مێژوی ئێرۆتیزم و پۆرنۆگرافی و فەرەنسا (بەشی یەکەم)

Monday, 03.14.2016, 22:39

6587 بینراوە


سه‌رنج دراوه له‌‌و خه‌سته‌خانانه‌ی كه مندالان نه‌خۆشی درێژه‌خایه‌نیان هه‌یه و ئازار ده‌چیژن، زۆر لە منداڵەکان  ده‌ست ده‌هێنن به‌ بەینی ڕانیانا بۆ هروژاندنی هەوەسیان، وه‌ك چاره‌یه‌ك بۆ له‌بیربردنه‌وه‌ی ئەشکەنجە و ئازار و بێ تاقه‌تییان، لە سەردەمانێکدا کە خەستەخانەکان لە لایەن کەسانی ئیماندارەوە   سەرپەرشتی دەکران، ئەم دیاردەیە بە گوناح دەبینرا،  بۆیە هەندێک جار منداڵەکانیان تەمێدەکردن،  لەبەر ئەوەی ئەم دیاردە نامۆیانە هێشتا لێکۆڵینەوەیان لەسەر نەکرابون بۆیە  تەمێیان دەکردن یان دەستیان دەبەستنەوە بۆ ڕیگریکردنیان لەو کارە .
هه‌روه‌ها ئه‌و كه‌سانه‌ی كه له سه‌رده‌مێكی ‌رابوردوی ژیانیاندا  لە دژواریدا ژیاون، کە ئەمەش بۆتە هۆی جۆرێک لە  ئاڵۆزی ده‌رونییان، سەرپەلی یان شازیەک لە گه‌مه‌ی سێكسیدا  به‌كارده‌هێنن وه‌ك به‌رپه‌رچ دانه‌وه‌یه‌ك بۆ ئه‌و رابوردووه‌ دژواره‌ و له‌هه‌مان كاتدا خۆ سه‌پاندنیان  به ده‌رخستنی كارێكتێری نێرینه‌ییان،  له‌لایه‌ن مێینه‌شه‌وه به‌جۆرێكی تر، به‌ڵام  لێكدانه‌وه‌ له هه‌ڵسوكه‌وتی مێینه زیاتر ئاڵوزتره له نێرینه .
ئه‌گه‌رچی له‌كه‌ڵچه‌رێكه‌وه بۆ كه‌ڵچه‌رێكی تر دیارده‌ی ئاڵ و گۆڕی سێكسی ده‌گۆر‌ێ  ئه‌مه‌ش په‌یوه‌سته به یاسای كۆمه‌ڵایه‌تیه‌وه، به‌لام به‌شوه‌یه‌كی گشتی سێكس لای مرۆڤ شاراراوه‌ بووه و نه‌یویستووه به‌ ئاشكرا باسی بكات، ئایا ئه‌م شاردنه‌وه‌یه جۆرێكه له‌ئێرۆتیسم یان تایبه‌تمه‌ندیه‌كی مرۆڤه و ئاژه‌ل نیه‌تی؟ یان شه‌رمكردنێكه له خۆ ؟ خۆ مندالێك ئه‌گه‌ر له‌سه‌ره‌تاوه په‌روه‌رده فێری نه‌كات ، ئه‌وا ئه‌قڵی پێی ناشكیێ كه‌ خۆی داپۆشێت .
ئه‌گه‌ر بگه‌ڕیینه‌وه سه‌ر ئاده‌م و حه‌وا، هه‌رچه‌نده چیرۆكێكی هه‌ڵبه‌ستراو بێت، به‌لام راستیه‌ك ده‌ست نیشان ده‌كات؛  ئادەم و حەوا، گه‌ڵو گون و كوزیان دادەپۆشن ،لەبر ئەوەی شه‌رم له‌خۆیان ده‌كه‌ن له‌به‌رده‌م یه‌زداندا پاش ئه‌وه‌ی سێوه‌كه ده‌خۆن، مەبەست لە سێو خواردنیش هٶشمەندبونە، ، بۆچی هۆشمه‌ند بوون ده‌بیت ببێته جێی شه‌رمکردن  له‌خۆ و بەو پێیەش شاردنه‌وه‌ی سێكسیان ؟ 
جۆرج  باتای نوسه‌رو فه‌یله‌سوفی فه‌ره‌نسی ( 1897-1962  ) له‌ كتێبی ؛  فرمیسكی ئێرۆزدا (ئێرۆز؛ خواوەندای ئێرۆتیك لای یۆنانیه‌كان) ، ‌باس له نه‌خشێك ده‌كات له ئه‌شكه‌وتی لاسكۆ (17000 پ ز لە فەرەنسا )؛ 
وێنە 01
وەک دەبینرێت لە وێنەی- 01-  دا ڕاوکەرێک ، یان شامانێک ،  بەسەر پشتا کەوتوە، ڕمێکی بەدەستەوەیە، کێری هەستاوە،  سەری لە شیوەی باڵندەیە، بەرامبەر بەو، گایەک کە ورگی هەڵدڕاوە ، وادیارە بە  ڕمی ڕاوکەرەکە. ئەم نەخشە لە ئەشکەوتی لاسکۆدا لە کونجوڕێکدا کراوە ،  وەک کارێکی ئێرۆتیکی شارداراوەتەوە ، بۆیە کاتێک من ئەم ئەشکەوتەم بینی و ئەم کتێبەم نەخوێندبوەوە ئەو کارەم لە ئەشکەوتەکەدا نەبینی .
ئەم ئەشکەوتە مەرەکەبی زۆر ڕشتوە و لێکدانەوەی زۆر بۆ کراوە. پێ دەچێت لەسەردەمی خۆیدا دەوری مۆزەخانەی لۆڤەری بینیبێت. بەبینینی ئەم ئەشکەوتە مرۆڤ سەری سەڕئەمێنێت لە جوانی ئەو نەخشانە، هەر خێرا شک لەوە دەکەین  کە ئەم نەخشانە هی 17000  ساڵ پێش زایین بێت، هەرگیز لە ژیانمدا هیچ شتێکم نەبینیوە هێندەی ئەو ئەشکەوتە کاریگەری هبوبێت لەسەرم، جێگەی داخە ئەم ژیانە جێبهێڵیتو ئەو ئەشکەوتە نەبینیت.  پرسیار لەوە دەکەین کە ئایا بۆچ مەبەستێک ئەم نەخشانە کراون . تەنها شتێک کە دۆزرابێتەوە لەم ئەشکەوتەدا گوریسێکە، ئەیا ئەم گوریسە بەکار هێنراوە وەک شاپڵیتە بۆ سوتاندنو ڕۆشنکردنەوەی ئەشکەوتەکە یان بۆ مەبەستی یاری ئێرۆتیزمی بەکار هاتوە ؟
 ئه‌م نه‌خشه وه‌ك یه‌كه‌م گوناحی مرۆڤ ناسراوه، جۆرج باتای ده‌ڵیت : هه‌ر كه‌مرۆڤ هۆشمه‌ند بوو به مردن،  له‌هه‌مان كاتا په‌نای بردۆته به‌ر ئێرۆتیزم وه‌ك به‌رپه‌رچ دانه‌وه‌یه‌كی مردن.  ئێرۆتیزم تایبه‌ته به‌مرۆڤ و ئاژه‌ل نیه‌تی،  چونكه ئاژەڵ هۆشمه‌ند نیه به‌مردن،  كه‌واته سێكس له قالبه سه‌ر‌تاییه‌كه‌ی خۆی ده‌چیته ده‌ره‌وه‌ كه ئامانجی نانه‌وه‌ی نه‌وه‌یه‌كی تره، ته‌نها وه‌ك خۆشی و له‌زه‌ت كراوه‌و بۆ ئه‌مه‌ش ئیرۆتیزم وه‌ك پاڵنه‌رێك به‌كار هینراوه ..
