هه‌ر پێنج حزبكه‌ بۆ نابن به ‌پارتی؟

Wednesday, 14/10/2020, 22:39

6733 بینراوە


ئه‌وه‌تا ده‌بینین كه‌ پارتی بۆخۆی بۆته‌ حزبی یه‌كه‌می باشوور، به‌كه‌یفی خۆی یاری به‌ حزبه‌كانی دیكه‌ ده‌كات و، وه‌ك له‌یتسۆك و بوكه‌ڵه‌ گه‌مه‌یان پێده‌كات، تۆ ته‌ماشا نێچیر به‌خێرێ دوو جێگری مل پان و كه‌لله‌ زلی هه‌یه‌ ( شێخ ڤیاگرا و مچه‌ی سه‌ی قایه‌ر) به‌ڵام حسابی سه‌لكه‌ پیازێكیان بۆناكات ،به‌كه‌یفی خۆی ده‌چێت به‌ملا و لادا،وه‌ك بینیمان چه‌ندین جار سه‌ردانی به‌غدای كردوه‌، چووه‌ بۆ توركیا ،وا ئێستاكه‌ش له‌كوه‌یته‌، به‌ڵام به‌ناو دوو جێگره‌كه‌ی كه‌ یه‌كێتی و گۆڕانن ئاگایان له‌ مه‌حموی بێ زه‌وا نی یه‌ هه‌رنازانن بۆچی چووه‌ و، چی ده‌كات وئامانج و مه‌به‌ستی سه‌ردانه‌كه‌ی چی یه‌؟، یان مه‌سروری كوڕی مه‌سعود كه‌ به‌ناو سه‌رۆكی حكومه‌ته‌، دونیایه‌ك وه‌زیر و مه‌زیر و راوێژكاری له‌ده‌وری خۆی كۆكردۆته‌وه‌، كه‌چی هه‌موو وه‌زیره‌كان و ئه‌نجومه‌نه‌كه‌ لای ئه‌و نرخی تاكێك كه‌وشیان نی یه‌، هه‌ر بڕیارێك كه‌له‌پشتی لاپتۆپه‌كه‌یه‌وه‌ ده‌ری ئه‌كات، بۆچوون و میزاجی كه‌سی خۆیه‌تی و ،یه‌ك پرس و را به‌كه‌س ناكات و ره‌ئی هیچ كامێكی قبوڵ نی یه‌، خۆ دوێنێ بوو كاتێك مه‌سرور تاك لایه‌نه‌ بڕیاریدا كه‌ مووچه‌ی فه‌رمانبه‌ران ببڕێت و كه‌م بكرێته‌وه‌، یه‌كێتی و قوباده‌كه‌ی كردیان به‌هه‌را و هاشو هووش، هه‌روه‌ها گۆڕانه‌ به‌رژه‌وه‌ند خوازه‌كه‌ش فه‌رمووی كه‌ ده‌ستكاریكردنی مووچه‌ی فه‌رمانبه‌ران هێڵی سووره‌ و قبوڵ كراو نی یه‌؟، به‌ڵام كاتێك مه‌سرور ئه‌و هات و هاواره‌ی بیسته‌وه‌ په‌یامی بۆ هه‌ردوولا یه‌كێتی وگۆڕان نارد: كه‌ ئه‌وه‌ بڕیاری كۆتایی یه‌و هه‌ر حزب و لایه‌نێكیش پێی رازی نی یه‌ ئه‌توانێت بفه‌رموێت له‌ حكومه‌ت بچێته‌ ده‌ره‌وه‌، په‌رله‌مانه‌كه‌ش كه‌ رێواس خانم سه‌رۆكایه‌تی ئه‌كات، ته‌نها و ته‌نها كارتۆنی یه‌،چونكه‌ هه‌ر پێشنیاز و بڕیارێك كه‌ بیه‌وێت بیخاته‌ به‌رنامه‌ی كاره‌وه‌ ئه‌بێت ره‌زامه‌ندی جێگرو وسكرتێره‌كه‌ی(هێمن هه‌ورامی، مونا قاوه‌چی) وه‌ربگرێت، ئه‌ودووانه‌ش هه‌ردووكیان پارتین و رێگه‌ ناده‌ن هیچ شتێك له‌ دژی پارتی ،له‌په‌رله‌مان ئه‌نجام بدرێت، رێواسی سه‌رۆك به‌جۆرێك بێ ده‌سه‌ڵات و ده‌ست پێ سپی یه‌ ،كاتێك ویستی له‌دژی پارێز به‌ندی سۆران عومه‌ر هه‌ڵوێستی هه‌بێت ، كه‌وته‌ خۆ نواندن به‌ڵام هه‌رزوو پۆرتی شكاو چۆوه‌ قاوغه‌كه‌ی خۆی.
