بەدوادا چونێک: قەحبەى سیاسى و قەحبەیەتى سیاسی

کوردستان لە گرەوى دەسەڵاتێکدایە لە هەموو بەهایەکى ئینسانى و نیشتمانى داماڵراوە ، حیزبەکانیتر هەتا بۆیانکراوە و بۆیانبکرێت خۆیان بەشەمەندەفەرى ئەم خیانەتکارانە هەڵئەواسن لەوانە بزوتنەوەى گۆڕان ئەوە دوو جارە، ڕاستە بەرەى دزیى و خیانەت بەهێز ئەکات، بەڵام لەم ماوە کەمەدا دەمامکى فریودان و درۆى زل و قەبەى گۆڕان کەوتە خوارەوە، ئەگەر لەم هەڵبژاردنەى ئەم دواییەى پەڕلەمانى کوردستان خەڵک و تایبەتر پارێزگاى سلێمانى بە هەموو شار و شارۆچکەکانى زەبرێکى کوشندە و جەرگبڕیان لەم بزوتنەوەیە وەشان و تەریکیان خست، ئەم حیزبە ئێستا بە بەشداریان لە حکومەتەکەى پارتى بە وەرگرتنى چەند پلە و پۆستێکى چەور و پڕ کۆلیسترۆڵ خەریکە ئەوانەشى کە دواى قەرەباڵغیەکەى گردى زەرگەتە کەوتبوون وردە وردە ئەوانیش دووردەکەونەو و دەوەرن ، مەبەستمان ئەوانە نییە کە نەوشیروان مستەفایان بە بت کردووە تائێستا وائەزانن باوکى هەژارانە و چیاى کوڕیى نان نییە بیخوات . 

   ئەمە وێنەى سەرۆکى گەورەترین پارتى ئۆپۆزیسیۆنی بەریتانیایە، پارتى کرێکاران ، (جیرمى کارین)ـە بە دورى نازانم لە هەڵبژاردنى داهاتوى بەریتانیا ببێت بە سەرۆک وەزیران  ، کە ژینێکى ئاسایى وەکو هەر هاوڵاتیەکى ئاسایى ئەژى ئەوەتا پێداویستى ڕۆژانەى خۆیکڕیوە کەسیش پێی ناڵیت سادە و خاکیی و شانامەى بۆ نەهۆنیوەتەوە . 

لە کوردەواریدا گەرماوى گشتى لە هەموو شارەکاندا هەبوو (ئێستا ژمارەیەکى یەکجار کەمى ماوە) کە کاتەکانى دابەشکرابوو بۆ ژنان و پیاوان، بە شێوەیەکى سادە و ساکار و خەڵک خۆى ئەشۆرد و ئەمانە پەڕیونەتە ناو فۆلکلۆر و گۆرانى و گۆرانى زۆر خۆش و هەست بزۆێن بەسەر حەمام و هاتنەوەى ژنان بە سەتڵ و جامەوە، وەکو لە گۆرانیەکانى حەسەن زیرەک دا هاتووە . ئەوکاتە پیاوان بەسەڵتە زەلامى ئەچون و لە حەمام لفکە و خاولى و پەشتەماڵیان وەرئەگرت و دواتر بۆ حەمامچیەکەى (خاوەن حەمام) ئەگێڕایەوە ، پەشتەماڵ کە بۆ داپۆشین بوو لەکاتى خۆشۆردندا لەبەر ئەوەى شوێنەکە گشتیە ئەگەر کەسێک کارى پێنەما ئەیگێڕایەوە هەڵیان ئەخست هەتا ووشک ئەبۆوە دواتر ئەدرا بەکەسێکی تر ، لەمەوە زاراوەى پەشتەماڵى حەمام هاتە ئاراوە و بەو کەسانەیان ئەوت کە لە مامەڵەکردندا سوکن و بۆ دەستکەت و دەستخۆشانە و هەر ڕۆژەى بە بەر یەکێکەوەن ، ئەکرێت ئێمە بەو حیزبانەى کە لە ماوەیەکى کورت و پێوانەیدا بە پلەى سەد و هەشتا پلە وەرئەچەرخێن بۆ بەرژەوەندى و سواڵى پلە و پۆست بڵێین ئەمانە وەکو پەشتەماڵى حەمامن، بەڵام ئەمە مانایەکى پڕ بە پێست بەدەستەوە نادات لەبەر ئەوە زاراوەى قەحبەى سیاسیم لە وتارى پێشومدا بەکار هێنا بوو . ئاخر چ ئەقلێکى تەندروست ئەوە قبول ئەکات کە هەموو ئەدەبیاتى حیزبەکەت لەسەر دژایەتى دەسەڵاتى بنەماڵەیى داڕشتووە ، کە دزن.. مافیان.. خۆفرۆشن.. خائینن.. نەوتدزن.. تاڵانچین.. گەندەڵن.. سەرکوتگەرن.. ساختەکارن.. دژەدیموکراسین.. شکەنجەگەرن. خاوەن زیندانى نهێنین .. لیستەکە وەکو زمانى عەلى حەمەساڵح زۆر درێژە, لە کورترین ماوەدا ئەگەر بتەوێت بچینە باوەشی ئەو حیزبەوە کەخاوەنى ئەو هەموو ئاکار و کردەوانەیە ، ئەبێت حیزبەکەى بنەماڵەى بەرزانیش گوێى بۆ ئاهونزولەکانى گۆڕان و جەرگى هەڵقرچاوى لیژنەى دانوسان و قرخەقرخى خانەى خەواندن (ببورن ڕاپەڕاندن) گرتبێت بۆیە وەکو لە گردەکە باوەو ئەڵێن: پارتى نەرمى ئەنوێنێ، هەر ئەوە ماوە  سەدایى گۆرانى نەرمە نەرمە لە گردەکەى کاکە چیاوە بچریکێنێ، ئاخر حیزبتان بینیوە ئەوەندە بەخێرایى بەگ دابنێت و هەر بە قنگە بەگ بگاتە پیرمام.

