ئەسپە شێی گۆڕان، هەڵبژاردنی كوردستان بەرەو گۆڕان، یان دۆڕان، دەبات!؟

Sunday, 14/06/2009, 12:00

2082 بینراوە


پەشێو دەڵێت: (هەستن مەنوون ئێمە لەناو قەیتولێكین، دوو ئەسپی كوێر رایەكێشێ)، پێ دەچێت ئەسپە شێی لیستی گۆڕان-یش، لەم هەڵبژاردنەی داهاتووی پەرلەمانی كوردستاندا، ئەو دوو ئەسپە كوێرەی پەشێو بكات بە سێ.

دیارە ئێستا و ئایندە شایانی گۆڕانن، وەلێ مێژوو ناگۆڕدرێت كاتێك كەسێك ئامادەبێت باگراوند و مێژووی خۆی بێ بەها بكات وپاكانەی لێبكات ئەوە مانای چەواشەكردنی خۆیەتی بە پلەی یەكەم و بەپلەی دووەمیش خەڵكییە . لە هەر ئان وساتێكدا هەوڵی گۆڕانی مێژوو درابێت واتا مەبەست لە چەواشەكردنی مێژوو بووە نەك گۆڕان. پێم وانییە كەسێك دوای تەمەنێكی درێژخاین و قاڵبوونەوەی لەناو عەقڵیەتی پاوانخوازیدا و بەتایبەت لە بەسەر چوونی تەمەنیدا بتوانێت بە رێژەی 180 پلە، گۆڕانی بەسەر دابێت و باس لە ڕیفۆرمخوازی بكات لە تێڕوانینی دەسەڵاتێكدا كەخودی خۆی بونیاد نەری بێت.
نوێخوازی لە كەسێكدا بەدیدەكرێت و بۆی دەچێتە سەر كە مەترسی پاشگەز بوونەوەی لێنەكرێت، نەك كەسێك لەگەڵ ئەوەی باگراوندێك ومێژوویەكی هەبێت لەو بوارەدا و لەبەرچاوی هەموو كوردێك روونە وئەگەر بێت و كەسێكی شەست بۆ حەفتا ساڵ بدوێنیت هەموو مێژووی كەسایەتیە سیاسییەكانی ئەمڕۆی بە ناو نوێخواز، بۆت ڕۆشن دەبێتەوە، هەڵبەتە ئەم پێشەكییەم پتر پێی كاك نەوشیروان دەگرێتەوە بەشێوەی سەرەكی پاشان ئەو كەسایەتیانەی كە خۆیان بەنوێخواز دەزانن وەلێ مێژوو شایەدە لە سەر بیر وباوەڕیان ئەگەر چەواشەی نەكەن.
كەسایەتی كاك نەوشیروان دەكرا كاتێك نوێخواز بوایە كە یەكەم جار پێی بە تەڵەی گۆڕانەوە بوو. كە كەوتە نێو باڵی مەكتەبی سیاسی ڕیفرۆمخوازی شۆڕشی ئەیلول كە پارتی دیموكراتی كوردستان ڕابەرایەتی دەكرد و لە نیو خەڵكیدا بە (جەلالی) دەناسرا بەرانبەر بە باڵی مەلا مستەفا بارزانی بوو كە بە (مەلایی) ناوزەند كرابوون . لە پاش جیابوونەوەی باڵی ناوبراو وڕێكەوتنیان لە گەڵ رژێمی بەعسیدا لە ساڵی(1966) ئەم بەرێزە بەرپرسی بەندیخانەی (جەلالی)یەكان بوولە بەكرەجۆ. وەلێ لە یادەوەریكانیشیدا ئامادە نەبوو سەرەقەڵەمێكیان لێ ئاشكرابكات كە چەندەها كەسایەتی شۆڕشگیری ئەو سەردەمە لە گۆشەی زیندانی جەلالییەكاندا بەندكردووە لە بری ئەو ڕێبازە نوێخوازییەی كە بووە هۆی جیابوونەوە لە پارتی دیموكراتی كوردستان ڕێبازی جەلالیزمی هەڵبژارد. هەر لە ئەڵقەی یەكەمی بیرەوەرییەكانی كاك نەوشیروان دا لە لاپەڕەی 228باس لەچۆنێتی شەهید بوونی كاك ئارام دەكات و لە درێژەی باسەكەیدا دەڵێت (كۆمیتەی هەڵمەت داوایان لی كردبووم لێرە بەدواوە لە باتی كاك ئارام من پیوەندییان لەگەڵ ببەستم سەرپەرشتی كار وچالاكییەكانیان بكەم. كاك ئارام دۆستێكی نزیك و خۆشەویستی من بوو. لە بیروباوەڕدا لە یەكەوە نزیك بوین.) وەلێ هەموو تاكێكی هۆشیار و شۆڕش دۆستی ئەوسەردەمە بە گشتی و ئەندامانی كۆمەڵە بە تایبەتی زانیارییان هەبوو كە ئارام كەسایەتییەكی (ماركسی لینینی) بووە و نووسینەكانی گەواهی ئەو راستییەن بۆ بیروباوەڕی.
پاش ڕاپەڕینە مەزنەكەی بەهاری (91) دەنگگۆی ئەوە بڵاوبووەوە كە كاك نەوشیروان نیازی سەر لە نوێ دروست كردنەوەی كۆمەڵەی رەنجدەرانی هەیە، كەچی كاك نەوشیروان لە چاوپێكەوتنێكی گۆڤاری (خاك)دا حاشا لە مێژووی چەند ساڵەی كاركردنی لە ڕیزەكانی ڕێكخراوێكی (ماركسی لینینی)دا دەكات و ئەو دڵسۆزییەی بۆ نزیكترین هاوڕێی وەلادەنێ و دەڵێت: (نە ماركسی بووم نە ماركسییش دەبم) لێرەدا شك لە هەڵوێستی بەردەوامی ئەم كەسایەتییە دروست دەبێت كە تاچەند ئامادەیە لە بیروباوەڕی نوێخوازی پاشگەز نەبێتەوە و بەردەوام دەبێت لە سەر ئەو گۆڕانەی كە باسی لێوە دەكات . جا پێم وایە مێژوو سەنگی مەحەكە بۆ ئایندە.

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست


چەند بابەتێکی پێشتری نووسەر




کۆمێنت بنووسە