کورتە نامەی شیعریی – بەشی دووەم -

Thursday, 08.22.2019, 8:42

529 بینراوە


گۆمی بیرم، دەشڵەقێنن..
پێنازانن
لەتەك تۆدا.. لە جێژووانم!
***
کە، وشە لێم یاخی دەبێت
ناتوانم وەسفی تۆ بکەم
تەنهام لە خۆم.. نامۆم بە خۆم.
***
کەشتییەوانی، کەشتییەکم
کەناری دەریام.. لێ ونە
چاوەڕوانی، تۆی قیبلەنومام
ئەی.. خانمەکەم.
***
من، حەز ناکەم بێ هیوابم
سوور دەزانم، کە ناهێڵن
بە یەك بگەین.. کەچی گوڵم
هەر چاوەڕێم.
***
ئای چەن خۆشە
رۆژگاری بەهار، من گوڵچنت بم
شەوگاری پایز، دەست لە ملت بم
زستان و هاوێن، چەتری سەرت بم.
***
لەو دەمەی را، کیژێك
کیژێك، کە دەچێت بۆ ژوان
کێ دەزانێت
دڵی لەسەر چەند لێدەدا.. چەند؟؟
***
دڵی کیژ و دڵی کوڕ
لە بۆ ژوانێ..
کەی وەك یەك لێدەدا.. کەی؟؟
***
ئاوێنەی ماڵەکەم
هێندە رەنگی (تۆ )ی گرتوە
بۆ سەیری خۆم
وێنەی (ئەتۆ)ی، تیادەبینم.
***
دوێنێ، کە:
بۆنی بسکی تۆم کرد
بە چوونەوەم..
شووشە عەترەکەی ماڵەوەم
و. ر. د. و. خ. ا. ش. ک. ر. د.
***
قەڵەمەکەم دۆشداماوە
نازانێت، چیتر بنووسێت؟!
زیاتر لەوەی نووسیوێتی:
ئەی
پە
ری.
***
کە:
هەنگ شیلەی گوڵ دەمژێت
نازانم
خۆزگە بە کامیان بخوازم
بە هەنگ ..
یاخود بە گوڵ؟!
***
کەی
ترپەی باران و هاژەی رووبار
دەگەن بە:
خەندە و پێکەنینی تۆ.. کەی؟!
***
هیچ شتێك
هێندەی دوورییت، وەڕسم ناکات
گەر دەتەوێت وەڕس بم
دە، دووربە لێم.
***
لە نێوان زماناندا
سنوور هەیە..
دڵان نا
بۆیە، بە دڵ خۆشمدەوێی
بە زمان نا.
***
ئەمن
چپەی ئیشق و
خوڕەی ئاوم لە لا خۆشە.
ئەتۆش خرینگەخرینگی بازن و
هاڕەی هەیاسە
وەی لە تۆ.. وەی!!
***
وا تێدەگەم، کفریش بکەیت
لەوانەیە، خوا لێت خۆشبێ
دڵی ژنێك زویر بکەیت.. نا.

فەتاح حەسەن
دانیمارك/ ڤالبی
2014



(دەنگدراوە: 0)