هه‌رچی تایبه‌تیشه‌ به‌ بازرگانی و داهات و باج و خه‌راج ئه‌وه‌ هه‌مووی هه‌ر له‌بن ده‌ستی پارتیدایه‌،هاوڕێ یه‌كم له‌ به‌ڕێوه‌به‌رایه‌تی هاتوچۆی سلێمانی پله‌ داره‌ ، ئه‌ڵێت رۆژانه‌ به‌ سه‌دان ملیۆن دینارداهات كۆده‌كه‌ینه‌وه‌، به‌ڵام پێش سه‌عات 12ی نیوه‌ڕۆ ئۆتۆمبیلێك دێت و ئه‌و پاره‌یه‌ ده‌بات كه‌ كه‌سمان بۆمان نی یه‌ بپرسین بۆكوێ ده‌چێت و چی لێدێت،؟ له‌وه‌ش زیاتر ده‌ڵێت كاتێك بمانه‌وێت پێداویستی رۆژانه‌ بۆ فه‌رمانگه‌مان بكڕین،بۆمان نی یه‌ یه‌ك دینار له‌و پاره‌یه‌ خه‌رج بكه‌ین، ئه‌بێت نووسراو بۆ سه‌رو خۆمان بكه‌ین ئه‌وجا ره‌زامه‌ند ده‌بن، له‌وه‌ش زیاتر پاڵاوگه‌ی بازیان كه‌له‌سنوری یه‌كێتیدایه‌، نه‌وته‌كه‌ی له‌ وسنوره‌وه‌ بۆدێت بۆپاڵاوتن، به‌ڵام داهاته‌كه‌ی ده‌چێته‌وه‌ هه‌ولێر و ئه‌وان بۆیان هه‌یه‌ خه‌رجی بكه‌ن. ویستگه‌ی غازه‌كه‌ی چه‌مچه‌ماڵ و ته‌واوی داهاتی فه‌رمانگه‌كان به‌هه‌مان شێوه‌یه‌، به‌بێ ئه‌وه‌ی یه‌كێتی یان گۆڕان كه‌ پارێزگاری سلێمانی سه‌ر به‌گۆڕانه‌ زاتی ئه‌وه‌ بكه‌ن هیچ بڵێن، بۆنموونه‌ به‌داهاتی (هاتوچۆ، گومرك ،باج،شاره‌وانی،) ئه‌توانرێت مانگانه‌ نیوه‌ی مووچه‌ی فه‌رمانبه‌رانی شاری سلێمانی پێبدرێت،به‌ڵام بۆیان نی یه‌ هیچ ده‌ستكاری بكه‌ن، ته‌نانه‌ت پارێزگاریش ناوێرێت ده‌ستكاری یه‌ك فلسی بكات
له‌بواری سیاسیشدا ئه‌وه‌تا به‌كه‌یفی خۆی داعش دێنێت، له‌گه‌ڵ حكومه‌تی به‌غدا رێك ده‌كه‌وێت، له‌گه‌ڵ توركیا پرۆتۆكۆلی لێدانی په‌كه‌كه‌ واژو ده‌كات، به‌بێ ئه‌وه‌ی هیچ حساب و رێزێك بۆ یه‌ك تاقه‌ حزب دابنێت و پرسه‌ گورگانه‌یه‌كیان پێبكات، ئه‌مه‌ش وایكردوه‌ كه‌ پارتی زۆرتر و زیاتر ببێت به‌كه‌ڵه‌گای گۆڕه‌پانه‌كه‌ و حزبه‌كانی دیكه‌ش ته‌واو سوو ك و چروك بێ قیمه‌ت بكات.
به‌بڕوای من باشترین و چاكترین كارێك بۆ ئه‌وڕۆ كه‌ ئه‌و حزبانه‌ بیكه‌ن، شتێكی مه‌علوم به‌ڵگه‌ نه‌ویسته‌ له‌ئاست پارتی وده‌سه‌ڵاته‌كه‌یدا هیچیان بۆناكرێت، به‌قسه‌ی من ده‌كه‌ن بارگه‌ و بنه‌ و كه‌پره‌كانیان بپێچنه‌وه‌، بیل جومله‌ بچنه‌ ناوپارتی، له‌ژێر سایه‌ی پارتیدا هه‌رلایه‌نێكیان وه‌ك لق یان ناوچه‌یه‌ك هه‌ڵسو كه‌وت بكات و، به‌سه‌ر هه‌ردوو ته‌كه‌توله‌كه‌ی نێچیر و مه‌سرور دابه‌ش ببن. ره‌نگبێت ئه‌وكاته‌ تۆزێك رێز و نرخ وقیمه‌ت بۆخۆیان بگێڕنه‌وه‌، ئێمه‌ش له‌ده‌ست فره‌ حزبی و هاوسه‌رۆكی و چی و چی رزگارمان ده‌بێت، له‌بری ئه‌وه‌ی دوعا و ره‌حمه‌ت بۆپێنج حزب بنێرین هه‌مووی له‌پارتیدا چڕ ده‌كه‌ینه‌وه‌.

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە