راگەیاندنەکانی هەرێم وەکو راگەیاندنە حیزبییەکان یەک ئاڕاستەیان هەیە

Friday, 05.12.2017, 8:57

1679 بینراوە


ئەم نووسینەی خوارەوە، بەشێکە لە ناوەرۆکی ئەو دیدارانەی کە لە ساڵانی رابردوودا کردوومە ، بەپێویستم زانی  بۆ بیرخستنەوە جار بەجار بەم شێوەیەی خوارەوە دایانبنێمەوە.
-----------------------------------------------
جیهانی پەیوەندییەکان له‌ ڕێگه‌ی ئه‌نته‌رنێته‌وه‌ جێگا‌ی به‌ ده‌زگا زه‌به‌لاحه‌کانی ڕادیۆ و ته‌له‌ڤزیۆن و رۆژنامه‌ جیهانییه‌کانیش له‌ق کردووه‌. پێگەیەکی وه‌ک فه‌یسبووک یان یوتوب‌، یان ماشینی گه‌ڕانی گۆگڵ، هێنده‌ی ده‌یان زانکۆ زانیاریی به‌ گشت مرۆڤایه‌تی ده‌گه‌یه‌نن، تا ئاستێک، ئه‌گه‌ر میدیا ده‌سته‌ڵاتی چواره‌م بێت، ئه‌وا ئینته‌رنێت بۆ‌ته‌ ده‌سته‌ڵاتی پێنجه‌م و داینه‌مۆی شۆڕش و هەموو شوێنێکی گرتۆته‌وه‌.
ئه‌رکی میدیا ته‌نیا گه‌یاندنی هه‌واڵ و زانیاری نییه‌، به‌ڵکو دروستکردن و هاندان و سازکردنی ڕای گشتییه‌. هەرچەندە لای زۆر کەس ڕاگه‌یاندنی ئازاد وا لێکدەدرێتەوە، که‌ دەبێت ئەو راگەیاندنە بێلایه‌ن بێت، له‌ جیهاندا هیچ ڕاگه‌یاندنێک نییه‌، کە بە بێ بیرکردنه‌وه‌، ئامانجێک له‌ پشتیه‌وه‌ نه‌بێت، جا ئه‌و بیرکردنه‌وه‌یه‌ ئایدیۆلۆژی حیزبی بێت، یان بیرکردنه‌وه‌ و فه‌لسه‌فه‌ بێت و بۆ ئەوە دنیابینی خۆی کردبێتیه‌ پره‌نسیبی کارکردنەکەی، گرنگ ئەوەیە له‌ سەرەنجامدا ئه‌رکی میدیا دەبێت هه‌ڵوێست وه‌رگرتن و سازدانی هه‌ڵوێستی شه‌قامیش بێت، لەگەڵ خواست و ئامانجی جەماوەردا بێت.
لە باشووری وڵات، میدیای پارتی و یه‌کێتیی، ئاڕاسته‌کانییان زه‌لیلکردن و سه‌رکزکردنی مرۆڤی کورده‌، بۆیه‌ به‌لای منه‌وه‌، ئەو میدیایانەی، کە هێندە له‌ به‌رژه‌وه‌ندی بنه‌ماڵه‌کانی ئه‌و دوو حیزبه‌دان، ئاڕاسته‌ی راگەیاندنەکانیان هێنده‌ی ئاڕاستەی نه‌یارانی کوردە و ڕۆڵی نەگەتیڤیان هەیە له‌ لاوازکردن و شکاندنی که‌سایه‌تی نه‌ته‌وه‌ی کورد. جگه‌ له‌ فه‌لسه‌فه‌ی درۆبکه‌ درۆبکه‌، تا بڕوات پێده‌که‌ن، ئەمە سیمای میدیای حیزبیی ئه‌و دوو بنه‌ماڵه‌یەیە.
جۆزێف گۆبڵز‌ گوته‌یه‌کی به‌ناوبانگی هه‌یه‌ ده‌ڵێت: (هه‌رکاتێک گوێم له‌ وشه‌ی ڕوناکبیر ده‌بێت، زیاتر هه‌ست به‌ گرنگی ده‌مانچه‌که‌م ده‌که‌م، کە دژیان هەڵیبگرم) ئەگەر له‌و قسه‌یه‌ی گۆبڵزه‌وه‌ پێناسەی میدیای حیزبی کوردی، تەنانەت رۆژنامەنووس و رووناکبیر و نووسەرە دەربارەکان بکه‌م، کە ئەمانە دیوێکی دیکه‌ی تاوان و ئه‌و ناپاکیانه‌ن‌، که‌ له‌ مێژووی کورددا ئه‌نجامیان داوه‌. لەوەش دەگەیەن، کە جگه‌ لە نووسەر و ڕووناکبیر و مرۆڤی ڕاستگۆ له‌ چوارچێوه‌ی ڕۆژنامه ‌و ته‌له‌ڤزیۆنه‌کانیانه‌وه‌ جێگه‌ی نابێته‌وه‌، مه‌گه‌ر ئه‌و کاتانه‌ نه‌بێت، کە دەبێت تۆش گۆبڵز ئاسا هه‌ست به‌ گرنگی ده‌مانچه‌ بکه‌ن کە دژیان بەکاری بهێنیت. چونکە هێڵی گەڕانەوە و تەنانەت تێگەیشتن و کۆمپرۆمیس لە نێواندا نامێنێتەوە، تەنانەت ئیستا میدیا بەناو ئەهلییەکان هەمان رێچکەی میدیا و راگەیاندنە حیزبییەکانیان گرتووە، بەرەو هەمان ئاڕاستە کار دەکەن، زۆربەی رۆژنامەنووسەکان بێهەڵویست و رۆڵی لایەنگریی نابینن کە لەگەڵ جەماوەردا بن، بەڵکو وەکو فەرمانبەر و کادیرێکی حیزبی کارەکانی خۆیان بەجێ دەهێنن و لە پرەنسیبی کاری راگەیاندن دوور کەوتوونەتەوە.
بۆیە دەتوانین بڵێین، کەوا ڕۆڵ و ئه‌رکی میدیای کوردی نەیتوانیوە هه‌ڵوێست بنوێنێت، زۆر ڕاشکاوانه‌ش ده‌ڵێم میدیای بە ناو ئۆپۆزسیۆنیش نه‌یتوانیوه‌ ئه‌رکه‌کانی خۆی وەکو ئۆپزیسیۆن ڕابگەیەنێت، وەک نمونە بزووتنەوەی گۆڕان، کە وەکو ئۆپۆزسیۆن خۆی نمایش دەکات، له‌ گۆڕەپانی سیاسیی هه‌رێمی کوردستاندا ڕاڕا و شه‌رمنانه‌ رەفتاری کردووە، میدیاکانیشیان به‌هه‌مان شێوه‌ شه‌رمنانه‌ن، تەنانەت زۆر جار لە میدیای دەسەڵات ترسناکترن، بۆ نمونە کەسێکی باوەڕپێنەکراو و گومانای لە میدیای دەسەڵات ئەگەر پەیامێکی پێبێت، هەروا بە ئاسانی ناتوانێت پەیامەکەی کاریگەریی هەبێت، بەلام هەر ئەو کەسە ئەگەر بچێتە میدیای ئۆپۆزیسیۆن، گەیاندنی پەیامەکەی رەواجی زۆرتری دەبێت، مەترسییەکە لێرەدایە ئەوەیە، کە ئۆپۆزیسیۆنی کوردی و راگەیاندنەکانیان بە مەبەست ئەم کارە دەکەن.