شیکارێک بۆ ترسە سیاسیەکانی پارتی، بۆ ئەمڕۆ و قۆناغی دوایی ڕاگەیاندنی دەوڵەت (بەشی یەکەم)

Wednesday, 27/01/2016, 22:53

1947 بینراوە


پارتی خۆی بۆ دوو قۆناغی جیاواز ئامادەکردووە و سیاسەت دەکات، هەوڵدەدات بەردەوامی بەدەسەڵاتی خۆی بدات، ئەویش قۆناغی ئەمڕۆی پێش دەوڵەت و قۆناغی دوایی ڕاگەیاندنی دەوڵەتی کوردییە. کە بانگەشەیی بۆدەکات و خۆی وەک خاوەن ئەو پرۆژەیە دەبینێت، مەسعود بەرزانی ڕۆڵی سەرەکی دەبینێت و هەوڵدەدات بیکاتە مێژوویەک و میراتێک بۆ بنەماڵەکەیی و نەوەکانی.
دۆخی ئەمڕۆی باشووری کوردستان، نهێنی ترسی داهاتووی بنەماڵەی بەرزانی و پارتیمان بۆ ڕەڤادەکات، کە لەداهاتوودا چارەنووسی خۆیان باش نابینن، بۆیە بەشێوەیەکی بەرنامە بۆ داڕێژراو ئامادەکاریی بۆ قەیران دەکەن،  دۆخێکی نەخوازراو بەسەر باشووردا دادەسەپێنن و دەیانەوێت بە ڕێگای نایاسایی و گووشار مانەوەیی دەسەڵاتی خۆیان وەک یەکانەیی دەسەڵات بۆ داهاتوو گرێنتی بکەن.  بۆیە سەرنجدان بۆ دوایی ئەم قۆناغە و خۆێندنەوە بۆ نهێنیەکانی پشتی پەردە و بێمنەتی و بێدەنگی پارتی دەرئەنجام بۆ ئەوە دەگەڕێتەوە هەلومەرجێک بخوڵقێنێت حزب و لایەنەکان  لە دەوریی خۆیی کۆبکاتەوە کۆتبەندیان بکات، ڕەووشی ئەمڕۆی باشوور و خوڵقاندی قەیرانی سیاسی و دارایی،  بۆ بەدەستهێنانی ئامانجەکان وەک چەکێکی کووشندە دژیی لایەنەکان و کۆمەڵگایی باشوور بەکاردەهێنێت، تاکوو بتوانێت لەهەلوومەرجێکی بەمشێوەیەدا کۆمەڵێک دەسکەووتی چارەنووسازی بنەماڵە بەدەست بێنێت.! بۆیە پارتی هەوڵدەدات باشووری کوردستان بگەڕێتەوە دۆخی پەنجا بە پەنجای پێش ٢٠٠٣. زیندوو کردنەوەی ستراتیژی نێوان خۆیان و یەکێتی کەبە (ستراتیژی نێوان پدک و ینک) ناسراوە. لەم سۆنگەیەوە یەکێتی بکاتە پارێزوانی خۆی لە زۆنی سەوز. نەخۆشی کوتلەیی ناو یەکێتی، پلانەکانی پارتی بۆ سەرکەوتن زیاتر بەهێزدەکات، چونکە بڕیارەکانی یەکێتی بەسەر دوو بەرەدا دابەشبووە و ناتوانێت خاوەن بڕیارێکی یەکلاکەرە و چارەنووساز بێت، هەمیشە دەیەوێت وەک نێوەندگیر خۆی نیشان بدات. پارتی بە بەرنامە لەسەر خاڵە لاواز و ناکۆکەکانی لایەنەکان کار و یاریی سیاسی دەکات، هەوڵی پارچەکردن و زیاتر قووڵکردنەوەی ناکۆکیەکان دەکات. چونکە  پارتی بە ترسەوە بۆ قۆناغی داهاتووی کوردستان دەڕوانێت، لە بەردەوام بوونی بەهیز بوونی  هێزە ئۆپۆزسیۆنەکان، پارتی یەقینە لەوەیی لە دەسەڵاتی ڕەهاوە دەبێتە کەمینەی سیاسی.  
پارتی سیاسەتێکی فێڵباز و زیرەکانە پەیڕەو دەکات. هەوڵی قووڵکردنەوەی ململانێ ناوخۆی حزب و لایەنەکان زیاتر پەرەپێدەدات و هەرجارێکیش بەشێوەیەکی زۆر دژبەر یان دۆست هەڵسوکەوت لەگەل لایەنێک دەکات. لەلایەکی تر سیاسەتی گشتی باشووری بەرەو ئاڵۆزی و شپەرزەیی و بێسەروبەرەی بردووە و لەئاستی نێودەوڵەتی هەرێمی بۆتە موخاتەبی سیاسی ئەم حوکمەتە و هەموو سیاسەتەکانی پارتی وەک دەیەوێت کاری پێدەکرێت نەوەک حوکمەتی هەرێم. خاڵی لاوازی لایەنەکان و حزبەکان بۆ مانەوەی باڵادەستی خۆی بەکاردێنێت، ناکۆکی ناو یەکێتی و پەرتەوازە بوونی بەرەیی ئۆپۆزسیون و پارچەکردنیان، هەڵوەشاندنەوەیی پرۆژەی چوارلایەنەکە بۆ کێشەیی دەستوور و دابەشبوونی سیاسەتی گشتی بۆ ئانتی پارتی و هەڵکردن لەگەڵ سیاسەتەکانی پارتی بەرۆکی هەموو حزبەکانی گرتووە بۆتە کێشمەکێشمی سیاسی ناو لایەنەکان، لێرەوەش بۆشایی سیاسی دروست بووە، پارتی لە گۆڕەپانی سیاسیدا بەدڵی خۆی و بەرژەوەندی خۆی تەراتێن دەکات. کۆمەڵگاش بێباوەڕ بووە لە هەموو لایەنەکانی دەرەوەیی پارتی، کە بێدەسەڵاتن و هیچیان لەبەرامبەر بە پارتی بۆناکرێت، چونکە خاوەن پرۆژە و یەکێتیەکی سیاسی و تەندروستن نیین، تەنیا کارێک دەیکەن هەشووهووشی میدیا و ڕاگەیاندنەکانە. ئەمانەیی باسمانکردن دەگەڕێتەوە بۆ سیاسەتی فێڵبازیی دوور لە پرانسیپی ئەخلاقی کە پارتی بەڕێوەی دەبات، پارتی سیاسەتی چەقبەستن و بێکاریگەرکردن پەیڕەو دەکات، لە بازنەیەکی داخراو بەدەوری خۆیاندا دەیانسوڕێنێ  و گێژیی کردوون، بۆیە لە دوایی سیاسەتی پارتی  ڕادەکەن و بە سیاسەت ناویدەکەن، ئەوەی خەتی سیاسی و ڕۆژەڤی سیاسی دیاری دەکات لە گۆڕەپانەکەدا پارتییە، بۆیە لایەنەکان ناتوانن ئەنجەدایی سیاسی بگۆڕن و پارتی ملکەچە بکەن، کە بە سیاسەتە کاولکارانەکانیدا بچێتەوە، بە هەڵەی ئیداریی و حوکمڕانی بچێتەوە، چیتر خەڵک نەبێتە قووربانی ململانێکان. 
ئەوەی جێگایی سەرنج و داخە کە ئەم هێزانە ناتوانن بە ڕاشکاوی بچنە بەرەیی گەل کە دژیی پارتی و دەسەڵاتەکەی دەکات، کە خەڵک وەک بۆمبێکی تەوقیتکراو لەهەر ئانووساتێکدا بێت دەتەقێتەوە، بەڵكوو بە پێچەوانەی خەڵک، هەموو لایەنەکان ڕۆڵی نێوەندگیری دەسەڵاتەکەی پارتی و خەڵک دەکەن، بۆیە خاوەن هێچ هەڵوێستێکی نین، بە شێوەیەکی ڕاستەوخۆ و ناڕاستەوخۆش دژیی هەموو جوڵاندێکی شەقام و چالاکیەکی جەماوەرین. بۆیە لە پەرێنتێزیی(ئێمە لەگەل هەموو مافەکانتانین بەڵام لەدەرەوەیی گرژیی! ئاژەوەگێریی)، ئایا تۆ هەموو شەقام و کوچەکان بکەیتە هێزی ئاسایش و پۆلیس دەتەوێت کێشە و ئاڵۆزیی دروست نەبێت، لەکاتێکدا حوکمەت بێمنەتە لە بایکۆدکردنی دەوام و داخستنی درگاکای دامودەزگاکان کە خزمەتی کۆمەڵانی خەڵک دەکەن!؟
بۆیە ئەمڕۆ پارتی لەم هەلومەرجەدا، ئامادەسازیی بۆ داهاتووی خۆی دەکات و هەوڵدەدات لێرەوە تووێشووی سیاسی خۆی بۆداهاتوو دابین بکات، لەدەرەوەیی پرۆسەسی سیاسی و هەڵبژاردن، چونکە لە زەمیەنی سیاسی و دیموکراتیکدا پارتی تەنگاو دەبێت و دەبێتە کەمینەیەکی سیاسی، چیتر ناتوانێت هەموو جومگە سیاسی و ئیداریەکانی هەرێم قۆرخ بکات و بە پێی بەرژوەندی بنەماڵەیی و حزبیی خۆی هاوکێشەی سیاسی و ئیداریی نەخشەکێش بکات. بۆیە پارتی دواهەمین چانسی خۆی لە ڕاگەیاندنی دەوڵەتی کوردیدا دەبینێتەوە، هەوڵدەدات یەکلایەنە ئەم پرۆژەیە بەرجەستە بکات،  ئەگەر لایەنەکان لەگەڵیدابن وەک پاشکۆیەک قبووڵ بکات و هەڵسووکەوتیان لەگەڵ بکات، بێئەوەی وەک شەریک و هاوبەش بەشداریی دەسەڵاتیان پیبکا، ئەگەر دژبەریش بن لەژێر ناوی دژیی بەرژەوەندی سیاسەتی نەتەوەی مەحکومیان بکات و لێرەوەش دەوڵەتی کوردی دەکاتە مۆرکی بنەماڵەیی خۆی و لەئەگەری سەرکەوتنیش ئەم هێزانە مەحکوم بکات لەکاتی خۆیدا خاوەن هەڵوێست نەبوون و دژبەریی ڕاگەیاندنی دەوڵەتی کوردیان کردووە، لێرەوە پارتی خۆی بە خاوەنی ئەم هەرێمە و هەموو مافێکی بڕیاردان دەزانێت بێ ئەوەی بگەڕێتەوە بۆ ڕەنگ و دەنگە جیاوازەکان، بە ئاشکرا ئەمڕۆ پارتی ئەم سیاسەت پەیڕەو دەکات. بۆیە دەمەوێت لە چەند خاڵێکدا ئیشارەت بە سیاسەتی پشتی پەردەیی پارتی بکەم، بۆئەوەی تاچەندین ساڵی ترخۆی بکاتە سەروەسێت و دەسەڵاتی یەکانەیی لە باشووری کوردستاندا بەڕێوە بەرێت. بۆ ئەم مەبەستە هەوڵدەدەم شیکارێک بۆ پلانی نهێنیە سیاسیەکانی پارتی بکەم بەشێوەیەکی خاڵبەندی. 

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە