سەڕۆک، هەیبەتی نەتەوەیی، بە قەد پرسی ئازادی کوردستان گرنگە....

Wednesday, 13/08/2014, 12:00

2086 بینراوە



بارزانی نوێنەری حکومەتی بنکە فرەوان، لە لێدوانەکانیدا شەری میلیشیای داعش، وا پێناسە دەکا کە ئەوان شەری دەولەتێکی ئیسلامی بەهێز دەکەن! وە ئەو دەوڵەتە ئیماکاناتێکی مادی زۆری بەهێزی لەبەر دەست دایە! چەکدارەکانیان ئەو چەکانەی کە بەدەستیانەوەیە، زۆر لە چەکی هێزی پێشمەرگە بەهێزترە!! بۆیە ئەوان بە تەنیا ئەو شەڕەیان بۆ ناکرێ.
سەرجاوەی ئابووری، سەروەت و سامانی داعش وەکو فیگەرێ ئێشکرا نیە، بەڵام لە هەموو حاڵەتێکدا بەگوێرەی مەنتقی عەقڵ سەرچاوەی ئابووری و دەرامەتی هەر چەندبێ، بەقەد دەرامەتی ووڵاتێکی دەوڵەمەندی وەکو عیراق و هەرێم نابێت.
داعش، وەکو سەرکردەکانی پارتە سیاسیە کوردیەکانی حکومەتی بنکە فرەوانی هەرێم، بە تایبەتی سەرکردە کۆن و تازەکانی یەکێتی نیشتمانی و پارتی دیموکراتی کوردستان، بیست و سێ ساڵ بە بەردەوامی دەرامەتی ووڵاتیکی وەکو باشووری کوردستانیان لە ژێر دەست نەبووە. لە دوای ساڵی ٢٠٠٣ وە ئەو هێزە وەکو پارتی و یەکێتی لە ١٧% بودجەی لە کۆی دەرامەتی ووڵاتێکی دەوڵەمەندی وەکو عیراقی وەرنەگرتووە. دەسەڵاتداریەتی نەبووە لەسەر کۆی هەڵهێنجانی بیرە نەوتەکانی ووڵاتێکی وەکو باشووری کوردستان بە درێژای بیست و سێ ساڵ. دەرامەتی بازرگانی ، پارەی گومرگ و بازارەکان و عەقاراتی ووڵاتێکی وەکو باشووری کوردستانی بۆ ماوەی بیست و سێ ساڵ بۆ خۆی پاوان نە کردوە. بەبەردەوامی رێژەیەک لە بودجەی ساڵانەی حزبی نەبووە لە کۆی دەرامەتی ووڵاتێکی وەکو باشووری کوردستان. وەکو میللەتی کوردی باشوور خاوەن ووڵاتێک نەبوونە کە کۆمپانیا هەر دەوڵەمەندەکانی دونیا رووی تێبکا بۆ بەرهەم هێنان. ئەی بۆ دەبێ میلیشیای داعش دەوڵەمەند تر بێت لە سوپای عیراق و پێشمەرگەو چەکی باشتری بەدەستەوە بێت؟
بوونی مۆراڵ و هەیبەتی میللەت و نەتەوە گرنگە، هیچی کەمتر نیە لە بوونی ووڵاتێکی ئازادی سنوور دیاری کراوی خاوەن سوپایەکی پڕ چەکراو. بۆیە هەیبەت و ناوبانگی نەتەوەی کورد وەکو پرسی سەربەخۆ بوونەکەی گرنگە.
شکاندنی هەیبەتی نەتەوەی کورد، لە نیوەی سەدەی رابردووە تاوەکو ئیمرۆ، هەموو کاتێک لەسەر دەستی چەند سەرکردەیەکی دیاری کراوی ئەو میللەتە لە باشووری ووڵات ئەنجام دراوە. لەساڵی ١٩٦٦ بوون بە جاشی بەکۆمەڵ، لەساڵی ١٩٧٤ لەلایەن هەندێ پارتەوە دووبارە بوون بە جاشی بە کۆمەڵ. ساڵی ١٩٧٤ ئاشبەتاڵ و فرەدانی چەک بە کۆمەڵ. لە ئەنفالی ١٩٨٨ کوشتنی بەکۆمەڵ و دەست درێزی کردنە سەر نامووسی میللەتی کوردبەکۆمەڵ،.لە ١٩٨٨ ئیزن دانی بە کۆمەڵی هێزی پێشمەرگەی یەکێتی لە سەقز لەلایەن سەرکردایەتی یەکێتی لە مانگی ١١ی ١٩٨٨. ٣١ی ئاب هێنانی سوپای عیراق لەلایەن بارزانیەوەو راکردنی بەکۆمەڵی هێزی یەکێتی، هێنانی هێزی سەربازی ئێران لەلایەن سەرکردایەتی یەکێتی و قبوڵکردنی ئەو هەڵوێستە بە کۆمەڵ لەلایەن هێزی یەکێتی و میللەتی کورد. کوشتن و بڕینی بەکۆمەڵ لە شەری براکوژی، لێدانی بەکۆمەڵی هێزی پێشمەرگەی پارتی و یەکێتی لە پەکەکە لە ناوەراستی نەوەتەکان. ٢٠١٤ هێرشی داعش.
سەرکردەکانی پارتە سیاسیەکانی بنکە فرەوانی هەرێم تێکرا، بازرگانی سیاسی بە هەموو شتێکەوە دەکەن هەتا بە ناوبانگ و هەیبەتی نەتەوەی میللەتەکەمان. ئەزمونی هێرشەکانی داعش بۆ سەر کوردە یەزیدیەکان، سەلماندی کە لێپرسراوە دەسەڵاتدارەکان، دووبارە میللەتی کوردیان بەرەو ئاقارێک دابەرد،کە بەشی هەر هەڵکوتانە سەر بێ، بەکۆمەڵ بکوژرێ، دەستدرێژی ناموسی بەکۆمەڵ بکرێتە سەر، منداڵی سەرببڕێ و ئافرەتاکانیان لە بازاری عەرەبی مەزات بکرێ، گریان، پارانەوەو دەست پانکردنەوە کارو پیشەی بێت لە میدیا جیهانیەکان، بۆ ئەوەی خەڵک سۆزی بۆ بجوڵێ وەکو دەرۆرزەکەرێ چاوی لێبکا، ببیتە جێگەی سەرەنجی رێکخراوە خێرخوازەکانی دونایا بۆ ئەوەی پێداویستیە هەرە سەرەتایەکانی بۆ بنێرن.
میللەتێک بەکۆمەڵ ئاشبەتاڵ بکا، بەکۆمەڵ ملکەچ بکا، بەکۆمەڵ چاو شۆڕ بکا، بە کۆمەڵ چەک فڕە بدا، بە کۆمەڵ ببێ بە جاش، بەکۆمەڵ دەست درێزی ناموس قبوڵ بکا، بە کۆمەڵ شەرەفی مەزات بکرێ، بەکۆمەڵ ڕابکا، بەکۆمەڵ لە میدیای هەموو دونیا بگری، بەکۆمەڵ دەست پانکاتەوە نە جارێک و نە سەد جار، سەرکردەکانیشی هاندەر و تەماشاکەر بن و چەپڵەی بۆ لێبدەن، بیکەن بە ئامرازێک بۆ دەستکەوتی مادی و سیاسی زیاتر بۆخۆیان، ئەوە بەدڵنیایەوە ئەو میللەتە یان ئەو نەتەوەیە ناوبانگ و رێزو هەیبەتی خۆی دەخاتە ژێر پرسیارەوە لە نێو کۆمەڵگای نێو نەتەوەی وە بەچاوی بەزەیی و کەم لێی دەڕواندرێ.



نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە