سۆزانیزم و ئیمپریالیزم

Saturday, 02.08.2020, 20:21

1453 بینراوە


ئەو وشەی (زاراوە) یەی سۆزانیزم، دامتاشیوە لەبریی زاراوەی سۆزانێتیی یا لەشفرۆشیی، بۆ دیارخستنی خاڵە هاوبەش و لێکچووەکانی نێوان سۆزانییەک و دەوڵەتێکی کۆڵۆنیالیزم ، هەروەها خاڵە ناجۆرەکانی نێوانیان. سۆزانی و لەشفرۆشەکان دوجۆرن ، شێوەى کارو پیشەکەشیان چونیەک نییە.

جۆری یەکەم:

 پێداویستییەکانی ژیان یا کەوتنە داوێکەوە یا جۆرەها  هۆکارى دیکە، بژاردەیەکی لەبەردەمدا ناهێڵنەوە جگە لەوەی یەکجار یا چەند جارێک جەستەی دەخاتە بەردەست کەسێکی دیاریکراو یا هەرکەسێکی دیکە، بەڵام نیازی ئەوەی نییە لەو کارەدا بەردەوام بێت و بیکاتە پیشە، بەردەوامیش نابێت و مۆڕاڵ و سەربەرزیی و شکۆ و هەست و سۆزی مرۆڤدۆستیشی لەدەست نەداوە، بەڵکو وەک دیلێکی جەنگ رەچاوی بارودۆخی دیلێتی دەکات بەدەست(بارودۆخەکەوە) دوژمنەوە.

جۆری دووەم:

لەشفرۆشێکی پیشەگەرە، شارەزایی لەکارەکەیدا هەیەو بگرە پسپوریشە تێیدا، هەمو کڕیارەکان وەک یەک نابینێت و بەپێی داواکارییەکانی ئەوان و ئەو نرخەی دەیدەن خزمەتیان دەکات، مۆراڵ وهەست و سۆزی مرۆڤدۆستیی  وسەربەرزیی  لە فرهەنگیدا نییەو هیچ مانایەکیان نەماوە و قسەی قۆڕ و بێواتان.زۆر ئاساییە تف لە روی ئەو کڕیارە بکات چەند خولەکێک پێشتر سەرتاپای لەشی پێفرۆشتووە، تێکەڵاوی کاری سیخوڕی و تیرۆریش دەبێت و دەبێتە بۆسەیەکی(کەمین) چاک بۆ جۆرەها کاری تیرۆر و رفاندن و هەواڵگریی و بەڵگە دروستکردن بە دەنگ ورەنگ و ڤیدیۆ بۆ هەڕەشەکردن یا ناوزڕاندنی کەسانێکی دیاریکراو بۆ بەرژەوەندی  لایەنێک یا سەریان بە فەتارەت بدات و مێشیش میوانی نییە. دۆستایەتی بەردەوام ناکات،ئەمڕۆ دۆستە و سبەی نەناس ، ئەمڕۆ لە هەموان لەپێشتری ، سبەی دەتکاتە نیچیر بۆ تاوانکارێک.. ئیمپریالیزمیش کە دەوڵەتە زلهێزەکانن و بۆ بەرژەوەندی خۆیان هەر هەمو تاوانێک دەکەن و لەلایەنەکانی دۆستایەتیی و رەوشتەوە لە بێڕەوشتترین سۆزانی  بێڕەوشتترن. ئەمەریکا، بەریتانیا،روسیا، فەرەنسا و ئەڵەمانیا، بەجۆرێک کوردیان فوتێکرد،زۆر لەقەبارەی خۆی گەورەتر.ئاخر کوردی داماویان هەڵنا، کوڕەئازاکەی خۆرهەڵاتی ناوەند لە بری هەمو جیهان شەڕی داعش و گروپە تیرۆریستەکان دەکات، فویدە و هاوکاریی بکە لە هەرێم ، لەکۆبانێ، لەعفرین و مەنبەج بۆ راگرتنی باڵانس، باڵانسی نێوان هێزەکانیان وگەیشتن بەئامانجە چەپەڵەکانیان و دابەشکردنی دەستکەوتەکان و شڵپێکی تەڕیش دەدەن بە قونی (کوڕە ئازاکە)دا کە لە بری هەموان شەڕی رێکخراوی تیرۆریستیی داعش و گروپەچەکدارەکانی دیکەی دەکرد، ئەوەتا دەبینین لە باشور و رۆژئاوا ئاویان لە ئاشیانی کورد بڕی و شەڕی نهێنی و ئاشکراشیان بەرامبەر ئێران لەماڵی کورد دەکەن و ئەوەندەی دیکە قوڕدەکەن بەسەر کوردی قوڕ و چڵپاوی مێژو بەسەر. جانتای دیپلۆماتکارانی زلهێزەکان بپشکنە، وشەیەک نادۆزیتەوە کە واتای راستینەی نێو دێڕەکانی لە بەرژەوەندی بەدەر بێت، ئیتر ئازادی و دیموکراسی و مافی مرۆڤ و مافەکانی گەلانی چەوساوە و بندەست تەنها چاوبەست و خەڵەتاندنی گەلانی ساویلکەو خۆشباوەڕ و دوژمن نەناسی وەک گەلی کوردە، کە پەند و ئامۆژگاری لەرابوردو وەرناگرێت و تاقیکردنەوەکان دوبارەو سێبارەو دەبارە و هەزاربارە دەکاتەوە و کارەسات و کاولکاریی و ماڵوێرانی بەسەر خۆیدا دەهێنێت و وەک میزی حوشتر بەرەو پاش دەگەڕێتەوە. هەمو دەبینین بەر لە ریفراندۆم و ١٦ی ئۆکتۆبەر هەرێمی کوردستان لە چ ئاستێکدا بو، ئێستاش هەرێم بە گشتیی و کەرکوک و ناوچەکانی دەرەوەی سنوری هەریم بە تایبەتی لە چ ئاستێکدان. دەڵێن داهێنەری یاری شەترەنج  زەردەشتە و ئەو یاری یەی بۆ (ویشتاسپ) ی شای کەیانەکان داهێنا، بەڵام من دەڵێم ئەو کەسەی یاری (مار و پەیژە) شی داهێنا هەر کورد بووە و گەرەکی بو بەکوردی و بەکورتی ئاوێنەی بەختی خۆیان پێشان بدات ، بەڵام ئەویش رەنجی بە باچو.




(دەنگدراوە: 5 . زۆرباشە: 5/5)