ئێستا زەمانی کۆبانێ و باکوری کوردستانە، گیانە!

Sunday, 08.09.2015, 20:38

1738 بینراوە


(تایبەتە بۆ خوشک و برا پەرلەمانتارەکانم، لە باشووری کوردستان)
ئێوە بڕیارەکانتان یا دەتانکاتە نوێنەری گەلەکەتان، یا دەتانکاتە هەرزەوەکیل
ئەوە یەکەم شەڕ و یەکەم گرژی و ئاڵۆزیی نییە لە ناوچەکەدا، کە مرۆڤەکانی ئەم ناوچەیە نەتوانن و تێنەگەن لە هۆ و ئامانجی ئەم کوشتارگەلە، بەتایبەتی بۆ نەتەوەکەمان ئەزموونە درێژخایەنەکە فرە تاڵ و بەژان و سوێیە:
• لاوازی فەرهەنگی 
• لاوازی ئابووری
• لاوازی سیاسی 
ئەم لاوازیی گەلە کە یەک بۆ ئەوی تر دەبێتە زەمینە و هۆی داگیرسان و چەوتی و شکستخواردن، واتە لاوازی فەرهەنگی لاوازیی ئابووری دێنێ و لاوازی ئابووری بێبایەخی فەرهەنگی و ئەم دوانەش سیاسەتی چەوت و سەرکردەی نالەبار،   چەوتیی و سەرکردەی نەشیاویش شکستدانی فەرهەنگیی و نابود بوونی  ئابووری بەدوای خۆیدا دێنێ. کەواتە پرۆسەکە تاقانە و هۆکان یەکێ نین، ئەمە زنجیرەیەکە.
نموونە: حزبێك، دوکانێک، ئیدی یەکێ لەو ناوە زۆرانەی کە ئێستا لە ناو خەڵکدا، حزبەکانی پێ پێناسەدەکەن لە کوردستان و ئێکس سەرۆکی ئەو حزبە، سەرۆک سوار ئەسپی بەرێوەبەرێتی حزبەکەی دەبێت و حەشاماتی حزبیش بەدوایدا ئەو سوارە و ئەمان پیادە، بە دڵنیاییەوە خێرایی چوونی سوارە و پیادە یەکنین و یەکنابن، بۆیە سەرۆک لە حاڵێکدا کە (ریلاکس) ە لەسەر کورسی فەرمانڕانی دادەنیشێت و هێدی هێدی جەستەی شێوەی کورسییەکە دەگرێت، کورسییەکە دەبێتە قاڵبی جەستەی سەرۆک، ئەو کورسییە هەر لەو جوانە و ئەویش هەر لەو کورسییە جوانە....ئەوانەی بەرژەوەندیان بە سەرۆکەوە گریداوە ئاوا دەڵێن.
ئالەم حاڵەی نالەبارەی رێگای دوور و شکۆمەندی کۆشکدا، حەشاماتی حزب دەگەن تاگەیشتن بە دەروازەی کۆشکی سەرۆک، بارستایی حەشامات کەمتر و پوختر و بێدەنگتر دەبن، ماندووی رێگا، برسیی دەسەڵات و چاو لەخۆری باڵای سەرۆک! ئەوکەمە کە دەگەن ئێدی  واق وڕماوی بیرشێواوی، پرزەلێبڕاوی رێگای دوورن، بۆئەوە ناشێن بڕیاردەری کوێقوڵاغی پرسی نەتەوەبن، ئەوان وەک و جاڕچی و بۆ شایەریی دەربار گونجاو و لواون 
ئەمان ئیتر لەناو (کەشی ریلاکسی) کۆشکی پاشایەتیدا، وون وون دەبن، ئێرە جێگای وون بوونە نەک خۆ دۆزینەوە، ئێرە باڵاترین خاڵی خۆشگوزەرانی مرۆڤێکە کە هەموویان خەونیان پێوە دەبینی، لێرە هەموو شتێک هارمۆنییە، سەمفۆنیای ئارامی و خۆشییە، هیچ خاڵێکی هاوبەش نییە لەگەڵ ئەو کارەساتانەی لەرێگای هاتن بۆ کۆشکدا، پێتان پیانا، ئێرە ناوەندی خاڵی بوونەوەی ئینسانە، لە بیر و دید و بنەما ئینسانییەکانی، ئێرە قۆناغی فڕێدانی کاژی رۆح و ویژدانە، لێرە هەموو شتێک چەند ......جوووووووووانە، ئای لێرە، پف لەووووووووێ..... پف لە کوردستان.
کارەساتە گەورەکان، مرۆڤە گەورەکان دەخوڵقێنن، کارەساتی گەورە لای هەموو نەتەوەیەک، رابەری گەورەی خوڵقاندووە، تاقانە و ریزپەڕی ئەم هاوکێشەیە کوردە کە وەک سووری بەر لەشکر و بە پێچەوانەی شەپۆلەکەوە، بە سەختی وا لە حاڵی دەست و پا کوتانا و مەلەدەکات و مەلە دەکات و مەلە دەکات...وێڵی چیت ئەی سەرگەردانی، سەدەکانی پڕ لە خوێن و فرمێسکی ئینسان؟ ئەی نموونەی  ستەمدیدەترین (ناوشیارترین) مرۆڤی ئەم گەردوونە، کە دوای کارەساتەکان، نە با دەبینی و نەباران؟! نە پیاوێکت تێدا هەڵکەوت نەژنێ..،ئەوەی هەتە سەت بارەیە، دەمووچاوی قێزەونی کوژراوی ( مێینە و نێرینە و عانەیە).....
