KURDISTANPOST
كاوە دەرگەڵەیی
سازێك لەو بنارەدا دەگری
Tuesday, 01/12/2009, 12:00
1705
بینراوە
من لە زمانو گریانی ئەو سازە دەگەم
چەند پەرێشانی ژانی هەڵچوی ئەم گەلەیە
پەروانە ئاسا خۆی بە دەوری
گڕى چرای ووڵاتا دەگێڕێ
تا سوتان مەیلی لێیە پەڕو باڵى هەڵكڕوزێ
دەنگی ئەو سازە هاواری گەلێكی پڕ لە ژانە
كیشوەر بە كیشوەر چیرۆكی خۆی دەگێڕێ
تا دڵسۆزی لێ وەرگرێ
ئیدی پێڵوی ئەسرینی بە دەسماڵى سۆزێ بسرێ
ئەرێ ئیستا ئەو ساز ژەنە دەناسمەوە
لە مێژە بەهەستی بیستنم ئاشنایە
پەڕە پەڕە مێژووی بیرەوەریەكانم هەڵدەدەمەوە
تا بە خەیاڵى بڵاوم ڕووخساری پشكۆ ڕەنگی بدۆزمەوە
ئەرێ ئەی سرود ئەرێ ئەی ئاوازی ژانی نیشتمان
لەوەتەی تۆ پەنات بردۆتە لای چیاو قەدپاڵى بەفر
لاوێكی فیداكاریش بەرەو لای ئێوە سەری خۆی هەڵگرت
ئەو سازێكی وەك كۆرپەلە باوەش نابوو
لایلایەی بۆ دەكرد لە ئامێزی دەگرتو بۆنی دەكرد
ئەوەندە تەلی ژێكانی بۆ نیشتمان ڕاتەكاندبوو
بۆیە سەری پەنجەكانی بە خوێنەوە داچۆڕابوو
ئەوەندەی بۆ نیشتمان تەلی ژێكانی
ئەرێ ئێستا وە بیرم كەوتەوە
ئەوە هۆزان بوو بە چەپكێ ئاوازەوە لەم شارەدا بۆ عەشقی نیشتمان عەوداڵ ئاسا بوو
هاواری سروودو نەوای سازی
چەشنی باران بەسەر ڕوێنی ڕەشیا نم نم دادەباری
بەسەر پرچی دەوەندا سرودی دەبوە ئاوەنگی بەرەبەیانی
ئای ئەو لاوە خوێن گەرمە
چەند دڵ پڕ لە حەسرەت بوو بۆ مەراقی ئەم نیشتمانە
ئەو چیا سەر بە بەفرە لە سۆمای چاوی ئەودا
تابلۆیەكە بە ڕۆحیدا هەڵواسراوە وەلێ چەند دوریش بێ
چەشنی خۆرێك هەڵدێتو هەر دەیگاتێ
ئەرێ ئەى سرود ئەرێ ئەی شیعری شەهید ئەرێ ئەی سازی تۆز لێ نیشتوو
پێم بڵێ ئەو ساز ژەنە شەیدایە كوانێ
لە حەژمەتا سرود پڕ بوو لە تاریكی مەغریبێك
بە پروشەى بارینی بەفرەوە
ووتی وەك تۆ غەریبی ئەو ساز ژەنە دەكەم
تا كەمێك لە پاكی ئەو عەشقەی
كە منو ئەو هۆگری بووین
بۆ چیاكانی سەركەشی بڵێیتەوە
لە بن تاوێری نسرمو سێبەردا
ئاواتە خوازم وەك جاران
ئاهەنگێ بۆ گۆڤەند ساز كەینەوە
ئەوسا لە ئامێزی یەكتردا بۆ خۆشەویستی ئەم نیشتمانە
بە عەشقەوە بتوێینەوە
كاوە دەرگەڵەیی
© 2019- Kurdistanpost