ئیتیلاعات دزەی کردۆتە ناو ئاسایشی گشتی یەکێتی نیشتیمانی

Tuesday, 12.12.2017, 17:19

7401 بینراوە


سەرچاوەیەک لە ئاسایشی گشتی سلێمانی بە کوردستانپۆستی ڕاگەیاند٫ ماوەی چەند ڕۆژێکە توانراوە ۲۹ کەس لە ناو دەزگای ئاسایشی یەکێتی لە سلێمانی دەستگیر بکرێت٫ کە سەرجەمیان کاریان بۆ ئیتڵاعاتی ئێرانی کردووە، سەرچاوەکە ئەوەی ئاشکرا کرد، کە لە ناو دەستگیرکراوەکاندا شۆفێرێکی تێدایە، کە شۆڤێری تایبەتی خێزانی وەستا حسن بووە. سەرچاوەکە وتیشی: یەکێک لە دەستگێرکراوەکانی ئیتڵاعات لە ڕێگای کۆڵبەرێکی ئێرانییەوە پەیوەندی بە دەزگای ئیتڵاعاتەوە کردووە. ئەو سەرچاوەیە ئاماژەی بەوەکرد ئەمە فەلتانێکی گەورەی ئەمنییە دەزگای هەواڵگری ئێرانی بتوانێت لە ناو دەزگای ئەمنیدا خەڵکی تێدا بچێنێت و کاریان بۆ بکات.
دیسان سەرچاوەکە جەختی لەوەکردوە٫ کە دڵنیاییە لەوەی لەژێر فشاری بەرپرسانی ئێرانی ئەو جاسوسانە ئازادەکرێن و لە سزای مەرگ ڕزگاریان دەبێت، چونکە چەندین بەرپرسی باڵای یەکێتی ڕاستەوخۆ و بەشانازیەوە جاسوسی بۆ دەزگای هەواڵگری و ئەجیندای ئێرانی دەکەن، سلێمانییان کردۆتە لانەی جاسوسی دەزگای هەواڵگری ئیتڵاعاتی ئێرانی.
لە کۆتاییدا سەرچاوەکە ئەوەشی خستە روو، کەوا سەرجەم راگەیاندن و کەناڵە کوردییەکان ئاگاداری ئەم رووداوەن،  بەڵام لە ترساندا خۆیان لە قەرەی نادەن.