ئەو کاتەی مریشک هێلکەی نەعامە دەکات

Thursday, 01/10/2020, 19:16

7737 بینراوە

ئێمە ناتوانین کە سایەتی کەسەکان تەنیا لە ڕوخساریاندا بخوێنینەوە

ماوەیەکە لە نیشتمان لە ناو ئەو هەموو لەشکرکێشی و بۆردمان و هەرەسەدا، کەسانێک هاتوون لەڕێگەی کتێبێکەوە مێژوو بە ڵنگەو قوچی دەگێڕنەوە و خۆیان لێبۆتە "جیۆگی ژۆکۆف"ی یەکێتی سۆڤیەت، باسی قارەمانێتیەک دەکات کە لە خەیاڵی خۆیدا دۆنکیشۆتێکە وێنەی نییە، کە لەڕێگەی ڕووداوی میتەوە نمایش دەکرێت.
جیاوازی نێوان پارتیی و یەکێتیی نییە، ئەوەی جیاوازی دەخاتە نێوانیانەوە، ئەوانەن کە نە مێژوویان خوێندۆتەوە، نە لە سیاسەت دەزانن، نە بەرپرس و سەرکردەکانیان دەناسن کە وەک داگیگرکەران خۆیان لەو نیشتیمانەدا داکوتاوە.
ئەوانەی لەسەر ئەم حیزبانە شەڕ دەکەن و پەلاماری یەکتر دەدەن، ئەوانەن کە نەزانن یان کۆیلەو هەلپەرستن لەبچوکی خۆیاندا ئاوا ڕەفتار دەکەن، نەک تەنیا پارتی و یەکێتی، بەڵکو هەموو حیزبەکانی تریش بەهەمان شێوە کۆپیکراوی پارتیی و یەکێتین، وەکو ئەرکێکی سیخوڕی و خزمەت بە داگیرکەران لەسەر هەمان بەرنامەی خیانەت و ناپاکی دەڕۆن کە دوژمانی کورد لە رێگای پارتیی و یەکێتییەوە نەخشەڕێگەیان بۆ داڕشتوون.
بزووتنەوەی گۆڕان بزووتنەوەی مارێکی سڕ و کۆپی جەستەی یەکێتییە، کە رۆحی پارتیی و کاری هەواڵگری پاراستن کراوە بە بەریدا.من پێم وانییە نەوشیروان مستەفا لە خۆڕا، یان لە نەزانینەوە بێت، کە ئەو هەموو کەسەی لە دوای خۆی بوونە پارتیی و یان لە ناو گۆڕاندا لیکاوی زەردیان لە دەم دێتە دەرێ، نەیناسیبن و بە رێکەوت داینابن.هەموو پێشوەخت بە پلان ئەم کەسانە هەڵبژێردراون، بۆ ئەوەی لەدوای خۆی منداڵەکانی ئاسودانە لەسەر ئەو میراتی داگیرکاراو و زەوتکراوی ئەم نیشتیمانە دانیشن.
ئەگەر بە لیستی ناوی گۆڕانبازەکانی ناو نەوشیرواندا گوزەر بکەین، لە ٨٠%ی بەرپرسەکانی ناو گۆڕان ئەمڕۆ بوونەتە پارتیی، یان لە ژێرەوە کاریان بۆی کردووە، ئەوەی ماوە لە قسە و لێدوانەکانیاندا لیکاوی زەردی پارتییبوون لە دەمیان دێتە دەرێ، لە نمونەی هۆشیار عومەر.
ئەمە داڕزانی رەوشت و ئەخلاقە کە ئەو بەرپرسانەی شاخ لەگەڵ خۆیاندا هێنایانە ناو شار و دەسەڵاتیان پێ بەڕیوەبرد و خەڵکیان بەرەو خیانەت و ناپاکیی و بەدرەوشتی پەروەردە کرد.
بەڕیزێک پێش ماوەیەک باسی لە کەسێتی نەوشیروان کرد، وتی نەوشیروان مستەفا لە بواری نووسیندا هەرچەندە لە هەموو بەرپرسەکانی کورد بە تواناتر و دەسترەنگینتر بووە ، بەڵام ئەم کەسە تەنیا لە ناو میللەتێکی نەزان و تێنەگەێشتوودا وەک سیاسیی دەناسرێت، دەنا بە پێوەری زانستیی و ئەکادیمیانە بێت، جگە لە ئەزمونی زۆری کاری حیزبایەتی نەوشیروان کەسێکی لێهاتوو نەبووە، کە دەبوو زۆر لەوە بەکارامەتر و زیرەکتر بوایە، کەسی سیاسیی هەموو بەیانییەک کە لە خەو هەڵدەستێت دەبێت پلانی هەبێت سیاسەت و فیکری دەوڵەمەند بێت، هەمیشە پلانی گۆڕانکاریی و پێشنیاریی بەرنامەی داهاتووی حیزبەکەی هەبێت. دەبوو نەوشیروان عەقڵی بەڕێوەبردنی لە ئاستی بیرکردنەوەیدا بوایە، نەوشیروان هیچی لەمانە پێ نەبوو، لە شاخ خەریکی پلاندانان بوو بۆ کوشتنی نەیارانی جەلالیزم، یان سوکایەتیی و گاڵتەی پێکردوون، هەمیشە پێشمەرگەی لە لا سووک بووە و قسەی رەقی داوە بەڕوویاندا کە رەخنەیان لێی گرتووە.بۆیە بزووتنەوەکەشی بەو ئاڕاستەیە برد، گوێی بە چارەنووس و پاشەڕۆژی گۆڕانیش نەدا.
ئەوانەی کە ئەمڕۆ لە ناو گۆڕانەوە دەچن و دەبنە پارتیی، هەموو بەرهەمی عەقڵی نەوشیروان و جەلالییزمە، عەقڵی ئەوانیش ئاکامی خیانەت و خزمەتی دوژمن بووە. ئەگەر بەپلانیش ئەوەیان نەکردبێت، ئەوە ئەنجامی ئەو کردەوانەیان ئەوەی کردوە. دواجار ئەگەر مێژوو بە هەڵەش بنووسرێتەوە، بەڵام بە هەڵە ناخوێنرێتەوە و لێکدانەوەی بۆ ناکرێ، با ئەم بەرپرسانەش بە ئارەزووی خۆیان چیان بوێت بینووسنەوە. مێژوو ئەو چەند دێڕە نییە، کە ئەمانە یادەوەریی خۆیان دەگێڕنەوە، بەڵکو ئەو رەفتار و کەسایەتییەی خۆیانە کە هەڵسوکەوتی پێدەکەن، ئەوە مێژوویانە کە ئێستا هەموومان بە روونی دەیبینین چیان لەم نیشتیمانە کردووە. مەلابەختیار هەرچییەک بنووسێتەوە، خوێنەر هەر لە دیتنی ناوەکەی خۆیەوە هەڵسەنگاندن بۆ راستییەکان دەکات، نەک مەلا بەختیار، بەڵکو نەوشیروان، تالەبانی و هەموو بەرپرسەکانی تریش چی بنووسن، ئەوەندە ناچننەوە کە خۆیان دڵی مێژووی خۆیانی پێ خۆش بکەن.خائین هەر خائینە، پێوەری خیانەت بە کردار و بەرهەمی بەڕیوەبردنیان دەردەکەوێت.سی ساڵ کەم نییە، کە کەس نەتوانێت ئەمانە بناسێت و لەئەنجامی ئەم هەموو هەرەسە نەڕوانێت.