جۆرج  باتای، دین و ئیرۆتیزم ده‌به‌ستێت به‌یه‌كه‌وه، له‌سه‌ره‌تاوه؛ ئه‌و كاته‌ی كۆمه‌ڵگا توانی به‌رهه‌می زۆر به‌ده‌ست بهێنێت به‌ هۆی کۆیلایەتیەوە، ئه‌مه‌ وایكرد كه‌كاتی پشوو بێکاری و ڕابواردن  بۆ خۆی به‌ده‌ست بهێنێت، وورده وروده،  ئه‌و كاتە بێکارانە، وه‌ك ئاهه‌نگ و و سێرۆمۆنی به‌كارده‌هێنران و بەسەردەبران،  دین ئەم کاتە بەتاڵانەی دەخستە قاڵبێکەوە،  ئێرۆتیزم له‌و كاته‌د  رواڵه‌تێكی دینی له‌خۆی گرتبو، دین سنورێكی بۆدانابون.  بەسەربردنی ئەم کاتانە وەک سیرۆمۆنی و شتێکی پیرۆز وابون . 
 پاش ئه‌وه‌ی ئیرۆتیزم له مه‌به‌ستی سه‌ره‌كی خۆی لائه‌دات، ئه‌وه‌ش جه‌وهه‌ری ئیرۆتیزم خۆیه‌تی، واتە لە خاڵێکدا ناتوانێت بوەستێت و هەمیشە پێویستی بە نوێکردنەوە هەیە. ئەوەش كارێكتێری ڕه‌سه‌نیه‌تی، وه‌ك چۆن ده‌گێرنه‌وه له‌به‌سه‌رهاتی دیۆنیز – خواوەندی نیزۆس-  له‌سه‌رده‌می ڕۆمه‌كانا 186 پ ز، ئیتر له‌و كاته‌وه ئێرۆتیزم و دین جیابونه‌ته‌وه، ده‌نا هه‌ردوكیان له‌سه‌ره‌تاوه پێكه‌وه‌ بوون، هه‌ر بۆیه‌ش دین له‌سه‌ر كۆڵه‌كه‌ی به‌ربه‌ره‌كانی سێكس و ئێرۆتیزم خۆی بنیات ناوە. 
بۆ زانیاری خوێنەر؛ دیۆنیزۆس، خواوەندی شەرابو هەوەس و خۆشیە، تەنها خواوەندێکە  لە دەرئەنجامی جوتبونی خواوەندێکو مرۆڤێکەوە هابێتە دنیاوە، دیۆنیزۆس خوایەکی ڕۆژهەڵاتی بوە و جێگای خۆی کردۆتەوە لای یۆنانەکان ، خواوەندای دیۆنیزۆزۆس دوجار لە دایکبوە ئەمەش وادیارە لەبەر ئەوەی کاتێک مرۆڤ ئاشنایی بە ئێرۆتیزم پەیدا دەکات ژیانێکی تر دەژێتەوە و دەبێتە دەرگایەکی تەری  بە سەر تێڕوانینو جۆری ی لە ژیاندا بۆ دەکرێتەوە . 
كه‌واته  له‌به‌ر ئه‌وه‌ی بون به‌مرۆڤێكی هوشمه‌ند، هۆشمه‌ند‌ی یه به ؛‌  مردن و له‌زه‌ت و خۆشی و ژیان، به‌لام پیش ئه‌وه‌ی هۆشمه‌ند ببن به‌ له‌زه‌تو خۆشی و ژیان،  یان هه‌ر له‌هه‌مان كاتا، هۆشمه‌ند بووین به‌مردن . 
