من بۆچی لایەنگری خۆپیشاندەران و ئۆپۆزسێونم..؟

Saturday, 23/04/2011, 12:00

1562 بینراوە






ئێمە ماوەیەكی زۆر لە ناوریزەكانی یەكێتی و شوێنە هەستیارەكانیدا كارمان كردوە، بە حورمەتیش بوین لە ناوریزەكانیدا و نانی كەمیشمان نەخواردەوە و قسوریشی بۆ نەكردوین ، كەسیش پێی نەوتوین برۆ بەولاوە، ئێستایش كە وازمان لە ریزەكانی هێنا نمەك حەرامیمان نەكردوە، وەكو هەندێ كەسی مشەخۆر وای بۆدەچێت، بەڵكو حورمەتی راو بۆچونی خۆمان گرتوە، زۆر لەبرادەرانی ئێمە لەو كەسە دڵسوزانە بون بۆ یەكێتی و دوا رۆژی، بگرە زۆریشمان تووند ڕەوبووین كە پێمانوابو دەبێ یەكێتی تاكە فەرمانڕەوای كوردستان بێ، لەگەڵ رێزگرتنی لە ئازادیەكان و بەدیموكراتی كردنی كۆمەڵگای كوردی ، چونكە ئاگامان لە میتۆد و ئەجینداكەی ئەوسای هەبوو كە هێشتا سكرتێرەكەی بەرەو ئەم هەڵدێرەی نەبردبوو، م موقدەرات وخەباتی خوێناوی بە پارتی نەكردبوو لەسە سینیەكی ئاڵتووندا. زۆربەی ئەوانەی كە لەریزەكانی یەكێتی كشاونەتەوە خەڵكە بەتوانا ودڵسۆزەكەی یەكێتی بوون، نەیاندەویست یەكێتی بگاتە ئەم ئاست وحاڵەتەی كە ئێستا تێیكەوتوە، بەتایبەتی لەو دەڤەرەی كە ئەو حوكمڕانێتی، چەندیش جەماوەر لێی كشاوەتەوە و ئێستا رووبەرووی وەستاوەتەوە. پێدەچێت هۆیەكەیش ئەوە بوو كە زۆر لە سەركردایەتیەكەی میتۆد و فەلسەفەی سیاسی یەكێتی یان لێی حاڵی نەبوبو، یان خۆیان لێی دزیوەتەوە، لەبەر بەرژەوەندی تاكەكەسی خۆیان و كەوتنە هەڵەیەكی ستراتیژی و مێژوویەوە، وەكو زۆربەی حیزبە شۆڕَشگێر و پێشكەوتنخوازەكانی رۆژهەڵاتی ناوەڕاست ، كە بوونە هاوپەیمانی حیزب و گروپە فێوداڵ و خێڵەكی و كۆنەپەرستەكان، بۆ نمونەیش حیزبی شیوعی عێراق كە دوای ئەوەی بووە هاوپەیمانی حیزبی بەعس لە ساڵی 1973و، بەرەو چ هەڵدێرێك رۆیشت و ئیستایش خۆی ناگرێتەوە، گەرچی حیزبێكی نەتەوەیش نییە بگرە حیزبێكی ئەنتەرناسێوناڵیە! نەدەبوو یەكێتیش هەر لەساڵی1992 ەوە هاوپەیمانێتی و پەنجا بە پەنجای هەڵبژاردایە، لەبەر دابەشكردنی گومركی ئیبراهیم خەلیل، بگرە دەبوو لەیەكەم هەڵبژاردنی پەرلەمانی كورستاندا واقیعی تەزویری پارتی لە هەڵبژاردەنەكاندا قبووڵ بكردایە و، ببوایە بە هێزی دووەم وئۆپۆزسێون لە پەرلەماندا، ئەگینا حاڵی بەم رۆژە نەدەگەیشت. یەكێتی سیاسەتی لەبیرچوەتەوە و لایەنەكەی دیكە(پارتی) دەستی كرد بە سیاسەتكردن و، وەكو ئەنجامەكەی دەبینین ئێستا لە گۆڕەپانی كوردستاندا. یان