قاسم سلێمانی: وشه‌ی مام پڕ به‌ باڵای مام جه‌لال بوو

Tuesday, 10.10.2017, 12:27

5925 بینراوە


کوردستانپۆست: کە دوژمن و داگیرکەرانی کورد، ئاوا ستایشی سەرانی کورد دەکەن، دەبێت کەللەمان ئەوەندەی تێدا بێت و بیربکەینەوە بپرسین بۆ؟
(بۆ) لێرەدا پرسیارێک و مانایەکی گەورەیە، دەبێت زۆر وەڵام لە مێشکماندا دروست بکات! ئەوانەی مێشکیان نییە
پێویست ناکات بیربکەنەوە، با ئەو ئەرکە بسپێرن بە فرمێسکی چاویان، شین و شەپۆر بۆ مردنی تالەبانی بکەن.
---------------------------------

ده‌قی په‌یامه‌كه‌ی سه‌رله‌شكه‌ر سوله‌یمانی
هه‌واڵی كۆچی دواییی خه‌باتگێڕی ماندوونه‌ناس، سه‌رۆك كۆماری پێشووی عیراق، جه‌نابی جه‌لال تاڵه‌بانی نه‌ك هه‌ر گه‌لی موسڵمانی عیراق، به‌ڵكوو هه‌موو گه‌لانی ناوچه‌كه‌ی تووشی غه‌م و په‌ژاره‌ كرد.
كۆچی دواییی كه‌سایه‌تییێكی خه‌باتگێڕ كه‌ شه‌ست ساڵ له‌ پێناوی ئازادیی گه‌لی عیراق له‌ عه‌ره‌ب، كورد، توركمان، شیعه‌، سوننه‌، مه‌سیحی و ئێزدی خه‌باتی كرد، ئه‌و كه‌ڵه‌ پیاوه‌ی كه‌ ده‌سته‌واژه‌ی "مام" به‌ڕاست پڕ به‌ باڵای بوو. كه‌سایه‌تییێك كه‌ به‌رده‌وام سه‌نگه‌ری خه‌باتی ده‌كرده‌ سه‌نگه‌ری به‌رگری له‌ شیعه‌، سوننه‌، كورد و عه‌ره‌ب.
گه‌وره‌ییی ئه‌م پیاوه‌ مه‌زنه‌ هێشتاكه‌ له‌ نێو گه‌لی عێراق به‌ نه‌ناسراوی ماوه‌ته‌وه‌ و له‌ كوردستانی عێراقیشدا به‌و چه‌شنه‌ی كه‌ شایه‌نیه‌تی، ده‌رفه‌تی ناساندن و ناسینی ئه‌م كه‌سایه‌تییه‌ دیاره‌، نه‌ڕه‌خسا.
تاڵه‌بانی ئه‌و پیاوه‌ مه‌زنه‌ بوو كه‌ وه‌رگرتنی به‌رپرسیارێتییه‌كان هیچی له‌ گه‌وره‌ییی ئه‌و زیاد نه‌كرد، به‌ڵكوو به‌پێچه‌وانه‌وه‌، ئه‌وه‌ "مام" بوو كه‌ بایه‌خی ئه‌به‌خشی به‌ پۆست و پله‌ و پایه‌كان. كه‌سایه‌تییێك كه‌ به‌ردوام گه‌لی عێراقی له‌ ململانێ و دووبه‌ره‌كی و قه‌یرانه‌كان ڕزگار كرد و پاراست.
ئه‌م خه‌م و په‌ژاره‌یه بۆ خه‌ڵكی كوردستانی عێراق زیاتر له‌ دیكه‌ی پێكهاته‌كانی گه‌لی عێراق قورسه‌ و به‌ باشی له‌وه‌ تێده‌گه‌ن كه‌ تاڵه‌بانیی مه‌زن به‌ چ شاره‌زایی و حیكمه‌تێكه‌وه‌ هاوكات له‌گه‌ڵ مافی دیكه‌ی گه‌لی عێراق، مافی خه‌ڵكی كوردستانی عێراقی له‌ ده‌ستووری هه‌میشه‌ییی ئه‌و وڵاته‌دا چه‌سپاند و جێگیری كرد.
كه‌سایه‌تییێكی گه‌وره‌ كه‌ به‌رده‌وام سه‌ربه‌خۆیی و یه‌كپارچه‌ییی عێراقی مه‌به‌ست بوو و باوه‌ڕی به‌وه‌ بوو كه‌ مافی هه‌موو پێكهاته‌ نه‌ته‌وه‌یی و مه‌زه‌بییه‌كانی عێراق ده‌بێ له‌ چوارچێوه‌ی وڵاتێكی یه‌كگرتوو له‌ ده‌ستووری هه‌میشه‌یی دانی پێدا بنرێت و بچه‌سپێت.