هه‌ر هۆشمه‌ندییه به مردن كه‌وای له مرۆ كردووه هه‌ر خێرا بڕوات به‌لای ئێرۆتیزما كه‌خۆشیه‌كه و ترسی مردنی له‌بیر ئه‌باته‌وه، وەک چۆن لەسەرەوە باسی ئەو منداڵانەمان کرد کە نەخۆشی درێژەخایەنیان هەیەو بەرەو مردن دەچن.  به‌لام بۆچی مرۆڤ  هه‌ست به‌خه‌تاباری ئه‌كات و خۆی ئه‌شارێته‌وه ؟ وادیاره هۆشمه‌ندی به‌مردن، جۆری جوتبونی مرۆڤی گۆڕیوه بۆ گانكردن و ئێرۆتیزم، چونكه ئاژه‌ل خۆی له‌خۆیدا جوت بوون بۆ بێچووكردن، بەشێوەیەکی  ئه‌نستانت بەبێ پلاندانان ئە‌كات، هۆشمه‌ند نیه به‌گان كردن واته به‌مردن، بۆ ئه‌مه‌ش وه‌رزی هه‌یه به‌پیچه‌وانه‌ی مرۆڤه‌وه كه‌ ئه‌و ‌تایبه‌تمه‌ندیه‌ی هه‌یه كه هه‌موو كاتیك و هه‌موو وه‌رزێك هه‌ر ئه‌وه‌نده‌ی هه‌‌وه‌سی هه‌ستا یان مێینه‌یه‌ك هه‌وه‌سی هه‌ستان گانی خۆی ده‌كات له‌هه‌ر شوێنێك بیت، ئێرۆتیزمیش یارمه‌تی ده‌ره بۆ ئه‌م مه‌به‌سته، بۆیه هه‌ندێك لێكۆڵینه‌وه‌ وای بۆ ده‌چن كه‌راسته مرۆڤ به‌رێكه‌وت توانیویه‌تی بگونجێت له‌گه‌ڵ ده‌وروبه‌ره‌كه‌یدا به‌لام تایبه‌تمه‌ندی زۆركردنی گان ( گان كردن به‌بێ وه‌رز) وادیاره هێشتویه‌تیه‌وه له‌سه‌ر زه‌وی،  بۆیه‌ش مرۆڤ هه‌ستی به‌وه كردووه كه‌سروشت له‌زه‌تێكی داوه‌تێ به‌رامبه‌‌ر به‌وه‌ی هوشه‌مندیه‌كی داوه‌تێ به‌مردن، به‌لام وادیاره مرۆڤ هه‌میشه ئاوڕی له‌ به‌پێچه‌وانه‌كه‌ی داوه‌ته‌وه ئه‌ویش نه‌ترسی له‌مردن و ناهۆشمه‌ندی، چونكه هۆشمه‌ندی جۆرێك له‌دوودڵی و ترس ده‌دات به‌مرۆڤ،  بۆیه هه‌ر له‌كۆنه‌وه مرۆی سه‌ره‌تایی به‌غیلیان به‌ ئاژه‌ڵ بردووه و زۆرجار سه‌ری مرۆڤیان وه‌ك باڵنده یان ئاژه‌ل پیشانداوه وه‌ك پیشاندانی هێزوو توانا.
 ئاژه‌ل ترسی نیه له‌به‌ر ئه‌وه‌ی هۆشمه‌ند نیه به‌مردن، ئه‌نكیدۆ له‌سه‌ره‌ مه‌رگا به گه‌لگامێشی ئه‌ووت؛ ئه‌وكاته‌ی له له‌دارستانه‌كاندا له‌گه‌ڵ ئاژه‌ڵدا ده‌ژیام، دڵم خۆش بوو و ئاسوده‌ بووم، ئێستاكه لە شارستانیەتا ئه‌ژنۆم  دەلەرزێ .
