جه‌نابێ به‌رپرسێ ! كوردو سندى

ل سه‌ر زارێ خه‌لكێ گه‌له‌ك دهێته‌گێران وبۆيه‌ سحبه‌تا گه‌له‌ك ديوانان حه‌تا ديوانا زارۆكان ژى (ل رۆژهه‌لاتا ناڤين ببه‌ به‌رپرس ، ل توركيا ببه‌ هونه‌رمه‌ند ، ل ئه‌ورۆپا ببه‌ ياريزان) هوسا هه‌ى هيڤيێن ته‌ دێ بجه هێن ، هه‌بوونا ڤان كوما په‌يڤان پێنه‌ڤێت كو راستيه‌كا بۆ هه‌ى ، به‌لێ بێگومان بتايبه‌ت ل ده‌ڤ مه‌ هه‌ر كه‌سێ ببته‌ به‌رپرس (مه‌ره‌م به‌رپرسێ نه‌به‌رپرسه‌ !!) دێ هه‌مى هێڤيێن وى بجهێن ، هه‌روه‌كى بێژى موعجيزه‌كا خوداييه‌ ، يان قوريكێ عه‌لى باباى بۆ هاتييه‌ بۆ بجه ئينانا هيڤيێن وى (ئه‌ز باوه‌رم قوريك ژى بيت دێ مينيت حێبه‌تى ژڤان به‌رپرسان) كا چه‌وا ئه‌ڤ مال و سامان و پارچه‌ زه‌ڤى و سه‌رێ گران و سه‌يرانگه‌ه و جهێن ستراتيژيێن باژێرى ب ده‌ست خوه‌ڤه‌ ئينانه‌ .

ياسه‌يره‌ ل ڤى وه‌لاتى هنده‌ك كه‌س ژبرسان و بێ پاره‌يى وه‌خته‌ يێ د غه‌رغه‌را دوماهيا ژيێ خوه‌دا و ها دێ گيانێ خوه‌ ژ ده‌ست دن ، پێشمه‌رگه‌يه‌ ل چه‌په‌رێ ده‌ستپێكێ يێ به‌ره‌ڤانيكرنێ ژ كوردستانێ ، به‌لێ ديناره‌ك ژى دبه‌ريكێ دا نينه‌ يان بتنێ (10 -50) دبه‌ريكێ دانه‌ ، ئه‌رێ ئه‌ڤه‌يه‌ مرۆڤايتى ، ئه‌ڤه‌يه‌ ژيان و دبه‌رامبه‌ردا يا به‌رپرسا يا چه‌وايه‌ ، جاره‌كا دى نه‌چارم گوتنه‌كا جاددێ ڤه‌گوهێزم (ئه‌م هه‌مى پێشمه‌رگه‌نه‌ !!) ، ئه‌ز دبێژم بتنێ گوتنه‌ و بۆ ده‌زگه‌هێن رِاگه‌هاندنێ يه‌ ، ئه‌گه‌ر دراستى د اژيانا چ ژبه‌رپرسێن ملله‌تى وه‌كى يا پێشمه‌رگه‌يى نينه‌ .

لڤى وه‌لاتى گه‌ر تو ژئه‌سمانى بكه‌ڤييه‌ خار ، بێگومان به‌ دێ كه‌ڤى ناڤ مولك و پارچه‌ زه‌ڤيه‌كا 30 مه‌ترى يا به‌رپرسه‌كێ ! ! يان ژى هيڤيا ته‌ لڤى وه‌لاتى ئه‌و بيت پارچه‌ زه‌ڤيه‌كێ بده‌ست ڤه‌ بينى دێ مينى عه‌جێبگرتى و بده‌سته‌ڤه‌ ناهێت ، چونكى هه‌مى ل سه‌ر ناڤێ به‌رپرسانه‌ !!

خوزى ببامه‌ سه‌رۆك !! ئه‌و گوتنه‌ ئه‌گه‌ر بجه بهێت ، هنگى تو ومالا ته‌ وه‌كو موعجيزه‌يه‌كا خودايى دێ ژ دنيايه‌كێ چنه‌ دنيايه‌كا دى و وه‌كى ئاشوپان دێ لێ هێت ، ئه‌ڤه‌ نه‌بتنێ بۆ ته‌يه‌ (مه‌به‌ست گه‌ر به‌رپرس بى) به‌لكو ئه‌ڤ خوشيه‌ دێ هه‌مى مالبات و خزم و كه‌س و كارێن ته‌ ڤه‌گريت ، فيجا هه‌ما زاڤا و مالا خه‌زيرى نه‌بێژه‌ !! دده‌مه‌كێ دا هنده‌كان پێدڤى ب پێدڤيترين تشتێ ژيانێ هه‌يه‌ ، له‌وا نه‌چارن كارێن گه‌له‌ك گران ئه‌نجام بده‌ن بۆ دابينكرنا ژيانا رۆژانه‌ ، به‌لێ ل ئاليه‌كێ دى ژ ته‌مبه‌ليا هنده‌كان ، به‌لێ هه‌بوونه‌كا زێده‌ يا داهاتى يا هه‌ى بتنێ چونكى (هه‌ڤالێ جه‌نابێ سه‌رۆكن) ، دێ بينى دژيانا خوه‌دا (40 تا 50) خانييا يێت هه‌ين ،يان ده‌ينى ددنه‌ خه‌لكى و شه‌ش جار زێده‌تر وه‌ردگرن ، يان يان ژى دده‌زگه‌هێ حكومى دا كابرايى (به‌رپرسێ نه‌ به‌رپرس) حه‌فت يان هه‌شت پۆستێن هه‌ين ، يان ژى مفا ژ ئيمتيازات و مۆچه‌ و زياده‌ و باوه‌رنامه‌ و ناديێن قومارێ و ئينانا كرێكارێن به‌نگلادشى يان ده‌ست ب سه‌ر داگرتنا گوره‌پانا ، كارگه‌هێن ڤه‌خارنێ ، يان ... هتد ، ئه‌ڤه‌ هه‌مى بۆ وان ده‌ست ددت ، چونكى هه‌ڤالێ جه‌نابێ سه‌رۆكن ، به‌لێ تو پێشمه‌رگه‌ يان چه‌ند خه‌مخور بى بۆ وه‌لاتى ، هنگى تو هه‌ر دژى ملله‌تى و چ كار بته‌ ناقه‌تن .

لڤێ هه‌رێمێ ده‌ما دبى نێزيكى به‌رپرسه‌كى ، هنگى هه‌مى كارێ ته‌ ب سه‌رێكڤه‌ دهێن ، به‌رۆڤاژى ئه‌گه‌ر ته‌ كه‌س نه‌بيت ياسا ل سه‌ر ته‌ بنه‌جه دبيت ، دێ بتنى جه‌نابێ به‌رپرسى ل ده‌زگه‌هه‌كێ حكومى هه‌مى كه‌س و كارێن خوه‌ يێن ل خوه‌ كومكرين و برا يێ لده‌ڤ و زاڤا يێ ل ده‌زگه‌هه‌كێ دى و شولێ خه‌زيورى ژخوه‌ ماشييه‌ ، بێ كو ئه‌و بهێت ژى . 

ئه‌ڤه‌ نه‌بتنێ گوتنه‌كه‌ ، به‌لكو ئه‌ڤه‌ ببه‌لگه‌يه‌ و بهزاران نموونێت ژڤى جوورى دناڤ گوره‌پانا ڤى وه‌لاتى داد هێنه‌ به‌رسينگێ مرۆڤى ، ب ديتنا من ئه‌ڤ كێشه‌ چ كێمتر نينه‌ ژ مه‌ترسيا داعشێ ، يا دبينم ئه‌ڤه‌ژى كێشه‌يه‌كا مه‌زنه‌ و ئه‌ڤه‌ دێ زيانه‌كا مه‌زن گه‌هينته‌ مه‌ و دبيت ئێدى داعشێ كارتێكرن نه‌بيت ، چونكى دويرن ژمه‌ ، لێ هه‌بينا جه‌نابێ به‌رپرسى مه‌ترسييه‌ و كوژه‌كه‌ژى ، وه‌كو كرمه‌كێ يه‌ يێ ژ مێشكێ مه‌ دخووت .

و. سندی