سیاسەت کردنی سەرکەوتوانە دەتوانێت ئابوری سەرکەوتوانە بەدوای خۆیدا بهێنێت!

Friday, 24/01/2014, 12:00

1722 بینراوە

زۆرجار خوێندومانەتەوە یان گوێ بیستی ئەو دەستەواژەیە بووین کە دەڵێت؛ئەوە ژێرخانی ئابوریە کەدەتوانێت جۆری سەرخانی کۆمەڵگا دیاری بکات، ئەم دەستەواژەیە زۆرتر لەلای فەلسەفەی ئابوری سیاسی مارکس وتراوە یان شیکردنەوەی لەسەر کردوە. من لێرەدا نامەوێت ئەو دەستەواژە ئابوریە سیاسیەی مارکس بە کەم وەرگرم یان بڵێم ناڕاستە، چونکە مارکس لەسەدەی نۆزدەیەمدا ژیاوە و وەک پێشڕەوترین و بەتواناترین فەیلەسوفی پێش خۆی و دوای خۆیشی دەرکەوتوە، چ لە ڕووی شیکردنەوەی بۆ ئابوری سیاسی نێو سیستەمی سەرمایەداری چەوسێنەر و دیاری کردنی بەدیلی سیاسی و ئابوری ئەو سیستەمە کە سۆسیالیزمی زانستیە، هەروەها وەک پێشەنگی ڕزگاری خوازی چینی کرێکار ناسراوە لە ئەوروپاو جیهاندا.
ئەو کاتێک ئاماژەی بەو دەستەواژەیە داوە، تیگەیشتوە لە  کۆمەڵگای سەردەمی خۆی، وە جۆری سیستەمە سیاسی و ئابوریەکەشی کە سیستەمی سەرمایەداری تازە گەشەسەندوو بوە، سیستەمی سەرمایەداری دەتوانم بڵێم لە سەدەی شازدەوە بەتەواوەتی پایەو چەقی سیاسەت و کاری خۆی داکوتیو بوەلە کۆی وڵاتانی ڕۆژئاوادا، خودی ئەو سیستەمە سیاسی و ئیداریە، هەردەم لە داهێناندا بوە لە نێو کایە جۆراوجۆرەکاندا، چ لە ڕوی سیاسیەوە بێت یان لە ڕوی ئابوری و تادواتر، دیارە سیستەمی سەرمایەداری پایە  ئەساسیەکانی خۆی لەسەر بنیات نانی قازانج و چەوساندنەوەی چینێکی بەرهەمهێنەر بنیات ناوە و بەردەوامیش  لەسەر ئەو ڕیتمە سیاسیەی خۆی لە کاردایە. من لێرەدا نامەوێت بڵێم، ئەو جۆرە ژیانکردنەی لە وڵاتانی ئەوروپادا هەیە، کە بەجۆرێک لە کۆمەڵگای ڕیفاهی ناسراوە، بەرهەمی تەنها خودی سیستەمە سیاسیە سەرمایەداریەکەیە،
بەڵکو بەرهەمی هەڵسوڕێنەرانەی کۆی ئەو بزوتنەوە جەماوەریە سیاسیانەشن کە لە خزمەتی چینی کرێکار و
خەڵکی چەوساوەدا بوون، وە کاریان کردۆتە سەر دەسەڵاتی حاکم و داخوازیە سەرەکیەکانیان سەپاندۆتە سەر
خودی دەوڵەتدا، چونکە ئەوە دەوڵەتدارانن، بەرپرسی کۆی جومگە سەرەکیەکانی ژیانی کۆمەڵگان بە گشتی، دیارە  ئەو ڕێکخستنە کۆمەڵایەتیەی لە وڵاتانی ئەوروپادا بوونی هەیە، بەدورە لە جیهانبینی سەپاندنی هەیمەنەی حیزبی  یان تەنیا سەرۆکێک، بە پێچەوانەوە دام و دەزگاکان هەریەکە بۆخۆیان، بەشێک لە سەربەستی و خۆ بەڕێوەبردنیان هەیە لەلایەن خودی خۆیانەوە، لێرەدا، ئەوە خودی سیاسەت کردنیێکی سەرکەوتوانەیە، دەتوانێت، کار لەسەر کۆی بەرهەمی ئابوریش دەکات و کۆمەڵگاش، نەک ناکرێت بە کۆمەڵگایەکی بەرخۆر، بەڵکو کۆمەڵگا بەشدارە لەنێو  جیهانبینی بەرهەمهێناندا و لە ڕووی کرداریەوە هەست بەبوونی خۆی دەکات، بۆیە خاوەن ئەو توانایەشە، کە  هەردەم بتوانێت ئیرادەی سیاسیانەی خۆی بخاتە نێو مەیدانی هەڵسوڕان و کاری سیاسیشەوە.

