هەردی تۆفیق

https://www.facebook.com/profile.php?id=100001526054835


شاعیر و نووسەری دەربار

Saturday, 08.13.2022, 20:44

1045 بینراوە


وای لێهاتوە ئەڵێن فڵان شاعیری یەكێتی، فیسار نوسەری پارتی . 

ئەوە تۆیت مێژو بۆ خۆت دروست ئەكەیت ، حیزب ناتوانێت مێژوت بۆ دروست بكات . رەوشتی نوسەران ئەوەیە یاخی بن ، دەستەمۆ و  لارو مل و چاوشۆڕی سیاسەت نەبن ، بەئەقڵی خۆیان بیر بكەنەوە و خوڵقێنەر بن ، بەڵام بارودۆخەكە لە كوردستان خەریكە پێچەوانە ئەبێتەوە. 
كابرا شاعیر بووە خەریكی شەڕە پەڕۆ بووە،  لە گەندەڵی تێوەگلاوە و بەئەقڵی حیزبییەكی كۆمیتە و ناوچە بیری كردوەتەوە، كابرا نوسەرە بەحساب ، كەچی بە ئیعازی حیزب ئەنوسێت و لەسەرەوە بیری بۆ ئەكەنەوە، کە چی بنوسێت و چی نەنوسێت!
ئەو دەسەڵاتەی كە لە كوردستاندا بووە نەك هەر ڕۆژێك لە شیعری شێركۆ بێكەس نەترساوە، ئەو حیزبەی هەژار موكریانی تێیدا دەربار بووە، نەك هەر لە نوسینی هەژار نەترساوە ، بەڵكو ئەمانە بنیادنەر و هەڵخەڵەتێنەری خەڵك بوون، بەشێك بوون لەدروستكردنی ئەو بارو دۆخەی كەئێستا تۆ و باوكت و دایكت باجەكەی ئەدەن و بەشی ئەوەندەش قەرزارن مناڵەكەت باجی  دزی و تاڵانگەرایی ئەمانە بدات ! 
ڕەنج سەنگاوییەك كە لە تەلەفیزۆنی ڕوداوا خەریكی ئەوا خزمەتكاری نێچیرەڤان بەرزانی و مردولاوانەوەیە ، خەریكی نوسینی دەردەدڵە بۆهەرزەكاران ، چی كاریگەرییەكی هەیە لەسەر ئەو دەسەڵاتە و مەعریفەی خەڵك ؟! 
نوسەرانی مشەخۆرو دەستەمۆ، ئەوانەی كاتێك باسی مرۆڤی باڵای نیچە ئەكەن و ویژدانی خۆیان بەهەرزان ئەفرۆشن بە حیزب ، حیزب دەست ئەگرێت بەسەر بیركردنەوەیاندا و گەمژەیەكی نەخوێنەوار بۆیان دیاری ئەكات چۆن بیربكەنەوە، چی بنوسن و چی نەنوسن ، ئەمانە هەبن یان نەبن چی ئەگۆڕێت؟!
فەرهاد پیرباڵ كە جڕتی بۆ دەسەڵات لێئەدا ، كاتێك حیزب دایماڵی لەخۆی و خۆی خستە بندەستی پارتی بینێتان چی پێكراو چی لێدەرچوو؟! 
تۆ كە نوسەر بوویت ئەبێت مرۆڤێكی باڵابیت ، یاخی بیت ، دەستكاری ناڕێكییەكان بكەیت ، داهێنەر بیت ، بەڵام كاتێك كە ئەبیت بەكۆیلە و شایەری حیزب ، كاتێك ئەبیت بەمرۆڤێك سەوداو مامەڵە بەخۆتەوە ئەكەیت ، كاتێك كە بۆ ئەوە ئەخوێنیتەوە ئەو خوێنەڕژاوە ناشیرین بكەیت لەبەر دڵی خەڵك ئەڕوات ، ئەوا لە شایەر و كاسەلێس و بەرماوەخۆرێكی حیزب زیاتر نیت .
كەم نین ئەو شایەرانەی وەك كلكی مەسولەكان ، خەریكی ڕازانەوەی مێزی بەرپرسن بە شیعر، خەریكی شەڕەپەڕۆن بە وتار، خەریكی ماستاون بە فەلسەفە، خەریكی ڕازانەوە و ئارایشتكردنی گوكاریەكانی حیزبن بە كتێب ، خەریكی پارە وەر گرتن و ڤێلا و  كۆیلایەتین ، بەرلەوەی خاوەنی هزر بن، حیزب بیریان بۆئەكاتەوە چی بنوسن . 
مرۆڤ كە چوە نێو چوارچێوەیەكەوە بیركردنەوەی هی خۆی نەبوو، كۆێلەیە نەك یاخی ، دەربارە نەك نوسەر ، شایەرە نەك شاعیر ....
ستایش و ماستاوی هەرچی نوسەرە بەقەد جڕتێك جوان نییە، مناڵە هەژارێك بۆ ئەو دەسەڵاتەی لێئەدات.