فەرەیدون عەبدولقادر، لە شیش ئاودیو کردنەوە بۆ نەوت ئاودیو کردن

Tuesday, 06.04.2019, 13:52

18474 بینراوە


ڕزگارکردنی کەرکوک لە ساڵی ١٩٩١دا بە فیتی ئیران و بەشێکی دانەبڕاوەی ڕاپەینی ئەو ساڵەی سەرتانسەری عیراق بوو. بەبێ ئامادەکاری و بیرکردنەوە لە چارەنووسی خەڵک، کاردانەوەی ئەو هێڕشە، سەرانی یەکێتی بۆ پتەوتر کردنی پەیوەندییان لەگەڵ ئێران، توڕيی و هەڵمەتی خەڵکیان بەکارهێنا بۆ ڕزگارکردنی کەرکوک. فەرەیدون عەبدولقادر ئەو کات ئەندامی سەرکردایەتی یەکێتی و کۆمەڵە و ئەندامی مەکتەبی سیاسی یەکێتی بوو  لە پەڕتووکی "هەڵۆ سوورەکانی قەندیل" لە لاپەڕە ٥٩٢ دا دەنووسێت:  
"لەگەڵ قەرارگەی ڕەمەزان هاوئاهەنگیمان تەواو کرد و بێتەل و پێویستیەکانی قۆڵی دەربەندیخان تا گەرمیانمان لە تەپەڕەش دانا هەندێ هێزیشمان لەوێ دانا!" . لە هەمان لاپەڕەدا دەنووسێت " لە بەرەبەیانی ڕۆژی ٥/٣/١٩٩١دا  توانیان شارۆچکەی ڕانیە بکەنە دەروازە بۆ ڕزگار کردنی ناوچەکان و ڕاپەرینی خەڵکی کوردستان".
 ئەم ددانپێدانانەی فەرەیدون دوای ٢٨ ساڵ بەوەی کە ئەوان جاشی ئیران بوون بێ سوڕ نییە! بەهەرحاڵ سەرانی پارتەکانی باشوور هەمیشە لەژێر ئەجێندای ئەم و ئەودا پرسی نەتەوەیی کوردیان کردوە بە کارت بۆ ئەوەی بەرژەوەندیی و کورسییان بپارێزن. دەرک بەوە دەکرێت کە ئەمڕۆ ئەوەی لە باشووری کوردستان بووە بە میلیۆنێر و میلیاردێر، ئەوا سەرانی پارتی و یەکەتیین، کە خاوەن ئۆتێل، مۆڵ، چیا، گرد، باڵەخانە و چاڵە نەوتن. بەدەستهێنانی ئەو سەرمایەیە لە ئەنجامی بەکارهێنانی پرسی نیشتمانیی و نەتەوەیی باشوورییەکان، لەدەستدانی هەلە مێژوویەکان و دزینی سامانی گشتی وڵاتەکە بووە.  
 ڕزگارکردنی کەرکوک لە ساڵی ١٩٩١دا بۆ چەند ڕۆژێک لە نەهامەتی بەولاوە هیچی دیی لێشین نەبوو، جگە لەوەی گەلێک پێشمەرگەی دێرین کە لە تەمەنی گوڵدا بوون شەهید بوون و هۆکاری سەرەکیی کۆڕەو بوو. ئەو کات ئەمریکا دژ بەو هەڵوێستە بوو، نەیدەویست ئیران ڕابەرایەتی عیراق بکات، لەبەرئەوە دەستی سەدامیی ئاوەڵە کرد و هێڕشێکی بەربڵاوی بۆ باشووری کوردستان ئەنجام دا. فەرەیدون عەبدولقادر لە پەڕتووکی "هەڵۆ سوورەکانی قەندیل لاپەڕە ٥٩٤دا ددان بەو ڕاستییەدا دەنێت و دەنووسێت:
 "کەرکوک بووە خاڵی وەرچەرخانی سەلبی لە پرۆسەی ڕاپەڕیندا و ئەمریکاش دەستی هێزە گەمرۆ دراوەکانی ڕژێمی عیراقیان ئاوەڵا کرد، تا بکەوەنە گیانی ڕاپەری و خەڵکی ڕاپەریوی کوردستان!".
سەرانی پدک و ینک بوون کە سنووری جوگرافیایی کوردستانیان لە باشوور تەسک کردەوە و ناویان نا هەرێمی کوردستان. لە  هەولێرەوە بەرەو کەرکوک، لە دوای یەکەم خاڵی پشکنین لەژێر دەسەڵاتی هەرێم دەردەچێت. لە سلێمانیشەوە بەرەو کەرکوک بەهەمان شێوە. ئەو ناوچانە ناوی دابڕاویان لێنراوە. شارۆچکەی دیبەگە کە بە ئوتوموبیل تەنیا ٣٠چرکە لە هەولێر دوورە و مەخموریش بەشێک نین لە هەرێم. لە ڕێگەی هەولێر موسڵ، دهۆک موسڵ بەهەمان شێوە. ئەم سنوورانە بە واژۆیی سەرانی پارتی و یەکێتی کەون و تازە لە کوردستان دابڕێندران!
بەهێزی کەرکوکییەکان لە هاوکێشەکاندا لە ڕێژەی کوردە لە کەرکوک نەک لە بەهێزبوونی سەرانی یەکێتی و پارتی. خۆبەستنەوەی کەرکوکییەکان بە سیاسەتی هەڵە و خەیانتکارانەی سەرانی ئەو دوو پارتە، هۆی سەڕکیین لە نەهامەتییەکانی ئەو شارە و گەیشتنیان بەو ڕۆژەی ئەمڕۆ کە بەبێ سەڵمینەوە خەرمانەیان دەسوتێنن. ڕێگریکردن لەو دۆخە بە شیڕە شیڕی ئەو کەسانە ناکرێت کە تا دوێنی باوکیان لەگەل بەعسییەکانی هەولێر و هەیئەی کەرکوک شەوانە بۆ خواردنەوە لەسەر یەک مێز دادەنیشتن!
لە ٢٠٠٣دا عیراق لە ئەوپەڕی بێهێزیدا بوو، خاوەن سەرخان و ژێرخانێکی دارماو بوو، سوپایەکی هەڵوەشاوە، سنوورێکی ئاواڵای هەبوو، ئەمریکا کە گەورەترین زلهێز بوو لە دنیا دژی بوو، لەم دۆخەدا سەرانی یەکێتی و پارتیی کەرکوکیان هەرزان فڕۆشکرد. ئەو کات عیراق ساڵانیکی زۆری گەرەک بوو بۆ ئەوەی خۆی بێنێتەوە عەیار، لەو کاتە مێژووییە دیاریکراوەدا سەرانی پارتی و یەکێتی بە گالۆن، بە تەنەکە، بە بەرمیل، تەنکەر و بۆری، نەوتی کەرکوکیان دەدزی بۆ دوژمنانی کوردیان ئاودیوی سنوورەکان دەکرد و پارەکەیان لە بنی باخەڵیان دەنا. لە مێژووی دنیادا ڕووینەداوە میللەتێکی ژێردەستی وڵاتداگیرکراو،  بە دەستی نوێنەرانی سامانی نەوتەکەی بە دوژمنانی بدرێت! لە کاتێکدا ئەزموون سەلماندویەتی کە بیرەنەوتی هەر وڵاتێک لە ڕووی ئابووریی، سیاسی و کۆمەڵایەتی و سەپاندنی مەرجە نیشتمانییەکان لەسەر مێزی ووتووێژدا لەگەڵ هێزە دەرەکییەکاندا کارتێکی بەهێز دەبێت بۆ فشار دروستکردن و وەدەستهێنانی دەسکەوتی سیاسی. 
سیاسەتی تەعریب، لە دوای دەسەڵاتی پارتی و یەکێتی زۆر لە زەمانی سەدام سەرکەوتووتر ئەنجام دراوە. سلێمانی، هەولێر و دهۆک، هەنوکە جمەیان دێت لە عەرەب، بگرە لەوانەی کە سەر بە دەزگەی هەواڵگریین، ئەوانەی کۆمپانیای لەشفڕۆشیان دامەزراندوە، ئەوانەی کۆمپانیای گەشتوگوزاریان هەیە، ئەوانەی خانوویان کڕیوە، ئەوانەی ڕێستورانتیان داناوە، ئەوانەی کۆنتڕۆڵی بازاری زێریان کردوە، ئەوانەی لە پشتەوەی میدیای زەبەلاحن تا دەگات بە ژنوژنخوازی و ژیانی کۆمەڵایەتی و بە هەزاران شتی دیی. 
