داعش ، دوو ساڵە لە قەراج و دەشتی هەولێر خەڵک سەردەبڕێ....
Monday, 11/08/2014, 12:00
4072 بینراوە
ڕێکخراوی ئیسلامیی توندڕەو ناسراو بە (داعش)، بەشێوەیەکی کتوپڕ، یان وەکو ڕووەکی خۆرست هەر لە خۆیەوەو بە گوێرەی وەرزی کەش و هەوا پەیدا نەبووە لە ناوچەکانی قەراج و دەشتی هەولێر. داعش بۆ ماوەی دوو ساڵە بنکەی جێگیریان لە گوندی "حاجی عەلی" یە کە بیست تا بیستوپێنج دەقە لە شارۆچکەی مەخمور دوورە. ئەو راستییە هەموو دانیشتوانی ئەو ناوچانە دەیزانن.
دوو ساڵە، دانیشتوانی قەراج و دەشتی هەولێر لە دڵە ڕاوکێی دەژین، گوزەران دەکەن و دەزانن ئەو هێزە تیرۆریستە بوونی هەیە لە ناوچەکانیان و بە چاو دەبیندرێن بە تایبەتی کاتی دوای نیوەرۆیان و شەو.
بە درێژای دوو ساڵ "داعش" بە هەوەسی خۆیان بە ئۆتۆمۆبیلی لانکرۆزەری مۆدیل باڵا، کە خەڵکی ئەو ناوچانە پێدەڵێن(سەیارەی مەرزیە) و بە چەکی قورس دەسورێنەوەو هەرەشەو گورەشە لە خەڵکەکە دەکەن. ئەو هێزە توندڕەوە زۆر جار دەست درێژی کوشتنیان کردۆتە سەر خەڵکی هەژاری ئەو ناوچانە، بە تایبەتی ئەو کەسانەی کە فەرمانبەری حکومەتی هەرێم یان حکومەت ناوەند بوونە لە ئاستی نزمدا وەکو پۆلیس، فەراش. چەند جارێک هەرەشەیان لێ کردوون کە دەست هەڵگرن لەوەی کە فەرمانبەری حکومەت بن، دواتریش ئەوەی بە قسەیانی نەکردوە بۆی گەراونەتەوە و سەڕیان بڕیوە. هەروها هەرەشەیان لەو کەسانە کردووە کە زانیویانە پێشمەرگەن، داوایان لێکردون نەچن بۆ کارەکانیان و بۆ رەبیەکان، دەنا دوا رۆژیان هەر سەر بڕین دەبێ، بێگومان راستی هەموو ئەو رووداوانەش بۆ خەڵکی ناوچەکە روون و ئاشکرایە..
دەزگا قەبە پارە خۆرەکانی هەردوو شاری هەولێرو سلێمانی، وکو دەزگای هەواڵگری، پاراستن ، دژە تیرۆر، ئاسایش، پۆلیس، هێزی پاسەوانی تایبەتی قەڵاچۆڵان و سەری ڕەش، زێرەڤانی و وزارەتی پێشمەرگە، گوێی خۆیان لێ خەواند بوو، بۆ یەک جاریش خۆیان نەکرد بە خاوەنی ئەو هەژارانەی کە لەو ناوچانەدا لەماوەی ئەو دوو ساڵەی رابردوودا سەر بڕاون لە لایەن داعشەوە، ئەو راستیەش هەموو دانیشتوانی ئەو ناوچانە دەیزانن.
لە غیابی دەسەڵاتی ناوەند و هەرێم لە ناوچەکەدا، داعش لە ماوەی ئەو دوو ساڵەدا، توانی هەندێ ئامانجی گرنگ بپێکێ:
یەکەم، خۆی ناساند بە خەڵکی ناوچەکە، کە هێزێکی دەوڵەمەندە لە رووی مادی وە توانای جەنگی هەیە دژ بە هەر دوو حکومەتی ناوەندو هەرێم.
دووم، شارەزا بوونی شوێنی جوغرافیا، رێگاو بانەکان و هەڵسەنگاندی قەوارەو ئامادەیی سەربازیی سوپای عیراقی و هێزی پێشمەرگەی هەرێم.
سێیەم، شارەزای پەیدا کرد لەسەر، جۆری عەقڵیەت و ئاستی بیرکردنەوەی خەڵکی ئەو ناوچانە. هەوڵیاندا سام و ترسێکی زۆری بێ هاوتا لە دڵ و دەروونی دانیشتوانەکە بڕوێنن، کە بوو بەهۆی کاردانەوەی سلبی لە دەروونی خەڵکدا، بەتایبەتی تۆقاندیان بە دەست درێژی کردنە سەر ناموس و سەربڕین.
چوارەم، بە ئەنجامدانی چەند سەربڕینێک بۆ دانیشتوانەکە سەلەماندیان کە بێکەسن وە کەس نییە لەسەریان بێتە دەنگ.
پێنجەم، لە ماوەی دوو ساڵدا توانیان خۆیان رێکبخەن، بە ئازادی لەناو خەڵکەکە بسورێنەوە و پەیامی خۆیان بگەیەنن. دۆست و لایەنگر کەم یان زۆر لە نێو کورد پەیدا بکەن. پەیوەندیەکی توندو تۆڵیش لەگەڵ ئاغا و شێخی عەرەبی ئەو ناوچانەدا ببەستن بیان کەن بە پشتوپەنا، یارمەتیدەر و پڕ چەکیان بکەن بۆ کاتی پێویست.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
