جلخوارە خۆماڵییەکانی ئەمڕۆی باشوور

بیرمەندی گەورەمان، پیرەمێرد دەڵێت:

(مستۆ) وادیارە، تۆش جلخوار ئەکەی

داوێنت دەخورێ و مەیلی بار ئەکەی

ھەموو کوردێکی، کە بەھۆی: 

بیر و باوەڕی ئاینی، سیاسی، بازرگانیی و کلتوورییەوە، پەسەن و ستایشی، ڕەفتارە ڕەگەزپەرستییەکانی ( ئۆردوگان) دەکات و ھاوکاری وییە، لە تیرۆرکردنی ئازادیخوازانی کورد، بەسووتماک کردنی خاکی کوردستان و بڵاوکردنەوەی فەرھەنگی ڕەگەزپەرستی مەغۆل و پشتیوانیی ئابووری لەشکری داگیرکەری تورک دەکات بە مامەڵەکردن بە کاڵای تورکانی مەغۆلەوە، ئەو پێناسەیەی ( پیرەمێرد) دەیگرێتەوە، ئەو بەشەی تریش لە نەتەوەکە دەبێت بزانن:

١- ئەگەر مەلا بوو، نوێژکردن لە پشت سەرییەوە حەرامە و ناپەسەندە لای خوا، چوونکە ئیمامێکە پشتیوانی لە زاڵم دەکات دژ بە نەتەوەیەکی ستەم لێکراو.

٢- پێوانەی خوا بۆ مرۆڤی بڕوادار، کردەوەی چاکە، نەک ژمارەی نوێژ و کەڕەتی چوونی بۆ حەج و درێژیی ڕیش و داپۆشینی جەستەی.

٣- ئەگەر خاوەن کارخانەی حیزب و تاقم بوو، ئەوا دەبێت: ھاتۆچۆ و سڵاوکردن و ژن و ژنخوازیی و یارمەتی و پشتیوانی کردنی،  بایکۆت بکرێت. 

٤-خۆ بواردن بکرێت، لە نزیک بوونە و دەنگدان پێی و دەبێت ئەو بەشە لە نەتەوەکە، ڕووی لێ وەربگێڕن و پشتی تێبکەن و ھەر ڕێگایەک، ئەو پیشانی دان، ئەوان پێچەوانەکەی ھەڵبژێرن.

پیرەمێرد، کە بیرمەند و منەورێکی سەردەمێکی فرە ناسک و یەکلاکەرەوەی مێژووی کوردە، ئەم خەسڵەتە، واتە جلخواریی، تەنھا لەوەدا نەبینییەوە کە کوردانێک هەبن و دژ بە مەسەلەی ڕەوای نەتەوەکەیان، چەکیان بۆ تورک ھەڵگرتبێت!!.

بەڵکو وەک ڕۆشبیرێک بەرەنگاری: چاولێکەریی، لاسایی و ڕەواجدان بە فەرھەنگی تورک، بویەوە، چوونکە ئەو دەیزانی، کە دوژمنانی کورد، لە دوو زەمینەدا، کاری جدی دەکەن:

١- ئاینی

٢- کلتووری

ئێمە بینیمان، لە دوای ڕاپەڕینەوە چۆن، ڕژێمی فاشی تورک، بە ھۆی جلخوارە خۆماڵییەکانی نوێی سەردەمی ئیستاوە، سەرەتا چەندین، کەناڵی تەلەڤزێۆنی، میدیای و قوتابخانەیان لە باشووری نیشتماندا،  دامەزراند و منداڵانی کوردیان بە زمان و خەسڵەتی تورکی پەروەردە کرد، بە پێی پلانەکانی دەزگای سیخوڕیی میت.

ئەو ھاوبەشی و پشتیوانییە  ڕاستەوخۆیەی ئێستای جلخواری خۆماڵی بۆ لەشکری سەربازیی و ھەواڵگریی مەغۆل، زۆر لەھاوبەشی کردنی کوردە جلخوارەکانی ناو (سپای حەمیدیە) ی سەردەمی عوسمانییەکان: 

- مەترسیدارتر و 

- فراوانتر و 

- ئاشکراترە، 

چوونکە ئەوەی پێشەنگی ئەم ڕەوتە (تورکاندن)ەی باشوور دەکات،  لە بازاڕی سەودای باشووردا، مامەڵە بە زمان، کوردبوون، پیرۆزییە نەتەوییەکان، ئاینی و پەسندکراوە کۆمەڵایەتییەکانی، نەتەوەکەوە دەکات، کە کاریگەرییە مەترسیدارەکانی، نەک لەسەر نەوەیەکی دوای ڕاپەڕینە، بەڵکە وردکردنی کەسایەتی کوردە و پەروەدەکردن و پێگەیاندنی نەوەیەکی لاواز و پەڕپوت و کەرامەت تێکشکاوە، کە مل بە ھەموو سوکایەتیەک دەدات و ئەمەش ڕۆژانە لەناو کۆمەڵگای ئەمڕۆی باشووردا دەبینین، کە لەمزگەوت و بازاڕ و زانکۆکانەوە، خۆ دەربڕینی مامۆستای زانکۆ و مەلای مزگەوت چەندە نامۆ و قێزەون و دژ بە ڕەوتی ئازادیخوازیی دێرینەی نەتەوەکەیە، چ لە ھەڵویستی ڕۆژانە و چ لە چاوساغی و پشتیوانی ڕاستەوخۆی لەشکری داگیرکەردا، بۆ سەر قەڵا و شورای بەرگری لە بوونی نەتەوەکەمان لە کوێستانەکانی قەندیل و پێدەشت و ناو گوند و شارەکان و ئاسمانی باشووری نیشتماندا.

هەموو ئەم خیانەت و جلخوارییەش، بە ناوی پاراستنی قەوارەی هەرێم و کوردایەتی و کوردەوە ئەنجام دەدەن.

بەرەنگاربوونەوەی، کلتووری جلخواریی و درێژەدان بەو شۆڕشە ڕۆشنبیرییەی بیرمەندی گەورەمان ( پیرەمێرد)، ئەرکێکی نەتەوەیی و تاودانەوەی گیانی کوردبوون و پشتیوانییە لە سپای ئازادیخوازی نەتەوەکەمان.

سەرنج/ ئەم گرتە ڤیدیێۆیەی خوارەوە، ئەو پێشبینیانەی پیرەمیرد دەسەلمێنێ و بە ڕوونیی پەروەردە و کاریگەریی مەغۆل، لەسەر بیروڕای گەنجەکان پیشان دەدات، بەهۆی کەناڵە جلخوارەکانی سەر بە دەزگای میتەوە، ئەمانە ئەو گەنجە بەتاڵکراوانەن، کە دەتوانرێ بۆ زۆر کاری دژ بە بزووتنەوەی ئازادیخوازی نەتەوەکە بەکار بهێنرێن.