مادام هۆشمه‌ندم به‌مردن كه‌واته با هه‌تا ده‌توانم له‌زه‌ت بچێژم، یان با مردن له‌بیر به‌رمه‌وه.  هه‌ر بۆیه سێكس ده‌‌ورێكی سه‌ره‌كی و كاتێكی زۆری بۆ ته‌رخان كراوه. له‌فلیمێكی ده‌رهێنه‌رێكی فه‌ره‌نسی ؛ فرانسوا تخیوفۆ، به‌ناوی؛  ئه‌و پیاوه‌ی حه‌زی له‌ئافره‌ت ئه‌كرد، كابرا ئه‌چێت بۆلای دكتۆرێکی نەفسی و پێی ئه‌ڵیت كه ڕۆژ تا ئێوارێ سه‌یری ئافره‌ت ئه‌كات، هه‌ر كه‌ ئافره‌تێك قسه‌ی له‌گه‌ڵ ده‌كات خێرا هه‌وه‌سی هه‌ڵئه‌سێت و هه‌موو كاتی خۆی ته‌رخان كردووه بۆ سه‌یركردنی سمت و مه‌مكی ئافره‌تان له‌سه‌ر جاده و بەم هۆیەوە ناتوانێت سەری هیچی بپەرژێت لەژیانیا.  دكتۆریش پرسیاری لێ ئه‌كات كه‌ ئایا كاری چیه له‌ژیانا، له‌وه‌ڵامدا ئه‌ڵیت ؛ هیچ كارناكات، دكتۆریش ئه‌ڵێت : ئه‌ی به‌ڕای تۆ ئێمه بۆچی به‌كاركردنه‌وه خۆمان خه‌ریك كردووه ؟  بۆ ئه‌وه‌ی نه‌كه‌وینه ئه‌و‌ داوه‌ی تۆی تێ كه‌وتویت. جا وادیاره هه‌ر بۆ ئه‌و مه‌به‌سته‌ش كار ده‌كه‌ین نه‌وه‌ك و بۆ ئه‌وه‌ی ڕۆژێك له‌رۆژان نهێنی بون و بونه‌وه‌رو گه‌ردون بدۆزینه‌وه .
وێنەیەک لە فلیمی تخیوفۆ؛ ئەو پیاوەی کە ئافرەتی خۆشدەویست
له‌كورده‌واریدا، هەتا ئەمڕۆ، دوو كتێبی ئێرۆتیكمان هه‌یه ، ئه‌ویش، چیرۆكی هه‌زارو یه‌ك شه‌وه كه‌ نه‌كراوه به‌كوردی ته‌نها ئه‌وه‌ نه‌بیت ده‌ماو ده‌م ئه‌گێڕێته‌وه، ئه‌وی تریان ؛ ڕشته‌ی مرواریه، له‌وه‌ زیاتر لیتێراتورێكمان نیه بۆ ئێرۆتیزم و پۆرنۆگرافی، هەروەها چەند دێڕێکی شێخ ڕەزای تاڵەبانی ؛

عومرم گەییشت بە هەشتا
کێرم باکارە هێشتا
تەسەدقنی گەر ئەفەرمویت
هەستم بدەم بە ڕەشتا

یان هۆنراوەکەی نالی بۆ مەستورە ؛
ئەم سڕە چیە میسلی سوهاىێ، نەسوابێ؟
دوڕڕێ کە وەکو دوڕی سەمابێ، نەسوابێ
دوکانی توحەفە، کانی حەیا، کانی بە قابێ
قوبەی لە قیبابی نوقەبابێ، نەقوپابێ
وەک خەیمە بە پەردێکی دوئەستونە بە پابێ
سەرتیلەکی نەختێ، بە نەزاکەت قەڵەشابێ
وەک هیمەتی سۆفی لە نێو خەڵوە خزابێ
مەستور و عەزیزی شەرەف و ڕێفعەت و جابێ
یا کۆمەڵە زیوی بوخەلا، دور لە  سەخا بێ
******

لەو کانیەدا چوزەرە ڕێواسێ ڕوابێ
بەو چوزەرە  ڕێواسە کەمێک قەڵەشا بێ
خۆ خواش ئاگاداره كه خه‌ڵكی ڕۆژهه‌لاتی زیاتر تینوی سێكسن تا له‌ئه‌وروپی، لەبەرئەوەی یاسای دین و کۆمەڵایەتی زیاتر بەسەریانا زاڵە و ڕێگریان لێ دەکات، هەوەسی سێکس کردنیش لەو ئەزمونەدا لە هەڵچوندایە ، بێ شک، دینیش بۆ هەمان مەبەست ئەو کارەدەکات، بەڵام  خەڵکی بە پێجەوانەکەیەوە تێگەشتون،  دین وای  گەرەکە کە هەوەس نەمرێت هەتاوەکو ژیان بەردەوام بێت سێکسی کەمتر دەبێتەوە، راستە کە لە کۆمەڵگایەکدا سێکس نەبیتە تابو ئەوا هەوەس زیاتر دەهروژێت بەلام  نایانەوێت لە ئێرۆتیزم تێبگەن بەنانەوەی نەوەی نوێ نەک بە گانکردن، چونکە گان کردن دەمانبات بۆ ئێرۆتیزم و ئێرۆتیزمیش ئامانجی نانەوەی نەوەیەکی نوێ نیە و بە پێیەش خوامان پێ لەبیر دەباتەوە خواش بە مانای مردن.  هەروەها وای بۆ دەچن کە لە کۆمەڵگایەکی ئازادا، هەوەسی وەک هروژێنەرێک هەرچەندە خۆیان بەبێ ئەوەی هٶسشمەندبن بەوە هەمو ڕۆژێک بەکاری دەهێنن  لەژیانی ڕۆژانەیانا چونکە مرۆڤن و ‌هۆشمەندن بە مردن، بەڵام چونکە دو ڕون، راستیەکان دەشارنەوە دانی پیادا نانێن . 
كه‌ر و قاز و مه‌ڕ و مایینی داماو هه‌مویان لاقەدەکرێن لەلایەن گەنجانی  ڕۆژهەڵاتیەوە ، باباسی ئەوە نەکەین کە چەند مێرد منداڵ و کچٶلە لەلایەن ئەندامانی خێزانەکانیانەوە بە شیوەیەکی بەربڵاو لاقەدەکرێن و کەسیش ئامادە نیە باسی بکات، یان لەم دواییەدا کە ناکۆکی کەوتە بەینی ئیخوان و سەلەفیەکان یەکێک لە ئیخوانەکان سەلەفیەکی بەوە خەتابار دەکرد کە گوایە بینیویەتی پیاوی بردۆتە ماڵەوە هەتاوەکو پێکەوە لەگەل ژنەکەیدا ڕابوێرن.
ئایا ته‌نها ئیسلامه كه ڕێگه‌ی له‌وه گرتووه یا هۆکارێکی تر ڕیگرە  ؟  بێگومان دین هه‌میشه، دینی مه‌سیحیش دژی سیكس بووه ئه‌گه‌ر بۆ مه‌به‌ستی مندال بون نه‌بێت .
ده‌ست په‌ڕ كردنیش تایبه‌تمه‌ندیه‌كی مرۆڤه كه‌هه‌موو دینێك دژی ده‌وه‌ستێته‌وه له‌به‌ر ئه‌وه‌ی ئه‌نجامه‌كه‌ی نه‌زۆكه و ئه‌مه‌ش خۆی له‌خۆیدا دژی دینه. ئاینی مه‌سیحی به‌شێوه‌یه‌كی ئاشكرا دژی ده‌وه‌ستێته‌و،  به‌ڵام ئیسلام به‌ ئاشكرا دژی ناوه‌ستێته‌وه واته له‌قورعانا باسی نه‌كراوه وه‌ك ئه‌وه‌ی ئاگاداربم، هه‌رچه‌نده كه‌كاتێك كازانۆڤه ده‌چێت بۆ توركیا  (1740)  پرسیار له جۆسوف عه‌لی ( فه‌یله‌سوف) ده‌كات ده‌رباره‌ی ده‌ستپه‌ڕ  له‌وه‌لامدا ده‌لیت : ده‌ست په‌ر، تاوانێكه‌ له زینا گوناحتره، پاشان ئه‌ڵیت: ئه‌زانم ئه‌مه قانونێكه كه سه‌پاندنی وه‌ك تاوان هه‌رگیز ناتوانرێت جێبه‌چیبكرێت و شتێكی باشیش نیه، بەلام ئەگەر پیاوێك  ژیانێكی ئاسایی ‌بژی و بێ ژن بێت ئه‌گه‌ر گه‌شته ئه‌و ئاسته‌ی تینوی سێكس بوو ، ئه‌بیت ده‌ستپه‌ر بكات. 
وه‌ك بیستومه هه‌مووجارێك به‌ پێكه‌نینه‌وه ده‌یان گیرایه‌وه گوایه مه‌لایه‌ك له‌پێنجوێن  كه‌ده‌ستی لاوانی ده‌گوشی پێش ئه‌وه پێی ده‌ووتن؛ ده‌ستت پاكه كوڕم ؟ ده‌ستپه‌ڕت نه‌كردووه؟  هەرچۆنێک بێت لە کوردەواریدا، باسی سێکس و ئێرۆتیزم بەشیوەیەکی ئازاد باسکراوە  بە تایبەتی لە نێوان ژناندا بەبێ تابو، بۆیە سەرم سورما، کاتێک کچێکی برادەرم لەفەرەنسا بۆی گێرامەوە کە دایکی ڕۆژێک گوێی لە ژنێک دەبێت کە باسی ژیانی خۆی دەکات کە چۆن لەگەل  مێردە کۆنەکەیدا نەدەگەشتۆتە ئۆرگاسم و لەوەتەی لەگەل پیاویکی تردایە هەست بە ئۆرگاسم دەکات،  دایکیشی بەبیستنی ئەم باسە سەری سوڕدەمێنێت چونکە هەتا ئەوکاتە  گان کردن لەگەل مێردەکەیدا هیچ لەزەتیکی نەچەشتوە و ئۆرگاسمی نەزانیوە چیە .  چۆن لە کۆمەڵگایەکی وەک فەرەنسادا، لەم سەردەمەدا ئافرەتێک هۆشمەند نەبوبێت بە لەزەتی سێکسی ؟  ئەم دیاردانە زۆرن لە کۆمەڵگادا، بۆ نمونە جارێکیان ئۆرگانیزاسیۆنێکی ئەوروپی بەمەبستی ئاشنا بونیان بە پەیوەندی ئاڵوگۆڕی سێکسی لە نێوان ژنو پیاوی ڕۆژهەڵاتیدا، لەوڵاتی ئەردەن چەند پرسیارێک ئاراستەی ژنو مێردان دەکەن، لە ئەنجامدا زۆرێک لە ئافرەتان پێکەنیون یان داوایان لە مێردەکانیان کردوە هەتاوەکو یارمەتیان بدەن لەوەڵامدانەوەی ئەو پرسیارانە چونکە تێنەگەشتون لەمەبەستیان،  بێ شک وادیارە لەو کۆمەڵگایەدا خەڵکی ئاگاداری دنیای ئێرۆتیزم نین و هەر لەژێر لێفەوە نخەنخیانە بەبێ ئەوەی بزانن چی رودەدات؛ دەنگ هەیەو ڕەنگ نیە، بەڵام بەم دوایانەدا بەبۆنەی ئەنتەرنێتو