نووسینی ئەم بابەتە، پەیوەستە بەو هەلومەرجە، داڕوخاوەی لە عێراق و کوردستاندا، بوونی هەیە، هۆکاری ئەو کۆ مەینەتیانەش سەپێنراوە بەسەر زۆرینەی دانیشتوانی ئەو کۆمەڵگایەدا، دەرئەنجامی ئەو فەشەلە سیاسیەیە کە بەناو  سیاسەتمەدارەکان لەو کۆمەڵگایەدا هەڵسوڕێنەرین، زۆرجار گوێبیستی ئەوە بووین کە ئەوە تاوانی نەوتە کە  کۆمەڵگای توشی ئەو بارە نالەبار و قەیرانە بەردەوامەکان وئەو هەژاریە زۆرەی یەخەی بە کۆمەڵگا گرتوە، کردوە.

لە کۆی ئەم سەرزەمینە پان و بەرینەدا و لە هەر جێگایەک، کە ئاوەدان کردنەوە تێیدا شوێنێکی گرتبێت، زۆر بە  دڵنیاییەوە دەتوانم بڵێم، لەو جێگایەدا هێندە دەوڵەمەندی سروشتی بوونی هەیە، کە بتوانێت خواستەکانی کۆمەڵگا بەدی بهێنێت، بەڵام کاتێک دەبینین، لە زۆرێک لە وڵاتانی جیهاندا، ئاستێکی زۆر لە دواکەوتووی و هەژاری  بوونی هەیە، ئەوە تاوانی ئەو سەرزەمینە و ژێر زەمینەکەی نیە کە بێبەریە لە دنیایی خولقاندن و ئالوگۆڕ پێکردنی سروشت، هێندەی تاوانە سەرەکیەکە، پەیوەستە بەو جۆرە سیستەمە سیاسیەی کە کۆمەڵگا بەڕێوە دەبات.