جاران عەرەب بۆ پشو نەیاندەوێرا ڕوو لە  کوردستان بکەن، ئێستا بە ئارەزووی خۆیان تەراتێنیانە، ڕێژەی تەعریب بە دەستی سەرانی پارتی و یەکێتی لە ناوچەکانی هەرێم لە هەڵکشانە و حکومەتی ناوەند و حەشدی هاورێ سەرانی یەکێتی کەرکوک تەعریب دەکەن. لە ئەنجامدا تەنیا کەرکوک نییە کە دۆخی لە مەترسییە، ئەڵبەتە هەرێمیش هەمان دۆخی هەیە و لەچەند ساڵێکی داهاتوودا کارلەکار دەترازێت، هەموو کوردستان بە شێنەیی تەعریب دەکرێت.
ئەمڕۆ شینی دانانی دزێکی دیی جا فەرەیدون عەبدولقادر بێت یان یەکێکی دیی بە پارێزگاری کەرکوک هیچ لەو واقیعە تاڵە ناگۆڕێت کە سەرانی ئەو دوو پارتە و دارودەستەکانیان بەسەر کەرکوک و ناوچە دابڕاوەکانیان هێناوە. تەنیا شتێک دەگۆڕێت کە ئەو دزە سەر بە کام لا دەبێت بۆ ئەوەی چاکتر بۆیانی بدزێت، کۆمپانیای وەهمی تۆمار بکات و دۆلار بەرهەم بهێنێت! لەم ڕووەوەش فەرەیدون خاوەن ئەزموونێکی سەرکەوتووە، بۆیە ئەرسەلان بایز لە وتارێکدا کە لە میدیا کوردییەکان بڵاوبۆتەوە بە شانوباڵی فەرەیدونی میلیۆنێری هاوشێوەی خۆی هەڵدەڵێت! پەندێکی کوردی هەیە دەڵێت: لە ڕێویان پرسی کێ شاهێدتە؟ گوتی کلکم"!
فەرەیدون عەبدولقادر لە لاپەڕە ٥٩٤دا دەنووسێت:
" ڕێگە گرتنی موجاهیدین و ڕژێم لە هێزەکانمان، پەکی ئەو نەخشەیەی خست کە بە نیاز بووین لە پشتەوە بەرە و کەرکوک بڕۆین و یارمەتی هێزەکانی ڕزگار کردنی کەرکوک بدەین".
لە ساڵی ١٩٩١دا لە شەڕەکانی ڕزگارکردنی کەرکوکدا، لە پێشمەرگەی کوڕی هەژاری کەرکوک و ناوچەکانی دیی بترازێت کەس شەهید نەبوو. بەو دوو سێ ڕۆژەی ئازادبوونی کەرکوک، پێشمەرگەکانی بەشداربووی ئەو شەڕانە باسیان کرد و گوتیان: فەرەیدون عەبدولقادر خەریکی شڕەخۆری بوو، هێشتا کەس دەستی نەگەیشتبووە بیرە نەوتەکان، لەبەرئەوە تەنیا مەوادی خانوبەرە بەتایبەتی شیش ئەو کات لە ئیران پارەی باشی دەکرد، لەو دوو سێ ڕۆژەدا فەرەیدون عەبدولقادری ئەندامی سەرکردایەتی و ئەندامی مەکتەبی سیاسی یەکێتی ئەو کات وەک شۆڕەسواری شڕەخۆری هەر خەریکی ئاودیو کردنی شیش بوو بۆ ئیران، بەڵام ئەمڕۆ ئەگەر بکرێت بە پارێزگاری کەرکوک لە بری شیش ئاودیو کردن، ئەوجارە نەوت ئاودیو دەکات. 




(دەنگدراوە: 17 . زۆرباشە: 5/5)