ئەگەر خوێنەرانى ئازیز پشودرێژ بن لە میانەى ئەم نووسینەدا بۆیان دەرئەکەوێت کە بڕینەوەى درەختى کوردستان وێرانکردنى دارستانەکەى و دزین و بەتاڵانبردنى دارەکەى چ پەیوەندیەکى لەگەڵ مەنهۆڵ دزیندا هەیە، هەرچەند خوێنەر ووشەى مەنهۆڵى بیست یان خوێندیەوە یەکسەر بیرى بۆحیزبە زێراب ئاساکانى هەرێم ئەچێت کە ٣٠ ساڵە بۆگەنیان بەسەر خەڵکى کوردستاندا ئەچێت، یان بیریان بۆ پەڕلەمان و مەنهۆڵ ئەچێت و ئەو سەرکەوتنە زەبەلاحەى حیزبى گۆڕان و خەباتى پەڕلەمانیان لەیاد ناچێت لە گۆڕینى سیستەمى حوکمڕانى هەرێمەوە بۆ گۆڕینى سەرە مەنهۆڵ. 

 ئەم نوسینە دوور و نزیک هیچ پەیوەندیەکى بەهاش وهوشى پارتیەوە نیە، کە هەندێک لەپاتاڵەکانیان وشەى (داڕبرین) لە ڕستەى زەرددا بەکار ئەهێنن، بەداخەوە تا ڕادەیەک فەزاى گشتى هەرێم لەلایەن ئەم حیزبەوە داگیرکراوە و مێگەل و مێگەلى حیزبەکانى بۆلاى خۆى مۆڵداوە، لەوانە داگیرکردنەوەى کەرکوک، قرتەقرتى ڕیفراندۆم، جیقەجیقى دەوڵەتى کوردى، ئابورى سەربەخۆ، تەسلیمکردنى تۆمەتبارێک بەئێران، سواڵکردنى پلە و پۆست لە بەغدا بەناوى ئەوەى شەڕى ڕاستەقینەیە بۆ مافى کورد وەک ئەوەى شەڕەکانیتر سوعبەت و گاڵتە بووبێتن....

 هەردوو جوت حیزبى کوردى پەیوەندییەکى دێرین و پڕ لە ملەکەچى و ملشۆڕیان بە تورکیاوە هەیە، لەمێژە مەلا مستەفا ئامۆژگارى کوڕەکانی کردووە کە قەت پشت لەت ورک نەکەن کوڕەکانى ڕاسپاردەکەیان سەنگینتر جێبەجێکردووە و خۆیان خستۆتە سەرکۆشى تورکەوە. جەلال تاڵەبانى قەت ڕێگاى تورکیاى لێنەگیراوە چ لەسەردەمى شەڕى چەکدارى و دواى (ڕاپەڕین)، بڕوانن: بەماوەیەکى کەم پێش ٣١ى ئابى ساڵى ١٩٩٦ کە سەرچڵ قەزاز خۆى و نەوشیروان مستەفا بەهێلکۆپتەرێکى میتى تورک بۆ هەولێر هێنانەوە. هەرچەند پاش گەڕانەوەى چەکدارانى یەکێتى بەهاوکارى ئێران و کشانى هێزەکانى بەرەو هەولێر فڕۆکەکانى تورکیا زەبری کاریگەریان لەهێزەکانى وەشاند و بەری پێشرەویان لێگرتن.