پێشتر ئەیانوت ئەم حیزبانەى دەسەڵات بەدرۆ و دراو حوکم ئەکەن، دیارە چوون بەشە دراوێک وەرگرن و بەڵام باڵانسى درۆیان لە مێژە بۆ پڕکردونەتەوە، بیرمانە عەلى حەمە صالح ئەیوت ئەم تەنکەرە نەوتانەى بەتاڵانى ئاودیوى سنورەکان ئەکرێن ئەگەر ئاوى تیابێت بەشى خەرجیەکانى هەرێم ئەکات، هەتا  گۆڕان و عەلی حەمە ساڵح پێویستیان بەخەڵک بوو بۆ هەڵخەلەتاندن و دەنگ کۆکردنەوە ئەیانوت بەداهاتى ناوخۆ کێشەى موچەى موچەخۆرانى کوردستان چارەسەر ئەکرێت و ئێستا کە دەمیان بەر قەرسیلەکەى خێڵى جامانە سور کەوتووە، عەلی حەمە ساڵع ئیستا کاوێژێکى تر ئەکات : هەتا بەغدا موچە نەنێڕێت پاشەکەوت کۆتایى پێنایەت، دور نییەپارتى بەشێک لە پلە و پۆستەکانیان بۆ پاشەکەوت بکات.

عەدنان عوسمانیش ئەڵێت: با حیزبەکانیتر لەگەڵ پارتیدا ڕێکبکەون ، یەکێکتر لە جڤات ئەڵێت مەسرور چاکسازى ئەکات.

خانمێکیتر ئەڵێت شەش مانگ ئەدەین بەحکومەت بۆ چاکسازى دواتر شەش مانگى بۆ تازە ئەکەینەوە، ئەگەر نەیانکرد ئەوا ئەیدەینە دەست خوا.

 ئیتر هەرایەکە لە خۆشى پلە و پۆست لە گردەکە هاکا مۆمى خۆشى داگیرسێنرا .. ئەوا بۆ نۆساڵ ئەچێت ئەم حیزبە ئەم نمونانەی پێگەیاندووە .

  

 سەبارەت بە سۆزانى (قەحبە – بەداواى لێبوردنەوە) بارودۆخێکى ئابورى و کۆمەڵایەتى پاڵ بەو کەسەوە ئەنێت کە بکەوێتە داوى کارێکى وەهاوە و زۆر جار ئەوکەسە بژێویی خێزانێک فەراهەم ئەکات، ئەگەر بیرەوەرى ئەمجۆرە کەسانە بخوێنینەوە هەموى ئاماژە بە نادروستى کارەکەیان ئەکەن و حەزیان بە ژیانێکى ئاساییە وەکو هەر کەسێکیتر بژین و خوازیارى ڕۆژێکن ببنە خاوەنى قەوارەى خێزانى خۆیان، ئەمانە نەخیانەت لە بیرو باوەڕ و نیشتمان ئەکەن ، نەسامانى گشتى ئەدزن نە بکوژن ...

  

بەڵام سیاسییەک .. بە ویژدانێکى مردووەوە هاونیشتمانیانى بەدروشمى ڕەنگاو ڕەنگ و بە وەعدى درۆ و قەبە بۆ ئازادیى و خۆشگوزەرانى و ڕێزگرتن لە مافەکانى مرۆڤ ، جوڵاندنى هەست و سۆزى خەڵکى  هەژار و گەنجى گیرفان خاڵى .. زۆریتر هەتا ئەگاتە موچەى کابانى ماڵ .. و سوارى شەپۆلى ناڕەزایەتى خەڵک ببێت و لەپێناوى پلە و پۆست لە پێناوى بەرژەوەندى کەسیى و تاقمێکدا سڵ لە هیچ ملکەچییەک نەکاتەوە و پاکانە و پاساوى بێبنەماى بۆ بهێنێتەوە بە ناوى گۆڕانکارى و چاکسازى و ... ئەگەر ئەمە قەحبەیەتى سیاسی نەبێت ئەبێت چى بێت؟ ئەگەر سیاسیەک ئەمە ڕەفتارى و ئاکارى بێت قەحبەى سیاسی نەبێت چییە؟

کۆنەهەوارێکى گردەکەى کاک چیا بەرامبەر ئەو ڕەخنانەى هەیە بە تەلەفیزۆنى ڕوداو ئەڵێت: پاش ماوەیەک نیگەرانیەکانى خەڵک ئەڕەوێتەوە، واتە ئەمانە باکیان بەهیچ مەبدەئ و بەهایەک نییە .. ئەگەر یەکێک  سیاسی بێت و شوڵى لێهەڵکێشا هەر ئەوەى پێدەڵێن کەوتم . 

 لە وتارى پێشومدا کە ئەوەى خوارەوە لینکەکەیەتى ئاماژەم بە شانۆگەرییەک کردبوو ، بەڵام لە تایپکردندا ناوى شانۆگەریەکە پەڕیبو ئەویش شانۆگەرى (گوڵە مێخەک)ـە سەدان چەپک لە گوڵە مێخەک و نێرگزى ئەم بەهارە بۆ کوردستانپۆست و خوێنەرانى .