دەبێت پارتی و یەکێتی بخرێنەوە لیستی تیرۆر

هێزی ئاسایش دەبێت کاری فەرمیی پاراستنی سەر و گیانی هاوڵاتیان بێت، کەچی ئەزموونی ژیان لەم هەرێمە ئەوە دەردەخات کە هێزە ئەمنییەکانی پارتی و یەکێتی، خودی خۆیان سەرچاوەی ترس و تۆقاندن و کوشتنی هاوڵاتی و ڕۆژنامە نوس و دەنگی ئازادن. وەک دەزانین دیارترین نمونەکانی فڕاندن و کوشتن لەلایەن ئەم هێزە تۆقێنەرانەوە کە ئەنجامدراوە تیرۆرکردنی ڕۆژنامەنوسانی وەک: (سۆرانی مامە حەمە، عەبدالستار تاهر شەریف، سەردەشت عوسمان، كاوە گەرمیانی، ویدات حسین، شوكری ئامێدی)، هەروەها کوشتارەکانی حەڤدەی شوبات و ئازاردان و لە کەدارکردنی چەندین کەسایەتی خاوەن بیروڕای ئازاد.

کاری تیرۆر چیە؟ تیرۆر لە پێناسەیەکدا بریتییە لە کاری تۆقاندن، فڕاندن و کوشتنی کەسانی بێ تاوان. ڕێک هەمان ئەو کارە ئەم هێزانە ئەنجامی دەدەن، ئەم هێزانە ڕۆژانە دەمانتۆقێنن، دەمانفڕێنن و دەمانکوژن، پاشان تەرمەکەمان فڕێ دەدەن، بەوەشەوە ناوەستن بە تۆمەتێکی قێزەونیش تۆمەتبارمان دەکەن، ئەمانە لە تیرۆرستیش خراپترن، تیرۆرست تەنیا دەتکوژێت، بەڵام ئەمان دەتکوژن و ناویشت پیس دەکەن، دوای کوشتنت هێشتا وازت لێ ناهێنن ناو و کەسایەتیشت تیرۆر دەکەن. هەروەک چۆن بینیمان دوای فڕاندن و کوشتنی سەردەشت عوسمان، هێزەکانی ئاسایشی پارتی ڕایانگەیاند سەردەشت دەستی پەیوەندی لەگەڵ تیرۆرستان هەبووە.

پێشتر کە دەمانبینی ناوی پارتی و یەکێتی لە لیستی تیرۆردایە، نیگەران دەبووین و پێمان وابوو ئەوە غەدرێکی گەورەیە لە کورد کراوە، بەڵام ئێستا دوای تێپەڕینی چەند ساڵێک و دەرکەوتنی ڕووی ڕاستی ئەم هێزە تۆقێنەرانە، دەبێت بڵێین ئەوانەی ناوی ئەم هێزانەیان لە تیرۆردا دانابوو، لە ئێمە ژیر تر بوون و لە ئێمە زیاتر ڕەگوڕیشەی ئەم هێزانەیان ناسیوە، ئێستا دوای ئەو هەموو خوێن ڕشتنەی هاوڵاتیان و دەنگە ئازادەکان، ئیتر کاتی ئەوەیە هەوڵبدەین دەنگمان بگەێنین بە هەموو جیهان و ناوی ئەم هێزە تۆقێنەرانە بخەینەوە ناو لیستی تیرۆر، چونکە تیرۆرستی ڕاستەقینە ئەمانەن کە لەژێر ناوی دیموکراسیدا بۆ خوێن ڕشتنمان خۆیان مەڵاسداوە.