حەقیقەتی هەڵبژاردن بە خاڵ و داتا

* ئەگەر حیزبەکانی دەسەڵات بێ گوێدانە هیچ پێوەرو مۆڕاڵێك لەسەر چەند کورسییەکی نوێنەرایەتی پەرلەمانی عێراق ئاوها بکەن (کە پێشتر ئێستاش هیچ کاریگەریی و ڕۆڵێکیان تیایدا نەبووەو نابێ) ئەی دەبێ بۆ هەڵبژاردنی کوردستان چی بکەن٣٠/٩؟

* بەشداریکردنی %٤٤ ی دانیشتوان لە هەڵبژاردن دەنگی نەخێرە بۆ هەموو هێزە سیاسییە فاشیلەکانی سەر ساحەی سیاسی کوردی و عێراقی.

* هەڵبژاردن هەرگیز لە کۆمەڵگای خێڵەکی و دواکەوتوو و دیکتاتۆریی مانای نابێت، چونکە ئەوە بۆ کۆمەڵگای وشیارو یەکسان و دادپەروەر چەکێکی کاریگەرە لە هەڵبژاردنی نوێنەرانی خەڵك و دیاریکردنی شێوازی حوکمدا.

* تەزویرکردنی سیستەماتیکی یەکێتی و پارتی لە هەڵبژاردندا  ئەوەی دەرخست کە ئەوان نایانەوێت بەهیچ جۆرێك دەسەڵات و هیچ لە ئیمتیازاتەکانیان جێبهێڵن، بۆ نموونە تەماشای سلێمانی بکە لە دەرەوە: بزانە چەند کۆشکی ٣٠ قات و زیاتری تێدا دروستکراوە، بۆ کەس ناپرسێت ئەو سەدان کۆشکە هی کێیەو چۆن ئەو پارەیان دەسخست؟

* با چیدی خەڵك و هێزە ئۆپۆزۆسیۆنەکان خۆڵ نەکەنە چاوی خۆیان و وابزانن بەو شێوازی کارکردنەیان دەتوانن گەندەڵکاران دووربخەنەوە، با ئیتر بیر لە ڕێگایەکی تر بکەنەوە بۆ هێنانەدی گۆڕانکاریی ریشەیی لە کوردستاندا.

* با ئۆپۆزۆسیۆن ئەوەش بزانێت ئەو ٢ حیزبە گەندەڵە لەماوەی ٢٧ ساڵی حوکمیاندا بەشی هێندە میکرۆب و پۆخڵەواتیان دروستکردووە چەپڵەیان بۆ لێبدەن و دەنگیان پێ بدەن، چونکە وەك پەندێکی کوردی دەڵێت: تەیری گول عاشق بە داری ژەقنەبووتە، بەڵام هەرگیز ئەو ڕێژەیە بە هەردوو حیزبی دەسەڵاتدار ناگاتە %٢٥.

* هەموو شوێنکەوتووانی ئەو ٢ حیزبەو هەوادارو پلە بڵندو نزمەکان با ئەوە بزانن ئەوەی کردیان لە سوکایەتیکردن بە دیموکراسی و دەنگی خەڵك هەرگیز سیاسەتکردن نییە، ئەوە دادەنرێت بە دۆڕاندنی هەموو بەها ئاکاریەکانی مرۆڤایەتی، هەرچەندە دەمێکە مۆڕاڵ لە فەرهەنگی ئەواندا نەماوەو هەردەم ئامادەبوون بۆ خیانەت و کردنی قێزەونترین کار، بۆ وێنە هاونەتەوەکانی خۆیان تەسلیمی تورکیاو ئێران بکەن تا بیانکوژن، لە پێناوی گیرفان و کورسیەکانی خۆیاندا.

* هەق وایە ئەو کەلله بۆگەنانەی فەرمانی دزیی و فێڵ و تۆقاندن دەدەن بە تەنهایی لەگەڵ خۆیاندا بدوێن و بە وتوێژێکی هێمنانەی ژیریی بگەنە ئەو راستییەی کە تاکەی دەتوانن ئاوها بە زۆر خۆیان بسەپێنن بەسەر میللەتێکدا کە ڕقی لێیانەو چارەی ئەوانی ناوێت؟