ئه‌نجوومه‌نی نوێنه‌ران و حكوومه‌تی ئێستای عێراق كه‌ تابلۆیێكه‌ له‌ به‌شداریی هه‌موو ئیتنیك و مه‌زه‌به‌ جیاواه‌كانی عێراق، نموونه‌یێكی زه‌ق له‌ حیكمه‌تی ئه‌و پیاوه‌ مه‌زنه‌ و ئه‌و پێشمه‌رگه‌ ماندوونه‌ناسه‌ پیشان ده‌دات كه‌ به‌ ژیری و یارمه‌تیی دیكه‌ی سه‌ركرده‌كانی عێراق، به‌ باشی داڕێژران و پێكهێنران.
تاڵه‌بانیی مه‌زن له‌ ستراتیژیی خۆیدا جیهانی ئیسلامی به‌ په‌ناگه‌ و وڵاتانی دراوسێ، به‌ تاییبه‌ت كۆماری ئیسلامیی ئێرانی به‌ قووڵاییی ئه‌م ستراتیژییه‌ داده‌نا و ئه‌م دوو ڕه‌هه‌نده‌ی له‌ هه‌موو قه‌یران و ململانێكاندا به‌ هێڵی سوور داده‌نا و لادانی تێدا نه‌بوو و هه‌میشه‌ پارێزگاریی لێ ده‌كرد. به‌م پێیه‌، له‌ سه‌رده‌می داگیركردنی عێراق له‌ لایه‌ن ئه‌مریكاوه‌، سه‌ره‌ڕای تێبینی و هه‌ستیاریی زۆری داگیركه‌ران، تاڵه‌بانی گه‌وره‌ترین له‌مپه‌ر له‌سه‌ر ڕێگای له‌ناوبردنی پێوه‌ندیی ستراتیژیكی گه‌لی عێراق له‌گه‌ڵ كۆماری ئیسلامیی ئێران بوو و به‌ لێهاتوویی و حیكمه‌تی تایبه‌تی خۆی، ئێرانی كرده‌ پشتیوانی هه‌میشه‌ییی گه‌لی عێراق و خوازیاری به‌رده‌وامیی هه‌میشه‌ییی ئه‌م پێوه‌ندییه‌ بوو و هه‌ر بۆیه‌ كۆماری ئیسلامیی ئێرانی به‌ وڵاتی دووهه‌می خۆی ده‌زانی.
تاڵه‌بانی به‌بێ گوێدان و ئاوڕدانه‌وه‌ له‌ ناڕه‌زایه‌تییه‌كانی ئه‌مریكا له‌ كاتی داگیركاریی عێراق له‌لایه‌ن ئه‌و وڵاته‌وه‌، به‌ هۆی ده‌رك و تێگه‌یشتنی ورد له‌ ڕاستییه‌كانی ناوچه‌كه‌، به‌رده‌وام به‌رگریی له‌ پێوه‌ندیی له‌پسان نه‌هاتووی دوو گه‌لی عێراق و ئێران و وڵاتانی دیكه‌ی ناوچه‌ ده‌كرد.
یه‌كێكی دیكه‌ له‌ تایبه‌تمه‌ندییه‌ دیاره‌كانی ئه‌و كه‌سایه‌تییه‌ مه‌زنه‌ ئه‌وه‌ بوو كه‌ ڕێگری ده‌كرد له‌ ده‌ستێوه‌ردانی نه‌یارانی جیهانی ئیسلامی به‌ تایبه‌ت ڕژێمی زایۆنی و قه‌ت شه‌رعیه‌تی به‌وان نه‌دا. تاڵه‌بانی یارمه‌تی زۆرێك له‌ كه‌سایه‌تیه‌كانی ئیسلامی له‌ شیعه‌ و سوننه‌ دا و له‌ گه‌شه‌سه‌ندنی جیهانی ئیسلامی به‌ تایبه‌ت له‌ ساحه‌ی عێراق ده‌وری سه‌ره‌كیی بینی.
تاڵه‌بانی خاوه‌نی ڕه‌وشت و ئاكاری تایبه‌تی ئیسلامی بوو و ئه‌مه‌ش ئه‌وی كردبووه‌ كه‌سایه‌تییه‌كی خاوه‌ن ڕێز بۆ هه‌موو كه‌سایه‌تییه‌كان و به‌رپرسان له‌ ئاستی جیهاندا.
كتێبخانه‌ی به‌ڕێز تاڵه‌بانی پڕ بوو له‌ كتێبی ئیسلامی و سه‌رگوزه‌شته‌ی خه‌باتگێڕان، هه‌ر بۆیه‌ تاڵه‌بانی وێڕای پێگه‌یشتوویی له‌ مه‌كته‌بی ئیسلام و سوود بینین له‌ ئه‌زموونی كه‌ڵه‌پیاوانی ئه‌م قوتانخانه‌یه‌ كه كاریگه‌رییه‌كانی ئه‌م مه‌كته‌به‌ له‌ ڕه‌وشت و ئاكاری به‌ڕێزیان ڕه‌نگی دابووه‌وه‌، به‌ جوانی وانه‌ی له‌ به‌سه‌رهاتی دیكه‌ی خه‌باتگێڕانی جیهانیش وه‌رگرتبوو و ئه‌م دوو تایبه‌تمه‌ندییه‌ ئه‌و به‌ڕێزه‌ی كردبووه‌ مه‌رجه‌عێك بۆ چاره‌سه‌ری كێشه‌ و ملمانێیه‌كانی هه‌موو هۆز و قه‌وم و گرووپه‌ جیاوازه‌كان.
ئه‌مڕۆ ئه‌و هه‌ڤاڵه‌ ئازیز و كۆچكردووه‌ له‌ ناوماندا نه‌ماوه‌ و هه‌ست به‌ نه‌بوونی ئه‌و ده‌كرێت و قه‌یرانی ئێستاش له‌ كوردستانی عێراقدا بۆ بۆشایی نه‌بوونی كه‌سایه‌تییێكی حه‌كیم و شاره‌زای هه‌موو هه‌لومه‌رجێك، وه‌ك خوالێخۆشبوو ده‌گه‌ڕێته‌وه‌. كه‌سایه‌تییێك كه‌ به‌رده‌وام نه‌ك هه‌ر نه‌كه‌وته‌ داوی عاتیفه‌ و ئیحساسه‌وه‌، به‌ڵكوو ئه‌وانه‌ی ده‌خسته‌ سه‌ر ڕێڕه‌و و ناو چوارچێوه‌یێكی ژیرانه‌ و لۆژیكی.
تاڵه‌بانی ته‌مه‌نی خۆی كرده‌ قوربانیی گه‌لی عێراق و به‌ ڕاستی ده‌بێ به‌ڕێزیان به‌ شه‌هیدی ڕێی عێراق ناوببرێت.
خودای مه‌زن بیخاته‌ به‌ر ڕه‌حمه‌تی بێ پایانی خۆی، ئه‌و كه‌ مه‌رهه‌می برینه‌كانی گه‌لی عێراق له‌ سه‌رده‌می حكوومه‌تی چه‌وسێنه‌ری به‌عس و ئاڵاهه‌ڵگری یه‌كگرتوویی و یه‌كپارچه‌ییی عێراق بوو.
تاڵه‌بانی قوتابخانه‌یێكی دامه‌زراند كه‌ هیوادارین ده‌رچووانی ئه‌و قوتابخانه‌یه‌ ڕێگه‌ی ئه‌و كه‌ڵه‌ پیاوه‌ بگرنه‌ به‌ر، ڕێبازێك كه‌ ئه‌وی دیكه‌ی ده‌خسته‌ پێش خۆی و خستنه‌ پێشی یه‌كگرتوویی بوو له‌ به‌رانبه‌ر دووبه‌ره‌كی و جیایی كاری، هه‌ڤیازیی مه‌نتیق به‌ سه‌ر عاتیفه‌ و ئه‌وله‌وییه‌ت دان به‌ دراوسێ له‌ به‌رانبه‌ر بیانی و سه‌رخستن و هه‌ڤیازی دان به‌ ئیسلام له‌ به‌رانبه‌ر كوفر و دانانی ئازادی له‌ سه‌رووی داگیركاری و جه‌ختی له‌سه‌ر ڕه‌وایی دۆزی فه‌ڵه‌ستین له‌ به‌رانبه‌ر داگیركاریی ئیسرائیل. ئاماژه‌دان به‌ دیكه‌ی تایبه‌تمه‌ندییه‌كانی ئه‌و كه‌سایه‌تییه‌ مه‌زنه‌ پێویستی به‌ نووسینی چه‌ندین كتێبی گه‌وره‌یه‌.
خۆم له‌ خه‌می له‌ده‌ستدانی ئه‌م پیاوه‌ مه‌زنه‌ و مامۆستا ئازاد و خه‌باتگێڕه‌ و كه‌سایه‌تییێك كه‌ ڕه‌وشتی به‌رزی ئیسلامی هه‌بوو، به‌ تازیه‌بار ده‌زانم و سه‌ره‌خۆشیی ئه‌م خه‌مه‌ گه‌وره‌یه‌ له‌ بنه‌ماڵه‌ی به‌ڕێزی تاڵه‌بانی و هاوژینه‌كه‌ی و منداڵه‌كانی و دیكه‌ی سه‌ركرده‌كانی كوردستانی عێراق، به‌ تایبه‌ت یه‌كێتیی نیشتیمانیی كوردستانی عێراق ده‌كه‌م و له‌ خودای مه‌زن، بۆ ئه‌و هه‌ڤاڵه‌ خه‌باتگێڕه‌ كۆچكردووه‌، داوای لێخۆشبوون و ڕه‌حمه‌تی بێ پایان و بۆ خانه‌واده‌ و كه‌سوكاریشی سه‌بر به‌ ئاوات ده‌خوازم.
سه‌رله‌شكه‌ری پاسدار قاسم سوله‌یمانی
پێنجشه‌ممه‌ 13ی ڕه‌زبه‌ری 1396ی كۆچی هه‌تاوی
14ی موحه‌ڕه‌می 1439
قاسم سلێمانی و ئەحمەد نەژاد، گومانلێکراو بە بکوژی قاسملۆ و دۆستی تالەبانی (قاسملۆ، عەزیز موحەمەد، جەلال تالەبانی)