زۆر دەگمەنە، هەر دەگمەنە ئەم حاڵەتەی لای کورد هەیە، پیاوە شکست خواردووەکانی، جوامێرن و ژنە رووتەکانی پۆشتەن و رێکخراوەکانی دەهۆڵ ژەن و قەلەمەکانی سەماکارن.
لای ئەم بەشە لە نەتەوەی کورد ساڵانێکی زۆرە، کارەساتەکان، دەبنەوە خوێنی تازە و دەچنەوە ناو رەگی جەستەی پیاوە دۆراوەکانی و دەیان ژێننەوە و دەبنەوە بە رابەری راپەڕینی نوێی نەتەوەیەک، تۆ چیت ئەی کوردی کورت؟!
بکوژەکانی باس لە یاسا دەکەن و تاوانبارەکانی دەم لەئازادی دەدەن، شەڕەنگێزەکانی ئاشتیخواز و شۆڕشگێرەکانی لە قاڵب دەدرێن، دزەکانی قازی و قازیەکانی گەندەڵن...تۆ چیت ئەی کوردی کورت؟!
کات، بۆ ئەم نەتەوەیە بەلایەنی کەمییەوە لە دوو پارچەیدا وەستاوە، بە تایبەت لە باشوورەکەیدا، میلی هەموو سەعاتەکان لەسەر یەک ژمارە راوەستاون، یەک مێژوو دەڵینەوە، یەک ناو سەتبارە دەکەنەوە، یەک بەسەرهات دگێڕنەوە، تۆ چیت ئەی کوردی کورت؟!
کا دەچێنی و چاوەڕوانی دروونەوەی گەنم دەکەیت!
بەردی گەورە هەڵدەگری و نایهاوێژی!
پەلەتە و بەرەو چارەنووسێکی نادیار شوێن رابەرێکی خەیاڵی کەوتووی!
سیاسەتمەدارەکانت کورت بین و تۆشیان بە چەوتە رێدا بردووە و دەتبەن!
ئای سازە گیان:
ئەو لەشە نەرمە، ئەو قژە خاوە، ئەو غەمزیە، ئەو نازە، ئەم سەمایە ئەو بۆنە ئەو دەنگە، ئەم کەچ کلاهیە، ئەو گەردنە، ئەو رەوتە، ئەو باڵایە ، خوایە لە کوێ بێنم هێزی ئینشایە؟!.
ئای سازە گیان لە پێناوی گەیشتن بە باڵاکەتدا، چیمان نەکرد؟! کێمان نەکوشت؟! بێڕێزیمان بەچەند پشتی خۆمان نەکرد؟! چۆن خۆمان وورد نەکرد؟! لەپێناوتا بوینە رێوی دەرەوە و شێری ماڵەوە! بە ناوی تۆوە و لە پێناوی تاڵ تاڵ موی قژەکەتدا، لە (دانە دانە تاوانە نەتەوەیەکانی سەرکردە بودەڵەکانمان) بووردین و نەتەڕ بووین و هەمیشەش لە دوای باران سیاسەتمەدارەکانمان کەپەنەکمان بۆ دێنن، ئەوان دەسکەوتی ئاوایان پێیە، ئەو پیاوانەی لەسەر پانی درێژ دەبن، لەبەر ورگ و قنگیان نە پاشی خۆیان دەبینن نە پێش، فەقیرانە: پیان دەڵین:
- کورت بینن-!
- ئاخر خەڵک هەروا سپڵەن، ئەو برادەرە کۆنە (کۆمۆ) (نیست) ە خۆ کفری نەکرد ووتی: نەتەوە سپڵەیە برسی بکە با شوێنت بکەوێ!
 ئەها سیاسەتمەدارەکانت لە باشوور و لە رۆژهەڵات چەند ئاقڵن، پاش ئەوەندە ساڵ لە 
(ئەوڕووپا) و پاش ئەوەندە ژن گۆڕین و  ئەوەندە شەوی ئەرخەوانی لەگەڵ کچان، چییان فێرکردی، ئابڕوویان بردی، سەریان شۆڕکردی، درۆزنیان کردی، رەنجەکەیان بردی...خۆ دەبینی لە پێناوی چاوەکانتا ( سازە گیان): (کورت ) بە ( کورد) ئەڵێ: ئێوە میوانن بچنەوە بۆ ووڵاتی خۆتان، کورت: بەو تەوارە بەرزەفڕانەی قەندیل دەڵێ، ئێوە میوانن، هەندێ کەس هەتا مردن هەر لە جیهانی خورافەدا گێنگڵ ئەدەن، ئەوان نازانن ئێستا مێژوویەکی نوێیە، ئێستا ئێمە ( لە زەمانی کۆبانی و پاش کۆبانی و باکوری کوردستاندا) دەژین، بای باکوور هەڵی کردوە و خۆڵ و خاشاک خۆی لەبەردا راناگرن،  ئێوە بەوان دەڵین بڕۆنەوە، ئێوە لێرە میوانن؟!، بەڵام سوزانییەکانی میللەتانی سەردەست لەباشووری کوردستاندا، خاوەن ماڵن...ئەرێ، وایە ؟! ئەی کورتی کورت؟!
ئای سازەگیان، ئەوەتەی ئێمە هەین لەگەڵ هەموو دوژمنانی  نەتەوەکەماندا ( سازیاین) بەڵام چونکە جوامێرەکانمان، ئەمانەن، لە پێناوی غەمزەیەکی چاوی تۆدا، وەک خۆیان دەڵێن، ( پشووماندا )، خۆ نە ( دۆڕاین)...

