسرێت بانگهێش ئەم وڵات و ئەم وڵاتانە كرابن.

كە وتم: ئاخر ئەم هەویرەی تۆ باسی دەكەى ئاو زۆر دەكێشێ.

گەنجەكە وەكو زۆر داخ لەدڵبێ و زۆر ناخی خۆی بخواتەوە، بەپەرۆشەوە وتى: توخوا، تكا دەكەم قسەم پێ مەكە، كورد دەمێكە وتوویەتى: تفی سەرەو ژوور هەر بەڕووى خۆمان دەكەوێتەوە.

لەو قسانەدابوو، بەدەنگێكى بەرزەوە ڕووى كردە سەكنەكە و وتى: قوربان دابەزین هەیە.

* * *



چەند بابەتێکی پێشتری نووسەر