نەشدەبوو یەكێتی رازی بێ بەوەی كە جەلال تاڵەبانی ببێتە سكرتێری گشتی هەتا هەتایی ، چونكە دەبینین ئێستا یەكێتی وەكو حیزبی شیوعی سۆڤێتی لێ بەسەر دێت بە دەستی ئەم سیاسەتەوە! كە هەم دەسەڵاتی لەدەست دا وهەم حیزبەكەیشی لەبەر یەك هەڵوەشایەوە!. دەشبینین لەناو یەكێتی سەركردایەتی بەكۆمەڵ نەماوە ، بگرە تاكڕەوانە یەكێتی بەڕێوەدەبرێت لەلایەن جەلال تاڵەبانیەوە و،بەو هۆیشەوە خۆیداوە بەدەستەوە بۆ لایەنەكەی دیكە كە(پارتی)یە ، وەكو چۆن حیزبی شیوعی عێراق تەسلیم بە ئیرادەی حیزبی بەعس ببوو، ببوە حیزبێكی بچووك و ئەنجامیش گورزی جەركبڕی لێكەوت، چاوەڕوانی ئەوەیش دەكرێت كە پارتی دوای ئەم رەشبگیریەی سلێمانی گورزی كەمەرشكێن لە یەكێتی بدات. ئەمرۆیش ئەو دەڤەرەی كە یەكێتی حوكمڕانێتی ،ئەو دەڤەرەی پێش 25/7/2009 نییە و بەدەستی ئۆپۆزسێون هەردو حیزب بەخەستی شكستیان هێنا و بە تایبەتی یەكێتی. ئەم راستیە كادیرە وریاكانی یەكێتی هەستیان پێی كردو دانی پێدادەنێن. زۆركەس پێی وایە كە تەسلیم بوونی یەكێتی بە نەیارە دێرینەكەی پارتی هەڵەیەكی نادروستە، بگرە هەڵەیەكی كوشندەیە بۆ یەكێتی، چونكە دیارە ئەو لایەنەكەی دیكە كە سیاسەتی تاكڕەوانەی یەكێتی خۆی بۆ داوەتە دەستەوە وەكو یەكێتی بیرناكاتەوە، بگرە بەو ئاقارە بیر دەكاتەوە كە بەرژەوەندی حیزبەكەی وبنەماڵەكەی دەپارێزێ . بۆیە یەكێتی هیچ چارەسەرێكی پێ نەبوو بۆ ناڕەزایی خەڵكی دەڤەرەكەی ،چونكە ئەسڵی چارەسەرەكەی خستووەتە دەستی لایەنەكەی دیكە كە پارتی و دوژمنە سەرسەختەكەیەتی، گەرچی ماوەی دوو مانگەدا یەكێتی رێگای بە جەماوەری سلێمانی و ناوچەكانی خۆی دابوو بەشێوەیەكی ئاشتیانە خۆپیشاندان بكەن وبە بێ هیچ گیروگرفتێك، وەلێ كاتێ هاوپەیمانەكە زانی خەریكە ئەو رەوشە جەماوەریە ئاشتیە دەپەڕێتەوە بۆ دەڤەرەكەی ئەو ،چونكە بە ئەقڵیەتی خێڵ ئیش دەكات و ئەو دۆخەی پێ قبووڵ نییە، ئاشنا نییە بەكەشی دیمكراتی هەربۆیەش كەسی بەناو دیمكراتی یەكێتیشی تێكداو، فشاری خستە سەر یەكێتی بۆ ئەو خۆپیشاندانەی شارو شاروچكەكانی دەڤەری سلێمانی و دەوروبەری كەپێش 17ی شوبات درووست ببوو دژ بە یاسای خۆپیشاندان و كۆتایی پێ بهێنێت ، دیاربوو هەندێ ناوەند لە ناو یەكێتی یەكێتی مەسەلەكە بەهەند وەربگیرێت و مەسەلەكەی بە ئاسایی وەرگرتبوو ، زۆربەی خۆپیشاندانەكانیش مۆڵەتی فەرمیان وەرگرتبوو، بە خۆپیشاندانەكەی 17ی شوباتیشەوە لە سلێمانی ، دیار بوو هاوپەیمانەكەی(دڵسۆزەكەی) یەكێتی