• هەموویان هەر یەک قوماشن
خەڵکی نەخۆش، نەتەوەی نەخۆش پێک دەهێنن، نەتەوەی نەخۆشیش سەرکردە و رابەری  نەخۆشی دەزێ، وەرە سەیرکە پاش ئەو هەموو دەریای خوێنە، پاش ئەو هەموو نوچدان و شکست و ئاشبەتاڵ و شۆڕش فرۆشتن و کچ بە پەنگ کردنە، پاش هەموو ئەو رۆژ و شەوە تاڵانە بۆ نەتەوەکەمان، پاش  و پاش و پاش.......
چۆن کوڕی رابەرە شکستخواردووەکان، دەبنەوە بەڕابەر، دیسانەوە هەمان تاس و هەمان حەمام، هەمان قەوانی سواویی (کوردایەتی) رێبازی سەرشۆڕی رابووردوو، کەی دەوەستی و ئاورێک دەدەیتەوە؟! کە پێشمەرگەیەکمان شەهید دەبێ، هەموو ژیانمان دەلەرزێ، ئێستا بە ئاشکرا، خوێنی رژاوی منداڵەکانمان، رۆح دەکەنەوە بەبەری (رابەرە، قیزەونەکانی مێژووی ئەتکراوماندا)، دیسانەوە، ئەوان بازرگانی خوینن و کاڵای بازاڕشیان رۆحی هەرزانی کوڕەکانی ئێمەیە، ئەم نەفرەتە چییە ئەی خوای گەورە، بەناوی رێباز و مێژووی بنەماڵەوە بەسەرماندا دەبارێ و تەواوبوونی بۆ نێیە، من دڵنیام کە ئێمە تەنیا قابیلی ئەم نەفرەتەین، ئێمە تووشی دەیان گرێ کراوین، بچوک بچوک لەبەردەم مێللەتانی سەردەستی کوردستاندا و فیرعەون فیرعەون بۆ گیانی خوشک و براکانمان لە هەر چوار پارچەی کوردستاندا:
- من : کەی دەبڕێیتەوە ئەی نەفرەتە هەمیشەییەکە؟

