لەل و نیو لەل

+ لە ساڵی ١٩٦٤ ەوە تا ئەمڕۆ شەڕی نێوان (جەلالی و مەلایی) ڕوویداوە، شکور بۆ خودا، نە کەسێک لە خێزانی بارزانی و نە کەسێک لە خێزانی تاڵەبانی لە(شەڕی براکوژی) دا خوێن لە پەنجەیان نەهاتوە !.

+ لە پاش ئەوەی (پیرەژنە قژ سورەکە) مادلین ئۆلبرایت، پاش ساڵەها شەڕ، جەنابی مام جەلال و جەنابی کاک مەسعودیان ئاشت کردەوە، جەنابی کاک مەسعود فەرمووی: ئەگەر دادگایەکی عادیلانە هەبێت، من و جەنابی مام جەلال لەم شەڕەدا بێ گوناه دەردەچین !

ئەمە لە کاتێکدا بەڕێزیان دەیفەرموو: ئەو پەنجە دەبڕم لەگەڵ یەکێتی ئیتفاق بکەم، جەنابی مام جەلالیش نەفیر عامی بۆ پارتی کوشتن دەرکردبوو !.

+ پاش چەند ساڵێک جەنابی کاک مەسعود، حەملەیەکی گەورەی کرد، بۆ ئەوەی جەنابی مام جەلال ببێت بە سەرەك کۆماری عێراق، جەنابی مام جەلالیش دەیفەرموو: نەك هەر ئەم دەورە، دەورەی داهاتووش جەنابی کاک مەسعود سەرۆکی هەرێمی کوردستانە !.

+ کە جەنابی کاک نەوشیروان مستەفا گۆڕانی دروستکرد، مام جەلال فەرمووی: نەوشیروان بەرپرسە لە کیمیا بارانی هەڵەبجە، کاک نەوشیروانیش فەرمووی: مام جەلال خۆزگەی خواستوە دووهەڵەبجەی تریش ڕووبدات، بۆ ئەوەی لەدەرەوە کەیسی کورد بە هێز ببێت !

دواتریش یەکێتی مانگی چارەکە ملیۆنێک دۆلاری دەدا بە گٶڕان و گۆڕانیش قەت نەیتوانی سێبەری یەکێتی نەبێت بەو حاڵەشەوە !.

+ کە خۆپیشاندانەکانی حەڤدەی شوبات ڕویدا، (دە )کوڕی خەڵکی تێدا بوو بە قوربانی، ڕاگەیاندنەکانی پارتی و یەکێتی و گۆڕان بە شێوەیەك بەربوبونە یەکتر ئەو سەری دیار نەبێت، تەنانەت گۆڕان نەیانهێشت، پارتی (لایەك) لە خێزانی قوربانیەکانیش بکاتەوە . 

شەو ڕۆژ، باس باسی پاکیج و دادگایی تاوانباران بوو، کەچی کە حکومەت پێکهات جەنابی کاک نەوشیروان فەرمووی: چوارسالی داهاتوو چوار ساڵی ئاشتی و پێکەوە ژیانە !

جا خوا مناڵ و مەزنی ناشارەزا و تازە پیاکەوتوو بگرێت وەزعەکەیان تێکدا !.

+ کە بەڕیز یوسف محەمەد، سەرۆکی پەرلەمان بوو، ڕکی گرتبوو لە کاک مەسعود و دەیووت: بە نەخوێندەوار حوکمڕانی ناکرێت ، کە ئەمساڵ چاوپێکەوتنی لە گەڵ کرا ئەیووت: ناوی کەسم نەبردوە !.

ئەم کارەساتە ناخۆشانە، بە توونی بابا و ئاوی ئاموون بڕۆن و قەت نەیەنەوە ....

ئێستا ...

ئێستا بافڵ تاڵەبانی ئەڵیت: کاک مەسعود کارێزامایە و مامی منە !

دڵنیام چیای کاک نەوشیروانیش جەلال تالەبانی بە مام و هێرۆخان بە ئامۆژن دەزانێت !

کەواتە ئێوە هەموو بەرە باب و ئامۆزای یەکتر و سەرۆکی ئێستا و داهاتووی ئێمەشن ....

ئێمەش هەندێکمان لەوە تێگەیشتوین کە:

دەروێش دەبێت بە خەلیفە، بەلام قەت نابێت بە شێخ .

مسکێن دەبێت بە سەرکار و تا کوێخاش دەڕوات، بەلام هەرگیز نابێت بە ئاغا و بەگ !

ئێمەی بەرپرسەکان تا سەرکردایەتی و مەکتەب سیاسی حیزبەکانی ئێوە دەڕۆین (گەر گوێ لە مستی ئێوە بین) هەڵدەکشیین، بەلام قەت نابین بە پیاو!.

بۆیە لە ڕۆژهەڵاتدا حیزب هی کەسی یەکەمە و بەس...

حیزب هی خێزانەکانە و بەس !.

قوربانی لوتفتان بین ...

وەک ئێمە ئەقڵمان نییە، ئێوە بەزەیتان بە ڕەعیەتەکانی خۆتاندا بێتەوە و (هەرسێ ئامۆزاکە) لەسەر "ئەوی بۆ ئێوە باشە" ڕێک بکەون و جەنابی کاک مەسعود، وەکو مەرجەع و مامی گەورەتان، بە جێگا پرس و ڕاتان دیاری بکەن و هەر یارییەک کە ئەیکەن پیرۆزتان بێت،

ئێمەی گەلی گێلیش تۆپەکەتان بۆ ئەهێنینەوە !.

ئێوە دانیشن بە خێر... 

ئێمەش دەستەونەزەر لە حوزورتاندا ڕاوەستاوین !

...

تێبینی: کە مەسعود حەیدەر وتی: کاک مەسعود بارزانی مەرجەعە، یەک ملێۆن جنێوی بۆ چوو !

کەچی کە بافڵ تاڵەبانی دەڵێت: کاک مەسعود کارێزما و مامی منە، یەک پیاوم ئەوێ لە ناو یەکێتیدا یەکێکیان بڵێ: (لەل) !

کە چیای کاک نەوشیروانیش هەر بڕیارێک دەردەکات، یەک گۆرانخوازم دەوێت بەو مەرجەی لە ناو گۆڕان بمێنێتەوە، بڵێت: (نیوو - لەل)

دیارە برایانی پارتیش لەوە تێگەیشتوون، (لەل) چەندە کارەساتبارە !

.

مولاحەزە: (لەل) وەک ووشە، مانایەکی دیار و سەربەخۆی نییە ، بەلام ماناکەی ئاوایە، وەک کورد دەڵیت: (پیاوم ئەوێ بکۆکێت).