هەڵس وكەوتی یەكێتی بەدڵ نە بوو بۆیە لە 17ی شوبات خۆی بەفیشەك لە بارەگای لقی چوار هاتە سەر خەت و 9 كەسیان شەهید كرد و بە سەدانیشیان برینداركرد . یەكێتیش تارادیەك خۆی بەو كارەساتەوە نەگلاند و هەندێ ناوەندیش لەناو سەركردایەتی بەریان لەزۆر كارەساتی ترسناك گرتبوو ، كە خەریك بوو هاوپەیمانە ستراتیژیەكەی لە سلێمانی بقەومێنێ، وەكو هێنانی میلیشیای بە ناو زێرەڤانی وپەلاماردانی سلێمانی و ئەتكردنی لەبەر ئەوەی پارتی پێ قبووڵ نەبوو دەریپەراند بۆجاری دووەم لە سلێمانی، بەڵام سەركردایەتیەكەی یەكێتی بەدەر لە سكرتێرەكەی جەلال تاڵەبانی خۆی لەوكێشانە بەدوور دەگرت و نەدیویست مێژووی خۆی بشێوێنێ لەبەردەم جەماوەرەكەیدا،ناچار بوو هەموو شتێك بخەنە دەستی تاڵەبانیەو، گەرچی زۆریان دژی ئەوە بوون كە تووند وتیژی بەكار بێت یان هێزە ئەمنیەكانی دژ بە جەماوەرەكەی خۆیان بەكار بهێنن، بەڵام كاتێك كارەكە لەدەستی ئەو سەركردایەتە دەرچوو، و هەرەشەكردن لەتاڵەبانی لەلایەن مەسعود بەرزانیەوە،لە هەولێرەوە بۆ ئەوەی زەبرو زەنگ بەكاربێت دژ بە جەماوەری خۆپیشاندەری ئاشتیخوازی سلێمانی وناوچەكانی دیكە و، تەسلیم بوونی هەندێ لەتووندرەوەكانی سەركردایەتیەكی یەكێتیش بە ئەمری واقیعی رێكەوتنە سترایتیژیەكەیان- گەرچی هەر ئەو توندرەوانەیش بون كە شەڕی ناوخۆیان لەگەڵ پارتیدا جۆش دابوو- بۆیە كەوتنە بە بەكارهێنانی كەلتوورەكەی بەعس لە داپڵۆسین و سەركوت كردنی ئەو جەماوەرە هەقخواز و ئاشتی خوازە و، خۆناشرین كردن لەبەردەم ئەو جەماوەرەیش كە دەنگی بۆ دان ولەبەردەم دەوڵەت و رێكخراوەكانی جیهانیشدا . بۆیە زەحمەتیشە ئیدی یەكێتی بتوانێ رەنگ ورووی جارانی خۆی تەنانەت لە ناو هێزە سۆشیال دیموكراتەكانی بگەڕێنێتەوە وسپی كاتەوە! چونكە گرەوكردن لە گەڵ دۆڕاندا زۆر ئاسانە، بەڵام گرەوكردن لەگەڵ بردنەوەدا زۆر زەحمەتە. زۆر كەس پێیوایە ئەو قەیرانەی كە یەكێتی تێیكەوتووە زەحمەتە ئەوانە بۆی چارەسەربكەن كە 67دەكەنە 66!، ئەگەر خۆی بەرۆحێكی ئینقیلابی چارەسەری نەكات و یاخی نەبێت لە دەسەڵاتی پارتی، هەرهیچ نەبێت متمانەی ئەوانە بگەڕێنێتەوە كە لە 25/7 دەنگیان پێی دا. بەڵام ئەو فەلسەفەیەی كە ئێستا یەكێتی بەڕێوەدەبات كە جەلال تاڵەبانب پیادەی دەكات زەحمەتە ئەوە بكات، چونكە وەكو ووتمان تەسلیم بە واقیعێكی نادروست ونائەقڵانی پارتی بووە. بۆیەش دوای ئەو لەشكركێشیەی كە 19/4 كردی بۆ سەر