پاکێجەکەی گووگڵ بۆ نەتەوەی کورد و سەرۆکایەتی هەرێم

 About 1,180,000,000 results (0.42 seconds)

نزیکەی یەک ملیار و سەد و هەشتا ملیۆن ئەنجام، لە ماوەی نزیکەی نیو چرکەدا؟ ئەمە ئەو پاکێجەیە کە رۆبۆتەکانی گووگڵ لە و ماوە کورتەدا ئامادەیان کرد و پێچایانەوە بۆ ئەو بەشە لە نەتەوەی کورد لە باشووری کوردستان تا لە بەر رۆشنایی ئەو بارستاییە پڕ بەهایانە لە زانیاریی بتوانن بێ خاپاندن و چاو بەستەگی سەرۆکێ لۆخۆیان هەڵبژێرن کە هەرکاتێ لێی نارازی بوون بتوانن لێپرسینەوەی لێ بکەن و دادگایی بکەن و لەکاتی ئەنجامدانی خیانەتی  نەتەوەیدا لە زیندانیشی توند بکەن.

(سەرنجی کوردستانپۆست: ئەوەی لەم چەند دێڕەی سەرەوەی نووسەرەکە  نەگەیشتووە، بەردەوامبە و ئەوەی خوارەوە بە وردی بخوێنەرەوە).

-------------------------------------------

ئێستا و لە دوا ساڵەکانی شارستانییەتی مرۆڤایەتیدا، کە وا پێدەچێت، بریارێک هەبێت بۆ لە ناو بردنی چەندین ملیار لە ئینسانەکان، بەبەهانەی زۆر بوونی دانیشتوانی گۆی زەوی و هێشتنەوەی رەگەزە باشتر و ساغەکان...جەنگە درێژخایەنەکانی ئەم ساڵانەی دوایی کە بەردەوامی جەنگە جیهانییەکانن و ئەو دووجەنگە هەرگیز کۆتاییان نەهات و بەهۆی کارخانەکانی بەرهەمهێنانی چەکەوە، درێژەیان دا بە گڕی سوتێنەری خۆیان لە کوردستان و رۆژهەڵاتی ناوەراست و بە شێک لە ئاسیا و ئەمریکای لاتین ( لاتین ئەمریکان) و ئێستاش بە خەستی لە رۆژهەڵاتی ناوەڕاست و جەنگی درێژخایەنی مەزهەبەکان و لە پاشاندا گۆڕینی بۆ جەنگی بێ ئەمانی نەتەوەکانی ناوچەکە دژ بەیەک، ئەو ئاماژانەن کە تروسکایی لە دوور رای دڵخۆشکەریش، بە ئایندەی کورد، دەخەنە نێو گێژاوی دوودڵی و گومان و بێ ئومیدییەوە، مەگەر خواوراستان، دۆخەکە بەبارێکدا وەرچەرخێ کە کورد بتوانێ جارێکی تر، سەرەگوریسێک بەدەستەوە بگرێت، کە ئەوەش بە بوونی ئەم سەرکردایەتیە کلاسیکیەی کورد و ئەوپەیوەندەیە لەرزۆکانەی لەسەر بنەمای قازانجی کەس و پارت و خێڵ بنیادنراوە، پێناچێت، کورد بگەێنێتە هیچ کەنارێک، بە پێچەوانەوە، بەرە و چەقی زوقماوەکەی پەلکێش دەکات، شەنگال زۆری گوت و ئێمە نەمان بیست، ئێمە لە هەڵکەندنی خەندەق بەدەوری رۆحی خۆماندا فرە گورج و گۆڵین، لەم باشوورەی پڕئاشووبەی چارەنووس وونەدا، رامانی یەخسیرکردنی رۆحی نەتەوەکەمان بەدەست و هیزی خۆمان رامانی هەرە لەپێشە، بۆیە بەهیچ بەهانەیەک، دەستەواژەیەک، مێژوویەک، پەیوەندییەک، نابێت هێز لەدەستی یەک کەسدا کۆبکرێتەوە، ئەگەر پەرلەمان ئەمە بکات، ئەوا، وەکیلەکانی هەرزە وەکیلن و زوڕنای ئاشبەتاڵی خۆیان دەژەنن، وەک رۆشنبیرەکانی!  کە بەیانیان قۆڵیان لە قۆڵیکدایە و بۆ ئیوارە، قاچێکی تر لە قۆڵیاندا ، چوار قۆڵی و پێنج قۆڵی سەرگەرمی هیچن و دیالۆگ دەبنە سەر تەختەی دامەی کەناڵە ئاسمانییەکان، بەقەوڵی ناکوردی خۆیان....  

