كاك نەوشــیروان بۆ كەناڵى الجزیرەدا : ئەگەر خروقات كرا پەنا ئەبەینە بەر دادگا ... !

Sunday, 07/06/2009, 12:00

3237 بینراوە

ئەم شەو 7/8-6-2009 كەناڵى ئاسمانى الجزیرە چاوپێكەوتنێكى لەگەڵ بەرێز كاك نەوشیروان سەرۆكى لیستى گۆڕان بڵاوكردەوە ، كاك نەوشیروان وەك سیاسەتمەدارێكى مولتەزیم بە ئامانجە باڵاكان و بارودۆخى ئەمڕۆى كوردستان بەئاراستەیەكى شارستانى دەروازەی گفتوگۆیەكى سیاسی هێمنانەى بۆ ئایندە وەك ئەڵتەرناتیڤێك بۆ پرۆسەى سیاسی خستەڕوو ...من نامەوێ هەموو لێدوان و قسەكانى بگێرمەوە ، بەڵام سەرنجم وەك تاكێكى بەئاگاى ناو كۆمەڵگە لەسەر لایەنێكى ئەو خوێندنەوەو بۆ چوونەى بەرێزیان هەیە كە لە میانەى وەڵامی پرسیارێكى كەناڵەكەدایە كە لەكاتى بوونى پێشێلكارى لەهەڵبژاردنەكاندا لە لایەن دەسەڵاتى سیاسی ئێستاى كوردستاندا ئێوە چى ئەكەن ؟ بەرێزیان وتى (پەنا ئەبینە بەر دادگا و دادگاى فیدراڵى و رێكخراوە نێوە دەوڵەتیە پەیوەندارەكان) !
ئەم وەڵامە وەڵامێكى سیاسیانەى هاوچەرخانە و تێڕوانینێكى شارستانیە بۆ چارەسەركردن و بەلاداخستنى كێشەكان ، پیاوى سیاسی و بەئەزموون و خۆ بە بەرپرسیارزان لەبەرامبەر كێشە گەورە و چارەنووسسازەكانى میللەتەكەى ئەبێ هەروا وەڵام بداتەوە بەڵام ، دەسەڵاتى سیاسی و ئەداى حكومەتە سەقەتەكەى هەرێم تاڵاوى ژەهرێكى پێ چەشتووین كە بەهیچ جۆرێ تامى شیرینى جارێكى تر لە كاسەى ئەودا دەممان شیرین ناكاتەوە ! ئەم دەسەڵاتە خۆسەپێنە وەك زەروو بە قوڕگى خەڵكەوە نوساوە ئەگەر خروقات و كارى نایاسایی و تەزویرو كێشە لە هەڵبژاردنەكاندا دروست بكا یاخود یارى بەئەنجامەكانى هەڵبژاردن بكا و لەكاتى دۆڕانە چاوەڕوانكراوەكەیاندا ئاژاوە بنێنەوە و كۆسپ بۆ ئایندەمان دروست بكەن ، ئەگەر بیانەوێت بەمەسەلەى هێز وچاوسووركردنەوەى پاسەوانەكانیان بمان ترسێنن ئەوا خەیاڵیان خاوە ، ئەگەر ئەم ئەگەرانە هەرچیان بەبارى نێگەتیڤەكەیدا دەسەڵات پراكتیزەى بكات ئەوا جەماوەر لەوانیە چاوەڕوانى ئەوە نەكات دادگا و حكومەتى ناوەندى بێتە ناوەوە و بەخاو و خلیسكى رازیمان بكەن و دەسەڵاتە شلۆق و ئیفلینج بوەكەیان بۆ بگەڕێنینەوە بەڵكە جەماوەر خۆى چارەسەر و ئەڵتەناتیڤى ئەوەى لایە ، ئەویش بەرەنگاربوونەوەى راستەوخۆ و رژانە سەر شەقامە تا ئەو رادەیەى كە بەخوێن ئازادى و گۆڕان دەستەبەر ئەبێ ، پێم وایە شەقام ، راى زۆربەى خەڵك لە دەسەڵات قبوڵ ناكا خروقاتى هەبێ و بێدەنگ بێ چونكە ئارام گرتنیش ئاستێكى دیارى كراوى هەیە و با دەسەڵات ئەوەى لاروون بێ : راستە چەك و جبەخانەكان لاى ئەون بەڵام سەدام و بەعسیش چەك و جەللادیان كەم نەبوو لە كوردستان ! ئەم نوسینەم باوا لێك نەدرێتەوە كە مەبەستم هاندان و خۆشكردنى ئاگرێ بێ بۆ ئایندە ، نا بە پێچەوانەوە بەلاى منەوە یەك دڵۆپ خوێن لە هەركەسێك بێ چ لە جەماوەر چ لە جەللادەكانى دەسەڵاتیش سەراپاى پرۆسە و رەوشى هێمنانە و رووى شارستانى مەسەلەكەمان ناشیرن و بێ بایەخ ئەكات بەڵام نابێ دەسەڵاتیش ئەوە والێك بداتەوە كە چەك بەدەست و خاوەنى هێزى چەكدارى نین ماناى وایە لاواز و بێ دەسەڵاتین و بێ دەنگى هەڵ ئەبژێرین نا زۆر بەپێچەوانەوە ئەم جارە بەهێزى زۆروزەوەندى جەماوەر ، بە ورەى پۆڵاینى بەعس قڕكەر بە پشتیوانى بازووى گەنج و لاوانى هێشتا خۆشی نەدیووى وڵاتەكەم مل بۆ ئیرادەى ئێوە و ویستە قێزەونەكانتان نادەین و دڵنیابن دەست بەردارى بیروڕاى ئازادیخوازانەى خۆمان نابین و حەتمیەتى ئەم گۆڕانە ئەبێ ببینین .