تورکیا بەدرێژى ٤٠ کیلۆمەتر کوردستانى داگیر کردووە بەهاوکارى لۆجستى و هەواڵگرى و پێشوازیکردنى لەلایەن پارتى و حکومەتەکەیەوە. تورک دەستى بەسەر ئابورى هەرێمدا گرتووە لە نەوت و بازرگانى و بازاڕ.... ئێستا هەرێمى کوردستان بووە بە مستەعمەرەیەکى تورکیا، دەزگاى هەواڵگرى میت هەموو کون و قوژبنێکى تەنیوە، نزیکەى ٧٠ بنکەى سەربازیان هەیە خێڵى بارزانى لەپێناو مانەوەى شڕە حکومەتە تاڵانچیەکەیان گوێلەمستى هەموو فەرمان و داخوازییەکى تورکیایە، لەهەر بوارێکدا بخوازێت فەراهەمى ئەکەن، ئەگەر پێویستیان بەخودى مەسعود بوو وەک داهۆڵێک ئەیخەنە پێشى پاسێکەوە ڕیکلامى پێئەکەن، ئەگەر پڕمەیەکى مەسعود بەدڵى ئەردۆغان نەبوو ئەوا سوکایەتى و جنێو نامێنێت پێی نەدەن لەبەرامبەریدا چ مەسعود و خێڵ و حیزبەکەى ئەوەندە سوک و ڕیسوا و بێکەرامەتن، تەنها وتەنها بە وشەیەکیش ئەگەر لەژێر لێوەوە بێت وەڵام نادەنەوە، بەڵام پیرەکەمتیار (مەسعود) بەرامبەر بە خەڵکى کوردستان پەنجەى هەڕەشە ڕائەوەشێنێت و ئەڵێت حسابتان بۆ ناکەم و هەڵپەڕن، بەڵام پاش هەر بێحورمەتکردنێکى ئەگەر تورکیا داوایەکی ترى لێبکات یەکسەر بۆى دێتە سەر پاشوو.

 ئەگەر دوو ساڵە فاشیزمى تورک درەخت ئەبڕێتەوە و سروشتى کوردستان ئیعدام ئەکات بۆ خێرخوازێک نەبوو ئەوە بوروژێنێت؟
ڕۆژنامەنوسێک نەبوو دوو هەواڵ دزە پێبکات؟ لەناوچەکەدا هاوڵاتیەک نەبوو باوەش بە دوو درەختدا بکات وەکو خەڵکى عەفرین کاتێک تورک دار زەیتونەکانیان ئەبڕینەوە... ئاخر ئەمە چ وڵاتێکە چ جۆرە زیندەوەرێکى تێدا ئەژى؟ 

 درەخت بڕین یەکێکە لە ئەنجامەکانى داگیرکارى فاشیزمى ئەردۆغانى، فاشیزم هەر شوێنێکى داگیر کردبێت سیاسەتى زەوى سوتێنراوى (الارض المحروقة) بەجێ دەهێلێت، واتە زەویەکى وێرانکراو و داماڵراو لە ئینسان و ڕووەک و هەموو زیندەوەرێک، ئەبێت چەند کانیاویان کوێر کردبێتەوە، چەند مین و کەرەسەى ئینسانکوژ و مەوادى کییاوى و بایۆلۆژى و زینبەخشییان وەشاندبێت، کە چەندەها پشت و نەوە کەلوکۆم بکات. 

 یەکێک لەداهێنانەکانى کورد جاشایەتیە چ بەناوەرۆک چ بەدەستەواژە، هەر لەبوارى جاشایەتیدا کورد پسپۆریی وەرگرتووە و داهێنانەکەى واوەتر چووە، ئەوەتا بێجگە لەتاک جاش و خیڵ جاش، حکومەتى جاشیشى هاتەسەر بینیمان حکومەتى هەرێم چۆن بووە بە جاشى تورکیا، ئەوە لەک وێی دنیادا هەبووە حکومەتێک ببێت بەجاشى حکومەتێکى بێگانە.