ئا لەم کاتەدا کە دەبوو کورد لە هەموو کات زیاتر واقیع بینانە بوایە، لەم کاتەدا حزبەکان، یا ئەندامانی حزبەکان بە توندی بە دوای بڵاوکردنەوەی ژاری خورافە پەرستی  و چەواشەکاری و تەفرەدانەوەن، لە پرسێکی گرنگدا، وەک دیاری کردنی سیستەمی بەرێوەبردنی ئەم سێ شار و لەتە، ئەندامانی تایبەتی حزبەکان داسپێرراون بۆ بڵاوکردنەوەی خورافات و  داهێنانی ووشەگەل و دەربڕین گەلێک کە زەینی خەڵکانێکی زۆر بە چەوتە رێدا دەبات و لەوە دەچێت دڵداری لەگەڵ کەسێکدا بکەن، نەک باسی پێشەڕۆژی نەتەوەیەکی، لەسای یارییەکانی ئەواندا بڕست لێبڕاو....

دەبوو ئەم مەسەلەیە، چیدی لە ناو پەرلەمانی باشووری کوردستاندا، باسی لێوە نەکرایە و ئەو پەنگەی ی . ن . ک (کە زۆریەنی کادرەکانی نارازی بوون)، بە نەتەوەی کوردیان دا بە درێژکردنەوەی ٢ ساڵ مانەوەی سەرۆک لە کورسییەکەیدا، کە بێگومان بە پێچەوانەی رامان و بۆچوونی زووربەی کادرەکانیانەوە، ئەم هەڵوێستە نا نەتەوەییەیان وەرگرت – ئەڵبەتە ئەوە چاوەڕوان دەکرا لە (ی .ن .ک) چونکە ئەوان ئیتر غرور و لە خۆبایی بوونیان، هەموو سنوورەکانی تێپەڕاندوە و هەڵوێستیان لەسەر بنەمای قازانجی تاکە کەس و دەستە و باڵە، ئەوان دەبێت ئەوە چاک بزانن – کە کادرەکانی ئەوان مەرەگێژەی ئەیلولی نین، کە بەردەوامن لەسەر کاری رۆشنگەریی کوردایەتی خۆیان ئەوە نیشانەی وەفاداریانە بە وگفتەی بە هەڤاڵانی خۆیان داوە، دەنا – تۆڵە .............................. - .

سەیر و سەمەرەیە، لە کۆتاییەکانی ئەو دەسەڵاتەی لە پارچەیەکی ئەنفالکراودا، پێک هاتوو بەرەو نەمان دەچێ، تازە بە تازە..پرس و نازونوکی سەرکردایەتیەکەی نەتەوەیەکی مەشغول کردبێ؟!!، ئەم بەشە لەنەتەوەی کورد لە باشووری کوردستاندا، نە قوربانیە و نە بێ دەسەڵات، نەتەوەیەک تاکو ئێستا لە دوای رووخانی – دەسەڵاتی میدیایەوە- ئەوەندە بێدەربەست بێت، کۆمەڵێک لە بەدترین کەسەکانی، وابەستە بە هەوەس و ئارەزووە دەروونییەکانیانەوە، هەرکات ویستبێتیان سەریان خستبی بۆ سەر چیا و هەرکات هەوەسی شاران و پایتەختی داگیرکەرەکانیان کردبێ، سەروژێریان کردبێتەوە بەرەو پێدەشتەکان، کەی بە خۆیا دێتەوە و هەڵوێستەیەک دەکات و بۆ هەڵبژاردنەکانی ( پێوانەیەکی دەبێت)؟! ژن و پیاوەکانی ئەم نەتەوەیە بەتایبەت لە باشوورە وێرانەکەیدا – لەرووی کۆمەڵایەتی، کلتوری و سیاسی و رەوشتییەوە – شەرم ناکەن، ژنەکانی بۆ هەڵبژاردنی تەڵاو ئاڵتون بەرزترین عەیارەیان دەوێ و پیاوەکانیان بۆ هەڵبژاردنی لاندکرۆزەر و رەینجرۆڤەرەکانیان دوا مۆدێل، بەڵام کە مەسەلەکە دێتە سەر چارەنووسی منداڵانی شەهیدان و ئەو دایکە گەرمییانەی سکی سووتا و ئەو باوکە ماردینییەی پشتی شکاو ئەو هاوسەرە سنەییەی هاوژینەکەی لە خاچ دراو ئەو تاقە دارەی بەپێوە سووتێنرا....شەرم ناکەن و خوێن نایان گرێ و باسی سەرۆک و سەرۆکایەتی دەبێتە، باسی هەموو دانشتنێکیان، ئەم بەشە لە نەتەوەکە و لە رۆژهەڵاتیش هەروەها، بەفیت و دەستی دەزگا هەواڵگرییەکانیان، ئیستا راستەوخۆ و نارستەوخۆ، هاوبەشن لە پلانی هەڵوەشاندنەوەی خێزانی کورد و لە خشتەبردنی ژنان بە تایبەتی و بەکارهێنانیان بۆ لێدانی پیاوانی بە رەوشت و بەهەڵوێستی کوردایەتی، بە دەیان و سەدان رێکخراوی پێشکەوتنخوازی ژنانیان دروستکردووە ! وەک ناوەندێک بۆ بڵاوکردنەوەی ژاری دژ بە نەتەوەکە و گەندەڵی رەوشت و رەواجدان بە بێبەندوباری بەتایبەت لەناو ژناندا، کە بەداخەوە، ژمارەیەکی هەست پێکراو لە ژنان، هەندێکیان بەئاگا و زۆرینەیان بێ ئاگا و بە فیت و قسەی ناوکتێبانی بریقەداری پیاوە گەندەڵەکان، تووشی ئەم داوی رێکخراوانە بوون و لە سووڕاندنی ئەو چەرخەی کە هێدی هێدی بەناوی ( ئینسانیەت ) وە نەتەوەکەیان دەخوات و لە پاشاندا، ناو و ناوبانگ  و ژیانی خۆشیان دەخوات و ئەوان وەک جەستەیەک و بارستاییەک لە گۆشتێکی خۆش لەبەردەم (گورگەمرۆ) کاندا، بێبایەخ وێڵ و وەیڵان دەبێت بە شوێن جوامێرێکدا بگەڕێن، کە رۆ‌حی ئەوانی بوێت بەر لە جەستەیان...بەڵام کات ئیوارەیە و تاریکی هەموو شت لەناو خۆیدا وون دەکات.....ئەفسوس بۆ ئەو چارەنووسانە، کە جڵەوی نەفسیان داوەتە دەست لەزەت و پیاوە بودەڵەکانەوە....

