نیشتیمان

Tuesday, 23/07/2013, 12:00

2149 بینراوە

وەڕسبوو لە سیمای ئێوە

گەلێک دەگەڕێ بۆ نیشتیمانێک

وەکو منداڵێکی بێ دایک

هەتیوو کەوتوو

تەواوی هیواکانی

لەنێو دڵی هەڵ گرتوو

لەگەڵ خۆیدا دەیگێڕێت

هەموو قوڕنێکی گەردونم

کردۆتە نیشتیمانی خۆم

داگیرکەر

خێڵ و خۆفرۆش

خواکانی بەرزایی

بێشکۆکانی ماد

ناتوانن بێ نیشتیمانمان کەن

جگە لە نیشتیمان

هیچی ترم نیە

بێ باوک

بێ برا و خوشک

بە خاج کراوی ئێوەی بێباوەڕ

تەنها کوردستانە نیشتیمانم، خێزانم

من نوسەرنیم

نیشتیمان هەموو ڕۆژێ بە نوسەرم دەکات

گەورە نیم!

نیشتیمان هەمووساتێ گەورەترم دەکات

خۆفرۆش و کۆیلە بوون

نیشتیمان باوەشی بۆ کردنەوە

دڵ ڕەق و ستەمکار بوون

نیشتیمان میهرەبانی دانەوە

کوردستان پەرستگایە

هیوای منە

هی هەموانە

زوحاکیتان

پڕوپاگەندەی بێ ئابڕوتان

چاو بزکردنەوەی

چڵکاوخۆرانتان

تلیاک و کۆکس و قومارچی ناشایستەتان

شەقاوەی سەر جادە و کۆڵانەکانی شارو گوندەکانمان

ناتوانن نیشتیمانم لێ نامۆ کەن

دڵی ئازادم داگیرکەن

ئێوە مۆرانەی میلەتی کوردن

وەکوو داڵەکەرخۆرە

برسی

تا ماون سەرشۆڕو نزمن

دەم و ڕوخسار نامۆن

ئاهەنگم بەڕێوەیە

چیدی فرمێسک هەڵناڕێژم

لەدووی ڕۆڵەکانم

زەماوەندە

زەماوندەی منە

شیوەنی زوحاکە