وانه‌ له‌ هه‌ڵه‌كان وه‌رناگرین!

Thursday, 14/01/2021, 8:43

8242 بینراوە


هه‌رێمی كوردستان باشترین زه‌مینه‌یه‌ بۆ كۆكردنه‌وه‌ی پاره‌ له‌خه‌ڵكی به‌ناوی پڕۆژه‌ و كۆمپانیای جۆراوجۆره‌وه‌، پاش كۆكردنه‌وه‌ی داهاتێكی زۆر خاوه‌نی پڕۆژه‌ و كۆمپانیا ساخته‌كان مایه‌پوچ بونی خۆیان ڕاده‌گه‌یه‌نن، ئه‌ویش له‌به‌ر چه‌ند هۆكارێكه‌ كه‌ ده‌كه‌ونه‌ داوی ئه‌و خه‌ڵكه‌ چاتوڵبازه‌وه‌، سه‌ره‌تا زۆرێك له‌ خه‌ڵكه‌كه‌ نه‌ پابه‌ندی ئاینن و نه‌ له‌یاسا تێگه‌شتون،  ئه‌وانه‌ ده‌یانه‌وێت ده‌وڵه‌مه‌ندببن ئیتر گوێیان لێ نیه‌ گه‌ر به‌ حه‌رامی و نایاسایش بووه‌، پاشان زۆرێك له‌خه‌ڵكی باجی چاولێگه‌ری ئه‌وانیترده‌ده‌ن.
له‌ساڵانی ڕابردوودا ده‌یان پڕۆژه‌ و كۆمپانیا و كه‌سایه‌تی له‌وجۆره‌ سه‌ریان هه‌ڵدا و خه‌ڵكێكی زۆریان لێ كۆبونه‌وه‌ و پاره‌ مۆڵ و خه‌وتوه‌كانی خۆیان خسته‌ ده‌ستی ئه‌و كۆمپانیا و پڕۆژ و كه‌سایه‌تیه‌ جۆراوجۆرانه‌وه‌ و له‌ كۆتایدا به‌ ده‌ستی به‌تاڵ لێی ده‌رچون، خاوه‌ن پڕۆژه‌كانیش یان هه‌ڵهاتن و وڵاتیان جێهێڵاوه‌ و یان مایه‌پوچ بونی خۆیان ڕه‌گه‌یاندوه‌ و خۆیان ته‌سلیمی یاسا كردووه‌، پڕۆژه‌ی خاوه‌ن پشكیش هه‌یه‌ هێشتا له‌كاردایه‌، به‌ڵام بێجگه‌ له‌ خاوه‌ن پڕۆژه‌كه‌ كه‌ سودمه‌ندی یه‌كه‌می پڕۆژه‌كه‌یه‌ هه‌موو خاوه‌ن پشكه‌كان نه‌ مایه‌كه‌یان دیاره‌ نه‌قازانج.
هه‌موو ئه‌وانه‌ش كه‌ زه‌ره‌ر و زیان ده‌كه‌ن له‌ كۆتایدا په‌ناده‌به‌نه‌وه‌ بۆ یاسا بۆ وه‌رگرتنه‌وه‌ی مافه‌كانیان له‌ كاتێكدا وه‌ك له‌سه‌ره‌تاوه‌ گوتمان كاره‌كانیان نه‌ شه‌رعی نه‌ یاساییه‌، به‌داخه‌وه‌ زۆرێك له‌وانه‌ كه‌سانی ڕۆشنبیر و خوێنده‌وار و خاوه‌ن بڕوانامه‌ و ته‌نانه‌ت كه‌سانێكیشی تێدایه‌ كه‌ پابه‌ندی ئاینن!
بۆنمونه‌ له‌كێشه‌ ئاڵۆزه‌كه‌ی سلێمان هه‌ڵشۆیدا پۆلیس ده‌ڵێت له‌كۆی هه‌زار و سه‌دوو یازده‌ سكاڵا ته‌نیا یه‌ك سكاڵایان یاساییه‌، ئه‌ویتری هه‌رهه‌موی نایاساییه‌! واته‌ له‌كۆی ئه‌و هه‌مووسكاڵایه‌ ته‌نیا یه‌ك سكاڵا ده‌توانێت له‌دادگا داوای مافی خۆی بكات و داواكه‌ی بباته‌وه‌، ئه‌ی ئه‌وانیتر چۆن و له‌كێ و له‌كوێ داوای مافی خۆیان بكه‌نه‌وه‌؟
 له‌وبڕوایه‌دام پاش ئه‌و هه‌موو كاره‌ساته‌ هێشتا خه‌ڵكانێك هه‌ن له‌ داهاتودا بكه‌ونه‌ داوی جۆراوجۆررى تره‌وه‌! چونكه‌ ئێمه‌ وانه‌ له‌هه‌ڵه‌كانی ڕابردومان وه‌رناگرین.

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە