خۆپیشاندانەکانی ئێران و خۆرهەڵاتی کوردستان

Saturday, 23/11/2019, 22:18

6950 بینراوە


لە ئێران خومەینی بە گووتاری ئاینی و دامەزراندنی کۆماری ئیسلامی لەساڵی 1979 هاتە مەیدان، بەو هۆیەوە کورد بووە پاڵپشتی بۆ کۆتایهێنان بە ڕژێمی شاهانشاهی پەهلەوی، کەسایەتییە ئاینییەکانی خۆرهەڵاتی کوردستان، پاڵپشتی حکومەتی ئیسلامی ئێرانیان کرد و لەگەڵ دامەزراندنی کۆماری ئیسلامی دا بوون. بەڵام هەر لەگەڵ سەرکەوتنی شۆڕشی و دامەزراندنی کۆماری ئیسلامی، خومەینی کەوتنە پەلاماردانی شار و ناوچەکانی خۆرهەڵاتی کوردستان، و پەراوێزخستن و زیندانیکردنی کەسایەتییە ئاینییەکانی کورد، و ئەنجامدانی چەندین تاوانی جەنگ و کۆمەڵکوژی و بڵاوکردنەوەی چەندین نەحۆشی و ماددەی هۆشبەر و ئەنجامدانی کردەوەی تیرۆری و لە سێدارەدانی گەنج و لاوەکانی کورد. کورد لە بری ئەوەی ئەوگۆڕانکارییە مێژوویەی لەناوچوونی ڕژێمی پەهلەوی بە هەل بزانێت بۆ بەدەستهێنانی مافەڕەواکانی بە ناوی ئاینەوە بووە پاڵپشتی کۆماری ئیسلامی، وەڵامی ئەو شۆڕشە بۆ پاڵپشتی کردنی کورد لێی، ڕاگەیاندنی جیهاد بوو لە 19/8/1979 بۆ کاولکاری خۆرهەڵاتی کوردستان و لە ناوبردنی کەسایەتی و پارت و ڕێکخراوە کوردییەکان، و دواجاریش هەڵگیرساندی شەڕی کورد کوژی و برا کوژی لەنێو حیزبە کوردییەکاندا.
ئاشكرایە كۆماری ئیسلامی شیعەی ئێران ڕژێمێكی دیكتاتۆری تۆتالیتاری دینییە، بە جۆرێك لە ماوەی (40)ساڵدا شوێنێكی بۆ ئازادی سیاسی و نەتەوەیی و دیموكراتی لە ئێران دا نەهێشتۆتەوە، ڕژێمێكی دیكتاتۆرێكی كەم وێنەیە بە پشت بەستن بە پاسدار و بەسیج و جاش و ئیتلاعات، بە ئارەزووی خۆی و بێ لێپرسینەوە دەستی لە تەواوی كاروبارەكانی سیاسەتی ناوەوە و دەرەوەی ووڵات وەردەدات، بەهەمان شێوەی ڕژێمی شاهانشاهی پەهلەوی پێشوو. كۆماری ئیسلامی خۆی بە سێبەری خودا دەزانێ بێ ئەوەی لەبەردەم هیچ كەس و یاسایەك دا بەرپرسیاربێت، كەمترین ناڕەزایی بە تووندترین شێوە بە ناوی محارەبەی خودا و دەوڵەتەوە سەركوت دەكرێت، چالاكانی سیاسی و مەدەنی لە سێدارە دەدات. لە ئێران دا دەرفەتێك بۆ پێكەوەژیان و ژیانێكی پلۆڕاڵیی سیاسی و فرە حیزبی نەماوە، ئازادی هەڵبژاردن و سیاسی و ئاینی و چاپەمەنی سنورداركراوە. تێكدانی لایەنی كۆمەڵایەتی و سەپاندنی باجی زۆر و خراپ بوونی بارودۆخی ئابوری ووڵات و خستنە خزمەتی هەژموون و فراوانخوازییەكانی شیعەوە،و لەلایەكی دیكەوە ئابوری ووڵات لە دەستی ڕوحانییە بونیادگەرا شیعییەكاندایە، هەروەها سیاسەتی دژایەتیكردنی مەزهەبی سونی و بەزۆر سەپاندنی مەزهەبی شیعە بە سەر ئاین و ئاینزاكانی دیكەدا، هەروەها بڵاوبونەوەی گەندەڵی ئیداری، دزیی، بەرتیل خۆریی، هەژاریی، بڵاوبونەوەی سێكس فرۆشی و بەدڕەوشتی و بەكارهێنانی ماددەی موخەدیر و خواردنەوە كهولییەكان، هەروەها سەپاندی كەلتوری فارسی بەسەر نەتەوەكانی دیكەدا بە تایبەتی نەتەوەی كورد و هەوڵدان بۆ پاكتاوی ڕەگەزی و سڕینەوەی نەتەوە غەیرە فارسەكاندا، هەر داواكارییەكی نەتەوەیی و ئازادیخوازی بە زەبری ئاگر و ئاسن وەڵام دەدرێتەوە.