هەرێمی باشوری کوردستان، پڕاوپڕە، لە دەوڵەمەندێتی سروشتی، هەر لە نەوتەوە بیگرە، تا دەگات، بە زۆرترین  جۆری تری مادەیی کانزایی بەبەهاو، لەولاشەوە زەویە بەرینەکەی کە بۆ بەرهەمهێنانی کشتوکاڵی و بەخێوکردنی سامانی ئاژەڵی لە پلەیەکی بەرزدایە، ئەگەر بێت و خەمخۆر و دڵسۆزی خۆی هەبێت.
لەبەرانبەر ئەم دەوڵەمەندێتەی سروشتی کوردستاندا، دەبینین، ئاستێکی یەکجار لە سیاسەتمەداری داڕوخاوی خود  پەرست بونیان هەیە. بەناو سیاسەتمەدارانێک، کە بەهیچ ئەندازەیەک نزیکایەتیان نیە لەگەڵ خواستەکانی کۆمەڵگادا و، بە ئەندازەیەکی باش، دەتوانین بڵێین، ئەوانی حاکم، هێندەی لە خزمەتی پرۆژە سیاسی و قازانج هێنەرەکانی  وڵاتانی چەوسێنەری چواردەور و جیهاندان، بە چارەکێکی ئەو خزمەتکاریە دەرەکیە، ئامادە نین، لە خزمەتی  بەهاکانی خودی کۆمەڵگای کوردستاندا بن.
ئەوە بەرهەمی ئەو داڕوخانەی سیاسیەکانە، کە وا دەکات، بۆ دوای  هەر دەنگان و هەڵبژاردنێک (دیارە من وەک خۆم نە بڕوام بەدەنگدانی نێو عێراق و کوردستان هەیە، وە نەبڕواشم بەوە هەیە کە لە نێو سیستەمی سەرمایەداریدا بە دەنگدان بتوانرێت سیستەمی دەوڵەتی چەوسێنەری سەرمایەداری لە نێو ببرێت)، ڕوو بکەنە لای کاربەدەستەکانی دەوڵەتانی چەوسێنەری وەک ئێران و تورکیا و تا دەگات بەهەر دەوڵەتێک
بەرژەوەندیەکی ئابوری و سیاسی لەو وڵاتەدا هەیە، تا لەوێوە چارەنوسی باڵادەستییان بۆ دیاری بکرێت لە
جێگۆڕکێی پۆستە ئیداری و سیاسیەکانیان بەسەر خەڵکی هەرێمی باشوری کوردستاندا. ئاخۆ لێرەدا ناهەقمانە بڵێین، کە ئەم عالی جەنابانە، ئەو کەسایەتیە سیاسیانەن کە بتوانن، تەرتیبی ژیانی کۆمەڵگا بکەن و ئاستی ئابوریەکی  داهێنەرانە بخوڵقێنن؟ ئاخۆ سەرۆکی هەرێمی باشوری کوردستان، ئەو کەسایەتیەیە، کە ئاگای لای کۆمەڵگا بێت و لەخەمی بەرەوپێشچونی کۆمەڵگادا بێت، یان تەنها خەمی لای خۆسەپاندنی خۆی و حیزبەکەیەتی بەسەر کۆمەڵگادا؟ ئاخۆ گەر خەڵکی کوردستان خاوەن ئیرادەی سیاسی خۆیان بوایەن، تا ئەم مێژوە، دەکرا دادگاکان خودی هەردوو حیزبی قائید بەڕێوەی ببەن و بۆ چرکەساتێکیش، ئەو دەزگایە خاوەن توانای سەربەخۆی خۆی نەبێت؟
ئاخۆ گەر لەو هەرێمەدا، سیاسەت مەدار بونی هەبوایە، دەکرا مرۆڤی ئازادیخواز و ڕۆژنامەنوسی وەک (سۆران و عەبدولستار و سەردەشت و کاوە) تیرۆر بکرێن و ترسوتۆقاندن بکەن بە ڕەوشتی سیاسی پلە یەک لە نێو کۆمەڵگادا؟
بەڕاستی جێگای شەرمە خەڵکی کوردستان دڵیان بەو سیاسیانە خۆش بێت، ئەو سیاسسیانەی کە تەنها زمانی
درۆ و ناڕەوایەتی بڵاو دەکەنەوە لە نێو کۆمەڵگادا؟ ئاخۆ گەر ئەوان بڕوایان بە جیهانبینی دیموکراسیەت هەبێت، بۆ تا ئێستا ناتوانن کابینەی پارەخواردنەکەی خۆیان پێک بهێنن؟ ئایا بۆچی ئەم هەموە نابەرابەریەتە دەخوڵقێنن لە نێو  ژیانی کۆمەڵگادا؟ کەواتە ئەم بەڕێوەبەرانەی نێو کۆمەڵگا لە ڕووی سیاسیەوە، ئەو مرۆڤانە نین، کە جێگا ئومێد بن بۆ کارلێکردن و ئاڵوگۆڕی بنەڕەتیانە لە نێو پەروەردە و سیاسەتی گشتی و ئابوری کۆمەڵگادا، بەڵکو ئەمانە  مرۆڤیش دەکوژن و خۆشیان وا نیشان دەدەن کە ئەوە ئەوان نەبوون ئەو کارەیان ئەنجام داوە، بەڵکو ئەوە دەستێکی  نەخوازراو بووە لە ئەنجامدانی ئەو جۆرە کارانەدا. ئاخر ئەو دەسەڵاتە بۆخۆیشی دەڵێت گەندەڵی بوونی هەیە، بەڵام تا ئێستاش کەسێکی بەرپرسمان نەبینی بدرێتە دادگاو، سزای ئەو گەندەڵکاریەی وەربگرێت، هۆکارەکەش تەنها  بۆیەک خاڵ دەگەڕێتەوە، ئەو هۆکارەش، تەنها خودی دەسەڵات خۆیەتی، کە بەرهەومهێنەری کۆی فەسادی ئیداری و گەندەڵی و دزینی سامانی گشتی کۆمەڵگایە، ئیتر چۆن ئەو دەسەڵاتە دەتوانێت گەندەڵکاران بداتە دادگا!!!!!؟

ئەوە بوونی پارەی زۆر نیە کە بتوانێت کۆمەڵگا بەرەو پێشەوە ببات و بە ڕێکو پێکیەکی زۆر باشەوە تەرتیبی
بکات(وەک لە سەردەمی جەنگی خلیجدا، سەدامی سەرۆکی فاشیل، بەدەستێکی ٢٥ دیناریەکی پێبوو، بەدەستەکەی  تریشی ڕومانەیەک،وەک هێمایەک بۆ توانایی سەربازی، بەڵام دواجار بینیمان، ئەو سەرکردە دۆڕاوە، چۆن خۆی و کورسیەکەی دۆڕاند و نەیتوانی ببێتە کەسی سیاسەت مەداری مێژووی، بەو ئەندازەیەش کۆمەڵگای عێراقی  توشی شکست و ماڵوێرانی قورس کرد، کە تا ئێستاش لە سایەی سەری جێگرەکانیەوە!!!، دەبێت کۆمەڵگای عێراقی هەر خەریکی باجدانی ئەو دۆڕانە قورسانە بێت)،
بەڵکو ئەوە جیهانبینی سیاسەتی تەندروستانەیە، کە دەتوانێت بەو کارە هەستێت و لەبەرژەوەندی گشتی
کۆمەڵگادا دەتوانێت ئەنجامی سەرکەوتوانە بەدەست بهێنێت، ڕەنگە باشترین نموونەش، ڕۆژئاوای کوردستان بێت، لەوێ هێشتا دەروازەی جەنگ و ململانێ خوێناویەکان لە نێو دەوڵەتی سوریادا تەواو نەبوە و کارگەی جەنگ و کوشتاری کۆمەڵگا بەردەوامی هەیە، بەڵام لەو پارچەیەدا کە ناوی ڕۆژئاوای کوردستانە، دەبینین، ئاستی بەڕێوە بردنی کۆمەڵگا لە سەرکەوتنێکی بەردەوامدایە، بەو ئابوریە کەمەش کە لەوێدا بوونی هەیە، ئەم
سەرکەوتنەش دەگەڕێتەوە بۆ ئاستی پێشکەوتنخوازی پارتی پەیەدە، کە دەتوانین بڵێین، ئەوە ئەو توانا سیاسیەیە، کە  توانیویەتی کۆمەڵگای ئەوێ دوور بخاتەوە لە نێو بەرپابونی جەنگی ناوخۆیی و جۆرێکی باش لە سیاسەتی  پەروەردەیی دیموکراتیانەی خۆبەڕێوەبردن بهێنێتە نێو کۆمەڵگای ئەو دەڤەرەوە. کەواتە لێرەدا بۆمان ڕوون دەبێتەوە، گەر پرۆژەداڕێژەرانی سیاسەتکاران تەندروست و لە پێناو بەرژەوەندی کۆی کۆمەڵگادا بێت، دەتوانێت کارێکی  وامەزن ئەنجام بدات، کە هەم ڕوی ئابوری گەشەبکات، وە لەلایەکی ترەوە کۆی سەرجەم کایە کۆمەڵایەتی و پەروەردەییەکانیش، بتوانن ئاڵوگۆڕی ڕیشەییان بەسەردا بهێنرێت. ئەو جۆرە سیاسەت کردنە، لە عێراق و لە نێو هەرێمی باشوری کوردستاندا، بەو بودجە زەبەلاحەیەوە، هێشتا لە ئاستێکی یەکجار خراپ و ماڵوێرانیدایە، تەنها  هۆکاریش، بۆ ئەو دەرئەنجامە سیاسیە دەگەڕێتەوە، کە خاوەن دەسەڵاتدارانی هەردوو حیزبی قائید، دەخوازن  کۆمەڵگا ڕەعیەت بێت و خۆیشیان ئاغا، جا تا ئەم جۆرە پەروەردەیە بوونی هەبێت، ئەوا لەوێدا نە دادگا دەتوانێت  سەربەخۆ بێت، وە نە بکوژی ئازادیخوازن و ژن کوژانیش دەتوانرێت بدۆزرێنەوە و بنەبڕ بکرێن، چونکە وەک  ئاماژەم پێدا، ئەو دەسەڵاتە سیاسیە خۆی بەرهەم هێنەری کۆی ناعەدالەتیە کۆمەڵایەتیەکانە، تا ئەویش بوونی هەبێت، هیچ کات نابێت ، بڵێین بۆ ژیانی زۆرینەیەک وا هەردەم لەبەردەم خراپ بوون و لەرزۆکیدایە. گۆڕانکاری سەرەکی لەنێو ئەو دەسەڵاتە دیکتاتۆرەیەدا، تەنها خواستی بەرپاکردنی شۆڕشی کۆمەڵایەتی دەتوانێت چارەسەری بکات، شۆڕش کردنێک وێنەی ڕۆژئاوای کوردستان، کە دەتوانێت ئیرادەی سیاسی بداتەوە بە کۆمەڵگا و سەرجەم هاوڵاتیەکانی. بەدەر لە شۆڕشێکی لەو چەشنە کە هەڵگری چەمکی یەکسانیخوازی و پەروەردەی تەندروستانەیە
بێت بۆ کۆمەڵگا، هیچ چارەسەرێکی سیاسیانەی دیکە ناتوانێت، ببێت، بەو فریاد ڕەسەی کە کۆمەڵگا ڕزگار بکات  لەنێو  جەوروستەمی ئەو دەسەڵاتەی زیاد لە بیست و دوو ساڵە خۆی سەپاندوە بەسەر کۆی خواست و ئیرادەی سیاسی  کۆمەڵگادا!!!!