له‌مه‌ودوا شه‌قام په‌رله‌مانی ئێمه‌یه و شتێکیش نییه به‌ناوی سه‌رۆکی هه‌رێم
Tuesday, 02/07/2013, 12:00
2523 بینراوە
ڕاگه‌یه‌ندراوی (ڕۆژنامه‌نوسان و چالاکوانان و چین و توێژه‌کان)ی ناحیه‌ی چوارقوڕنه، سه‌باره‌ت به درێژکردنه‌وه‌ی واده‌ی سه‌رۆکایه‌تی هه‌رێم و کوده‌تا به‌سه‌ر شه‌رعییه‌تدا
بۆ:
- لایه‌نه سیاسییه‌کان
- ڕۆژنامه‌نوسان و ڕۆشبیران و چالاکوانانی مه‌ده‌نی
- سه‌رجه‌م ناوه‌نده‌کانی ڕاگه‌یاندن
- ڕای گشتی
وه‌ک هه‌موومان ئاگادارین له ڕۆژی 30/6دا و له‌کاتێکدا خه‌ڵکی کوردستان چاوه‌ڕوانی ئاڵوگۆڕی ده‌سه‌ڵاتیان ده‌کرد له ماوه‌یه‌کی نزیکدا، له پڕۆسه‌یه‌کی دیموکراتیدا و له ژێر چه‌تری هه‌ڵبژاردندا به‌ڵام به‌داخه‌وه "به‌ناو په‌رله‌مانی کوردستان" له پیلانێکی نایاسای و نا ئاساییدا له ڕێی په‌رله‌مانتاره کۆنتڕۆڵکراوه‌کانی هه‌ردوو پارتی (یه‌کێتی و پارتی) بۆ ماوه‌ی دوو ساڵیتر ته‌مه‌نیانکرده‌وه به‌به‌ر ده‌سه‌ڵاتی سه‌رۆکێکدا که له‌ماوه‌ی هه‌شت ساڵی ڕابردوودا وه‌ک سه‌رۆکی پارتی دیموکراتی کوردستان و سه‌رکرده‌یه‌کی بێ کرده و پیاوێکی یاخی له یاسا و ویژدان حکومی ئه‌م هه‌رێمه‌ی کردووه
ئێمه له‌ڕێگه‌ی ئه‌م ڕاگه‌یه‌ندراوه‌وه هه‌موولایه‌ک له‌وه ئاگادار ده‌که‌ینه‌وه که له‌مه‌ودوا په‌رله‌مانی ئێمه شه‌قامه و شتێکیش نییه به ناوی سه‌رۆکی هه‌رێمی کوردستان، که له‌پڕۆسه‌یه‌کی دیموکراسیدا شه‌رعییه‌تی وه‌رگرتبێت، به‌ڵکو له‌مه‌ودوا وه‌ک سه‌رکرده‌ی پارتێکی کوده‌تاچی و سه‌رکرده‌ی گروپێکی یاخی له‌هه‌رێمی کوردستاندا مامه‌ڵه‌ی له‌گه‌ڵدا ده‌که‌ین و په‌یامی ده‌ست خۆشیش بۆ نوێنه‌رانی گه‌ل له پارته‌کانی ئۆپۆزسیۆن ده‌نێرین که توانیان ئازایانه نوێنه‌رایه‌تی ده‌نگی زیندووی شه‌قامی کوردی بکه‌ن و به‌رد بگرنه ئه‌و وه‌همه‌ی که‌ده‌سه‌ڵاتی کوردی 22ساڵه به خه‌ڵکی ئازادیخوازی ئه‌م هه‌رێمه‌ی ده‌فرۆشێته‌وه و ناوی ناوه " دیموکراسی"،
ئێمه پێمانوایه سه‌رۆکی پارتی دیموکراتی کوردستان له ماوه‌ی حکومڕانیه‌تی ئه‌م هه‌رێمه‌دا ئه‌وه‌نده‌ی ڕووی دیموکراسییه‌تی ڕه‌شکرد و نموونه‌یه‌کی دزێوی حکومڕانی نیشانی ئێمه و دۆست و دوژمندا نیو ئه‌وه‌نده‌ش له‌هه‌وڵی دابینکردنی ژیانێکی ئارام و ئاسایشدا نه‌بووه بۆ تاکه‌کانی کۆمه‌ڵگا، و به‌رده‌وام به‌زه‌بری ئاگر و ئاسن ده‌ستی به کورسییه‌که‌یه‌وه گرتووه نه‌بادا گه‌رده‌لوولی وشیاری خه‌ڵکی کوردستان کورسییه‌که‌ی له‌ده‌ست ده‌ربێنێت و خۆشی ڕه‌وانه‌ی دادگایه‌کی عادیلانه‌بکات، کوشتنی ڕۆژنامه‌نوس و ئه‌تککردنی دیموکراسی و سوکایه‌تی کردن به‌به‌ها مرۆڤایه‌تییه‌کان و ژن کوژی و سه‌رهه‌ڵگرتنی گه‌نجان بۆ ده‌ره‌وه و خۆسوتاندن لاوانی بێنازی کوردستان و نه‌گه‌ڕاندنه‌وه‌ی ناوچه کێشه له‌سه‌ره‌کان بۆ سه‌ر خاکی کوردستان و تێکچوونی شێرازه‌ی کۆمه‌ڵایه‌تی کۆمه‌ڵگه‌ی کوردی و لاوازبوونی ئینتیما لای تاکی کوردی و ئه‌مانه و چه‌ندانی تریش له‌ده‌سته‌که‌وته‌کانی ئه‌م سه‌رۆکه‌یاخیه‌ن، ئیتر چ یاسایه‌ک ڕه‌وایه‌تی به‌درێژکردنه‌وه‌ی ته‌مه‌نی سه‌رۆکێکی له‌م شێوه‌یه ده‌دات؟
په‌یامی ئێمه بۆ سه‌رجه‌م ڕۆژنامه‌نوسان و ڕۆشنبیران و چالاکوانان و ئه‌و ڕێکخراو و گروپانه‌ی که بۆ ئازادی تێده‌کۆشن و لایه‌نگرانی یه‌کێتی نیشتیمانی کوردستان ئه‌وه‌یه که به‌هه‌موو شێوه‌یه‌ک ڕووبه‌ڕووی ئه‌م خواسته دیکتاتۆرییه‌ته ببنه‌وه که پارتی و یه‌کێتی هه‌نگاویان بۆی ناوه و شه‌قام بکه‌ن به میمبه‌ری ناڕه‌زایه‌تی و گردبوونه‌وه و که‌مپه‌ین و واژۆکردنه‌وه و ئاگادارکردنه‌وه‌ی گروپه نیوده‌وڵه‌تییه‌کان بکه‌ن به کارتی فشار.
له‌کۆتاییدا ئێمه پێمان وایه ئه‌م واده درێژکردنه‌وه‌یه ته‌نیا بۆ دوو ساڵ نییه به‌ڵکو بۆ داکوتانی ڕه‌گی هه‌تاهه‌تایی حوکمی بنه‌ماڵه و تاقم و گروپێکی دیاریکراوه که ده‌ستی به‌سه‌ر هه‌موو جومگه‌یه‌کی سیاسی و ئابوری و یاسایی ئه‌م هه‌رێمه‌دا گرتووه و ئاماده‌یه له‌پێناو ئه‌نجام نه‌دانی هه‌ڵبژاردن و ده‌ستاوده‌ستنه‌کردنی ده‌سه‌ڵاتدا هه‌مان ئه‌زمونی 31ی ئابی 1996 دوباره بکاته‌وه.
ناوه‌کان:
کامه‌ران مه‌لا عوسمان لشکر کوێستانی شێروان برایم خواز
شێرکۆ ڕه‌سوڵ سه‌لمان کۆچه‌ری به‌شدار عبدالرحمن
کارزان عوسمان ئاکۆ مامه حه‌مه ئاسۆ قادر له‌یل
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