هەموو ئەم فاكتەرانە و ململانێی ئێران لەگەڵ ئەمریكا و ئیسڕائیل، كە گەمارۆیەكی قورسی ئابوری و سیاسییان خستۆتە سەر ئێران و ئێرانیان دووچاری قەیرانێكی قوڵی سیاسی و ئابوری كردۆتەوە لە هەموو ئەو ناوچانەدا كە ئێران بەرژەوەندی تێدا هەیە، ئەمە لە كاتێكدا ئەمریكا لە ڕێكەوتننامەی ئەتۆمی لەگەڵ ئێران كشاوەتەوە.
لەبەر ئەم هۆكارانە و چەند هۆكارێكی دیكە گۆڕانكارییەكی گەورەی مێژوویی لە ئێران دا ڕوو دەدات لە داهاتوویەکی نزیکدا.

پرسیارەكە ئەوەیە، ئایا كورد دەتوانێت ئەو گۆڕانكارییە مێژووییە لە پێناو مافە نەتەوەییەكانی ووا قازانج بكات و خۆبەڕێوەبەری بە دەست بێنێت؟ یان وەكو هەموو ڕووداوە مێژووییەكانی ڕابردوو فارس دەبێتەوە دەسەڵاتدار و كوردیش لەبەر خۆخۆری و خۆبەبچوكزان و ململانێ و شەڕی حیزبی و خێڵاكی بە ژێر دەستی دەمێنێتەوە؟ ئەم پرسیارە ڕۆژگار و داهاتوو وەڵامی دەداتەوە، ئەگەرچی حیزبی كۆمەڵەی زەحمەتكێشانی كوردستانی ئێران بە هەموو باڵەكانییەوە، حیزبی دیموكراتی كوردستانی ئێران بە هەموو باڵەكانییەوە لە خەباتی سیاسی و چەكداری بە كوم و كورتییە چارەسەرنەكراوەكانیانەوە بەردەوامن!.

هەروەها (پارتی ژیانی ئازاد كوردستان - پژاك) نزیك لە پەكەكە چەند ساڵیكە لە هەوڵی ڕێكخستنی كۆمەڵگا و تێكۆشانی سیاسی و گەریلایی دایە، لەلایەكی دیكەوە چەند ساڵێك لەمەوبەر (پژاك) سیستەمی "كۆمەڵگای دیموكراتیك و ئازادی خۆرهەڵات" كۆدار"ی ڕاگەیاند، نەخشەڕێگای چارەسەری دیموكراتی بۆ ئێران و خۆرهەڵاتی كوردستان. بۆ چارەسەركردنی كێشە ئابووریی، سیاسیی و كەلتوری و ئاینی و مەزهەبی و كۆمەڵایەتییەكانی ئێران و خۆرهەڵاتی كوردستانە. نەخشەڕێگاكە لەسەر بنەمای كۆنفیدرالیزمی دیموكراتی و برایەتی و ئازادیی گەلانە لەدژی لایەنگرانی دەستێوەردانی دەرەكی لە دۆخی ئێراندا پشتی بە هێزی گەل بەستووە. لێرەدا دەپرسین ئایا ئەم سیستەمە وەڵامە بۆ داخوازییەكانی كۆمەڵگای خۆرهەڵاتی كوردستان؟.

ئایا ئەم خۆپشاندانانە دەتوانێت ڕژێمی ئیسلامی شیعی بگۆڕێت بە ڕژێمێکی دیموکراتی؟ یان بە سوریا بوون و عێراق بوونی لێدەکەوێتەوە؟ ئایا کورد لە خۆرهەڵاتی کوردستان ئامادەکاریکردووە و دەتوانێت بە هاوشێوەی خۆرئاوای کوردستان هێڵی سێیەم هەڵبژێرێت و خۆسەری دابمەزرێنێت و بەرخۆدان بکات؟ ئایا بەڕاستی ئەم خۆپیشاندانە بنەما و سەرەتای شۆڕشن؟ یان زیاتر حکومەتی ئێران دیکتاتۆرتر و خوێن ڕێژتر دەبێت؟ یان بەڕاست ئەم خۆپیشاندانانە هەر ئەنجامێکی دەبێت؟ دیسان داهاتوو وەڵامی ئەو پرسیارانە و دەیان پرسیاری دیکە دەداتەوە.

ئومید ناسح جیهانی

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە