یەکێتی لە سۆسیال گۆچانی تالەبانییەوە بۆ سۆسیال پۆستاڵی پاڤێل


بۆ بەڕێز یونس ڕاوى

Tuesday, 07.12.2022, 20:27

1887 بینراوە


خوێنەرى ئازیز..

نە یونس ڕاوى بەڕێز ئەناسم نەبینیومە تەنها لە ڕێگەى کتێب و نووسراوەکانى نێو سۆشیال میدیاو ڤیدیۆ و چاوپێکەوتنەکانیەوە پێی ئاشنام پێم وایە توێژەرێکى ئایینى بەئاگایە لێکدانەوەکانى واقعیە بە هەناسەیەکى ئینسانى موتوربەکراوە.

 بایەخى نوسینەکانى بۆ گرنگە :

  لەبەر ئەوەى پێغەمبەرى ئیسلام هیچ ڕاڤەیەکى بۆ ئایەت و دەقەکانى قورئان نەکردووە کەواتە ئەو بوارە ڕەخساوە بۆ ئیجتهاد و تەفسیرى ئایەتەکانى قورئان، ئیمامى عەلى بەقورئان ئەڵێت چەند ڕوى هەڵگرتووە یان چەند ڕووە (حمال اوجە) و هەر لەمەشەوە جۆرەها ڕێبازگەى (مذهب)ى ئاینى دەرکەوتون وەکو حەنبەلى مالکى شافعى حەنەفی... و زۆریتر کە هەریەکەیان بەپێی کات و سەردەم و و ژینگەى کۆمەڵایەتى و سیاسی سەردەمەکەیان تەفسیریان کردووە.. 
ئەوەى ئەم بەڕێزە سەرقاڵێتى ئیجتهادە و ڕەئیە و مافى خۆیەتى و هیچ ڕێگرییەکى ئاینى لەو بارەویەوە نیە، تویژنەوەکانى و لێکدانەوە و ڕاڤەى دەقە کانى قورئان زۆر لۆجیکانە و عەقڵانیە کە شارەزاى بوارەکەشە.
  ئەوەى گرنگە هەتا ئێستا مەلاکانى کوردستان و حیزبەکانى ئیسلامى سیاسى و ئەو مێگەلەى دوایان کەوتون هیچ وەڵامێکى دروست و عەقڵانیان بەرامبەرى نیە،  بەڵکو سوپایەک لەخەڵکى بێئاگا و جنێوفرۆش و کەسانی بازاڕیى و دەمهەراش و دەمزێرابیان هەڵخراندووە و فڕێانداونەتە ناو بازاڕى سۆشیال میدیاوە. کەوتونەتە جنێودان و سوکایەتى و بێرێزیکردن بەقێزەونترین شێوە، ئەوەى ئەیبینین بەڕێز ڕاوى پشوو درێژدیارە و بەئاگایە، کە هیچ بەهایەکى بۆ ئەو جۆرە لە بازرگانانى ئاین و ئەو دینبازانە و مێگەلەکانیان دانەناوە لە بۆچونە بوێرەکانى ساردی نەکردۆتەوە. 
  بە ژمارەى ئەو کۆمینتانەى کە لە سۆشیال میدیادا لەسەر نووسینەکانى ئەم بەڕێزە بڵاوئەکرێتەوە ئەزانین، کە ئەم کۆمەڵگایە لە گۆمى جەهل و نەزانى و خەرافیاتدا ڕوو لە نقوم بونە. دەرخەرى ئەو واقیعە تاڵەیە، کە داعش و بیرى داعش چ ئامادەییەکى هەیە.
 هەرێمى کوردستان بووە بە مەیدانى تەراتێنى ئیخوان و وەهابى و تەکفیرى و سەلەفى و جیهادى و...هتد و هەریەکەیان مزگەوت و کەناڵ و مەدرەسەى تایبەتى خۆیان هەیە، شەو و ڕۆژ ژەهر بەناو کۆمەڵدا ئەڕێژن،  وەکو مارێکى کوشندە گاز لەهەرکەس بگرن هۆش لەدەست ئەدات و هەموو هەستێکى ئینسانى ون ئەکات، ئەبێت بە ڕۆبۆتێک مەرجەعەکەى حیزبێکى ئیسلامى بێت یان مەلایەکى تەکفیرى ئەیبزوێنێت، لە بچوکترین هەلێکدا ئەگەر بۆیان هەڵبکەوێت ئەفغانستانێکى دڕندەتر دروست ئەکەن. فەزایەکى فاشیزمى ئیسلامیان خوڵقاندووە ڕۆچونەتە کون و قوژبنى ژیانى تایبەتى و هەموو کایە کۆمەڵایەتیەکان. ئێستا شتێک بەناوى ئاین و پەیوەندیەکى ڕۆحى وجودى نەماوە، بەڵکو ئاینى ئیسلام بووە بە چەردەیەک (طقوس) کە کۆمەڵێکى پڕلەنیفاق و گەندەڵ و دەسبڕ و درۆزن بەدواى خۆیدا ئەهێنێت. 
 ئەبێت ئەو ڕاستیە لەبیر نەکەین، کە کاک یونس و زۆریتر بەئاگا بێت یان بێئاگایانە چاوپۆشى لەو واقیعە ئەکەن، کە دەسەڵاتى جوت بنەماڵە لەپشت ئەم جەهل و خورافاتەیە بۆ گەوجاندنى کۆمەڵگا و تێکدانى ئاسایشى کۆمەڵایەتى. لە پێناوى مانەوەیان لەدەسەڵاتى چەتەگەریى و تاڵانچێتى، چونکە ئەوانە کەسانى دەوڵەتدارینین و هیچ شتێکیان لەو بارەیەوە نییە. 

 دنیایەکى سەیر تێکەوتوین..

خوێندەوارێک دواى نەخوێندەوارێک کەوتووە و بووە بەڕاوێژکارى ئەوەش یەکێکە لە کوێرەوەرى و مەرگەساتەکانى ئەم میللەتە بەشمەینەتە، هەواڵەکان ئاماژە بەوە ئەدەن کە بەڕێز ڕاوى بووە بە ڕاوێژکار، ڕەنگە زۆربەمان وێنەى یونس ڕاویمان بینیبێ کە لەکۆبونەوەیەکى باڤێل تاڵەبانیەوە لەگەڵ شیعە وەلائیەکان واتە خاوەن میلیشیاکانى سەربەئێران و لەنێویاندا گەورە تیرۆریست قەیس خەزعەلى خاوەنى میلیشیاى عەسائب و لحەق (عصائب الحق) کە مێژویەکى ڕەشى هەیە لە تیرۆر و ئینسان کوژى، ژن کوژى، خۆپیشاندەر کوژى، چالاکوانى مەدەنى کوژ، تایفى و کوشتن لەسەر ناسنامەى ئاینى تەنانەت کوشتن لەسەرناوى ناسنامەى کەسێتى، تیرۆرى چەندەها دکتۆرى پسپۆر و زانا و کەسانى شارەزا و فڕۆکەوان و ئەفسەرانى ڕژێمى پێشوو سەرەڕاى دزى و تاڵانى و جەردەیی و قاچاخچێتى بە نەوت و مادەى هۆشبەر، میلیشیاکەى یەکێکە لەمیلیشیا تاڵانچى و دڕندەکانى عێراق، کە خەڵکى بێمۆراڵ و بەرەڵاى لێخڕبوەتەوە و سڵ لەهیچ وەحشیگەرییەک ناکەنەوە. 
 لە کۆتایى ساڵى 2014 دا ڕێکخراوى لێبوردنى نێو دەوڵەتى میلیشیاى عەسائبولحەقى بە فڕاندن و کوشتنى دەیەها خەڵکى مەدەنى سونە مەزهەب تۆمەتبارکرد. ناوەندى عێراقى بۆ بەدیکۆمینتکردنى (دیکۆمینتاندن) تاوانە جەنگیەکان ئیدانەى کوشتنى خەڵکى سیڤیلی کرد لەلایەن میلیشیاى عەسائب ولحەقى پشتیوانیکراو لەلایەن ئێرانەوە.
 لەسەرەتاى ساڵى 2020 ئەمریکا میلیشیاى عەسائبولحەق ى بەڕێکخراوێکى تیرۆریستى ناوزەدەکرد و قەیس خەزعەلى و براکەى لەیس خەزعەلى بەشێوەى تایبەت پۆلێنکراون خراونەتە ڕیزى تیرۆریستە جیهانیەکان.

بەڕێز یوسف..

میژوچەیەکى گەشى لەگەڵ بازرگانانى ئاین و ئاینبازاندا هەیە و نووسینەکانى شاهیدن، کە چۆن واقیع بینانە ئەوانەى هەراسان کردووە. بەڵام ئێستا بەرامبەر عەمامەبەسەرێکى شیعە بەناوى ئاین و شیعەگەراییەوە بێپەردە  چ  دڕندایەتیەک ئەکات، دانیشتوە.
 بەداخەوە خۆى توشى چ (شەرمەزاری) یەک کردووە، بەڕێزى بە پیشە پارێزەرە لە خەڵکى ئاسایی وەکو ئێمە باشتر لە ووشەگەلى داوەر و دادگا و ئەو بابەتانە شارەزاترە، پێم وانیە ویژدانى پیشەییەکەى ئەوە قبوڵ بکات وەک لەهەواڵەکاندا هاتوە دادوەرێک بەر لەقە بدرێت لەسەر ئەوەى بەئەرکى پیشەییى خۆى هەستاوە. (تارە فارس) کچۆڵەیەکى بەغدادیە و یوتوبەکانى ناو سۆسیال میدیا هەوادارانى دووملیۆنى تێپەڕاندووە لەلایەن میلیشیاکەى خەزعەلیەوە کوژرا و دوان لە بکوژەکان گیران، خەزعەلى لەناو دادگا دادوەر (ڕەوف عەبدوالواحید) بەر لەقەئەدات کەفەرمانى گرتنى بکوژانى دەرکردووە و و لێکۆلینەوەى لەگەڵداکردون. 
 ئەوەى ئەو بەڕێزە ڕاوێژى پێئەدات سیاسەت وسیاچەمانە لێکجیاناکاتەوە، تەنها کوڕى پیاوێکە حیزبێکى بەسەرکردایەتى و بنکردایەتى و بەپارەو پولەوە بەمیراتى بۆ ماوەتەوە، ڕاوێژى چى.. ئەو ناتوانێت پابەندى پەیڕەوى حیزبەکەى و دیسپیلینى حیزبە میراتیەکەى ببێت، قسەکانى نەپاش و پێشى هەیە نە سەرو بن، کەیف لەوە ئەبینێت کەلە نێو هەندێک هەرزەکار و گەنجى چەکبەشان دەرکەوێت بە نمایشى سەربازى و میلیشیاییەوە، ئەگەر بڵێم ئابڕوى حەوت پشتى سیاسەت و حیزبایەتى بردووە هێشتا کەمم وتوە.
 واباشترە کاک یوسف ڕاوى خۆى لەو (شەرمەزاری)یە بتەکێنێت و ئەوى بیربێتەوە کەیەکێکە لەو کەسە بوێرانەى بیرى چەوتى بازرگانانى دین و ئیسلامى سیاسى لەقاو ئەدات و کاریگەرى دیار و بەرچاوى هەبووە.

خوێنەرى ئازیز : 

 بڕواننە ئەم ڤیدیۆ سەمەرەیە، (سەرۆک)ى حیزبێک، حیزبەکەى کە ئەیوت خاوەنى (20,000) بیست هەزار شەهیدە واتە (20,000) بیست هەزار خێزانى هەناسە سارد و جەرگسوتاو و سەرگەردان و ڕەشپۆشکردووە بە دروشمى یەنەکەوە (ئاشتى، دیموکراسى، مافى مرۆڤ، چارەى خۆنوسین) گچکە گچکە سڵاوى سەربازى بۆ گەورە تیرۆریستێک ئەکات.
 یەکێتى بوون چ ئابڕوو چونێکە، ڕاوێژ پێدانیش چ بێئابڕوییەکە، دیارە سیاسەت نەئابڕوى هەیە نەحورمەت، سڵاوى سەربازى.. پێویستە بۆسواڵکردنى چەند پلەو پۆستێک.. بۆ زمانلوس و بێحورمەتان.