 حکومەتێک پاکانە بۆ داگیرکردنى وڵاتەکەى بکات، حکومەتێک دار و درەختى وڵاتەکەى ببڕنەوە، ئەوەندە چاوقایم بێت بڵێت بە ئاگادارى ئێمە بووە، حکومەتێک خاکەکەى ئەفرۆشێت، سامانى سەر زەوى و ژێر زەوى هەڕاجکردووە... پەرلەمانەکەى دەمى پێچراوە وەک سەلکى پوتى سەرۆکەکەى... وەزیر و گزیر و بەرەو خوار لە کلکەلەقێ بۆ مەسرور ڕۆژ ژماردن زیاتر هیچ بەرهەمێکیان نییە . حکومەتێک وەزیرى تێدایە بەئاشکرا میتى تورکە و پەنجەى ئاماژەى تورکى رەگەز پەرست بەرز ئەکاتەوە شانازى بە هاوبەشیکردنى تورک بکات بۆ هێرشى سەر کەمپى ئاوارەکانى کوردستان لە شارۆچکەى مەخمور، ئەوە چ حوکمەتێکە، هەقوایە کورد ووشەى حوکمەت و حوکمدارى لەفەرهەنگیدا بسرێتەوە.

 یەکێتى شاگردى حکومەت و شەریکى و نەوت و خاڵى سنورى و قاچاخچیتى و سەدەها و هەزاران بەرژەوەندى جۆراو جۆرى ئاشکراو نهێنى لێکئالاو وەک تەونى جاڵجالۆکە، هەریەکەى تەواوکەرى یەکترین و هەردوکیان مل کەچ و گەردن کەچى تورکیان و بەرژەوەندییە بنەماڵەییەکانیان لەپێش کورد و خاکەکەیەوەیەتى، ئەوەى هەیە خێڵى جامانەسور چاوقایمانە بەئاشکرا بونەتە بەشێک لە بەکرێگیراوانى تورک وەکو جەبهەى نەصرە و حیزبى رۆژ و.... یەکێتى بەشێوازێکیتر و لەبەر پێگەى جوگرافیاکەى ناتوانێت شوڵى لێهەڵبکێشێت، لێرەو لەوێ خورتەو بۆڵەیەک ئەکات ڕێک وەکو خورتەو بۆڵەى نەوشیروان مستەفاى کاتى یەکێتى بونەکەى و هیچ کردەیەکى بەدواوە نیە، بەڵام باڵێکى شکاویترى ئەم حیزبە چ لەحیزب و حکومەت بەهەناسەى زەردى پارتى ئەژین لەئاخر وتەى مەلا حیکمەتە کوێر داواى حیکمەت لەمەسعودى کەللە پوت ئەکات. 

 ئیسلامى سیاسى و سەلەفى و ئیخوانى هەموو ڕەنگ و تیپە جۆراو جۆرەکانیان، لە شەڕى ئیسرائل و حەماسدا لەغەزە هەموویان خەریکى پارانەوە و دوعاکردن بون بۆقودس و فەلەستین و دروشمى (قودس کێشەى منە – القدس قضیتى) بەرزکردبۆوە، بەڵام هەر ڕۆژەى پارچەیەکى وڵاتەکەیان داگیر ئەکرێت، پارچەیەکى ئەفرۆشرێت، دارستانەکانى وێران ئەکرێت و دارەکانى بۆ تورکیا ئەبەن، رەز و کانیاو و باخ و بێستان و پاوان و دێهات و مەڕوماڵاتیان و ژیان و گوزەرانیان خاپور ئەکرێت بێدەنگن. ئاخر ئەوە چ ئاینێکە لەئاست داگیرکەردا ئاوەها چاوشۆرت ئەکات، ئەوە چ ئاینێکە دڕندایەتى ئەردۆغان بەرامبەر هاوڕەگەز و خوشک وبرات نابینیت، ئەوە ئاینەیە ڕوخاندنى مزگەوتەکانى عەفرین نابینێت، ئەوە ئاینەیە قودس کێشەیەتى بەڵام فرۆشتنى ئەوخاکەى کەمرد ئەیشارێتەوە کێشەى نیە، کێشەى ئەو قودس و دوگەنجە لەشەقامێکدا سەما بکەن، کێشەى ئەمانە جوانکردنى فاشیزمى ئیسلامیە، کێشەى ئەمانە کێشەى باڵاپۆشى و فریودان و سڕکردنى بیرو هۆشە بۆ ئەوەى جوت بنەماڵە بێخەمبن لەدزى و تاڵانى، هەتا ئەردۆغان دێت و شەرەف و کەرامەت و ڕێشیان ئەخاتە ژێر پۆستاڵى جەندرمەکانەوە کە بە خوێن و گۆشتى ئینسان پەروەردەکراون! ئەوە ئەو ئاینەیە.. ئەردۆغان سومبولیەتى.

 بۆبیرهێنانەوە.. ئەوەى حوکمى ڕاستەقینەى دەڤەرى بەرزان ئەکات، کوچەک مەلا مستەفای کوڕى مەسعودە، ئەم جانەوەرە.. یاسایە حکومەتە وەزیرە پارێزگارە پۆلیسە ئەفسەرە واتە دەسەڵاتى ڕەهایە و لەسەرو یاساوەیە کەس بۆى نیە بێفرمانى ئەو بکات ئەوەى ژینگەى دەڤەرەکە بشێوێنێت و دار ببڕێت قورسترین سزا ئەدرێت ئەوەى ڕاوى ئاژەڵى کێوى بکات سزاى کوشتنە هەتا ئێستا چەند کەس کوژراون. بەراوردێک بکەن لەنێوان ئەو دەڤەرەى جامانە سورى لێیە لەگەڵ شوێنەکانیترى بادینان کەفاشیزمى تورک بەهاوکارى ئەو خێلە سەرسورە خەیکن ژینگەو دارستان و پاوەن و زیندەوەرى لەڕەگ و ڕیشەوە دەرئەهێنن. 

 یەکێک لەباشیەکانى تورک لەوانەیە ئەوە بێت هەمیشە بەچاوى سوک سەیرى خائن و خۆفرۆشانى کوردی کردووە و دواى ئەوەى کەڕاژەى خیانتیان تەواوکردوە و کارى پێیان نەماوە لە ناویبردون، دیاب ئاغاى دەرسیم ئەتاتورک لە کوژرانێکى مسۆگەر ڕزگار ئەکات دواتر ئەتاتورک جینۆسایدى شارى دەرسیم ئەکات و ناوى شارەکە بۆناوێکى تورکى ئەگۆڕێت، هەمومان چیرۆکى خیانەتى حەسەن خەیریمان بیستوە و پاش ئەو هەموو خیانەتەى لە کورد دواتر ئەتاتورک ئیعدامیکرد پێش ئیعدامکردنى وەسێتى ئەوە بوو لە ڕێگەیکدا بینێژن هەمو کەسێک بەسەریدا بڕوات تف و نەفرەتى بکات، لەوبروایەدام مەسعود جورئەتى ئەوەى تێدا نیە وەسیەتێکى وەها بکات. ئێستا ئاگرەکە لەماڵى سەرۆک خێڵى ئیدارەى شیمالى عێراق نزیکبۆتەوە و تورکیا بۆردومانى دێی ( میزویایى ) کردووە کەدراوسێ دێى ( دۆرێ )یە زێدى مەسعودە و گەنجینەى هەمو سامان و نهێنیەکان و خیانەتەکانێتى.

 ماوەتەوە بپرسین ئەبێت مەنهۆڵى زێراب چ پەیوەندییەکى بەم باسەوە هەبێت؟ دزیکردن و تاڵانى کەلتورى تورکە لەسەردەمى دەوڵەتى عوسمانیەوە هەتا ئێستا، لەقەل و قاز و درەخت و شوێنەوار و... هتد، بژارنى دەیەها کتێبى ئەوێت. ئاستى دزى تورکیا کەوتۆتە سەرەمەنهۆڵ دزین، لەعێراق سەرە مەنهۆل ئەدزێت و سەرقاپى مەنهۆڵى زێرابەکانى شارەکانى خۆى پێدائەپۆشێت، ئەمە ڤیدیۆى سەرە مەنهۆڵێکى دزراوى ناوچەى مەحمودیەى شارى بەغدادە و بەعەرەبى لەسەر مەنهۆڵەکە نوسراوە ( محافظة بغداد مجارى مەحمودیة صرف صحي ).

ئیتر چۆن دار و درەختى کوردستان نادزێت؟