ئەم رەوشی کارکردنە مەترسییەکی زۆر گەورەی لەسەر پێشەڕۆژی نەوەکانمان هەیە و خێزانەکانی ئیستا ماندوو دەکات و بەردەوامی ئەنفاڵ و کیمیا بارانە، بەڵام بەشێوەیەکی پێشکەوتنخوازانە و مۆدێرن و لەبەرگی ئازادیی ژنانی کوردا، زۆر گرنگە کە ئێمە بۆ بەرپەرچدانەوەی ئەو رەوشە و بەکارهێنانی دژە ژارێک، رواج بدەین بە بەرخۆدان و گەڕانەوە سەرخۆی ژنانی باکوور و خۆرئاوا و لە باشوور و رۆژهەڵاتی کوردستاندا، وشیاری ئازادی راستەقینەی ژنان ، کە ئەزمونێکی رەسەن و سەکەوتووە ( لە باکور و خۆرئاوا)، بکەینە نموونەی رابوونێکی نوێ لەو دووپارچەیەی تری کوردستاندا، بە ئومێدی چاک بوونی کۆمەڵگاکەمان لەسەر دەستی مامۆستایانی کۆمەڵ و نەوەکاندا کە تاکو ئیستا بە چەوتەرێدا دەبڕین، لەلایەن زۆرینەی پیاوەکانەوە، هەر لە مەلای مزگەوتەوە بگرە تادەگاتە بانکدارێک، سیاسییەک، بەرێوەبەرێکی گشتی داد،  ئامر مەفرەزەیەکی ناو داعش، بەڵیندەرێک، میدیاکاریک و پرۆفیسۆرێکی زانکۆی فڵان، کاربەدەستیکی باڵا و یەکێکی تر  نزم و.....هتد، لەم دەڤەرە خوێناویە و ریزپەڕمان تیدا نییە.....

ئیوە دەتوانن بۆ ئەم پرسە (پرسی سەرۆکایەتی هەرێم)، ئەم ووشەیە (President) لە خانەی گەرانی – گووگڵ – دا بنووسن ، جا بزانن چەندە، ئەلتێرناتیڤتان دەخاتەبەردەست و چاو، ئەوندە زانیاری کە تا ١٠ ساڵی تر کورد، هەموو کورد خەریک بێت بۆ خوێندنەوەیان، ئەوەی شایانی باسە لە دیمۆکراتیەتی راستەقینەدا دوو دەستە ناتوانن راستەوخۆ، یان بە مەکر و ئیشارە و رەمزەوە، لە ماسمێدیاکاندا قسە لە سەر پرسی سەرۆکایەتی و مەسەلە سیاسییەکانی تر بکەن، ئاگادار بن دەڵێم لە دیمۆکراسیی راستەقینەدا: ئەمەی ئێمە دیمۆکراسی پشتی میکرۆفۆنەکانە...

  ئەو کەسانەی بەجۆرێک وان لە ریزەکانی لەشکردا، یانی پیشە و پلەی سەربازیان هەیە.

  ئەوکەسانەی کە خۆیان وان لە پلەیەکی حکومیدا، بەتایبەت پلە بەرزەکان.

- لە باشووری کوردستان، خاوەن پلە سەربازییەکان، بێ سڵەمینەوە، چەندین جار باسیان لە نەبوونی (بەدیل) کردوە بۆ سەرۆکی هەرێم   تەنانەت ئەو نازناو بەکار دەهێنن کە کاتی خۆی بۆ دکتاتۆر (سەددام) یان بەکار دەهێنا، وەک قائد الضرورة.... 

- سەرۆکی حکومەت، لە ماڵی حکومەتەوە (هی خەڵکە- گشت)، بە پارەی خەڵک، بە جلوبەرگی خەڵکەوە و لەسەر ماندووبوونی خەڵک، بەراکشاوی لایەنگری هەڵبژاردنەوەی سەرۆکەکەیەتی و داوا دەکات لەخەڵک کە هەڵیبژێرنەوە...

ئەم هەڵوێستانە لە هەرجێگایەکی تری دنیا کە نیوە دیمۆکراتیەکیش پەیڕەو بکرێت، لێپرسینەوەی توندیان لێدەکرێت....بەڵام ئێرە باشووری ووڵاتێکی زامداری بێ خاوەنە.....