هەرچیەک ئەکەم حەزم لێ ناکا

Tuesday, 30/08/2022, 18:36

3997 بینراوە


هەرچیەک ئەکەم حەزم لێ ناکا
هەرچیەک ئەکەم هەر شوم پێ ناکا
ببم بە حسکێ عەرزی بۆ بدڕم
ببم  بەهەڤاڵ  قردێلە ببڕم
ببم به مەسروور بەڕۆژی ڕوناک 
بەپارەی دزی ڤیلای بۆ بکڕم
هەرچیەک بکەم حەزم لێ ناکا

هەرچیەک بکەم هەر شووم پێ ناکا
نابم بە فواد  خەریکی خەو بم
ناچمه لالە زار شێرەکەی شەو بم
نابم به ڕێباز  ورگم  بقوپێنم
لەگەندەڵیشدا  هێشتا قەڵەو بم
 کەچی بێ ڕەحمە  حەزم لێ ناکا
هەرچیەک بکەم هەر شووم پێناکا

مەلای مێباز نیم چاوباشقاڵێ بم
کل لەچاو بدزم لەخوا نەترسم
 ابم بە قوباد  گڕلە یار بەربێ
لەپەنجەرەوە ئەحواڵ بپرسم 
کەچی کافرە حەزم لێ ناکا
هەرچیەک ئەکەم هەر شووم پێ ناکا

 کرێکارێکم لە ئێسک و لە چەق
کۆڵنادەم ئەژیم لەسەر بەردی ڕەق
نابم بەکۆیلە بۆ بنەماڵە
خۆپشاندەران بدەمە بەر شەق
 کەچی زاڵمە ، حەزم لێ ناکا
هەرچیەک ئەکەم هەر شوم پێ ناکا

هێندە زیرەک نیم زانای ئەتۆم بم 
هێندە شێتیش نیم سوار سەری خۆم بم
وەکو گردەکە درۆزنیش نیم
بەڵێنم داوە بەڕاستی مۆم بم
کەچی ناگۆڕێ  حەزم لێ ناکا
هەرچیەک ئەکەم هەر شووم پێ ناکا

نەماڵم ئەوێ نەگەنج و حۆری
ئەوم دی دەستم لە دنیا شۆری
وەک دوو حیزبەکە نەوتی بۆ بدزم
لەملا بەتەنکەر لەولا بەبۆری
هەر باوەڕ ناکا حەزم لێ ناکا
هەرچیەک بکەم هەر شووم پێ ناکا.

نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست






کۆمێنت بنووسە