شەڕی خاك خۆمان دەیكەین!

Thursday, 06.23.2022, 12:01

688 بینراوە


لەبەر تالوکەیی بارودۆخەکە و هەوڵدان بۆ چەواشەکردنی ئەو بەشە لەنەتەوەی کورد لە باشووردا، لەلایەن سەرکردەیەتی (خێڵ – حیزب)ە وە، درێژەی وتاری تیرۆری حیزب، دوا دەخەم و لەم بارەیەوە ئەم هاوارە بڵاودەکەمەوە.
سەرەتا دیسان و بۆ دەیان جار بە ئامۆژگاریی و ڕێنوێنییە گەوھەرینەكەی بیرمەندی گەورەمان مامۆستا مەسعوود محەمەد دەست پێدەكەم كە دەڵێت:
" ئەگەر كەوتمە سەر دووڕیانێك و نەمزانی كام ڕێگایە ھەڵبژێرم، ئەوا پرسێك بەم حیزبە شیت و وێتانەی كوردستان دەكەم، ئەوان كام ڕێگایەیان پیشاندام، من ملی ڕێگاكەی تریان دەگرم و دڵنیام كە ڕێگا ڕاستەكەم ھەڵبژاردووە".
كاركردن بەم ڕێنماییەی مامۆستامان ئەركێكی نەتەوەیی و پێویستییەكە بۆ پاراستنی ئاسایشی تاكی كورد و نەتەوەكەمان.
خاكی كوردستان، نیشتمانی نەتەوەی كوردە، بزووتنەوەی ئازادیخوازیی كوردایەتیش، ویژدانی زیندووی نەتەوەكەیە.
نەتەوەكەش خۆی بڕیار لە چارەنووسی خۆی دەدات، نە ڕێگە دەدات سەرۆك خێڵ و خێڵ- حیزب خۆ بكەنە نوێنەری و چیدیش ڕێگە بەھیچ سەركردەیەتییەك نادات لە جیاتی نەتەوەكە بڕیار بدات.
نەتەوەكە وشیار و ئاگاداری یارییەكانی دەزگا سیخوڕییەكانی دەوڵەتانی كۆڵنیالیستی كوردستانە، كە چۆن لە ڕێگەی سەركردەیەتی خێڵ- حیزب و سەركردەیەتی  جلخوارەوە دەیانەوێت ئەو بەشە لە نەتەوەكە لە باشووری نیشتماندا ڕووبەڕوی كارەساتی خوێناوی نوێ بكەنەوە.
دەیانەوێت شەڕی پاراستنی بەرژەوەندی دەوڵەتانی كۆلۆنیالیستی كوردستان بە تۆ بكەن، وەك ڕەفتاری ھەمیشەیشیان، سەركردەیەتی خێڵ- حیزب و سەركردەیەتی جلخواریی باشوور، ڕێنوێن و پشتیوان و جێبەجێكاری ئەم مەرامە گڵاوەی داگیركەران و دوژمنی دێرینەی نەتەوەكەن.
جارێكی تر دەزگای میت و ئیتلاعات دەیانەوێ ئەو بەشە لە نەتەوەكەمان لەڕێگای حیزبە وابەستەكانی خۆیانەوە، بۆ قایمكردنی بنكە و بارەگا ھەواڵگریی و لەشكرییەكانییان، لە شەڕی لابەلاوە  تێوە بگلێنن و ئەم خێڵ- حیزبانەش كە بەھەزاران داو خۆیان بە چارەنووسی ئەو ڕژێمە كۆڵۆنیالیستیانەوە گرێداوە، دەیانەوێ سۆزی نەتەوەكە بجوڵێنن و تاكو ئێستا باسی كورد و پێشمەرگە و نیشتمان دەكەن، وەك ئەوەی ئەو بەشە لە نەتەوەكەمان، گێژ و كوێر و نابینا بێت!!.
خێڵ-حیزب و حیزبی بنەماڵە و سەركردەیەتی داڕزاوی باشوور، كە لە سەدان تاوانی نەتەوەییەوە تێوەگلاوون  و دەستییان بە خوێنی كوردی سوور بووە، ناتوانن چیدی بەناوی ئەو بەشە لە نەتەوەی كورد لە باشووردا، بڕیار بدەن، (شەڕی خاكی خۆمان، خۆمان دەیكەین)، بەم تەفرەدان و فێڵ و چاوبەستەگیانە، چیدی ئەو بەشە لە نەتەوەكەمان شەڕی لابەلا و خواستی دەروونی سەركردەیەتی خێڵ- حیزب جێبەجێ ناكات،.
مەسەلەی ئێمە لە مەسەلەی سەركردەیەتی حیزبی بنەماڵە نەك ھەر جیاوازە، بەڵكە ھیچ پەیوەندییەكیان پێكەوە نەماوە، مەسەلەی نەتەوەیەكی ستەمدیدە و دەسەڵاتێكی ستەمكارە.
چ  ژیرییەك قەبوڵ دەكات، ستەمكار نوێنەر و بڕیاردەری ستەمدیدە بێت، جگە لە عەقڵی نەخۆشی سەركردەیەتی خێڵ- حیزب؟!.

چەند ڕێنمایی گرنگ:

- لە خۆتان نزیك بكەونەوە و لە حیزبەكان دوور بكەونەوە.
- پرس و ڕا بە كەسانی شەرافەتمەند و ژیر و دڵسۆز بكەن.
- دەستەكانی ھێزی پشتگیری مەدەنی و لەشكری دروست بكەن. بۆ پاراستنی ئەو بەشە لە نەتەوەكە لە كاتی پێویستدا.
- زانیاری لەسەر كەسانی ھەواڵگر و سیخوڕ و دەڵاڵەكانی  دەوڵەتانی كۆڵنیالیست و حیزبەكان كۆبكەنەوە، بە بەڵگەی دروست.
- ھەوڵ بدەن ئەو تاكانەی سەر بەھێزی حیزبەكانن ڕێنمایی بكەن بۆ دانانی چەك و وازھێنان لە حیزب و گەڕانەوە بۆ بەرەی نەتەوەكە.
- چاودێری ھەڵسوكەوت و ڕەفتاری بەرپرس و كەسووكاریان بن و بەڵگەكان تۆمار بكەن، بە ھەموو ئامڕازەكانی تۆماركردن.
- گیانی تۆڵە و توڕەیی، ژیرێتی مرۆڤ پەك دەخات و بڕیاری نادروستی پێ دەدات، ئەوانەی ستەمیان لە نەتەوەكە كرد و خیانەتیان لە نیشتمان كرد، دەبێت لە دادگایەكی دادپەروەرانەی گەلدا، بەبەڵگەوە دادگایی بكرین، چوونكە بەلە ناو چوونییان، زۆر بەڵگەی مێژووی ون دەبن و تاقمەكان و كەسوكاریان لە ئازاری ڕسوابوون و  ھەڵوەشاندنەوەی ئیمپراتۆریەتەكەیان ڕزگاریان دەبێت، ھەموو بڕیارێك دەبێت ھی گەل بێت و گەلیش دەیەوێ ستەمكاران دادگایی بكات.
- سپای ڕزگاریی كوردستان لە ھەموو شار، شارۆچكە و گوندەكان ھەن، ھەوڵ بدەن پەیوەندی بەھێز لەسەر بنەمای دڵسۆزیی بۆ مەسەلە كوردستانییەكە لەگەڵ ئەواندا ھاوئاھەنگ بن، ئەزموونی قوڵی ئەوان و خۆبەخشینیان بۆ ئازادی نیشتمان، پشتیوانێكی ( بێ بەدیلە) بۆ ئێوە.
- پاراستنی موڵك و ماڵ و گیانی ھەر كوردێكی شەرافەتمەند، ئەركێكی نەتەوەییە لە ئەستۆی ئێوەدا.
- خۆ ڕێكخستن و خۆ پەروەردەكردن لەسەر بنەمای ( سوودی گشتی)، ھەنگاوێكی بنچینەیی دامەزراندنی كۆمەڵگایەكی یەكسان و گێڕانەوەی شكۆی مرۆڤبوونێكی ئازاد و تاكێكی كوردی بڕیاردەرە.
- دەبێت لە چاوی ھەمووانەوە بۆ بەرژەوەندی خۆمان بڕوانین، تاكێك بین لەناو گشتدا، گەورەبین و لە ناو نەتەوەكەدا كەسایەتی خۆمان گەورەتر بكەین، بە كارە چاك و خۆبەخشانە و ڕیكخراوەكانمان.
- فێری فریاگوزارییە سەرەتاییەكان ببین و توانای بەڕێوەبردنی خۆمان و گروپی ٥ تا ١٠ كەس فێر بین و خۆمان نموونەی بەرزی دەم، دەست و داوێن پاكی بین، ئێمە دژی ھەموو فەسادەكان دەجەنگین.
- ھەم بەرانبەر بە دوژمنانی دێرینەمان و ھەم خیانەتمەندانی ناوخۆ، وشیار و ئاگادار بین، بازنەی چالاكییەكانیان تەنگ بكەینەوە و مانەوە و پاراستنی ھەموو كوردێكی شەرافەتمەند، لە كارە بنچینەیی و ڕۆژانەكانمان بێت.
- كات و سوود وەرگرتن لە كات بۆ پێشخستنی ئەو ئەركە نەتەوەییانەی كوردبوونمان لە ئەستۆی خستووین، زۆر گرنگە و وشیایی تەواومان نەبێت، زیانی گەورەمان لێ دەدەن و ڕەنجمان بێ وەر دەكەن.
- بۆیە نابێت، بە قسە و باسی بۆشی سەركردەیەتی خێڵ- حیزبەوە خەریك بین و فكرمان مەشغوڵ و تواناكانمان لاواز بكەن، ئەوان ھەمیشە لە جەنگی دەروون و فكریی ئێوەدان.
- مەسەلەی ئێمە لە جامانە و سەرچۆپی و مێژووی قێزەوون و كەس و فڕوفیشاڵی حەفتاساڵ و بەڵێن و سۆز و كوردایەتی ساختەی، سەركردەیەتی جەلالی و مەلای زۆر گەورەتر و بەنرخترە، نابێت ڕێگە بە فكری خۆمان بدەین، مەشغوڵی ئەم ئەفسانە پووچانە ببێت. 
ئەو بەشە لە نەتەوەكەمان، ئەوە بۆ سی و یەك ساڵ دەچێت، گیرۆدەی تەلیسم و ئەفسانەی بێ بنەمای سەركردەیەتی خێڵ- حیز ب، بووە و ئاسایشی نەتەوە و تاكەكانی لەژێر چاودێری دەزگا ھەواڵگرییەكانی دەوڵەتانی كۆلۆنیالیستی داگیركەری كوردستاندایە، بە ڕێنمایی و پشتیوانی و مۆڵەتی سەركردەیەتی داڕزاوی خێڵ- حیزبی باشووری و ھاوكاریی ژمارەیەك سەركردەیەتی پووچی ڕۆژھەڵات، بڕیارەكان لە پایتەختی دەوڵتە كۆلۆنیالیستەكان دەدرێت و سەركردەیەتی خێڵ- حیزب لە باشوور جێبەجی دەكات.
دەبێت ئەم بارە ڕاست بكرێتەوە و بڕیاریی چارەنووس و خۆبەڕێوەبردن بۆ ئەو دوو بەشە لە نەتەوەكەمان لە باشوور و ڕۆژھەڵات بگەڕێتەوە، گەلێكی ڕێكخراو كە لە خۆیدا كۆبووبێتەوە، دەتوانێ ئەم كارە بكات.