فلیمە پۆرنۆکانەوە خەڵکی ئاشناییان پەیدا کردوە، بۆیە لە هەواڵی ڕۆژنامەیەکدا خوێندمەوە کە گوایە لە کوردوستان پیاوێک  داوای لە ژنەکەی کردبو کەبۆی بمژێت ئەگەر نا ئەوا تەڵاقی دەدات، ژنەکەشی لەوەڵامدا وتبوی ؛ یەع . مەلاو پیاوانی دینی کوردوستانیش هاتنە دەنگ کە گوایە لە ئیسلاما ئەوە ڕێگەی پێدراوە و ناشەرعی نیە و پێغەمبەر محەمەدیش ئەو کارەی بۆ کراوە لەلایەن ژنەکانیەوە، وەک ئەوەی کە گوایە ئیسلام دینێکی کراوە بێت، بەڵام خۆ ئەگەر بە پێچەوانەوە ژنەکە ئەو داوایەی بکردایە  کە مێردەکەی دەبێت بۆی بمژێت دەنا لێی جیادەبێتەوە ئەوا هەرگیز مەلاکان پشتگیریان لێنەدەکرد و دەیان وت ؛  ئەم ئافرەتە قەحبەو تیاترۆیە،  کەسیش ئەقڵی پێ نەشکا بڵی کابرا دەبڕۆ تۆش بۆی بمژە، بەشکم  ئەویش بتوانێت بەوبۆنەیەوە بۆت بمژێت، نا شتی وا ڕونادات چونکە لای ئێمە هەر پیاوان مافیان هەیە باسی ئارەزو و هەوەسی سێکسیان بکەن، ئەگەر ئافرەتێک باسی هەوەسی سیکسی بکات ئەوا دەبیتە قەحبە. کەچی لە سەفەرێکمدا بۆ کوردوستان لە گەڵ هاوڕێیەکی کچمدا، لەشاری سڵێمانی لە گەڵ چەند کچیکدا دانیشتبوین، هاوڕێکەم پرسیاری لێ کردم دەیویست بزانێت کە بۆچی ئەو کچانە هێندە ماکیاج دەکەن، چونکە لە ئەوروپا ئەوجۆرە ماکیاجە تەنها قەحبەکان دەیکەن، منیش پاش ئەوەی دەوری وەرگێڕم بینی، وەڵامی کچەکان ئەوەبو کە گوایە ئەوانیش حەز بەو جۆرە ماکیاچە ناکەن بەڵام ئەگەر ماکیاچ نەکەن ئەوا ناتوانن شو بکەن چونکە خەڵكی دەڵێن ئەو کچە دڵی وشکە، واتە قەحبە نیە. بێ شک خەلکی ڕۆژهەلاتی هەر خەون بە قەحبەوە دەبینن لەگەڵ ئەوەشدا هەمیشە باسی خٶشەویستی دەکەنو هۆنراوەکانیان بە وشەی ؛ خۆشەویستەکەم دەست پیدەکات، بەڵام وادیارە عەشق بۆ ئەوان مانای سێکس کردنەو هیچی تر، خۆ ئەگەر سێکس ئازادبێت لە کوردوستان ئەوا بێشک نیوەی شاعیرەکان واز لەهۆنراوە نوسین دەهێنن .
تێبینی ؛ تەبلۆکەی سەرەوە لەلایەن دولاکرواوە نەخشێنراوە، لەساڵی  1827.  وەک زۆرێک لە تابلۆکانی دولاکروا لەسەردەمی خۆیدا لەلایەن خەڵکیەوە  دژی وەستاونەتەوە، تابلۆکە بە ناوی ؛ مردنی سەردەنەپاڵ، پاشای ئاشوری. کاتێک کۆشکی پاشا دەوری دراوە لەلایەن دوژمنەوە. فەرمان بە ئەسکەر و کۆیلەکانی دەدات کە هەمو ژنو دەستگیرانەکانی بکوژن و تەنانەت سەگەکەشی و هەمو ئەوشتانەی کە لەزەتی لێ چەشتون پاشان  پاشا خۆشی.

ماویەتی





(دەنگدراوە: 5 . زۆرباشە: 5/5)