- نەفرەتی هەمیشەیی: من سەرەک هۆزەکانی مێژووی تۆم، هەموو جارێک، دەتفرۆشم..پاش چەند ساڵێک دیسان دێمەوە، تۆ نامناسییەوە، چونکە بیرەوەریدانی مێژووت هەمیشە بەتاڵە، دەبمەوە بەرابەرت، تۆ دێتەوە و دەبیتەوە بە نۆکەرم،  نەک هەر هی خۆم هەموو جارێک کە دێمەوە، کور و برازا و نەوە و نەتیجەش * لەگەڵ خۆم دێنمەوە، تۆ باشترین رۆڵەکانت دەکەیتەوە بە نۆکەرم، بە نۆکەریان، من چی بکەم، تۆ خۆت نۆکەرخەسڵەتی، ئارەزووت لە کەلەپچەیە، لە ئازادی دەترسی، دەنا من ترسنۆکترین تاکی کوردم، دەیان پشتە درۆت لەگەڵ دەکەم و تۆ هەر تێناگەی، پێت رادەبوێرم تیناگەی، موچەت دەبڕم تێناگەی، لە کۆشکی سەر بەفەلکدا دەژیم تێناگەی، هەر لەپڕێ منتان هێنایەوە و منتان کردەوە بە ئاغای خۆتان تیناگەی، سوارتان دەبم تیناگەی، سەر زەوی و بن زەوی ئەم بەشە لە کوردستانتان خستۆتە ژێر دەستمەوە و دەیفرۆشم وتێناگەی، من چیم، ئەندامانی حزبەکەی من چین، بووینەتە خاوەنی چارەنووسی تۆ؟!!، ئێمە خەڵکانی نەخوێندەوار، خورافی، بەدسیفەت، نمەک نەناس، شەروال پیس و.....هتد، ئێ تۆ بۆ دەبیتەوە بە نۆکەرم؟ بۆ مندالەکانت دەنێرت بۆ بەرەکانی ئەو جەنگەی من هەڵمگیرساندوە؟! ژیانی من لە خوێن و سووتان و جەنگدایە  ....بۆتێناگەی؟! بۆ تێناگەی؟!

- من ساڵی ١٩٤٦ قازیم بەجێهێشت و لە سێدارەیان دا.
- لە ٦٠کاندا موعینی و هاورێکانی کە لەهەرە دڵسۆزەکانی نەتەوەبوون، بەدەستی من کوژران.
- ساڵی ١٩٧٥ بەیەک ووشە ( ئاش باتاڵ) م بە ئێوەکرد و نەتەوەکەمان لە نەهامەتی و شکستی دەروونی ١٠٠% دا جێهێشت و من چووم بۆ خزمەتی شای ئێران و دانەویمەوە قاچی ماچ بکەم بەڵام ئەو لەبەر نەخۆشی من و تەمەنم دستی درێژ کرد و منیش دەستیم ماچ کرد. دکتۆر مەحمود شایەتیداوە.
- کە شۆرشی گەلانی ئێران هەڵگیرسا من باماندایەوە و بووم بە پاسداری موەقت (کە جۆرێکە لە سیغەی موەقت)، پێش هێزەکەیان کەوتم و شەری ٢٠ شەو و رۆژەی سنەم بەڕێوەبرد، پیاوانە بەرێوەم برد، ناسری سەلیمی** لە کاتێکدا چاوبەستراو، سەربەرزانە تەماشای خۆری دەکرد، بەگولەی ژێ سێی من گیانیم وشک کرد، کاک فوئاد، کە فرە خەڵک دۆست و شۆڕشگێڕ و کوردپەروەر بوو، لە پیلانێکی (دەستچنی من) بە شارەزایی  کۆنەساواکێکی وەک پژمان***، کە بەتایبەتی و بۆ ئەم مەبەستە لەلایەن ئیتلاعاتەوە لە فەرەنساوە بانگهێشت کرابوو و بە سەرپەلیی (حسین فەیل)****لە بۆسەیەکدا کوشتمان.
- هەموو بزوتنەوە کوردایەتیەکانی باکوری کوردستان بەدەستی من لە ناوچوون، سەرانی حزبەکانم، هەریەک بە بەهانەیەک، کوشت، هەرکەسێک گومانی، لە خودابوونی ( ماڵباتی من) هەبووبێت، کوشتوومە، ئەوەتەی پەکەکە دروست بووە من دژیم،  خەندەقم هەڵکەند بۆئەوەی کاتێ (داعشی هاومەرامم) قەتڵعامی کۆبانی دەکات، ئەگەر کەسانێک رزگاریان بوو، نەتوانن بگەنە ناو کوردستانی عێراق!، بەڵام کە ئەوکچە گەنجانە، لووتی زلی منیان شکاند، کاتێک هەوڵەکانم لە باکوور، بووە مایەی گاڵتەجاڕی نەتەوەکە، دیسان بامدایەوە، ئەمجارە، باسی دەوڵەتی کوردیم کرد، ئەوەندە بە فشەوە باسم کرد، لە چایخانەکانی سڵێمانی دەیانووت (کاکم بنێشتی کوردی) دروست دەکات.
- ئیتر بەس نییە لەوە زیاتر ئەم هەموو خیانەتە، بۆ تیناگەی، من هیچ نیم باوەڕبکە هیچ نیم،  هەموو شەوێک لەترسا خەوم نییە، وەک داهۆڵ ئێشک دەگرم، خەو بە سەددام و موعەمەر و ئەوانی ترەوە دەبینم، ناوی خۆم و ماڵباتەکەم لە لاپەرەکانی (ویکلیکس) دا دەبینم، نازانم لەناو کام پیسەرۆی هەولێردا خۆم حەشار دەم، خۆ هەولێر زوربەی گەرەکەکانی بێ پیسەڕۆیە، هەزار جار بەو پارێزگارەم ووت، تا قیامەتەکە نەهاتووە، سەری ئەو پیسەڕۆیانە بگرە، بەڵام کێ .......بە کلاوی من دەپێوێ؟!

ئەوەی دەمێنێتەوە ئەوەیە کە ئاماژەیەک بدرێت بە یەکێتی و گۆران، کە خیانەتی دوای ‌هەڵبژاردنەکان دووبارە نەکەنەوە، ئەوسا پێتان ووترا، ئەو شەڕە ئەوسا بکرایە ئێستا ئەم فیرعەونە دروست نەدەبوو، ئەگەر بەرەیەکتان دروست کردبایە، هەموو شتیکی ئەو زەلامە دەبوو بە نیوە، ئەوەی کردتان، دووبارەی نەکەنەوە، دەنا دەکەونە بەر نەفرەتی خوا و خەڵکی خوا..ئاگاداربن.... ئاگاداربن..... ئاگادار!

*نەتیجە – کورەزا و کچەزا
** ناسری سەلیمی – یەکێک لە شەهیدەکانی شەڕی قارەمانانەی شاری سنەی رۆژهەڵاتی کوردستانە، بەدەستی قیادە موەقەتەکان شەهید کرا.
*** پژمان : سەروان پژمان، کوردێکی سنەییە، لە دامەزرینەرانی ساواکی ئێرانە و یاساکانی ساواکی داناوە و بە خەتی خۆی کە زۆر خۆش بووە نووسیوەتەوە و لێپرسراوی بەشی دەرەوەی ساواک بووە بۆ کاروباری باشووری کوردستان، لە کتێبێکیدا بە ناوی (چۆن شۆرشی کوردم دروست کرد و چۆن ڕوخاندم) زۆر لە نهێنیەکانی پاڵەوانە سنگ شێرەکانی ئەو تایەفەیە باس دەکات. لە فەرەنسا بوو بۆ شەهیدکردنی رابەر (کاک فوئاد مستەفا سوڵتانی) بانگێشتی ئیران کرا لەلایەن ئیتلاعاتەوە و لەگەڵ مەفرەزەیەکی قیادە موەقەتە، بە سەرپەرشتی (حسین فەیلی)، ئەو رۆڵە ئەزیزە کوردستانییەی نەتەوەکەمانیان شەهید کرد.
**** حسین فەیلی، لە نۆکەرە بە ئەمەکەکانی، دەزگای پاراستن و ماڵباتی مەلایە، دوای ئەوەی کاک فوئادی شەهیدکرد، پشتگوێیان خست و لە شائابادی کرماشان دوکانی دانابوو، پێموابێ تا مرد (ئەگەر مردبێ، دەمێکە هەواڵیم نەبیستوە) ئەو کارەی دەکرد.




(دەنگدراوە: 1)