سلێمانی و دەوروبەری و ئەنجامدانی وئەو رەشبگیرەیەی كرد، زۆربەی جەماوەری خۆی لەدەست دا بە هەموو چین و توێژەكانەوە، بەتایبەتیش چینی رۆشنبیر كە ئەمە بەلایانەوە كەلتوری بەعسە، ، كە زۆریان پێش ئەو كارەساتە بەرگریان لە ئەجندای یەكێتی دەكرد وئێستا ئەوانەیش پشتیان لێی كرد-هەقم بەسەر هەندێ كۆڵكە خوێنەواری مشەخۆری وەكو جەمال عەبدوڵا و ئازاد تۆفیقەوە نییە- ، لەبەر ئەو كارە قێزەوەنەی دژ بەسلێمانی ئەنجامی دا ، كە خۆی ناوی نابوو (قەڵای سەوزی) یەكێتی!. ئیدی (شعرەی معاویە)ی لە نێوان خۆی و جەماوەر و رۆشنبیرەكانیدا پساند. بەشبەحاڵی خۆم ئومێدم مابوو كە یەكێتی رۆژَێك بێتەوە سەر خەتی جەماوەر و سەنگەری دژەكەی نەگرێت، چونكە بەشە ئاقڵەكەی سەركردایەتەكەی بڕوایان بە گوێگرتن هەبوو لە داخوازیەكانی جەماوەر و ئۆپۆزسیون ودانوستان كردن و ئاشتبوونەوە لە گەڵ جەماوەردا، بەڵام گوێگرتنی تاڵەبانی لەلایەكەی دیكە بەبێ لەبەرچاوگرتنی بەرژەوەندی جەماوەرەكەی خۆی، هەمو بۆچون و رێگاچارەكانی تێكدا و، ئەزمونی كوردستانی خستە بەردەم مەترسی و هەڵدێرێكی سیاسی گەورەوە!. بۆیە من گەرچی نوسەرم وئێستا لە سیاسەتەوە دوورم، بەڵام ئەخلاقی ئەدەبییم ورۆشنبیرییم هانم دەدات كە لایەنگری خۆپیشاندەران و بۆچونەكانی ئۆپۆزسیۆنی سیاسی بم لە كوردستاندا..
لێرەدا حەقیقەتێك هەیە كە هەمووان دەیزانن، بەتایبەتی ئەو بەشە ئاقڵەی ناو سەركردایەتی یەكێتی، كە لە ماوەی ئەم دومانگەدا لە هەوڵی هێوركردنەوەی دۆخەكە بوون وخوازیاری بەدەنگەوەچوونی داخوازیەكانی جەماوەر بوون. ئایا سەركوتكردنەكەی رۆژی 19/4 كۆتایی بەكێشەكان دەهێنێ یان قوڵتریان دەكاتەوە؟ بۆ ئەمەیش ئێمە ئەزمونی ئێستای سوریا و یەمەن و تونسمان لەبەرچاوە ، كە یەكەم جار خۆپیشاندانەكان بە بەئاگرو ئاسن كپ كران . راستە جەماوەر چەند رۆژێ كپ و بێدەنگ بوو، بەڵام كە بۆ جاری دووەم هەڵسایەوە ئەو جارە هەموو شارەكانی گرتەوە، گەرچی جاری یەكەم لەیەك دوو شار بوو، بەڵام دوەمجار سەرتاسەری بو، و رژێمەكانی راماڵی وەكو میسرو تونس ، ئەوەتا یەمەن و سوریا و لیبیاش سەرەیان نزیكە بۆ راماڵین..بۆیە هێشا دەرفەت ماوە بۆ جەماوەر ئاشتكردنەوە و، وازهێنا لە بەكارهێنانی هێز ، چونكە ئەمانەی ئێستا هێز دژ بە جەماوەر بەكاردێنن هەر خۆیان بەشێك بوون لەو جەماوەرەی كە هێزی بێ شوماری بەعسی لە كوردستان وەدەرنا!..

 

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە